General (Page 1,477)

കൊച്ചി: ഐ.എസ്.ആർ.ഒ ചാരക്കേസ് ഗൂഢാലോചനയുമായി ബന്ധപ്പെട്ട് നിർണായക വിവരങ്ങൾ പുറത്ത്. കേസിൽ ഒന്നാം പ്രതിയായ എസ്. വിജയൻ മറിയം റഷീദയ്ക്കു നേരെ ലൈംഗികാതിക്രമത്തിനു ശ്രമിച്ചെന്നും ഇതിനു വഴങ്ങാത്തതിനാലാണ് കേസിൽ കുടുക്കിയതെന്നും ഫൗസിയ ഹസൻ വ്യക്തമാക്കി. ചാരക്കേസിലെ മറ്റൊരു പ്രതിയായിരുന്നു മാലി സ്വദേശിനിയായ ഫൗസിയ ഹസൻ. ഹൈക്കോടതിയിൽ നൽകിയ വിശദീകരണത്തിലാണ് ഇവർ ഇക്കാര്യം വെളിപ്പെടുത്തിയത്.

ഐഎസ്ആർഒ ഗൂഢാലോചന അന്വേഷിക്കുന്ന സി.ബി.ഐ സംഘം രജിസ്റ്റർ ചെയ്ത കേസിൽ വിജയനും രണ്ടാം പ്രതി തമ്പി എസ്. ദുർഗാദത്തും നൽകിയ മുൻകൂർ ജാമ്യഹർജിയെ എതിർത്ത് നൽകിയ വിശദീകരണത്തിലാണ് ഫൗലസിയ ഇക്കാര്യം വ്യക്തമാക്കിയത്. ചാരക്കേസിലൂടെ വ്യക്തിപരവും ഔദ്യോഗികവുമായ നേട്ടങ്ങൾക്കു പുറമേ രാഷ്ട്രീയ സാമ്പത്തിക നേട്ടങ്ങളും ഇവരടക്കമുള്ള ഗൂഢാലോചനക്കേസിലെ പ്രതികൾക്ക് ലഭിച്ചെന്നും ഫൗസിയ പറഞ്ഞു. സ്‌പെഷ്യൽ ബ്രാഞ്ച് ഇൻസ്പെക്ടറായിരുന്ന വിജയനും വഞ്ചിയൂർ സ്റ്റേഷൻ ഹൗസ് ഓഫീസറായിരുന്ന തമ്പി എസ്. ദുർഗാദത്തും ചേർന്നാണ് ഔദ്യോഗിക രഹസ്യ നിയമ പ്രകാരം ചാരക്കേസെടുത്തത്. കേന്ദ്ര സർക്കാരിന്റെയോ ഐ.എസ്.ആർ.ഒയുടെയോ പരാതിയില്ലാതെ ഔദ്യോഗിക രഹസ്യനിയമപ്രകാരം കേസെടുക്കാനാവില്ലെന്നിരിക്കെ തങ്ങളെ കേസിൽ കുടുക്കിയതാണെന്നും ഫൗസിയ ഹൈക്കോടതിയിൽ നൽകിയ വിശദീകരണത്തിൽ പറയുന്നു.

മറിയം റഷീദയുടെ വിസാ കാലാവധി 1994 ഒക്ടോബർ 20 ന് അവസാനിക്കാനിരിക്കെ 18 ദിവസം മുമ്പ് കാലാവധി നീട്ടിക്കിട്ടാൻ ഫോറിനേഴ്‌സ് രജിസ്‌ട്രേഷൻ ഓഫീസായ തിരുവനന്തപുരം സിറ്റി പൊലീസ് കമ്മിഷണറുടെ ഓഫീസിൽ പോയിരുന്നു. അവിടെ വിജയൻ മറിയം റഷീദയുടെ പാസ്പോർട്ടും രണ്ട് വിമാന ടിക്കറ്റുകളും വാങ്ങിവച്ചു. കുറച്ചു ദിവസങ്ങൾക്കുശേഷം വിജയൻ മറിയം റഷീദ താമസിക്കുന്ന ഹോട്ടൽ മുറിയിലെത്തി ചില ചോദ്യങ്ങൾ ചോദിച്ചു മടങ്ങി. പിന്നീട് ഒക്ടോബർ എട്ടിന് മുറിയിലെത്തിയ വിജയൻ ഫൗസിയയോട് പുറത്തു പോകാൻ ആവശ്യപ്പെടുകയും മറിയം റഷീദയെ ലൈംഗികമായി ആക്രമിക്കാൻ ശ്രമിക്കുകയും ചെയ്തു. എന്നാൽ മറിയം റഷീദ ബലാത്സംഗ ശ്രമം എതിർക്കുകയും വിജയനെ മുറിയിൽ നിന്നും പുറത്താക്കുകയും ചെയ്തു. ഈ സംഭവത്തിന് ശേഷമാണ് മറിയം റഷീദയുടെ വിസാ കാലാവധി നീട്ടി നൽകാതെ അനധികൃതമായി ഇന്ത്യയിൽ താമസിച്ചെന്ന് ആരോപിച്ച് അറസ്റ്റ് ചെയ്തതും തുടർന്ന് ചാരക്കേസ് സൃഷ്ടിച്ചതും. ബംഗളൂരുവിലെ സ്‌കൂളിൽ മക്കൾക്ക് അഡ്മിഷനെടുക്കാനാണ് 1994 ൽ ഇന്ത്യയിലെത്തിയത്. തിരുവനന്തപുരത്ത് ഹോട്ടൽ സമ്രാട്ടിലാണ് താമസിച്ചത്. പകർച്ചവ്യാധിയെത്തുടർന്ന് മാലിദ്വീപിലേക്കുള്ള വിമാന സർവീസുകൾ റദ്ദാക്കിയ സമയമായിരുന്നു അതെന്നും ഫൗസിയ കോടതിയെ അറിയിച്ചു.

കൊച്ചി: സംസ്ഥാനത്തു 140 കിലോമീറ്ററിൽ കൂടുതൽ ദൈർഘ്യമുള്ള റൂട്ടിൽ സർവീസ് നടത്തുന്ന 220 സ്വകാര്യ ബസുകളുടെ പെർമിറ്റ് പുതുക്കി നൽകില്ല. ബസുകളുടെ പെർമിറ്റ് പുതുക്കി നൽകേണ്ടതില്ലെന്ന് സർക്കാർ തീരുമാനിച്ചു. കെഎസ്ആർടിസിക്കു വേണ്ടിയാണ് വിവിധ ജില്ലകളെ ബന്ധിപ്പിച്ചു വർഷങ്ങളായി സർവീസ് നടത്തിവന്ന സ്വകാര്യ ബസുകളിൽ നിന്നു റൂട്ടുകൾ ഏറ്റെടുക്കാൻ സർക്കാർ തീരുമാനിച്ചത്. ഇതു സംബന്ധിച്ച് സ്വകാര്യ ബസുടമകൾക്ക് ആക്ഷേപം ബോധിപ്പിക്കാൻ ഒരു മാസത്തെ സമയം സർക്കാർ അനുവദിച്ചിട്ടുണ്ട്.

സർക്കാരിന്റെ പുതിയ വിജ്ഞാപനം അനുസരിച്ച് ഈ ദീർഘദൂര റൂട്ടുകളിൽ കെഎസ്ആർടിസിക്കു മാത്രമേ ഇനി സർവീസ് നടത്താൻ കഴിയൂ. കാലങ്ങളായുള്ള കേസിനൊടുവിൽ കെഎസ്ആർടിസിക്ക് അനുകൂലമായി ലഭിച്ച ഉത്തരവിന്റെ അടിസ്ഥാനത്തിലാണ് സർക്കാർ ഉത്തരവ് പുറപ്പെടുവിച്ചത്. പൊതുഗതാഗത മേഖലയിൽ അഗ്രഗേറ്റർ ലൈസൻസ് നൽകാനുള്ള കേന്ദ്ര സർക്കാർ നയത്തിനു വിരുദ്ധമാണ് സർക്കാർ തീരുമാനമെന്ന വിമർശനം ഉയരുന്നുണ്ട്. കെഎസ്ആർടിസിക്കു കീഴിൽ പുതുതായി രൂപീകരിച്ച കെ സ്വിഫ്റ്റ് കമ്പനിക്ക് ഈ റൂട്ടുകൾ കൈമാറാനാണു സർക്കാർ പദ്ധതിയിടുന്നതെന്നാണ് വിവരം.

തൃശൂർ: കരുവന്നൂർ സർവീസ് സഹകരണ ബാങ്ക് തട്ടിപ്പ് കേസുമായി ബന്ധപ്പെട്ട് കൂടുതൽ വിവരങ്ങൾ പുറത്ത്. വിവിധ കാലയളവുകളിലായി ബാങ്കിൽ നിന്നും വെട്ടിച്ച നൂറ് കോടിയിലേറെ രൂപ നിക്ഷേപിച്ചത് റിയൽ എസ്റ്റേറ്റ് മേഖലയിലാണെന്ന് വിവരം. തട്ടിപ്പിലൂടെ ലഭിക്കുന്ന പണത്തിലൂടെ ഭൂമി വാങ്ങിയും വിറ്റും വൻ ലാഭമുണ്ടാക്കി തട്ടിപ്പ് സംഘം ബാങ്കിൽ വീണ്ടും നിക്ഷേപിച്ചിരുന്നതായാണ് റിപ്പോർട്ട്.

നോട്ട് നിരോധന കാലത്ത് ഉൾപ്പെടെ തട്ടിപ്പ് വ്യാപകമായിരുന്നുവെന്നാണ് കണ്ടെത്തൽ. വായ്പയെടുക്കാൻ എത്തുന്നവരുടെ ആധാരമടക്കമുള്ള രേഖകൾ കൈവശപ്പെടുത്തിയ ശേഷമായിരുന്നു തട്ടിപ്പ് നടത്തിയത്. നോട്ട് നിരോധനം കാരണം പണം ഇല്ലെന്നും പ്രതിസന്ധി തീർന്നാൽ ഉടൻ പണം നൽകാമെന്നും പറഞ്ഞ് കബളിപ്പിച്ചായിരുന്നു തട്ടിപ്പ് നടത്തിയിരുന്നത്. പത്ത് ലക്ഷം രൂപ വായ്പയ്ക്ക് അപേക്ഷിച്ച വീട്ടമ്മയ്ക്ക് അങ്ങനെ പണം നൽകിയില്ല. എന്നാൽ വീട്ടമ്മയുടെ പേരിൽ ഭൂമിയുടെ മതിപ്പു വിലയെക്കാൾ മൂന്നിരട്ടി തുക വായ്പയെടുത്ത് തട്ടിപ്പ് നടത്തിയതായാണ് പരാതി.

നൂറ് കോടിയുടെ വെട്ടിപ്പ് നടന്നുവെന്നാണ് പരാതി ലഭിച്ചിരിക്കുന്നത്. എന്നാൽ ബാങ്കിൽ നിന്നും 300 കോടിയോളം രൂപ തട്ടിയെടുത്തതായുള്ള ആരോപണങ്ങളാണ് ഉയരുന്നത്. കഴിഞ്ഞ ഏതാനും ആഴ്ചകളായി ബാങ്കിന്റെ പ്രവർത്തനം അവതാളത്തിലാണെന്ന് തിരിച്ചറിഞ്ഞതിനെ തുടർന്ന് ലക്ഷങ്ങൾ നിക്ഷേപിച്ചവർ പണം പിൻവലിക്കാൻ തുടങ്ങിയിരുന്നു. എന്നാൽ ഇത്തരക്കാർക്ക് ബാങ്ക് നൽകിയത് ആഴ്ച്ചയിൽ പതിനായിരം രൂപ മാത്രമാണ്. നിക്ഷേപകരുടെ പരാതി വ്യാപകമായതോടെയാണ് സംഭവത്തിൽ പരാതി നൽകാൻ ഭരണ സമിതി തീരുമാനിച്ചത്.

ഇരുപത് വർഷത്തോളമായി ബാങ്കിൽ തട്ടിപ്പ് നടക്കുന്നുണ്ടെന്നാണ് റിപ്പോർട്ട്. പെയിന്റിംഗ് തൊഴിലാളിയുടെ പേരിൽ 50 ലക്ഷം രൂപയുടെ വായ്പ അനുവദിച്ചതായും വിവരമുണ്ട്. സഹകരണ വകുപ്പ് നടത്തിയ അന്വേഷണങ്ങളിലാണ് ഇക്കാര്യങ്ങൾ കണ്ടെത്തിയത്.

സി.പി.എം ലോക്കൽ കമ്മിറ്റി മുൻ അംഗമാണ് തട്ടിപ്പ് സംബന്ധിച്ച് ആദ്യം പരാതി ഉന്നയിച്ചത്. വർഷങ്ങൾക്ക് മുമ്പ് തന്നെ ക്രമക്കേട് നടന്നിട്ടും നേതൃത്വം കണ്ടില്ലെന്ന് നടിച്ചുവെന്നായിരുന്നായിരുന്നു ആരോപണം. ബാങ്കുമായി ബന്ധപ്പെട്ട് രൂപീകരിച്ച സബ് കമ്മിറ്റിയിലും അദ്ദേഹം ക്രമക്കേടിനെ കുറിച്ച് വെളിപ്പെടുത്തിയിരുന്നു. എന്നാൽ നടപടി സ്വീകരിക്കാതെ വന്നതോടെയാണ് ഇദ്ദേഹം ജില്ലാ സെക്രട്ടറിയെ സമീപിക്കുന്നത്. തുടർന്ന് ജില്ലാ സെക്രട്ടി അന്വേഷണ കമ്മിഷനെ നിയോഗിച്ചു. പിന്നീട് പോലീസിലും പരാതി നൽകുകയായിരുന്നു.

ബാങ്കിലെ മുൻ സെക്രട്ടറിയടക്കം ആറുപേർക്കെതിരെയാണ് പോലീസ് കേസ് രജിസ്റ്റർ ചെയ്തിരിക്കുന്നത്. എന്നാൽ പാർട്ടിയിലെ ചില നേതാക്കളെ സംരക്ഷിച്ചാണ് പരാതി നൽകിയതെന്നും ആരോപണം ഉയരുന്നുണ്ട്.

പത്തനംതിട്ട: ആറന്മുള ഉതൃട്ടാതി വള്ളം കളി മത്സരമല്ലാതെ, ജലഘോഷയാത്രയായി നടത്തും. ആരോഗ്യ വകുപ്പ് മന്ത്രി വീണ ജോർജിന്റെ അധ്യക്ഷതയിൽ ഓൺലൈനായി ചേർന്ന അവലോകന യോഗത്തിലാണ് തീരുമാനം. തിരുവോണ തോണി വരവേൽപ് ആചാരപരമായി നടത്താനും തീരുമാനമായി. ആറന്മുള ഉത്രട്ടാതി വള്ളംകളി, തിരുവോണത്തോണി വരവ്, അഷ്ടമിരോഹിണി വള്ളസദ്യ എന്നിവയുടെ നടത്തിപ്പ് സംബന്ധിച്ച കാര്യങ്ങളിൽ തീരുമാനമെടുക്കാനായിരുന്നു യോഗം ചേർന്നത്.

ഓഗസ്റ്റ് 21 ന് തിരുവോണ തോണി വരവേൽപ്പ് ആചാരപരമായി 40 പേരെ പങ്കുടുപ്പിച്ചുകൊണ്ട് നടത്തും. കഴിഞ്ഞ വർഷം 20 പേർക്കായിരുന്നു തോണിയിൽ പ്രവേശനം അനുവദിച്ചിരുന്നത്. നിശ്ചയിക്കപ്പെട്ട എണ്ണം കൃത്യമായി പാലിക്കുന്നുണ്ടെന്ന് ഉറപ്പാക്കേണ്ട ചുമതല പള്ളിയോട സേവാസംഘത്തിനും ബന്ധപ്പെട്ട വകുപ്പുകൾക്കുമായിരിക്കും. തിരുവോണ തോണിക്ക് അകമ്പടി സേവിക്കുന്നതിനായി 3 മേഖലയിൽ നിന്ന് ഓരോ പള്ളിയോടങ്ങൾ എന്ന ക്രമത്തിൽ 3 പള്ളിയോടങ്ങളെ പങ്കെടുക്കാൻ അനുവദിക്കും. ഓരോ പള്ളിയോടത്തിലും 40 പേർ വീതം പങ്കെടുക്കാൻ അനുമതിയുണ്ട്. പള്ളിയോടത്തിലും തിരുവോണത്തോണിയിലും പങ്കെടുക്കുന്നവർ ഒരു ഡോസ് കോവിഡ് വാക്‌സിനെങ്കിലും എടുത്തിരിക്കണമെന്നാണ് നിർദ്ദേശം. കോവിഡ് നെഗറ്റീവാണെന്ന ആർടിപിസിആർ പരിശോധനാ ഫലവും വേണം. രണ്ട് വാക്‌സിൻ ഡോസുകളും എടുത്തവർക്ക് ആർടിപിസിആർ പരിശോധനാ ഫലം നിർബന്ധമില്ല.

തിരുവോണത്തോണിയിലും പള്ളിയോടത്തിലും വരുന്നവരിൽ ഒരു ഡോസ് വാക്‌സിൻ എങ്കിലും എടുത്തു എന്ന് ഉറപ്പാക്കാൻ പ്രത്യേക വാക്‌സിനേഷൻ ക്യാംപ് ആരോഗ്യ വകുപ്പ് നേതൃത്വത്തിൽ നടത്തും. ഇതിനാവശ്യമായ ലിസ്റ്റ് പള്ളിയോട സേവാസംഘം നൽകും. ഉത്രട്ടാതി വള്ളം ഓഗസ്റ്റ് 25 ന് 3 പള്ളിയോടങ്ങൾ പങ്കെടുത്തുകൊണ്ട് ജല ഘോഷയാത്രയായി നടത്തും. ഇവർക്ക് ക്ഷേത്രക്കടവിൽ വെറ്റപുകയില, മാല, അവൽ, പ്രസാദം എന്നിവ നൽകി പള്ളിയോട സേവാസംഘം സ്വീകരിക്കും.

കോവിഡ് രണ്ടാം വ്യാപനത്തെ തുടർന്ന് മാറ്റി വച്ചിരിക്കുന്ന പള്ളിയോട സേവാസംഘം ഭരണ സമിതി തെരഞ്ഞെടുപ്പ് രോഗ വ്യാപനം കുറയുന്ന മുറയ്ക്ക് ഓഗസ്റ്റോടെ നടത്തും. പുതിയ ഭാരവാഹികളെക്കൂടി പങ്കെടുപ്പിച്ചുകൊണ്ട് ഓഗസ്റ്റ് പകുതിയോടെ വീണ്ടും അവലോകന യോഗം ചേർന്ന് അഷ്ടമി രോഹിണി വള്ളസദ്യ, വള്ളസദ്യ വഴിപാട് എന്നിവയുടെ നടത്തിപ്പ് സംബന്ധിച്ച് തീരുമാനം എടുക്കും. എല്ലാചടങ്ങുകളിലും നിശ്ചയിക്കപ്പെട്ടവർക്ക് മാത്രമേ പ്രവേശനം ഉണ്ടായിരിക്കുകയുള്ളുവെന്നും പൊതുജനങ്ങൾക്ക് പ്രവേശനം ഉണ്ടാകില്ലെന്നും ആരോഗ്യ വകുപ്പ് അറിയിച്ചു.

തൃശൂർ: കരുവന്നൂർ സഹകരണ ബാങ്കിലെ അഴിമതി പുറത്തുവന്നതിന് പിന്നാലെ തട്ടിപ്പ് സംബന്ധിച്ച കൂടുതൽ വിവരങ്ങൾ പുറത്ത്. അഴിമതി കേസിലെ 3 പ്രതികളിലൂടെ മാത്രം ബാങ്കിൽ നിന്നും വായ്പയായി പോയത് 76 കോടി രൂപയാണെന്നാണ് കണ്ടെത്തിയിരിക്കുന്നത്. ഇവയിൽ ഒട്ടുമിക്ക വായ്പകളിലും ഒരു രൂപ പോലും തിരിച്ചടവുണ്ടായിട്ടില്ല. സഹകരണ വകുപ്പു നടത്തുന്ന അന്വേഷണത്തിനു സമാന്തരമായി പാർട്ടി നടത്തിയ അന്വേഷണത്തിലാണ് ഇക്കാര്യങ്ങൾ കണ്ടെത്തിയിരിക്കുന്നത്. ദിവസക്കൂലിക്കാരായ അനേകരുടെ പേരിലാണ് അരക്കോടി വരെ വായ്പ നൽകിയത്.

മാനേജരുടെ ഭാര്യയ്ക്കും ബന്ധുക്കൾക്കും പാർട്ടിപ്രവർത്തകർക്കും വരെ വായ്പ അനുവദിച്ചു. സിപിഎം നയിക്കുന്ന ബാങ്കിൽ 125 കോടിയിലേറെ രൂപയുടെ അഴിമതിയാണ് നടന്നത്. വായ്പാ തട്ടിപ്പു കേസിൽ പൊലീസ് പ്രതിചേർത്ത മുൻ മാനേജർ ക്രമവിരുദ്ധമായി അനുവദിച്ച 26 കോടിയുടെ വായ്പയിൽ ഇടപാട് അനുവദിച്ചവരിലാണ് മാനേജരുടെ ഭാര്യയും ഭാര്യാപിതാവും സ്വന്തം മാതാപിതാക്കളും വരെയുള്ളത്. 52 പേർക്കു 50 ലക്ഷം വീതം വായ്പ നൽകിയ കൂട്ടത്തിലാണ് സ്വന്തക്കാരും ബന്ധക്കാരുമുള്ളതെന്ന് പാർട്ടി നിയോഗിച്ച അന്വേഷണ സംഘം കണ്ടെത്തി.

സഹകരണ ബാങ്ക് വായ്പാ ചട്ടങ്ങൾ പ്രകാരം ഒരാൾക്കു പരമാവധി അനുവദിക്കാവുന്ന വായ്പാത്തുക 50 ലക്ഷം രൂപയാണ്. ഈ വായ്പാ പരിധി മറികടന്നാൽ അന്വേഷണം ഉണ്ടായേക്കുമെന്നതിനാലാണ് കൃത്യം 50 ലക്ഷം രൂപ വീതം ഒട്ടേറെപ്പേർക്കു വായ്പ നൽകി പ്രതികൾ തട്ടിപ്പു നടത്തിയത്.

കേസിൽ പ്രതിചേർക്കപ്പെട്ടവർ അല്ലാതെയും വായ്പാ തട്ടിപ്പ് നടന്നിട്ടുള്ളതായിട്ടാണ് കണ്ടെത്തിയിരിക്കുന്നത്. ഇതിൽ 4 പേർ വഴി 43 കോടി രൂപ ക്രമവിരുദ്ധമായി വായ്പ അനുവദിച്ചെന്നു സംശയിക്കുന്നുണ്ട്. 10 ലക്ഷം രൂപയുടെ മാസത്തവണ നിക്ഷേപ പദ്ധതിയിൽ ഒരാളുടെ പേരിൽ മാത്രം നറുക്കെടുപ്പു നടത്തുക, 2 തവണ പണം അനുവദിക്കുക തുടങ്ങിയ ഏർപ്പാടുകളും നടന്നിരുന്നതായി അന്വേഷണത്തിൽ തെളിഞ്ഞു.

കൊച്ചി: ട്രാൻസ്ജെൻഡർ ആക്ടിവിസ്റ്റ് അനന്യ കുമാരി അലക്‌സ് മരിച്ച നിലയിൽ. കൊച്ചി, ഇടപ്പള്ളി ലുലുമാളിന് സമീപമുള്ള ഫ്ളാറ്റിൽ തൂങ്ങി മരിച്ച നിലയിലാണ് അനന്യ കുമാരി അലക്‌സിനെ കണ്ടെത്തിയത്. റേഡിയോ ജോക്കി, അവതാരക എന്നീ നിലകളിൽ പ്രശസ്തയാണ് അനന്യ കുമാരി. കേരളത്തിലെ ആദ്യ ട്രാൻസ്ജെൻഡർ റേഡിയോ ജോക്കിയായിരുന്നു അനന്യ.

സംസ്ഥാനത്തെ ആദ്യ ട്രാൻസ് സ്ഥാനാർത്ഥിയെന്ന വിശേഷണത്തോടെ കഴിഞ്ഞ നിയമസഭാ തിരഞ്ഞെടുപ്പിൽ മലപ്പുറം വേങ്ങര മണ്ഡലത്തിൽ മത്സരിക്കാനായി നാമനിർദ്ദേശ പത്രിക സമർപ്പിച്ചിരുന്നു. എന്നാൽ ടിക്കറ്റ് നൽകിയ ഡി.എസ്.ജി.പിയുമായുള്ള അഭിപ്രായഭിന്നതകളെ തുടർന്ന് പിന്നീട് ഇവർ മത്സര രംഗത്തു നിന്നും പിൻമാറി.

ലിംഗമാറ്റ ശസ്ത്രക്രിയയ്ക്കിടെ പറ്റിയ പിഴവ് മൂലം താൻ ശാരീരിക അസ്വസ്ഥതകൾ അനുഭവിക്കുന്നുണ്ടെന്ന് വ്യക്തമാക്കി സ്വകാര്യ ആശുപത്രിയിലെ ഡോക്ടർക്കെതിരെ ആരോപണവുമായി അനന്യ അടുത്തിടെ രംഗത്തെത്തിയിരുന്നു. കഴിഞ്ഞ വർഷമായിരുന്നു അനന്യ ലിംഗമാറ്റ ശസ്ത്രക്രിയ നടത്തിയത്. ശസ്ത്രക്രിയ കഴിഞ്ഞ് ഒരു വർഷം പിന്നിട്ടിട്ടും തനിക്ക് ജോലി ചെയ്യാൻ സാധിക്കുന്നില്ലെന്നും ശാരീരിക പ്രശ്‌നങ്ങൾ നേരിടുന്നുണ്ടെന്നും അനന്യ ആരോപിച്ചിരുന്നു.

തിരുവനന്തപുരം: വനം മന്ത്രി എ.കെ.ശശീന്ദ്രനെതിരെ ഗവർണർക്കും വനിതാ കമ്മീഷനിലും പരാതി. യൂത്ത് കോൺഗ്രസ് സംസ്ഥാന സെക്രട്ടറി വീണാ എസ് നായരാണ് ശശീന്ദ്രനെതിരെ പരാതി നൽകിയത്. പീഡനപരാതി ഒതുക്കാൻ ശ്രമിച്ച സംഭവവുമായി ബന്ധപ്പെട്ടാണ് ശശീന്ദ്രനെതിരെ പരാതി നൽകിയിരിക്കുന്നത്. സ്ത്രീക്കെതിരായ കുറ്റകൃത്യം മനപൂർവ്വം മറച്ച് വയ്ക്കാൻ ശ്രമിച്ചെന്നാണ് പരാതിയിൽ ആരോപിക്കുന്നത്.

ഒരു മന്ത്രി തന്നെ സ്ത്രീപീഡന പരാതി ഒതുക്കി തീർക്കാൻ ശ്രമിക്കുന്നത് കേട്ട് കേൾവിയില്ലാത്ത സംഭവമാണ്. ഇന്ത്യൻ ഭരണഘടന മുന്നോട്ടു വയ്ക്കുന്ന മൂല്യങ്ങൾക്ക് എതിരായ സംഭവമാണിത്. ധാർമികമായും നിയമപരമായും ഈ മന്ത്രിക്കു തൽസ്ഥാനത്തു തുടരാൻ അവകാശമില്ലെന്നും പരാതിയിൽ വ്യക്തമാക്കുന്നു.

ശശീന്ദ്രനെ മന്ത്രി സഭയിൽ നിന്നും പുറത്താക്കാൻ മുഖ്യമന്ത്രിക്ക് നിർദ്ദേശം നൽകണം. സംസ്ഥാനത്തെ സ്ത്രീകളുടെ ആകെ അഭിമാനം ഉയർത്തിപ്പിടിക്കാൻ മന്ത്രിയെ പുറത്താക്കാൻ മുൻകൈ എടുക്കണമെന്ന് ഗവർണർക്ക് നൽകിയ കത്തിൽ വീണ ആവശ്യപ്പെടുന്നു. മന്ത്രിക്കെതിരെ നിയമപരമായ നടപടി സ്വീകരിക്കാൻ സർക്കാരിനോട് ശിപാർശ ചെയ്യണമെന്നാണ് വനിതാ കമ്മീഷന് നൽകിയ പരാതിയിലും വീണ ചൂണ്ടിക്കാട്ടുന്നത്.

യൂത്ത് ലീഗ് നേതാവ് അഡ്വ. സജാൽ എറണാകുളം സെൻട്രൽ പൊലീസ് സ്റ്റേഷനിലും മന്ത്രിക്കെതിരെ പരാതി നൽകിയിട്ടുണ്ട്.