National (Page 822)

ന്യൂഡൽഹി: പുതിയ ഐടി നിയമം ഇന്ന് മുതൽ നിലവിൽ വരുന്ന സാഹചര്യത്തിൽ പുതിയ ഐടി നിയമമനുസരിച്ചുള്ള നിയമനങ്ങൾ നടത്തിയോ എന്ന കാര്യത്തിൽ റിപ്പോർട്ട് നൽകാൻ സോഷ്യൽ മീഡിയാ പ്ലാറ്റ്ഫോമുകളോട് ആവശ്യപ്പെട്ട് കേന്ദ്ര സർക്കാർ. റിപ്പോർട്ട് എത്രയും പെട്ടെന്ന് സമർപ്പിക്കാനാണ് കേന്ദ്ര ഇലക്ട്രോണിക്സ്,ഐടി മന്ത്രാലയം നിര്‍ദ്ദേശിച്ചിരിക്കുന്നത്.കഴിയുമെങ്കിൽ ഇന്ന് തന്നെ റിപ്പോർട്ട് സമർപ്പിക്കണമെന്നാണ് കേന്ദ്രം അറിയിച്ചു. നിരവധി തവണ കൈമാറ്റം ചെയ്യപ്പെടുന്ന ഒരു സന്ദേശത്തിന്‍റെ ഉറവിടം എവിടെ നിന്നാണെന്ന് ഇനി മുതല്‍ സാമൂഹിക മാധ്യമങ്ങള്‍ സർക്കാരിനോട് വെളിപ്പെടുത്തണമെന്നാണ് പുതിയ ഐടി നിയമം പറയുന്നത്.

ഈ നിയമം ഉപയോക്താവിന്‍റെ സ്വകാര്യതയുടെ ലംഘനമാണെന്ന് ഫേസ്ബുക്കിന്‍റെ ഉടമസ്ഥതയിലുള്ള മെസേജിങ് ആപ്ലിക്കേഷനായ വാട്സാപ്പ് പറഞ്ഞിരുന്നു. എന്നാൽ പൗരൻമാരുടെ സ്വകാര്യതയ്ക്കുളള അവകാശം ഉറപ്പാക്കാൻ സർക്കാർ പ്രതിജ്ഞാബദ്ധമാണെന്നും അതേസമയം ഇത് ന്യായമായ നിയന്ത്രണങ്ങൾക്ക് വിധേയമാണെന്നുമാണ് കേന്ദ്ര ഐടി മന്ത്രി രവിശശങ്കർ പ്രസാദ് പ്രതികരിച്ചത്.നിയമപരമായ ഒരു ഉത്തരവ് ലഭിക്കുകയാണെങ്കിൽ ഈ പ്ലാറ്റ്‌ഫോമുകളിലെ ഏതെങ്കിലും ഉള്ളടക്കം 36 മണിക്കൂറിനുള്ളിൽ നീക്കം ചെയ്യുന്നതിനാണ് ഈ സംവിധാനം.

ഇക്കാര്യത്തിൽ നടപടികൾ കൈക്കൊണ്ടിട്ടുണ്ടോ എന്നാണ് ഇപ്പോൾ കേന്ദ്രം സോഷ്യൽ മീഡിയാ പ്ലാറ്റ്ഫോമുകളോട് ആരായുന്നത്.ഫേസ്ബുക്ക്, വാട്സാപ്പ്, ട്വിറ്റർ എന്നീ സോഷ്യൽ മീഡിയാ സൈറ്റുകൾ ഒരു കംപ്ലയൻസ് ഓഫീസറെ നിയമിക്കേണ്ടതുണ്ടെന്ന് കേന്ദ്ര സർക്കാർ നേരത്തെ നിർദ്ദേശം നൽകിയിരുന്നു. ഈ സാമൂഹിക മാദ്ധ്യമങ്ങളുമായി ബന്ധപ്പെട്ട് ഒരു പരാതി പരിഹാര/പ്രതികരണ സംവിധാനം രൂപപ്പെടുത്തുന്നതിനായാണ് കേന്ദ്രം ഇക്കാര്യം ആവശ്യപ്പെട്ടത്.

ന്യൂഡല്‍ഹി: മന്ത്രിമാരെ തീരുമാനിക്കുന്നതില്‍ കേന്ദ്രകമ്മിറ്റി ഇടപെടാറില്ലെന്നും കെ കെ ശൈലജ മന്ത്രിയാവില്ലെന്ന് അറിഞ്ഞത് സെക്രട്ടേറിയറ്റ് തീരുമാനത്തിന് ശേഷമാണെന്നും സീതാറാം യെച്ചൂരി. കെ.കെ.ശൈലജയെ മന്ത്രിസഭയില്‍ ഉള്‍പ്പെടുത്താതിരുന്നതിനെ ചൊല്ലി നടക്കുന്ന കോലാഹലത്തിലാണ് യെച്ചൂരിയുടെ പ്രതികരണം. സ്ഥാനാര്‍ത്ഥികളുടെ പട്ടിക കേന്ദ്രത്തിന് കൈമാറുമെങ്കിലും മന്ത്രിമാരെ തീരുമാനിക്കേണ്ടത് സംസ്ഥാന കമ്മിറ്റിയാണ്. ശൈലജ ജനങ്ങളുടെ വിശ്വാസം നേടിയെന്ന് മാത്രമല്ല രാജ്യത്തിന് ആകെ മാതൃകയായി. ശൈലജയുടെ സേവനം പാര്‍ട്ടി ഇനിയും ഉപയോഗിക്കും. കഴിഞ്ഞതവണ എല്‍ഡിഎഫ് സര്‍ക്കാരില്‍ രണ്ടുവനിതാ മന്ത്രിമാരാണ് ഉണ്ടായിരുന്നതെങ്കില്‍ ഇത്തവണ അത് മൂന്നായി.ഏറ്റവും കൂടുതല്‍ കാലം മുഖ്യമന്ത്രിയായിരുന്ന ജ്യോതി ബസുവിന് പോലും ആധിപത്യം ഉണ്ടായിരുന്നില്ലെന്നും സിപിഎമ്മില്‍ വണ്‍മാന്‍ ഷോയില്ലെന്നും യെച്ചൂരി പറഞ്ഞു. കേരളത്തില്‍ പാര്‍ട്ടി വലിയ വിജയമാണ് നേടിയത്. ചരിത്ര വിജയം നേടിയ സര്‍ക്കാര്‍ ജനങ്ങളെ മഹാമാരിയില്‍ നിന്ന് രക്ഷിക്കണം. പ്രകടനപത്രികയില്‍ പറയുന്നത് നടപ്പാക്കണമെന്നും യെച്ചൂരി പറഞ്ഞു.ആരോഗ്യം മെച്ചപ്പെട്ടാല്‍ കോടിയേരി പാര്‍ട്ടി സെക്രട്ടറി സ്ഥാനത്തേക്ക് തിരിച്ചുവരുമെന്നും യെച്ചൂരി പറഞ്ഞു. തെരഞ്ഞെടുപ്പ് ഫലം കേന്ദ്രസര്‍ക്കാരിന് ഒരു മുന്നറിയിപ്പായിരുന്നു. നയപരമായ ബദല്‍ വേണം എന്നതിന് തെളിവാണ് ഫലം.ലക്ഷദ്വീപ് അഡ്മിനിസ്ട്രേറ്ററെ മാറ്റണമെന്നും ജനങ്ങളുടെ വികാരം മനസ്സിലാക്കാതെയും നിയമ വിരുദ്ധമായുമാണ് അവിടുത്തെ നടപടികളെന്നും യെച്ചൂരി പറഞ്ഞു. അമിത് ഷായാണ് ഇക്കാര്യത്തില്‍ തീരുമാനമെടുക്കേണ്ടതെന്നും യെച്ചൂരി കൂട്ടിച്ചേര്‍ത്തു.

ന്യൂഡൽഹി:ലക്ഷദ്വീപിൽ കേന്ദ്രം നിയമിച്ച അഡ്മിനിസ്ട്രേറ്ററുടെ നിയമപരിഷ്കാരങ്ങൾക്കെതിരേ ദ്വീപുനിവാസികൾ പ്രതിഷേധം ശക്തിപ്പെടുത്തുന്നതിനിടെ പിന്തുണയുമായി കോൺഗ്രസ് നേതാവ് രാഹുൽ ഗാന്ധി.ലക്ഷദ്വീപ് അഡ്മിനിസ്ട്രേറ്ററായി ചുമതലയേറ്റ പ്രഫുൽ പട്ടേലിന്റെ പരിഷ്കാര നടപടികൾക്കെതിരേയാണ് ദ്വീപിൽ പ്രതിഷേധം പുകയുന്നത്. കരാർ അടിസ്ഥാനത്തിൽ ജോലിചെയ്തിരുന്ന അധ്യാപകരെ പിരിച്ചുവിടുക, വിദ്യാർഥികളുടെ ഭക്ഷണ മെനുവിൽനിന്ന് മാംസം ഒഴിവാക്കുക, ഡെയറി ഫാമുകൾ പൂട്ടുക തുടങ്ങിയ നടപടികൾക്കെതിരേയാണ് പ്രതിഷേധം.

നരേന്ദ്രമോദി ഗുജറാത്ത് മുഖ്യമന്ത്രിയായിരിക്കേ ആഭ്യന്തര മന്ത്രിയായിരുന്ന പ്രഫുൽ കെ. പട്ടേൽ 2020 ഡിസംബറിലാണ് അഡ്മിനിസ്ട്രേറ്ററായി ചുമതലയേറ്റത്. പദവിയേറ്റതുമുതൽ പട്ടേലിന്റെ തീരുമാനങ്ങൾ വിവാദമായി. കരാർ അടിസ്ഥാനത്തിൽ ജോലിചെയ്തിരുന്ന 200 ഹൈസ്കൂൾ അധ്യാപകരെ പിരിച്ചുവിട്ടു. ഇതിനെതിരേ സമരം നടത്തിയ വിദ്യാർഥികളെ അടിച്ചമർത്തി.അഡ്മിനിസ്ട്രേറ്ററെ തിരിച്ചുവിളിക്കണമെന്നാണ് ദ്വീപുനിവാസികൾ ഉൾപ്പടെയുളളവരുടെ ആവശ്യം.’സമുദ്രത്തിലെ ഇന്ത്യയുടെ രത്നമാണ് ലക്ഷദ്വീപ്.

അധികാരത്തിലുളള അജ്ഞരായ വർഗീയവാദികൾ അതിനെ നശിപ്പിക്കുകയാണ്. ഞാൻ ലക്ഷദ്വീപിലെ ജനങ്ങൾക്കൊപ്പം നിൽക്കുന്നു. ‘ – രാഹുൽ ട്വീറ്റ് ചെയ്തു.ലക്ഷദ്വീപിലെ സമാധാനാന്തരീക്ഷവും സംസ്കാരവും തകർക്കാനാണ് നിയമപരിഷ്ക്കാരങ്ങളിലൂടെ അഡ്മിനിസ്ട്രേറ്ററായ പ്രഫുൽ പട്ടേൽ ശ്രമിക്കുന്നതെന്ന് വ്യാപകമായ ആരോപണം ഉയർന്നിരുന്നു. പ്രതികരിച്ച കെ.എസ്.യു.വിന്റെ ട്വിറ്റർ അക്കൗണ്ട് മരവിപ്പിച്ചു. പിന്നീട് ദ്വീപിലെ വാർത്താപോർട്ടൽ വിലക്കി.ഗുണ്ടാ നിയമം നടപ്പാക്കി. ഓരോ ദ്വീപിലുമുള്ള സബ് ഡിവിഷണൽ മജിസ്ട്രേറ്റുമാരെ പിരിച്ചുവിടുകയും ദ്വീപിലെ ഉത്തരേന്ത്യക്കാരായ ഉദ്യോഗസ്ഥർക്ക് ചുമതല നൽകുകയും ചെയ്തു.

ടൂറിസം വകുപ്പിൽനിന്ന് 190 പേരെ പിരിച്ചുവിട്ടു. ജില്ലാ പഞ്ചായത്തിന്റെ അധികാരങ്ങൾ വെട്ടിക്കുറച്ച് അഡ്മിനിസ്ട്രേറ്ററുടെ വരുതിയിലാക്കി. തീരസംരക്ഷണ നിയമത്തിന്റെ പേരുപറഞ്ഞ്, കടലോരങ്ങളിലെ മീൻപിടിത്തക്കാരുടെ ഉപകരണങ്ങളും വലയും ഷെഡ്ഡുകളും നീക്കി. മൃഗസംരക്ഷണവകുപ്പ് നടത്തിയിരുന്ന രണ്ട് ഡെയറിഫാമുകൾ നഷ്ടത്തിലാണെന്നു പറഞ്ഞ് പൂട്ടി. കന്നുകാലികളെ കിലോയ്ക്ക് 250 രൂപ നിരക്കിൽ ലേലംചെയ്ത് വിൽക്കാനാണ് ഉത്തരവ്. ബേപ്പൂർ തുറമുഖംവഴിയാണ് ലക്ഷദ്വീപിൽനിന്നുള്ള ചരക്കുനീക്കം ഏറിയകൂറും നടന്നുവരുന്നത്.

ന്യൂഡൽഹി:അടുക്കളയിൽ ഉപയോഗിക്കുന്ന വിവിധ ഭക്ഷ്യ എണ്ണകളായ നിലക്കടല എണ്ണ, കടുകെണ്ണ, വനസ്‌പതി, സൂര്യകാന്തി എണ്ണ,പാമോയിൽ, സോയബീൻ എണ്ണ എന്നിവയ്‌ക്ക് കഴിഞ്ഞ പത്ത് വർഷത്തിനിടെ ഉണ്ടായ ഏ‌റ്റവും വലിയ വിലക്കയ‌റ്റമാണ് ഇപ്പോഴുണ്ടായിരിക്കുന്നത്.മലേഷ്യയിൽ നിന്ന് ഇറക്കുമതി ചെയ്യുന്ന അസംസ്‌കൃത പാമോയിലിന് കഴിഞ്ഞ വർഷം 2281 റിംഗി‌റ്റായിരുന്നു വിലയെങ്കിൽ ഇപ്പോഴത് 3890 റിംഗി‌റ്റാണ്. സോയാബിൻ എണ്ണയ്‌ക്ക് മുൻവർഷം ഇതേസമയം 306 ഡോളറായിരുന്നത് ഇപ്പോൾ 559.61 ആയി.വിവിധ സംസ്ഥാനങ്ങൾ കേന്ദ്രത്തിനെ അറിയിച്ച കണക്കനുസരിച്ച് ആറ് തരം ഭക്ഷ്യ എണ്ണകൾക്കും 2010 ജനുവരിയിലുള‌ളതിനെക്കാൾ കുത്തനെ ഉയ‌ർച്ചയുണ്ടായെന്നാണ്.

കടുകെണ്ണ കഴിഞ്ഞ വർഷം മേയിൽ118 രൂപയായിരുന്നത് ഇപ്പോൾ 164 രൂപയായി കിലോയ്‌ക്ക്. കഴിഞ്ഞ വർഷം കിലോയ്ക്ക് 88.27 രൂപയുണ്ടായിരുന്ന പാമോയിൽ ഇപ്പോൾ ഏതാണ്ട് 50 ശതമാനം ഉയർന്ന് 131.69 രൂപയായി.നിലക്കടലയെണ്ണ 175 രൂപ,​ വനസ്‌പതി 128 രൂപ,​ സോയ എണ്ണ 148,​ സൂര്യകാന്തി എണ്ണ 169 രൂപ എന്നിങ്ങനെയാണ് കിലോയ്‌ക്ക് വില. 18 മുതൽ 52 ശതമാനം വരെ വില മുൻവർഷത്തെക്കാൾ കുതിച്ചുയർന്നു. ഇന്ത്യയിൽ ഭക്ഷ്യ എണ്ണ ഉൽപാദനം 8.5 മില്യൺ ടണ്ണാണ്.

അതേസമയം ഇറക്കുമതി ചെയ്യുന്നത് 13.5 മില്യൺ ടണും.കൊവിഡ് മൂലം വിവിധ സംസ്ഥാനങ്ങളിൽ ലോക്ഡൗൺ ഏർപ്പെടുത്തിയതിനെ തുടർന്ന് സാമ്പത്തിക രംഗത്തുണ്ടായ മന്ദതയാണ് വില കുത്തനെ ഉയരാൻ കാരണം. ഇതിനെതുടർന്ന് കേന്ദ്ര ഭക്ഷ്യ പൊതുവിതരണ വകുപ്പ് യോഗം ചേ‌ർന്ന് വിവിധ സംസ്ഥാനങ്ങളോട് വിലകുറയ്‌ക്കാനാവശ്യമായ നടപടികൾ സ്വീകരിക്കാൻ ആവശ്യപ്പെട്ടു.രാജ്യത്തെ ഉപയോഗത്തിൽ 60 ശതമാനവും ഇറക്കുമതി ചെയ്യുന്നതിനാൽ ആഭ്യന്തര ഭക്ഷ്യ എണ്ണവില സാധാരണഗതിയിൽ അന്താരാഷ്‌ട്ര വിലയ്‌ക്കനുസരിച്ചാണ് മാറുന്നത്.