General (Page 1,399)

കോഴിക്കോട്: സാമ്പത്തിക പ്രതിസന്ധിയ്ക്കിടയിലും സംസ്ഥാന സർക്കാർ ധൂർത്ത് തുടരുന്നു. മുഖ്യമന്ത്രിയുടെ എസ്‌കോർട്ട് ജോലിക്കായി നാല് ആഢംബര കാറുകളാണ് വാങ്ങുന്നത്. പ്രത്യേക കേസായി പരിഗണിച്ചാണ് ആഭ്യന്തര വകുപ്പ് കാറുകൾ വാങ്ങാൻ അനുമതി നൽകിയിരിക്കുന്നത്. പഴക്കം ചെന്ന രണ്ട് കാറുകൾ മാറ്റണമെന്ന സംസ്ഥാന പൊലീസ് മേധാവിയുടെ അപേക്ഷയുടെ അടിസ്ഥാനത്തിലാണ് ലക്ഷങ്ങൾ മുടക്കി നാല് കാറുകൾ വാങ്ങാൻ അനുമതി നൽകിയത്.

മുഖ്യമന്ത്രിയുടെ എസ്‌കോർട്ട് ജോലിക്കായി ഉപയോഗിക്കുന്ന രണ്ട് ഇന്നവോ ക്രിസ്റ്റ കാറുകൾ മാറ്റി പുതിയത് വാങ്ങണമെന്ന് ആവശ്യപ്പെട്ട് കഴിഞ്ഞ മെയ് 29 നാണ് സംസ്ഥാന പൊലീസ് മേധാവി ആഭ്യന്തര വകുപ്പിന് കത്ത് സമർപ്പിച്ചത്. ഈ വാഹനങ്ങളുടെ കാര്യക്ഷമത കുറഞ്ഞതിനാൽ പകരം പുതിയ കാറുകൾ വാങ്ങാൻ അനുവദിക്കണമെന്നായിരുന്നു കത്തിൽ പറഞ്ഞിരുന്നത്.

ഇത് പരിഗണിച്ച ശേഷം ആഭ്യന്തര വകുപ്പ് അഡീഷണൽ ചീഫ് സെക്രട്ടറി നാല് ലക്ഷ്യറി കാറുകൾ വാങ്ങുന്നതിന് അനുമതി നൽകികൊണ്ടുള്ള ഉത്തരവിറക്കി. മൂന്ന് ഇന്നോവ ക്രീസ്റ്റയും ഒരു ടാറ്റാ ഹാരിയറും വാങ്ങാനുള്ള അനുമതി നൽകുന്നുവെന്നാണ് ഉത്തരവിൽ വ്യക്തമാക്കിയിരിക്കുന്നത്. 62.43 ലക്ഷം രൂപ ഇതിനായി വിനിയോഗിക്കാമെന്നും ഉത്തരവിൽ വിശദമാക്കുന്നു.

ഒന്നര ലക്ഷം കിലോമീറ്റർ ഓടി കഴിഞ്ഞാൽ വാഹനങ്ങളുടെ കാര്യക്ഷമത കുറയുമെന്നാണ് ആഭ്യന്തര വകുപ്പിലെ ഉന്നതർ മാദ്ധ്യമങ്ങളോട് വ്യക്തമാക്കിയത്. പൈലറ്റ് എക്‌സ്‌കോർട്ട് സർവീസിന് കാര്യക്ഷമത കുറഞ്ഞ വാഹനങ്ങൾ ഉപയോഗിക്കാൻ കഴിയില്ലെന്നും ഈ സാഹചര്യത്തിലാണ് പുതിയ കാറുകൾ വാങ്ങുന്നതെന്നും ഉന്നത വൃത്തങ്ങൾ പറയുന്നു. പുതുതായി വാങ്ങുന്നവയിൽ രണ്ട് വാഹനങ്ങൾ ടൂറിസം വകുപ്പിന് വേണ്ടി ഉപയോഗിക്കുമെന്നും അടിയന്തര സാഹചര്യങ്ങളിൽ മുഖ്യമന്ത്രിയുടെ ആവശ്യത്തിനായി ഈ വാഹനങ്ങൾ ഉപയോഗിക്കാൻ കഴിയുമെന്നും ആഭ്യന്തര വകുപ്പ് വിശദമാക്കിയിട്ടുണ്ട്.

തിരുവനന്തപുരം: നിയമസഭാ കയ്യാങ്കളി കേസിലെ പ്രതികളായ ഇടത് നേതാക്കളുടെ വാദത്തിനെതിരെ പരിഹാസവുമായി വ്യവസായി കൊച്ചൗസേഫ് ചിറ്റിലപ്പിള്ളി. ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം. 2015 ലെ ബജറ്റ് ദിനത്തിൽ നിയമസഭയിൽ സ്പീക്കറുടെ കസേര മറിച്ചിടുന്നതും കമ്പ്യൂട്ടർ തകർക്കുന്നതും ഉൾപ്പെടെയുള്ള ദൃശ്യങ്ങൾ വ്യാജമാണെന്ന പ്രതികളുടെ വാദത്തിനെതിരെയാണ് അദ്ദേഹം പരിഹാസവുമായി രംഗത്തെത്തിയത്. എല്ലാവരും തത്സമയം കണ്ട ഗുണ്ടായിസം വ്യാജമാണെന്ന് അവകാശപ്പെടണമെങ്കിൽ നിങ്ങൾക്ക് വല്ലാത്ത കട്ടിയുള്ള ചർമ്മമുണ്ടായിരിക്കണമെന്ന് അദ്ദേഹം ഫേസ്ബുക്കിൽ കുറിച്ചു.

നിയമസഭാ കയ്യാങ്കളി കേസിലെ പ്രതികളുടെ വാദത്തെ കുറിച്ച് വിശദമാക്കുന്ന മലയാള മനോരമ പത്രത്തിലെ വാർത്ത ഷെയർ ചെയ്തു കൊണ്ടായിരുന്നു അദ്ദേഹത്തിന്റെ പരാമർശം.

നിയമസഭയിൽ നടന്നത് അതിക്രമം ആയിരുന്നില്ലെന്നും വാച്ച് ആൻഡ് വാർഡായി വന്ന പോലീസുകാരാണ് അതിക്രമം കാണിച്ചതെന്നുമായിരുന്നു കഴിഞ്ഞ ദിവസം പ്രതികൾ ചീഫ് മജിസ്ട്രേട്ട് കോടതിയിൽ വ്യക്തമാക്കിയത്. അവർ സംഘർഷം ഉണ്ടാക്കിയപ്പോൾ പ്രതിരോധിക്കുക മാത്രമാണ് ചെയ്തത്. 21 മന്ത്രിമാർ ഉൾപ്പെടെ 140 എംഎൽഎമാരും നിയമസഭയിൽ ഉണ്ടായിരുന്നു. എന്നാൽ അവരാരും കൈയാങ്കളി കേസുമായി ബന്ധപ്പെട്ട് സാക്ഷികളായില്ല. പകരം പോലീസുകാർ മാത്രമാണ് സാക്ഷികളായത്. അക്രമവുമായി ബന്ധപ്പെട്ട് ദൃശ്യമാദ്ധ്യമങ്ങളിലടക്കം പ്രചരിപ്പിച്ച ദൃശ്യങ്ങൾ യഥാർഥമല്ലെന്നും പ്രതികൾ കോടതിയിൽ വാദിച്ചിരുന്നു. വിടുതൽ ഹർജിയിൽ വാദം കേൾക്കവേയാണ് കേസിലെ പ്രതികൾ ഇക്കാര്യങ്ങൾ വെളിപ്പെടുത്തിയത്. നിയമസഭ കൈയാങ്കളി കേസുമായി ബന്ധപ്പെട്ട് വി. ശിവൻകുട്ടി, ഇ.പി. ജയരാജൻ, കെ.ടി. ജലീൽ, കെ. അജിത്, കെ. കുഞ്ഞഹമ്മദ്, സി.കെ. സദാശിവൻ എന്നീ ആറ് പ്രതികളാണ് വിടുതൽ ഹർജി നൽകിയിരുന്നത്.

ഇലക്ടോണിക് പാനൽ നശിപ്പിച്ചു എന്നതാണ് മന്ത്രി വി. ശിവൻകുട്ടിക്ക് എതിരെ ചുമത്തിയിരുന്ന കുറ്റം. എന്നാൽ പിന്നീട് നടന്ന പരിശോധനയിൽ ഈ ഇലക്ട്രോണിക് പാനലിന് കേടുപാടില്ലെന്ന് കണ്ടെത്തിയെന്നും പിന്നെ എങ്ങനെയാണ് ശിവൻകുട്ടിക്ക് എതിരെ കേസ് ചാർജ് ചെയ്യുകയെന്നും അദ്ദേഹത്തിന്റെ അഭിഭാഷകൻ വാദിച്ചു.

അതേസമയം വിടുതൽ ഹർജിയെ സർക്കാർ അഭിഭാഷകൻ എതിർത്തു. നിയമപരമായി കുറ്റകരമാണെന്ന് അറിഞ്ഞുകൊണ്ടാണ് പ്രതികൾ നിയമസഭയിൽ അതിക്രമം കാണിച്ചതെന്ന് സർക്കാർ അഭിഭാഷകൻ കോടതിയിൽ വ്യക്തമാക്കി. പ്രതികൾക്കെതിരെ പ്രഥമദൃഷ്ട്യാ കുറ്റം തെളിഞ്ഞതാണെന്നും. പ്രതികളുടെ പ്രവർത്തി നിയമസഭയുടെ ചരിത്രത്തിൽ ആദ്യമായിട്ടാണെന്നും സർക്കാർ അഭിഭാഷകൻ കോടതിയെ അറിയിച്ചു. നിയമസഭാ കയ്യാങ്കളി കേസുമായി ബന്ധപ്പെട്ട ഉത്തരവ് അടുത്ത മാസം ഏഴിന് പ്രസ്താവിക്കുമെന്നാണ് കോടതി അറിയിച്ചിരിക്കുന്നത്.

കൊച്ചി: പി സി ജോർജിനെതിരെ കേസെടുത്ത് പോലീസ്. കോവിഡ് നിയന്ത്രണത്തിന്റെ പേരിൽ ആരോഗ്യമന്ത്രി വീണാ ജോർജിനെതിരെ അശ്ലീല പരാമർശം നടത്തിയതിനാണ് പി.സി ജോർജിനെതിരെ പോലീസ് കേസെടുത്തത്. എറണാകുളം നോർത്ത് പൊലീസാണ് കേസ് രജിസ്റ്റർ ചെയ്തത്. ഒരു ഹൈക്കോടതി അഭിഭാഷകന്റെ പരാതിയെ തുടർന്നാണ് നടപടി.

ക്രൈം സ്റ്റോറി മലയാളം എന്ന ഫേസ്ബുക്ക് പേജിന് നൽകിയ അഭിമുഖത്തിലായിരുന്നു പി സി ജോർജിന്റെ വിവാദ പരാമർശങ്ങൾ. കേരളത്തിന് അപമാനമാണ് വീണ ജോർജെന്നായിരുന്നു പി സി ജോർജ് പറഞ്ഞിരുന്നത്. കടുത്ത സ്ത്രീവിരുദ്ധ പരാമർശങ്ങളാണ് പി സി ജോർജ് വീണാ ജോർജിനെതിരെ നടത്തിയത്. സ്ത്രീത്വത്തെ അപമാനിച്ചതിനും സമൂഹമാദ്ധ്യമങ്ങളിലൂടെ അധിക്ഷേപിച്ചതിനുമാണ് അഭിഭാഷകൻ പരാതി നൽകിയത്.

തിരുവനന്തപുരം: കോവിഡ് മരണ പട്ടിക പുതുക്കുമെന്ന് ആരോഗ്യമന്ത്രി വീണാ ജോർജ്. കേന്ദ്രത്തിന്റെ പുതിയ മാർഗരേഖയനുസരിച്ചാണ് സംസ്ഥാനവും മാർഗരേഖ പുതുക്കുന്നതെന്ന് മന്ത്രി പറഞ്ഞു. അതിനുള്ള നടപടികൾ പുരോഗമിക്കുകയാണ്. ഏതാനും ദിവസങ്ങൾക്കകം മാർഗരേഖയ്ക്ക് അന്തിമ രൂപമാകുന്നതാണെന്ന് മന്ത്രി വ്യക്തമാക്കി.

നെഗറ്റീവായാലും 30 ദിവസത്തിനുള്ളിലെ മരണം കോവിഡ് മരണമാണന്നതുൾപ്പെടെയുള്ള കാര്യങ്ങൾ ഉൾപ്പെടുത്തിയുള്ളതാകും പുതിയ മാർഗരേഖ. ഇതുസംബന്ധിച്ച് സമഗ്രമായ ലിസ്റ്റ് തന്നെ പ്രസിദ്ധീകരിക്കും. കോവിഡ് മരണവുമായി ബന്ധപ്പെട്ട് ആരോഗ്യ വകുപ്പ് തന്നെ ഒരു അന്വേഷണം നടത്തുകയും അത് പരിഹരിക്കാനുള്ള നടപടികളുമായി മുന്നോട്ട് പോകുകയാണ്. ഇതോടൊപ്പം പരാതികൾ പരിഹരിക്കുന്നതിനുള്ള നടപടികളും സ്വീകരിച്ചിട്ടുണ്ട്. ആരോഗ്യ വകുപ്പ് തന്നെ അതിനൊരു ഇടപെടൽ നടത്തി പട്ടിക പ്രസിദ്ധീകരിക്കുക തന്നെ ചെയ്യും. അർഹരായവർക്കെല്ലാം ഇതുസംബന്ധിച്ച ആനുകൂല്യം ലഭിക്കണമെന്ന് തന്നെയാണ് സർക്കാരിന്റെ തീരുമാനം. അതിന് വേണ്ടി സംസ്ഥാന സർക്കാർ ചെയ്യാവുന്ന കാര്യങ്ങളെല്ലാം ചെയ്യുമെന്ന് വീണാ ജോർജ് വിശദമാക്കി.

മെഡിക്കൽ കോളേജിൽ രണ്ടാഴ്ചത്തേയ്ക്കുള്ള സ്റ്റെൻഡ് ലഭ്യമാണ്. കൂടുതൽ സ്റ്റെൻഡ് എത്തിക്കാനുള്ള നടപടി സ്വീകരിക്കും. കോവിഡ് രോഗികളുടെ എണ്ണത്തിൽ കുറവുണ്ടാകും എന്ന് തന്നെയാണ് കരുതുന്നത്. എല്ലാവരും ശ്രദ്ധിക്കേണ്ട കാര്യം നമ്മുടെ സാമൂഹിക ഇടപെടലുകൾ കോവിഡ് മാനദണ്ഡങ്ങൾ പാലിച്ചു തന്നെ വേണം എന്നതാണ്. മാസ്‌ക് ശരിയായവിധം ധരിക്കണം. സാമൂഹിക അകലം പാലിക്കണം. സാമൂഹിക കൂടിച്ചേരലുകൾ ഒഴിവാക്കണം. കോവിഡ് മാനദണ്ഡങ്ങൾ പാലിച്ച് തന്നെ മുന്നോട്ട് പോകണം. ഇപ്പോഴത്തെ സാഹചര്യത്തിൽ സംസ്ഥാനത്തിൽ 90 ശതമാനത്തിലധികം പേർ ആദ്യഡോസ് വാക്സിൻ എടുത്തിട്ടുണ്ട്. ഒരു കോടിയിലധികം ആളുകൾ സമ്പൂർണ വാക്സിനേഷനുമായെന്ന് മന്ത്രി ചൂണ്ടിക്കാട്ടി.

മുഖ്യമന്ത്രി ഉദ്ഘാടനം നിർവഹിക്കുന്ന മെഡിക്കൽ കോളേജിലെ പുതിയ ഐ.സി.യു.കൾ സന്ദർശിച്ചു. കോവിഡ് മൂന്നാം തരംഗം മുന്നിൽ കണ്ടാണ് മെഡിക്കൽ കോളേജിൽ രണ്ട് ഐ.സി.യു.കൾ സജ്ജമാക്കിയത്. അത്യാധുനിക 100 ഐ.സി.യു. കിടക്കകളാണ് സജ്ജമാക്കിയത്. 5.5 കോടി രൂപ ചെലവഴിച്ച് മെഡിക്കൽ കോളേജ് ആശുപത്രിയിലെ 7, 8 വാർഡുകൾ നവീകരിച്ചാണ് അത്യാധുനിക ഐ.സി.യു. സംവിധാനം സജ്ജമാക്കിയത്. ഈ ഐ.സി.യു.കൾക്കായി ആദ്യഘട്ടത്തിൽ 17 വെന്റിലേറ്ററുകളാണ് സ്ഥാപിച്ചത്. ബാക്കിയുള്ള വെന്റിലേറ്ററുകൾ ഉടൻ സ്ഥാപിക്കാനുള്ള നടപടി സ്വീകരിച്ചിട്ടുണ്ടെന്നും വീണാ ജോർജ് കൂട്ടിച്ചേർത്തു.