താൻ ഇന്ത്യൻ പൗരനായെന്ന സന്തോഷവാർത്ത വെളിപ്പെടുത്തി അക്ഷയ് കുമാർ
മുംബൈ : താൻ ഒടുവിൽ ഇന്ത്യൻ പൗരനായെന്ന സന്തോഷവാർത്ത പങ്കുവെച്ച് ബോളിവുഡ് നടൻ അക്ഷയ് കുമാർ. 2019 ൽ ഇന്ത്യൻ പൗരത്വത്തിനായി അപേക്ഷ നൽകിയെങ്കിലും കോവിഡ് കാരണം നടപടികൾ നീണ്ടു പോവുകയായിരുന്നു എന്ന് നടൻ വിശദീകരിച്ചു. കനേഡിയൻ പൗരത്വമുള്ളതിനാൽ അക്ഷയ് കുമാറിന് ഇന്ത്യൻ പൗരത്വം ലഭിക്കാത്ത അവസ്ഥയായിരുന്നു. പൗരത്വം ലഭിച്ച രേഖകളുടെ ചിത്രം സോഷ്യൽ മീഡിയയിൽ പങ്കുവെച്ചാണ് മനസ്സുകൊണ്ടും പൗരത്വം കൊണ്ടും ഇന്ത്യക്കാരനായെന്ന് അക്ഷയ്കുമാർ കുറിച്ചത്.
ഇന്ത്യ എന്നാൽ തനിക്ക് എല്ലാമാണ്. തന്നെക്കുറിച്ച് ആളുകൾ പറയുന്നതും പരിഹസിക്കുന്നതും എല്ലാം സത്യാവസ്ഥ അറിയാതെയാണ്. കൃത്യമായി നികുതി അടയ്ക്കാൻ താൻ മറക്കാറില്ലെന്നും അക്ഷയ്കുമാർ സോഷ്യൽ മീഡിയയിൽ പറഞ്ഞു. കനേഡിയൻ പൗരത്വം ഉണ്ടായിരുന്നെങ്കിലും കഴിഞ്ഞ ഏഴ് വർഷമായി താൻ കാനഡയിലേക്ക് പോയിട്ടില്ലെന്ന് അക്ഷയ്കുമാർ ഒരു അഭിമുഖത്തിൽ മുൻപ് വ്യക്തമാക്കിയിരുന്നു.
