General (Page 1,478)

കൊച്ചി: ഐഷാ സുൽത്താനയ്‌ക്കെതിരെയുള്ള രാജ്യദ്രോഹക്കേസ് റദ്ദാക്കരുതെന്ന് ലക്ഷദ്വീപ് ഭരണകൂടം. ഹൈക്കോടതിയിൽ സമർപ്പിച്ച എതിർസത്യവാങ്മൂലത്തിലാണ് ലക്ഷദ്വീപ് ഭരണകൂടം ഇക്കാര്യം വ്യക്തമാക്കിയിരിക്കുന്നത്. അന്വേഷണവുമായി ഐഷാ സുൽത്താന സഹകരിക്കുന്നില്ലെന്നും കേസ് രജിസ്റ്റർ ചെയ്തതിനു പിന്നാലെ ഐഷ മൊബൈലിലെ വിവരങ്ങൾ നശിപ്പിച്ചെന്നും എതിർസത്യവാങ്മൂലത്തിൽ വ്യക്തമാക്കിയിട്ടുണ്ട്. ആവശ്യപ്പെട്ട രേഖകൾ ഐഷ ഹാജരാക്കിയില്ലെന്നും ലക്ഷദ്വീപ് അഡ്മിനിസ്‌ട്രേഷൻ ആരോപിക്കുന്നു.

രാജ്യദ്രോഹക്കേസ് രജിസ്റ്റർ ചെയതതിന് തൊട്ടുപിന്നാലെ ഐഷാ സുൽത്താന മൊബൈലിലെ വിവരങ്ങൾ നശിപ്പിച്ചു. ചാനൽ ചർച്ചയ്ക്കിടെ ബയോവെപ്പൺ പരാമർശം നടത്തുന്നതിന് മുൻപ് ഐഷാ സുൽത്താന തന്റെ ഫോണിൽ പരിശോധന നടത്തുന്നത് ദൃശ്യങ്ങളിൽ വ്യക്തമാണെന്ന് സത്യവാങ്മൂലത്തിൽ പറയുന്നു. ആ സമയത്ത് ഐഷാ സുൽത്താന ആരൊക്കെയായി ബന്ധപ്പെട്ടു എന്ന് കണ്ടെത്തേണ്ടതുണ്ടെന്നും നിലവിൽ ഈ ഫോണിലെ ചാറ്റ് ഹിസ്റ്ററി അടക്കം നശിപ്പിച്ച സാഹചര്യമാണുള്ളതെന്നും സത്യവാങ്മൂലത്തിൽ വിശദമാക്കുന്നു.കേസ് മുന്നോട്ടു കൊണ്ടുപോവുകയും ഐഷാ സുൽത്താനയെ ചോദ്യം ചെയ്യേണ്ടതുണ്ടെന്നും ലക്ഷദ്വീപ് ഭരണകൂടം കോടതിയെ അറിയിച്ചു.

തിരുവനന്തപുരം: സംസ്ഥാനത്ത് ലോക്ക് ഡൗണിൽ പുതിയ ഇളവുകൾ നൽകില്ല. വാരാന്ത്യ ലോക്ക് ഡൗൺ തുടരാനാണ് സർക്കാരിന്റെ തീരുമാനം. ബക്രീദിനോടനുബന്ധിച്ച് സംസ്ഥാനത്ത് നൽകിയ ഇളവുകളെ സുപ്രീം കോടതി വിമർശിച്ച സാഹചര്യത്തിലാണ് ലോക്ക് ഡൗണിൽ ഇളവ് നൽകേണ്ടെന്ന് തീരുമാനിച്ചത്. മുഖ്യമന്ത്രിയുടെ നേതൃത്വത്തിൽ നടന്ന അവലോകന യോഗത്തിലാണ് ഇത് സംബന്ധിച്ച തീരുമാനമായത്.

നിലവിലുള്ള ലോക്ക് ഡൗൺ നിയന്ത്രണങ്ങൾ ഒരാഴ്ച്ച കൂടി അതേപടി തുടരാൻ യോഗത്തിൽ ധാരണയായി. ബക്രീദുമായി ബന്ധപ്പെട്ട് സംസ്ഥാനത്ത് അനുവദിച്ചിരുന്ന നൽകിയിരുന്ന മൂന്ന് ദിവസത്തെ ഇളവുകൾ ഇന്ന് അവസാനിക്കും. നാളെ മുതൽ നേരത്തെയുണ്ടായിരുന്ന നിയന്ത്രണങ്ങൾ തുടരാനാണ് അവലോകന യോഗത്തിൽ തീരുമാനിച്ചിരിക്കുന്നത്.

ബക്രീദിനോട് അനുബന്ധിച്ച് സംസ്ഥാനത്ത് നൽകിയ ഇളവുകൾക്കെതിരെ സുപ്രീം കോടതി രൂക്ഷ വിമർശനം ഉന്നയിച്ചിരുന്നു. വൈകിയ വേളയിലായതിനാൽ ഉത്തരവ് റദ്ദാക്കുന്നില്ലെന്നായിരുന്നു കോടതി അറിയിച്ചത്. മഹാമാരിയുടെ കാലത്ത് സർക്കാർ സമ്മർദ്ദത്തിന് വഴിപ്പെടരുതായിരുന്നുവെന്ന് കോടതി വിമർശിച്ചിരുന്നു.

തിരുവനന്തപുരം: സംസ്ഥാനത്തെ ലോക്ക് ഡൗൺ നിയന്ത്രണങ്ങളിൽ കൂടുതൽ ഇളവ് വരുത്താൻ സാധ്യതയെന്ന് റിപ്പോർട്ട്. വാരാന്ത്യ ലോക്ക് ഡൗൺ പിൻവലിക്കാൻ സാധ്യതയുണ്ടെന്നാണ് വിവരം. ഇന്ന് വൈകീട്ട് മുഖ്യമന്ത്രി പിണറായി വിജയന്റെ അദ്ധ്യക്ഷതയിൽ ചേരുന്ന കോവിഡ് അവലോകന യോഗത്തിലായിരിക്കും ഇതുസംബന്ധിച്ച അന്തിമ തീരുമാനം ഉണ്ടാകുക.

മൈക്രോ കണ്ടെയിൻമെൻറ് സോൺ കേന്ദ്രീകരിച്ച് ലോക്ക് ഡൗൺ നിയന്ത്രണങ്ങൾ പരിമിതപ്പെടുത്താണ് സർക്കാർ ആലോചിക്കുന്നത്. ജൂലൈ 22 ന് ശേഷമുളള സ്ഥിതിഗതികളാകും ഇന്ന് ചേരുന്ന യോഗത്തിൽ ചർച്ച ചെയ്യുന്നത്. ബക്രീദിനോടനുബന്ധിച്ച് കേരളം നൽകിയ ലോക്ക് ഡൗൺ ഇളവുകൾക്കെതിരെ സുപ്രീം കോടതി രൂക്ഷ വിമർശനം ഉന്നയിച്ച സാഹചര്യത്തിൽ കോടതി നടപടി കൂടി കണക്കിലെടുത്ത ശേഷമായിരിക്കും ഇക്കാര്യത്തിൽ അന്തിമ തീരുമാനം എടുക്കുന്നത്. ലോക്ക് ഡൗണിൽ ഇളവ് അനുവദിക്കണമെന്നാണ് വ്യാപാരികൾ ഉൾപ്പെടെയുള്ള വരുടെ ആവശ്യം.

കാസർകോട്: മാർക്സ് സാമ്പത്തിക ശാസ്ത്രത്തിന്റെ അവസാന വാക്കല്ലെന്ന് തദ്ദേശ സ്വയംഭരണ വകുപ്പ് മന്ത്രി എം വി ഗോവിന്ദൻ. സമ്പത്ത് വ്യക്തിയിൽ കേന്ദ്രീകരിക്കുക വഴി സമൂഹത്തിലുണ്ടായ പ്രതിസന്ധിക്ക് സാമ്പത്തിക ശാസ്ത്രത്തിൽ ബദൽ പരിഹാരം കണ്ടെത്തുകയായിരുന്നു മാർക്സ് ചെയ്തതെന്ന് അദ്ദേഹം പറഞ്ഞു. ബഹുമുഖ തലങ്ങളെ വിശകലനം ചെയ്യാൻ അതുവഴി സാധിച്ചുവെന്നും അദ്ദേഹം വ്യക്തമാക്കി. കണ്ണൂർ സർവകലാശാല മുൻ രജിസ്ട്രാറും കാഞ്ഞങ്ങാട് നെഹ്റു കോളജ് സാമ്പത്തിക ശാസ്ത്ര വിഭാഗം മുൻ മേധാവിയുമായ ഡോ.എ. അശോകന്റെ ‘ഹെറ്ററഡോക്സ് ഇക്കണോമിക്സ്’ എന്ന പുസ്തകം പ്രകാശനന ചടങ്ങിനിടെയായിരുന്നു അദ്ദേഹത്തിന്റെ പരാമർശം. മുൻ ജില്ല പഞ്ചായത്ത് പ്രസിഡന്റ് എം വി ബാലകൃഷ്ണൻ മാസ്റ്ററിന് പുസ്തകം കൈമാറിക്കൊണ്ടായിരുന്നു മന്ത്രി എം വി ഗോവിന്ദൻ പുസ്തക പ്രകാശനം നിർവ്വഹിച്ചത്.

സാമ്പത്തിക ശാസ്ത്രത്തിൽ മാർക്സ് അവസാന വാക്കാണെന്ന് പറയുന്നത് തെറ്റിദ്ധാരണയാണ്. ഇന്ന് അതിനപ്പുറത്തേക്ക് ഉൽപാദന ബന്ധങ്ങൾ വളർന്നു കഴിഞ്ഞു.18 ലക്ഷം ശമ്പളം വാങ്ങുന്നവർ, ചൂഷണത്തെക്കുറിച്ച് സംസാരിക്കുന്നതെന്തിനെന്ന് ചോദിക്കുന്നു. അത്രയും ശമ്പളം വാങ്ങുന്നയാൾ ഉൽപാദിപ്പിക്കുന്നതിന്റെ മൂല്യവും അതിനനുസരിച്ച് വളർന്നിട്ടുണ്ട്. പട്ടിണിയെ അടിസ്ഥാനമാക്കി മാത്രം മിച്ചമൂല്യ സിദ്ധാന്തത്തെ വിശകലനം ചെയ്യരുതെന്നും വളർന്നു വരുന്ന മേഖലയെ കൂടി ഉൾപ്പെടുത്തി വിശകലനം ചെയ്യുമ്പോഴാണ് മാർക്സിസം പ്രസക്തമാകുന്നതെന്നും അദ്ദേഹം കൂട്ടിച്ചേർത്തു.