ഹൈദരാബാദ് : ഇന്ത്യൻ പെലെ എന്നറിയപ്പെട്ടിരുന്ന ഫുട്ബോൾ ഇതിഹാസം മുഹമ്മദ് ഹബീബ് (74 ) അന്തരിച്ചു. ഡിമെൻഷ്യ, പാർക്കിൻസൺ എന്നീ രോഗങ്ങൾ മൂലം കുറേ നാളുകളായി ചികിത്സയിലായിരുന്നു. 1970 കാലഘട്ടത്തിൽ ഇന്ത്യയിൽ ഫുട്ബോളിന് ചുക്കാൻ പിടിച്ച വ്യക്തിയായിരുന്നു ഹബീബ്. പെലെയുടെ ന്യൂയോർക്ക് കോസ്മോസിനെതിരെ 1977 സെപ്റ്റംബർ 24 ന് മോഹൻ ബഗാന് വേണ്ടി ഗോൾ നേടുകയും സാക്ഷാൽ പെലെയുടെ അഭിനന്ദനത്തിന് അർഹനാവുകയും ചെയ്തു.
1960 മുതൽ 1975 വരെയുള്ള കാലഘട്ടത്തിൽ ദേശീയ ടീമിനായി കളിച്ച അദ്ദേഹം ബാങ്കോക്കിൽ നടന്ന ഏഷ്യൻ ഗെയിംസിൽ വെങ്കല മെഡൽ നേടിയ ടീമിലെ അംഗമായിരുന്നു. ഈസ്റ്റ് ബംഗാൾ, മോഹൻ ബഗാൻ, മുഹമ്മദൻ സ്പോർട്ടിങ് തുടങ്ങി നിരവധി ക്ലബ്ബുകൾക്കായി മത്സരിച്ചിട്ടുണ്ട്. തെലങ്കാന സ്വദേശിയായ ഹബീബ് 1969 ൽ സന്തോഷ് ട്രോഫി ഉയർത്തിയ ബംഗാൾ ടീമിൽ അംഗമായിരുന്നു.