ആറ്റുകാൽ പൊങ്കാല; പ്രത്യേക ട്രെയിൻ സർവീസുകൾ നടത്താൻ ഇന്ത്യൻ റെയിൽവേ
തിരുവനന്തപുരം: ആറ്റുകാൽ പൊങ്കാലയുമായി ബന്ധപ്പെട്ട് പ്രത്യേക ട്രെയിൻ സർവീസുകൾ നടത്തുമെന്ന അറിയിപ്പുമായി ഇന്ത്യൻ റെയിൽവേ. മാർച്ച് ഏഴിനാണ് ആറ്റുകാൽ പൊങ്കാല നടക്കുക. അന്നേ ദിവസം എറണാകുളത്തേക്കും നാഗർകോവിലിലേക്കും അധിക സർവീസുകൾ നടത്തുമെന്ന് റെയിൽവേ വ്യക്തമാക്കി.
10 ട്രെയിനുകൾക്ക് വിവിധയിടങ്ങളിൽ അധിക സ്റ്റോപ്പ് അനുവദിച്ചിട്ടുണ്ട്. തിരക്ക് നിയന്ത്രിക്കാൻ അധിക ട്രെയിനുകൾക്ക് പുറമെ മൂന്നു പാസഞ്ചർ ട്രെയിനുകളിൽ കൂടുതൽ സെക്കൻഡ് ക്ലാസ് കോച്ചുകൾ ഒരുക്കാനും റെയിൽവേ തീരുമാനിച്ചു. നാഗർകോവിൽ കോട്ടയം പാസഞ്ചർ, കൊച്ചുവേളി നാഗർകോവിൽ പാസഞ്ചർ ട്രെയിനുകൾ കൂടുതൽ സമയം തിരുവനന്തപുരത്ത് നിർത്തിയിടും. മാർച്ച് 7 ന് പുലർച്ചെ 1.45 ന് എറണാകുളത്ത് നിന്നും തിരുവനന്തപുരത്തേക്ക് പ്രത്യേക ട്രെയിൻ സർവ്വീസ് നടത്തും.
പൊങ്കാല അവസാനിച്ച ശേഷം തിരുവനന്തപുരത്തുനിന്നും എറണാകുളത്തേക്ക് വൈകിട്ട് 3.30 നും തിരുവനന്തപുരത്തു നിന്നും നാഗർകോവിലിലേക്ക് ഉച്ചക്ക് 2.45 നും ട്രെയിനുകൾ ഉണ്ടാകുമെന്നും റെയിൽവേ വൃത്തങ്ങൾ അറിയിച്ചു.