എല്ലാത്തിനും കടമെടുക്കരുത്; കേരളത്തോട് ലോകബാങ്ക് വൈസ് പ്രസിഡന്റ്
തിരുവനന്തപുരം: കേരളം കടബാധ്യതയുടെ കാര്യത്തില് അതീവ ശ്രദ്ധ ചെലുത്തണമെന്നും എല്ലാത്തിനും കടമെടുക്കരുതെന്നും ദക്ഷിണേഷ്യന് രാജ്യങ്ങളുടെ ചുമതലയുള്ള ലോകബാങ്ക് വൈസ് പ്രസിഡന്റ് മാര്ട്ടിന് റെയ്സര് പറഞ്ഞു. ‘കഴിയാവുന്നത്ര മേഖലകളില് സ്വകാര്യ നിക്ഷേപം കൊണ്ടുവരണം. ഇത്തരം മേഖലകളില് നിന്നു സര്ക്കാര് പിന്മാറണം’- അദ്ദേഹം വ്യക്തമാക്കി.
‘പുനരുപയോഗ ഊര്ജം പോലെയുള്ള മേഖലകളില് കേരളം സ്വകാര്യനിക്ഷേപം പ്രോത്സാഹിപ്പിക്കണം. ഈ മേഖലകളില് അടിസ്ഥാന സൗകര്യമൊരുക്കല്, വിതരണം തുടങ്ങിയ മേഖലയിലേക്കു സര്ക്കാര് ഇടപെടല് ചുരുങ്ങണം. പൊതുമേഖലാ ഫണ്ടിങ് ആവശ്യത്തിലധികം വേണ്ട. റീബില്ഡ് കേരളയില് അധിക സഹായമായി 150 ദശലക്ഷം ഡോളറും കേരള ഇക്കണോമിക് റിവൈവല് പ്രോഗ്രാ (കേര)മിനുള്ള 165 മില്യണ് ഡോളറും ഉള്പ്പെടെ 350 ദശലക്ഷം ഡോളര് കേരളത്തിനു നല്കുന്നതു പരിഗണനയിലാണ്. ബോര്ഡ് യോഗമാണ് ഇക്കാര്യത്തില് തീരുമാനമെടുക്കേണ്ടത്. ഇനിയൊരു പ്രളയം വന്നാല് നേരിടാന് കാലാവസ്ഥയിലുണ്ടാകുന്ന മാറ്റങ്ങള് മുന്കൂട്ടി കണ്ടുള്ള പ്രവര്ത്തനമാണു വേണ്ടത്. ശക്തിയായി മഴ പെയ്യുമ്പോള് റോഡുകളില്നിന്നു വെള്ളം ഒഴുകിപ്പോകാനുള്ള ഡ്രെയിനേജ് സംവിധാനം വേണം. മറ്റു സംസ്ഥാനങ്ങളുമായി താരതമ്യപ്പെടുത്തുമ്പോള് കേരളത്തില് ഇക്കാര്യങ്ങളില് നല്ല ആസൂത്രണമുണ്ട്. ഹരിതോര്ജം, ആരോഗ്യ പരിപാലനം എന്നിവയില് സഹകരിക്കുന്ന കാര്യം മുഖ്യമന്ത്രിയുമായുള്ള ചര്ച്ചയില് ഉയര്ന്നു. ഇക്കാര്യം ചര്ച്ച ചെയ്യും. കേന്ദ്രം നിര്ദേശിക്കുന്ന മുന്ഗണനകള് ലോകബാങ്കിനു കണക്കിലെടുത്തേ പറ്റൂ’- ഇക്കാര്യം മുഖ്യമന്ത്രി പിണറായി വിജയന്റെ ശ്രദ്ധയില്പെടുത്തിയതായി കണ്ട്രി ഡയറക്ടര് അഗസ്തേ താനോ ക്വാമിക്കൊപ്പം മുഖ്യമന്ത്രിയെ കണ്ടശേഷം മാര്ട്ടിന് റെയ്സര് അറിയിച്ചു.
‘റീബില്ഡ് കേരളാ പദ്ധതിക്കു ലോകബാങ്ക് നല്കിയ തുക സര്ക്കാര് മറ്റെന്തിനെങ്കിലും ചെലവിട്ടോ എന്നതു ഞങ്ങള്ക്കു മുന്പിലുള്ള വിഷയമല്ല. ചെയ്യേണ്ട ഓരോ കാര്യവും എടുത്തുപറഞ്ഞു കൈമാറിയ തുകയല്ല. ബില് കിട്ടുമ്പോള് പണം കൊടുക്കുന്ന പരമ്പരാഗതമായ കണക്കെടുപ്പല്ല ഇക്കാര്യത്തിലുള്ളത്. ‘ഇതാണു ഞങ്ങളുടെ റീബില്ഡ് കേരള’ എന്നു സര്ക്കാര് പറഞ്ഞാല്, നല്കിയ പണം പ്രയോജനപ്പെട്ടോ എന്നു നോക്കേണ്ട ഉത്തരവാദിത്തമേയുള്ളൂ. നീക്കിവച്ചതും നടപ്പാക്കിയതുമായി പൊരുത്തമുണ്ടോ എന്നും നോക്കണം’- അദ്ദേഹം കൂട്ടിച്ചേര്ത്തു.