General (Page 1,444)

തിരുവനന്തപുരം: സംസ്ഥാനത്തെ ഹയർ സെക്കൻഡറി, വൊക്കേഷണൽ ഹയർ സെക്കൻഡറി ഒന്നാം വർഷ പരീക്ഷാ തീയതികളിൽ മാറ്റമില്ല. നേരത്തെ നിശ്ചയിച്ച പ്രകാരം സെപ്റ്റംബർ 6 മുതൽ 16 വരെയാണ് ഹയർസെക്കൻഡറി പരീക്ഷ നടത്തുന്നത്. സെപ്റ്റംബർ 7 മുതൽ 16 വരെയാണ് വോക്കേഷണൽ ഹയർസെക്കൻഡറി പരീക്ഷാ തീയതി.

ഒന്നാം വർഷ ഹയർ സെക്കൻഡറി, വോക്കേഷണൽ ഹയർ സെക്കൻഡറി മാതൃകാ പരീക്ഷകൾ ഓഗസ്റ്റ് 31 ന് ആരംഭിക്കും. സെപ്റ്റംബർ 4 വരെയാണ് മോഡല് പരീക്ഷ. കോവിഡ് വൈറസ് വ്യാപനത്തിന്റെ പശ്ചാത്തലത്തിൽ പരീക്ഷകൾ വിദ്യാർഥികൾക്ക് രക്ഷിതാവിന്റെ മേൽനോട്ടത്തിൽ വീട്ടിലിരുന്ന് പരീക്ഷ എഴുതാം. പരീക്ഷ ടൈംടേബിൾ പ്രകാരം നിശ്ചിത സമയത്ത് വിദ്യാർഥികൾക്ക് ചോദ്യപേപ്പർ www.dhsekerala.gov.in എന്ന വെബ്സൈറ്റിൽ നിന്ന് ഡൗൺലോഡ് ചെയ്ത് എടുക്കാാം. മാതൃകാ പരീക്ഷ എഴുതിയതിനു ശേഷം അധ്യാപകരുമായി ഡിജിറ്റൽ മാദ്ധ്യമങ്ങൾ വഴി സംശയ ദുരീകരണവും നടത്താം.

അതേസമയം ഹയർസെക്കൻഡറി,വൊക്കേഷണൽ ഹയർ സെക്കൻഡറി ഒന്നാം ഘട്ട അലോട്ട്‌മെന്റ് തീയതി തീരുമാനിച്ചു. ഓഗസ്റ്റ് 24 മുതൽ വിദ്യാർത്ഥികൾക്ക് രണ്ടു സ്ട്രീമിലേയ്ക്കും അപേക്ഷ സമർപ്പിച്ച് തുടങ്ങാം. അപേക്ഷ നൽകാനുള്ള അവസാന തീയതി സെപ്റ്റംബർ 3 ആണ്. ട്രയൽ അലോട്ട്‌മെന്റ് സെപ്റ്റംബർ 7 നും ആദ്യ അലോട്ട്‌മെന്റ് 13 നും നടക്കും.

കൊച്ചി: 60 വയസ് കഴിഞ്ഞ എല്ലാ പട്ടിക വിഭാഗക്കാർക്കും ഓണസമ്മാനവുമായി സംസ്ഥാന സർക്കാർ. സംസ്ഥാനത്ത് 60 വയസ് കഴിഞ്ഞ എല്ലാ പട്ടിക വിഭാഗക്കാർക്കും 1000 രൂപ വീതം സംസ്ഥാന സർക്കാർ അനുവദിച്ചു. മന്ത്രി കെ രാധാകൃഷ്ണനാണ് ഇക്കാര്യം അറിയിച്ചത്. പൊതുസമൂഹത്തിന്റെ മുഖ്യധാരയിലേക്ക് ഇനിയും എത്തപ്പെടേണ്ടവരും, സമൂഹത്തിന്റെ പ്രത്യേക കരുതലിന് അർഹതയുള്ളവരുമാണ് പട്ടികവർഗ്ഗ വിഭാഗക്കാരെന്ന് മന്ത്രി വ്യക്തമാക്കി.

ഓണത്തിന്റെ ഉത്സവനാളുകളിൽ പട്ടിക വിഭാഗത്തിലെ മുതിർന്ന പൗരൻമാരുടെ ക്ഷേമം ഉറപ്പാക്കുന്നതിനായി മുഖ്യമന്ത്രിയുടെ ഓണസമ്മാനമായി’ 5.76 കോടി രൂപ അനുവദിച്ചിരിക്കുകയാണെന്ന് അദ്ദേഹം പറഞ്ഞു. ഇതിലൂടെ 60 വയസ്സ് കഴിഞ്ഞ എല്ലാ പട്ടികവർഗ്ഗ വിഭാഗക്കാർക്കും ഓണസമ്മാനമായി 1000/- രൂപ വീതം ലഭിക്കും. ഇത് പ്രകാരം പട്ടികവർഗ്ഗ വിഭാഗത്തിലുള്ള 57655 പേർക്കായിരിക്കും ഇത്തവണ മുഖ്യമന്ത്രിയുടെ ഓണസമ്മാനം ലഭിക്കുക. പട്ടികവർഗ്ഗ വികസന വകുപ്പ് മുഖേന അടിയന്തിരമായി ഈ ധനസഹായം
അർഹരിലേക്ക് എത്തിക്കുന്നതിനുള്ള നടപടികൾ സ്വീകരിക്കുവാൻ നിർദ്ദേശം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു.

മലപ്പുറം: ഗാന്ധി ഭവനിലെ അന്തേവാസികൾക്കൊപ്പം ഓണം ആഘോഷിച്ച് കോൺഗ്രസ് എംപി രാഹുൽ ഗാന്ധി. മൂന്ന് ദിവസത്തെ സന്ദർശനത്തിനായാണ് രാഹുൽ ഗാന്ധി കേരളത്തിലെത്തിയത്. വണ്ടൂർ ഗാന്ധിഭവൻ സ്‌നേഹമരം ഓൾഡ് ഏജ് ഹോം അദ്ദേഹം സന്ദർശിച്ചു. ഗാന്ധി ഭവനിലെ അന്തേവാസികൾക്കൊപ്പം ഓണസദ്യയും കഴിച്ച് അന്തേവാസികൾക്കുള്ള ഓണക്കോടിയും സമ്മാനിച്ച ശേഷമാണ് അദ്ദേഹം മടങ്ങിയത്.

ചൊവ്വാഴ്ച്ച ഉച്ചയ്ക്ക് രണ്ടുമണിയോടെയാണ് കാരക്കാപറമ്പിലെ ഗാന്ധിഭവനിൽ രാഹുൽ ഗാന്ധി എത്തിയത്. സംസ്ഥാനത്തെ വിവിധ ഭാഗങ്ങളിൽ നിന്നുള്ള പതിനൊന്ന് അന്തേവാസികളാണ് ഗാന്ധിഭവനിലുള്ളത്. ഉച്ചഭക്ഷണത്തിനു ശേഷമാണ് അന്തേവാസികൾക്ക് അദ്ദേഹം ഓണക്കോടി സമ്മാനിച്ചത്. ഒരുമണിക്കൂറോളം സമയം അദ്ദേഹം അന്തേവാസികൾക്കൊപ്പം ചെലവഴിച്ചു.

എഐസിസി ജനറൽ സെക്രട്ടറി കെ.സി.വേണുഗോപാൽ, കെപിസിസി പ്രസിഡന്റ് കെ.സുധാകരൻ, എ.പി.അനിൽകുമാർ എംഎൽഎ, ഗാന്ധിഭവൻ ചെയർമാൻ ഡോ.പുനലൂർ സോമരാജൻ, ഡിസിസി പ്രസിഡന്റ് ഇ.മുഹമ്മദ് കുഞ്ഞി, ബ്ലോക്ക് പഞ്ചായത്ത് പ്രസിഡന്റ് കെ.സി.കുഞ്ഞിമുഹമ്മദ്, ജില്ലാ പഞ്ചായത്തംഗം ആലിപ്പറ്റ ജമീല, വണ്ടൂർ പഞ്ചായത്ത് പ്രസിഡന്റ് പി.റുബീന, പോരൂർ പഞ്ചായത്ത് പ്രസിഡന്റ് എൻ.മുഹമ്മദ് ബഷീർ, കോൺഗ്രസ് നേതാക്കളായ ആര്യാടൻ ഷൗക്കത്ത്, വി.എ.കരീം, കെ.ടി.അജ്മൽ, ഷൈജൽ എടപ്പറ്റ, ടി.വിനയദാസ്, കളത്തിൽ കുഞ്ഞാപ്പഹാജി, മുരളി കാപ്പിൽ, കെ.ഫസൽ ഹഖ്, സി.കെ.ജയദേവ്, കെ.സുരേന്ദ്രനാഥൻ, സ്‌നേഹാരാമം മാനേജർ പി.കെ.ശ്യാമള എന്നിവർ പങ്കെടുത്തു

തിരുവനന്തപുരം: ഓണക്കാലത്ത് ഓൺലൈൻ ഷോപ്പിംഗ് ഉത്സവം ആരംഭിച്ച് കുടുംബശ്രീ. കുടുംബശ്രീയുടെ ഓൺലൈൻ പോർട്ടലായ www.kudumbashreebazar.com വഴി ‘ഓണം ഉത്സവ്’ എന്ന പേരിലാണ് കുടുംബശ്രീ ഷോപ്പിംഗ് ഉത്സവം ആരംഭിച്ചിരിക്കുന്നത്. ഓഗസ്റ്റ് 18 മുതലാണ് ഓൺലൈൻ ഷോപ്പിംഗ് ഉത്സവം. ഓണസദ്യക്കായുള്ള കുടുംബശ്രീയുടെ മുഴുവൻ ഉൽപന്നങ്ങളും ഇതിലൂടെ വാങ്ങാൻ കഴിയും. 31 വരെയാണ് ഓൺലൈൻ ഷോപ്പിംഗ്. ഓണസദ്യയൊരുക്കാനുള്ള പായസം മിക്‌സും ചിപ്‌സും ശർക്കരവരട്ടിയും ഉൾപ്പെടെയുള്ളവ ഒൺലൈനിലൂടെ ലഭിക്കും.

കുടുംബശ്രീ നൽകുന്ന 10 ശതമാനവും സംരംഭകർ നൽകുന്നതും കൂടി ചേർത്ത് 40% വരെ ഡിസ്‌കൗണ്ട് നൽകിയാണു എല്ലാ ഉത്പന്നങ്ങളും വിൽപന നടത്തുന്നതെന്ന് അധികൃതർ അറിയിച്ചു. 1000 രൂപയിൽ കൂടുതൽ ഉൽപന്നങ്ങൾ വാങ്ങുന്നവർക്ക് 10% അധിക ഡിസ്‌ക്കൗണ്ടും ലഭിക്കും.

ഓർഡർ ചെയ്യുന്ന ഉൽപന്നങ്ങൾ തപാൽ വകുപ്പുമായി ചേർന്ന് ഇന്ത്യയിൽ എവിടെയും ഡെലിവറി ചാർജ് ഇല്ലാതെ എത്തിക്കുമെന്നതാണ് മറ്റൊരു പ്രത്യേകത. 18 ന് ഉച്ചയ്ക്കു 12 മണിക്ക് മന്ത്രി എം.വി ഗോവിന്ദനാണ് ഷോപ്പിംഗ് ഉത്സവിന്റെ ഉദ്ഘാടനം നിർവ്വഹിക്കുന്നത്. വിവിധ തരത്തിലുള്ള ചിപ്‌സുകൾ, ശർക്കരവരട്ടി, അച്ചാറുകൾ, ധാന്യപ്പൊടികൾ, കറിപ്പൊടികൾ, മസാലക്കൂട്ട്, ജൈവ അരി, ജാം, സ്‌ക്വാഷ്, കശുവണ്ടി, വാളൻപുളി, സോപ്പ്, ലോഷൻ, സാനിറ്റൈസർ, മാസ്‌ക് എന്നിവ ഓൺലൈനിലൂടെ വാങ്ങാൻ കഴിയും.

ഇടുക്കി ജില്ലയിലെ ഗോത്രവർഗ മേഖലയിലെ സംരംഭകർ തയ്യാറാക്കുന്ന കലർപ്പില്ലാത്ത ബ്രാൻഡഡ് ഉൽപന്നങ്ങളായ കൂവപ്പൊടി, ചെറുതേൻ, കുടംപുളി, പാലക്കാട് ജില്ലയിലെ അട്ടപ്പാടിയിൽ നിന്നുളള സംരംഭകർ ഹിൽവാല്യു എന്ന പേരിൽ ബ്രാൻഡ് ചെയ്ത് തയാറാക്കുന്ന ഉൽപന്നങ്ങളായ തേൻ, റാഗി, ചോളം, തിന, വരഗ് കറുവപ്പട്ട, കുരുമുളക്, ഏലം, ഗ്രാമ്പൂ, വെളിച്ചെണ്ണ, തൃശൂർ ജില്ലയിലെ അതിരപ്പളളിയിൽ നിന്നുള്ള ബ്രാൻഡഡ് ഉൽപന്നങ്ങളായ കാപ്പിപ്പൊടി, തേൻ, വരഗ്, കൂടാതെ നെല്ലിക്കയും കാന്താരിമുളകും ചേർന്ന അച്ചാർ തുടങ്ങിയ ഉത്പന്നങ്ങളും ഓൺലൈനിലുണ്ട്.

കൊച്ചി: അടിയന്തര സാഹചര്യങ്ങളിൽ അതിർത്തി കടന്നു പോകുന്നവരെ തടയരുതെന്നു കർണാടക സർക്കാരിന് നിർദ്ദേശം നൽകി ഹൈക്കോടതി. ഇതുസംബന്ധിച്ച ഇടക്കാല ഉത്തരവ് കോടതി പുറത്തിറക്കി. മരണം, മെഡിക്കൽ ആവശ്യങ്ങൾ തുടങ്ങിയവയ്ക്കായി യാത്ര ചെയ്യുന്നവരെ തടയരുതെന്നാണ് ഇടക്കാല ഉത്തരവിൽ കോടതി നൽകിയിരിക്കുന്ന നിർദ്ദേശം.

യാത്ര ചെയ്യുന്ന വാഹനം ആംബുലൻസ് വേണം എന്ന് നിർബന്ധിക്കരുതെന്നും സ്വകാര്യ വാഹനങ്ങളിൽ ആണെങ്കിലും അതിർത്തി കടന്നു യാത്ര ചെയ്യാൻ അനുവദിക്കണമെന്നും മതിയായ രേഖകൾ ഉള്ളവരെ തടയരുതെന്നും കോടതി നിർദ്ദേശിക്കുന്നു. കർണാടക ഹൈക്കോടതി ഉത്തരവിന്റെ അടിസ്ഥാനത്തിലാണ് നിയന്ത്രണം കർശനമാക്കിയതെന്നാണ് സർക്കാർ കോടതിയെ അറിയിച്ചിരുന്നത്.

കേരളത്തിൽ നിന്നും വരുന്നവർക്ക് നിയന്ത്രണങ്ങളേർപ്പെടുത്തിയ കർണാടക സർക്കാരിന്റെ നടപടിയിൽ ഇളവ് തേടി മഞ്ചേശ്വരം എംഎൽഎ എ കെ എം അഷ്‌റഫ് ആണ് കേരള ഹൈക്കോടതിയെ സമീപിച്ചത്. കേരളത്തിൽ നിന്നുള്ളവർക്ക് കർശന നിയന്ത്രണം ഏർപ്പെടുത്തിയ കർണാടക സർക്കാർ നടപടി പുന:പരിശോധിക്കണമെന്നാണ് ഹൈക്കോടതിയിൽ സമർപ്പിച്ച പൊതുതാത്പര്യ ഹർജിയിൽ ആവശ്യപ്പെട്ടിരുന്നത്. വാക്‌സിൻ സ്വീകരിച്ച ശേഷവും കർണാടകത്തിലേക്ക് വരുന്നവർ 72 മണിക്കൂറിനുള്ളിൽ എടുത്ത ആർടിപിസിആർ ഫലം വേണമെന്ന കർണാടക സർക്കാരിന്റെ നിബന്ധനയെ ചോദ്യം ചെയ്ത് സമർപ്പിച്ച ഹർജിയിൽ കർണാടക സർക്കാരിന്റെ നിലപാട് ഭരണഘടന ഉറപ്പു നൽകുന്ന സ്വഭാവിക നീതിയുടെ ലംഘനമാണെന്നും ആരോപിക്കുന്നു.

കൊച്ചി : മുൻ സംസ്ഥാന പോലീസ് മേധാവി ലോക്‌നാഥ് ബെഹ്‌റയെ കൊച്ചി മെട്രോ എംഡിയായി നിയമിക്കാൻ തീരുമാനിച്ച് സംസ്ഥാന സർക്കാർ. ചൊവ്വാഴ്ച ചേർന്ന മന്ത്രിസഭാ യോഗത്തിലാണ് ഇക്കാര്യത്തിൽ അന്തിമ തീരുമാനമായത്. മൂന്ന് വർഷത്തേക്കാണ് നിയമനം.

സംസ്ഥാനത്ത് ആദ്യമായാണ് വിരമിച്ച ഐപിഎസ് ഉദ്യോഗസ്ഥൻ കൊച്ചി മെട്രോയുടെ എംഡിയാകുന്നത്. 1985 ബാച്ച് ഐപിഎസ് ഉദ്യോഗസ്ഥനാണ് ലോക്‌നാഥ് ബെഹ്റ. ഡിജിപി പദവിയിലുള്ള സംസ്ഥാന പോലീസ് മേധാവി, വിജിലൻസ് ഡയറക്ടർ, ജയിൽ മേധാവി, അഗ്‌നിരക്ഷാ സേനാ വിഭാഗം മേധാവി തുടങ്ങിയ തസ്തികകളിൽ അദ്ദേഹം സേവനം അനുഷ്ഠിച്ചിട്ടുണ്ട്. എൻഐഎയിൽ അഞ്ചുവർഷവും സിബിഐയിൽ 11 വർഷവും അദ്ദേഹം പ്രവർത്തിച്ചു.