International (Page 179)

ധാക്ക: നവരാത്രി ഉത്സവങ്ങളോട് അനുബന്ധിച്ച് ബംഗ്ലാദേശിലുണ്ടായ വർഗീയ സംഘർഷങ്ങൾ പിടിച്ചു കെട്ടാനാകാതെ സർക്കാർ. മതവികാരം വ്രണപ്പെടുത്തിയെന്നാരോപിച്ച് ഹിന്ദുക്കൾ താമസിക്കുന്ന മേഖലയിലെ ഇരുപതോളം വീടുകൾ അക്രമകാരികൾ അഗ്നിക്കിരയാക്കി. രംഗ്പൂരിലാണ് കലാപമുണ്ടായത്. മേഖലയിലുള്ള ഒരു യുവാവ് ഫേസ്ബുക്കിൽ പങ്കുവെച്ച പോസ്റ്റ് മതവികാരം വ്രണപ്പെടുത്തിയെന്നാരോപിച്ചാണ് ജനക്കൂട്ടം വീടുകൾക്ക് നേരെ ആക്രമണം നടത്തിയത്.

സ്ഥലത്ത് പൊലീസ് ശക്തമായ ബന്തവസ് ഏർപ്പെടുത്തിയെങ്കിലും കലാപകാരികളെ നിയന്ത്രിക്കാൻ കഴിഞ്ഞില്ല. ബംഗ്ലാദേശിന്റെ വിവിധ ഭാഗങ്ങളിലായി നിരവധി ആക്രമണങ്ങളാണ് ഉണ്ടായത്. ആക്രമണങ്ങളിൽ ന്യൂനപക്ഷ വിഭാഗത്തിൽപ്പെട്ട രണ്ട് പേർ കൊല്ലപ്പെടുകയും ചെയ്തു.

ഇതുവരെ രാജ്യത്ത് വിവിധ ഭാഗങ്ങളിലുണ്ടായ അക്രമങ്ങളിൽ പേരാണ് കൊല്ലപ്പെട്ടത്. ധാക്കയിൽ നിന്ന് 100 കിലോമീറ്റർ അകലെയുള്ള കുമിലയിലെ ദുർഗാപൂജ പന്തലിലാണ് ആദ്യം ആക്രമണം ഉണ്ടായത്. ഈ വീഡിയോ സാമൂഹ്യ മാദ്ധ്യമങ്ങളിൽ പ്രചരിച്ചതിന് പിന്നാലെയാണ് ബംഗ്ലാദേശിൽ കലാപം ഉടലെടുത്തത്. പിന്നീട് ഹാജിഗഞ്ചിലെ ഒരു ഹിന്ദു ക്ഷേത്രത്തിലേക്ക് അഞ്ഞൂറോളം വരുന്ന കലാപകാരികൾ തള്ളിക്കയറുകയും ഭക്തൻമാർക്ക് നേരെ ആക്രമണം നടത്തുകയും ചെയ്തു. ഹജിഗഞ്ചിൽ ക്ഷേത്രം ആക്രമിക്കാനെത്തിയ 500 ഓളം പേർക്കെതിരെ പോലീസ് വെടിവെയ്പ്പും നടന്നിരുന്നു. അക്രമം വ്യാപിക്കുന്നത് തടയുന്നതിനായി പ്രദേശത്ത് മൊബൈൽ ഇന്റർനെറ്റ് സേവനങ്ങൾ താത്ക്കാലികമായി നിരോധിച്ചിരിക്കുകയാണ്.

വാഷിംഗ്ടൺ: കോവിഡ് വ്യാപനത്തെ തുടർന്ന് ഏർപ്പെടുത്തിയിരുന്ന നിയന്ത്രണങ്ങളിൽ ഇളവ് നൽകി അമേരിക്ക. വിദേശ യാത്രക്കാർക്ക് ഏർപ്പെടുത്തിയിരുന്ന കോവിഡ് നിയന്ത്രണങ്ങളിലാണ് അമേരിക്ക ഇളവ് നൽകിയത്. രണ്ട് ഡോസ് വാക്‌സിനെടുത്ത യാത്രക്കാർക്ക് ഇനി രാജ്യത്ത് പ്രവേശനം അനുവദിക്കും. വൈറ്റ് ഹൗസാണ് ഇക്കാര്യം അറിയിച്ചത്. നവംബർ എട്ടു മുതലാണ് തീരുമാനം പ്രാബല്യത്തിൽ വരിക.

യാത്ര ചെയ്യുന്നതിന് മൂന്ന് ദിവസത്തിന് മുൻപ് കോവിഡ് പരിശോധന നടത്തണമെന്നാണ് അധികൃതർ നൽകിയിരിക്കുന്ന നിർദ്ദേശം. കോവിഡ് വൈറസ് വ്യാപനത്തിന്റെ പശ്ചാത്തലത്തിൽ 2020 മാർച്ചിലാണ് അമേരിക്ക വിദേശ യാത്രക്കാർക്ക് പ്രവേശന വിലക്ക് ഏർപ്പെടുത്തിയത്. ഇന്ത്യ, ബ്രസീൽ, ചൈന, ബ്രിട്ടൻ, കാനഡ, മെക്‌സിക്കോ തുടങ്ങിയ രാജ്യങ്ങൾക്കെല്ലാം അമേരിക്ക വിലക്കേർപ്പെടുത്തിയിരുന്നു. കർശനമായ നിയന്ത്രണങ്ങൾ അമേരിക്കയുടെ സമ്പദ് വ്യവസ്ഥയെ പോലും ബാധിച്ചിരുന്നതായുള്ള റിപ്പോർട്ടുകൾ പുറത്തു വന്നിരുന്നു.

കാബൂൾ: അഫ്ഗാനിസ്താനിൽ വീണ്ടും സ്‌ഫോടനം. കാണ്ഡഹാറിലെ ഷിയ പള്ളിയിലാണ് സ്‌ഫോടനം ഉണ്ടായത്. സ്ഫോടനത്തിൽ 32 പേർ കൊല്ലപ്പെട്ടു. 40 ൽ അധികം പേർക്ക് പരിക്കേൽക്കുകയും ചെയ്തു. വെള്ളിയാഴ്ച ഉച്ചകഴിഞ്ഞുള്ള നമസ്‌കാരത്തിനിടെയാണ് ബിബി ഫാത്തിമ പള്ളിയിൽ സ്‌ഫോടനം ഉണ്ടായത്.

വെള്ളിയാഴ്ചത്തെ നമസ്‌കാര ചടങ്ങുകളിൽ വലിയതോതിൽ ജനങ്ങൾ പങ്കെടുത്തിരുന്നതായാണ് താലിബാൻ വക്താക്കൾ അറിയിക്കുന്നത്. സംഭവത്തിൽ അന്വേഷണം പുരോഗമിക്കുകയാണെന്നും താലിബാൻ വ്യക്തമാക്കി. ആക്രമണത്തിന്റെ ഉത്തരവാദിത്വം ഏറ്റെടുത്ത് ഇതുവരെ ആരും രംഗത്തെത്തിയിട്ടില്ല. മരണസംഖ്യ ഉയരാൻ സാധ്യതയുണ്ടെന്നാണ് റിപ്പോർട്ട്.

ഏതാനും ദിവസങ്ങൾക്ക് മുൻപ് അഫ്ഗാനിലെ കുൺഡുസ് നഗരത്തിലെ സെയ്ദ് അബാദ് പള്ളിയിലും സ്‌ഫോടനം നടന്നിരുന്നു. 50 പേരാണ് സ്‌ഫോടനത്തിൽ കൊല്ലപ്പെട്ടത്. അമേരിക്കൻ സൈന്യം അഫ്ഗാൻ വിട്ടതിനു ശേഷമുണ്ടായ ഏറ്റവും വലിയ ബോംബ് ആക്രമണമായിരുന്നു അബാദ് പള്ളിയിലേത്.

ധാക്ക: ക്ഷേത്രങ്ങൾ തകർത്തവരെ വെറുതെ വിടില്ലെന്ന് മുന്നറിയിപ്പ് നൽകി ബംഗ്ലാദേശ് പ്രധാനമന്ത്രി ഷെയ്ഖ് ഹസീന. ദുർഗ പൂജയുമായി ബന്ധപ്പെട്ട് നടന്ന സംഘർഷത്തിനിടെയാണ് ബംഗ്ലാദേശിൽ ക്ഷേത്രങ്ങൾ തകർക്കപ്പെട്ടത്. കുമിലയിൽ ഉണ്ടായ ആക്രമണത്തിൽ നാല് പേർ കൊല്ലപ്പെടുകയും ചെയ്തു. സംഘർഷത്തിന്റെ പശ്ചാത്തലത്തിൽ 22 ജില്ലകളിൽ അർധ സൈനികരെ വിന്യസിച്ചു.

കുമിലയിലെ അക്രമത്തിൽ വിശദമായ അന്വേഷണം നടത്തുമെന്നും ഒരാളെയും രക്ഷപ്പെടാൻ അനുവദിക്കില്ലെന്നും ഷെയ്ഖ് ഹസീന വ്യക്തമാക്കി. അക്രമികൾ ഏതു മതത്തിൽപ്പെട്ടവരായാലും പിടികൂടി ശിക്ഷിച്ചിരിക്കും. സംഭവവുമായി ബന്ധപ്പെട്ട് നിരവധി വിവരങ്ങൾ ലഭിച്ചിട്ടുണ്ട്. ഇത് സാങ്കേതികവിദ്യയുടെ യുഗമാണ്. കുറ്റകൃത്യത്തിൽ പങ്കാളികളായവരെ കണ്ടെത്താൻ സാങ്കേതികവിദ്യ ഉപയോഗപ്പെടുത്തുമെന്നും ഷെയ്ഖ് ഹസീന പറഞ്ഞു. ധാകേശ്വരി ദേശീയ ക്ഷേത്രത്തിൽ നടന്ന ചടങ്ങിലായിരുന്നു പ്രധാനമന്ത്രിയുടെ പ്രതികരണം. ദുർഗാപൂജാ ആശംസകളും പ്രധാനമന്ത്രി ജനങ്ങളോട് പങ്കുവെച്ചു.