General (Page 1,342)

On:

തിരുവനന്തപുരം: മുൻ മന്ത്രിയും സംസ്ഥാന കമ്മിറ്റി അംഗവുമായ ജി സുധാകരനെതിരെ നടപടിയുമായി സിപിഎം. അമ്പലപ്പുഴ മണ്ഡലത്തിലെ തിരഞ്ഞെടുപ്പ് പ്രവർത്തനത്തിലുണ്ടായ വീഴ്ചയിലാണ് നടപടി. സിപിഎം സംസ്ഥാന കമ്മിറ്റി ജി സുധാകരനെ പര്യമായി ശാസിച്ചു. അമ്പലപ്പുഴയിലെ ഇടതുമുന്നണി സ്ഥാനാർഥിയായിരുന്ന എച്ച്. സലാമിന്റെ വിജയം ഉറപ്പിക്കുന്നതിനാവശ്യമായ പ്രചാരണം നടത്തുന്നതിൽ സുധാകരന് വീഴ്ച വന്നുവെന്നാണ് അന്വേഷണ കമ്മീഷന്റെ കണ്ടെത്തിയിരിക്കുന്നത്.

ആലപ്പുഴയിലെ തെരഞ്ഞെടുപ്പ് പ്രചാരണത്തിൽ സുധാകരന്റെ ഭാഗത്തുനിന്ന് ചില വീഴ്ചകളുണ്ടായെന്നും ഇടത് സ്ഥാനാർഥിയുടെ വിജയത്തിനാവശ്യമായ നടപടികളല്ല അദ്ദേഹത്തിന്റെ ഭാഗത്തു നിന്നുണ്ടായതെന്നും സിപിഎം സംസ്ഥാന സമിതി അംഗീകരിച്ച അവലോകന റിപ്പോർട്ടിൽ വിശദമാക്കുന്നു. ജൂലൈയിൽ നടന്ന സിപിഎം തിരഞ്ഞെടുപ്പ് അവലോകന റിപ്പോർട്ടിൽ പേരെടുത്ത് പരാമർശിക്കുന്ന ഏക നേതാവ് ജി. സുധാകരനാണ്.

എളമരം കരീം, കെ.ജെ. തോമസ് എന്നിവർ ഉൾപ്പെട്ട പാർട്ടി കമ്മീഷനാണ് സുധാകരനെതിരെയുള്ള ആരോപണത്തിൽ അന്വേഷണം നടത്തിയത്. സുധാകരന് വീഴ്ച വന്നുവെന്നാണ് അന്വേഷണ കമ്മീഷൻ കണ്ടെത്തിയിരിക്കുന്നത്. അതേസമയം സുധാകരനെതിരെ ഏത് രീതിയിലുള്ള നടപടി വേണമെന്ന് റിപ്പോർട്ടിൽ ശുപാർശ ചെയ്തിരുന്നില്ല.

ഇത് രണ്ടാം തവണയാണ് ജി സുധാകരൻ പാർട്ടി അച്ചടക്ക നടപടി നേരിടുന്നത്. നേരത്തെ ആലപ്പുഴ സംസ്ഥാന സമ്മേളനത്തിൽ വിഭാഗീയ പ്രവർത്തനങ്ങൾ നടത്തിയതിന്റെ പേരിലും സുധാകരനെതിരെ പാർട്ടി നടപടി ഉണ്ടായിട്ടുണ്ട്. സി.പി.എമ്മിന്റെ സംഘടനാ നടപടിയിൽ മൂന്നാമത്തേതാണ് പരസ്യശാസന. ഇതിന്റെ ഭാഗമായി സുധാകരനെതിരെ നടപടിയെടുത്ത കാര്യം പാർട്ടി കീഴ് ഘടകങ്ങളിലും മാദ്ധ്യമങ്ങളിലും അറിയിക്കും. ജി സുധാകരന്റെ ജനകീയത, പാർട്ടി പാരമ്പര്യം, അഴിമതി വിരുദ്ധ പാരമ്പര്യം എന്നിവ കണക്കിലെടുത്താണ് കടുത്ത നടപടികൾ സ്വീകരിക്കാൻ സിപിഎം തയ്യാറാകാതിരുന്നത്.

On:

തിരുവനന്തപുരം: സ്വർണ്ണക്കടത്ത് കേസ് പ്രതി സ്വപ്ന സുരേഷ് ജയിലിൽ നിന്ന് പുറത്തിറങ്ങി. ജാമ്യവുമായി ബന്ധപ്പെട്ട രേഖകൾ സ്വപ്നയുടെ അമ്മ ഇന്ന് രാവിലെ അട്ടക്കുളങ്ങര ജയിലിലെത്തിച്ചു. അമ്മയോടൊപ്പമാണ് സ്വപ്‌ന ജയിലിൽ നിന്നും പുറത്തിറങ്ങിയത്. അതേസമയം സ്വപ്‌ന മാദ്ധ്യമങ്ങളോട് പ്രതികരിക്കാൻ തയ്യാറായില്ല.

ആറു കേസുകളിലും സ്വപ്ന സുരേഷിന്റെ ജാമ്യ ഉപാധികൾ കഴിഞ്ഞ ദിവസം കോടതിയിൽ സമർപ്പിച്ചിരുന്നു. എൻഐഎ കേസുൾപ്പെടെ എല്ലാ കേസുകളിലും സ്വപ്നക്ക് ജാമ്യം ലഭിച്ച് മൂന്ന് ദിവസം പിന്നിട്ടും ജയിലിൽ നിന്നും പുറത്തിറങ്ങാൻ കഴിഞ്ഞിരുന്നില്ല. ജാമ്യ ഉപാധികൾ സമർപ്പിക്കാൻ കഴിയാത്തുകൊണ്ടാണ് ജയിൽ നിന്നും ഇറങ്ങാൻ കഴിയാതിരുന്നത്. ഇന്നലെ വൈകുന്നേരത്തോടെ എല്ലാ നടപടികളും പൂർത്തിയാക്കി. സ്വർണ്ണക്കടത്ത് കേസിൽ അറസ്റ്റിലായി ഒരു വർഷത്തിന് ശേഷമാണ് സ്വപ്‌ന ജയിലിന് പുറത്തിറങ്ങിയത്.

25 ലക്ഷം രൂപയുടെ ബോണ്ടിലാണ് എൻഐഎ കേസിൽ സ്വപ്നയക്ക് കോടതി ജാമ്യം അനുവദിച്ചിരിക്കുന്നത്.

On:

തിരുവനന്തപുരം: നിയമസഭാ തിരഞ്ഞെടുപ്പിൽ അമ്പലപ്പുഴയിലെ പ്രചാരണത്തിൽ മുൻ മന്ത്രി ജി. സുധാകരൻ വീഴ്ച വരുത്തിയെന്ന് അന്വേഷണ റിപ്പോർട്ട്. സിപിഎം സംസ്ഥാന സമിതിയിൽ റിപ്പോർട്ട് അവതരിപ്പിച്ചു. അമ്പലപ്പുഴയിലെ ഇടത് സ്ഥാനാർഥിയായിരുന്ന എച്ച്. സലാമിന്റെ വിജയം ഉറപ്പിക്കുന്നതിനാവശ്യമായ പ്രചാരണം നടത്തുന്നതിൽ സുധാകരൻ വീഴ്ച്ച വരുത്തിയെന്നാണ് അന്വേഷണ റിപ്പോർട്ടിൽ വ്യക്തമാക്കിയിരിക്കുന്നത്. ഏത് രീതിയിലുള്ള നടപടിയാകും സുധാകരനെതിരെ സ്വീകരിക്കേണ്ടതെന്ന് തീരുമാനിക്കുന്നത് സംസ്ഥാന സെക്രട്ടറിയേറ്റ് ചർച്ചചെയ്ത ശേഷമായിരിക്കും. ഇന്ന് വൈകീട്ട് സംസ്ഥാന സെക്രട്ടറിയേറ്റ് ചേരും.

ആലപ്പുഴയിലെ തെരഞ്ഞെടുപ്പ് പ്രചാരണത്തിൽ സുധാകരന്റെ ഭാഗത്തുനിന്ന് ചില വീഴ്ചകളുണ്ടായെന്നും ഇടത് സ്ഥാനാർഥിയുടെ വിജയത്തിനാവശ്യമായ നടപടികളല്ല അദ്ദേഹത്തിന്റെ ഭാഗത്തു നിന്നുണ്ടായതെന്നും സിപിഎം സംസ്ഥാന സമിതി അംഗീകരിച്ച അവലോകന റിപ്പോർട്ടിൽ വിശദമാക്കുന്നു. ജൂലൈയിൽ നടന്ന സിപിഎം തിരഞ്ഞെടുപ്പ് അവലോകന റിപ്പോർട്ടിൽ പേരെടുത്ത് പരാമർശിക്കുന്ന ഏക നേതാവ് ജി. സുധാകരനാണ്.

സുധാകരനെതിരെ നടപടി സ്വീകരിക്കുമെന്നാണ് റിപ്പോർട്ടുകൾ. എളമരം കരീം, കെ.ജെ. തോമസ് എന്നിവർ ഉൾപ്പെട്ട പാർട്ടി കമ്മീഷനാണ് സുധാകരനെതിരെയുള്ള ആരോപണത്തിൽ അന്വേഷണം നടത്തിയത്. സുധാകരന് വീഴ്ച വന്നുവെന്നാണ് അന്വേഷണ കമ്മീഷൻ കണ്ടെത്തിയിരിക്കുന്നത്. സുധാകരനെതിരെ ഏത് രീതിയിലുള്ള നടപടി വേണമെന്ന് റിപ്പോർട്ടിൽ ശുപാർശ ചെയ്തിട്ടില്ല.

On:

മുംബൈ: മഹാരാഷ്ട്രയിലെ ആശുപത്രിയിൽ തീപിടുത്തം. അഹമ്മദ് നഗറിലെ സിവിൽ ഹോസ്പിറ്റലിലെ കോവിഡ് 19 തീവ്രപരിചരണ വിഭാഗത്തിലാണ് തീപ്പിടിത്തം ഉണ്ടായത്. തീപിടുത്തത്തിൽ പത്ത് പേർ വെന്തു മരിച്ചു. ഇന്ന് രാവിലെയായിരുന്നു സംഭവം. മരണപ്പെട്ടവരെല്ലാം രോഗികളാണെന്നാണ് റിപ്പോർട്ട്.

തീപ്പിടിത്തത്തിൽ ഒരാൾക്ക് ഗുരുതരമായി പരിക്കേൽക്കുകയും ചെയ്തു, 17 പേരാണ് ഐസിയുവിൽ ഉണ്ടായിരുന്നത്. വാർഡിലെ മറ്റുള്ളവരെ മറ്റൊരു ആശുപത്രിയിലെ കോവിഡ് വാർഡിലേക്ക് മാറ്റിയതായി അഹമ്മദ് നഗർ ജില്ലാ കളക്ടർ ഡോ. രാജേന്ദ്ര ഭോസ്ലെ വ്യക്തമാക്കി. അപകടത്തിന് കാരണം ഷോർട്ട് സർക്യൂട്ടാണെന്നാണ് പ്രാഥമിക നിഗമനം. സംഭവത്തിൽ അന്വേഷണം നടത്തുമെന്ന് സർക്കാർ അറിയിച്ചിട്ടുണ്ട്.

On:

ന്യൂഡൽഹി: പാർലമെന്റ് അംഗങ്ങൾക്കും കേന്ദ്ര സർക്കാർ ജീവനക്കാർക്കും നൽകിയിരുന്ന സൗജന്യ ക്രെഡിറ്റ് സംവിധാനം അവസാനിപ്പിച്ച് എയർ ഇന്ത്യ. സർക്കാരിൽനിന്ന് എയർ ഇന്ത്യയെ ടാറ്റയുടെ കീഴിലുള്ള ടാലസ് പ്രൈവറ്റ് ലിമിറ്റഡ് ഏറ്റെടുക്കുന്നതിന്റെ ഭാഗമായാണ് ഇളവുകൾ അവസാനിപ്പിക്കാൻ തീരുമാനിച്ചത്.

കേന്ദ്ര സർക്കാർ ജീവനക്കാരുടെ യാത്രാ ചെലവുകൾ എക്സ്പെന്റിച്ചർ മന്ത്രാലയമാണ് ഇതുവരെ കൈകാര്യം ചെയ്തിരുന്നത്. ഇത്തരം വിമാന യാത്രാ ചെലവുകൾ യാത്രയ്ക്കു ശേഷം മാസങ്ങൾ കഴിഞ്ഞാണ് എയർ ഇന്ത്യയ്ക്കു ലഭിച്ചിരുന്നത്. ഇത് കമ്പനിയുടെ നഷ്ടത്തിന് കാരണമായതായാണ് വിലയിരുത്തൽ. ജനപ്രതിനിധികൾക്കും കേന്ദ്ര സർക്കാർ ജീവനക്കാർക്കും ഇനി മുതൽ അവരുടെ ഇഷ്ട പ്രകാരം നിരക്കുകൾ നോക്കി ഏതു വിമാന സർവീസ് വേണമെങ്കിലും ഉപയോഗിക്കാമെന്നാണ് എയർ ഇന്ത്യ അറിയിച്ചിരിക്കുന്നത്. ഡിപ്പാർട്മെന്റ് ഓഫ് ഇൻവെസ്റ്റ്മെന്റ് ആൻഡ് പബ്ലിക് അസറ്റ് മാനേജ്‌മെന്റ്(ദിപം) സെക്രട്ടറി തുഹിൻ കാന്ത പാണ്ഡെയാണ് ഇക്കാര്യം അറിയിച്ചത്.

അനാവശ്യച്ചെലവുകൾ കണ്ടെത്തി അവ കുറയ്ക്കുകയാണ് ടാറ്റയുടെ ആദ്യ നടപടിയെന്നാണു റിപ്പോർട്ടുകൾ. വിമാനങ്ങളുടെ നവീകരണം, ജീവനക്കാർക്കുള്ള ഫ്രീ പാസ് വെട്ടിച്ചുരുക്കൽ, പുതിയ റൂട്ടുകൾ കണ്ടെത്തൽ, വിമാനങ്ങളുടെ പരിപാലന ചെലവ് എന്നിവയിലെല്ലാം മാറ്റങ്ങൾ ഉണ്ടാകും. അതേസമയം ജീവനക്കാരുടെ കാര്യത്തിലാണ് ആശങ്ക നിലനിൽക്കുന്നത്. സർക്കാരുമായുള്ള കരാർ പ്രകാരം ഒരു വർഷത്തേയ്ക്ക് ആരെയും പിടിച്ചുവിടാൻ ടാറ്റയ്ക്ക് കഴിയില്ല. പൊതുമേഖലാ വിമാന കമ്പനിയായ എയർ ഇന്ത്യയുടെ പൂർണമായ കൈമാറ്റം ഈ വർഷം ഡിസംബറോടെ സാധ്യമാകുമെന്നാണു വിലയിരുത്തൽ. 18,000 കോടി രൂപയ്ക്കാണ് ടാറ്റയുടെ ടാലസ് എയർ ഇന്ത്യയെ സ്വന്തമാക്കിയത്.

sameer vankde

On:

ന്യൂഡൽഹി: ആഢംബര കപ്പലിൽ നടന്ന ലഹരി പാർട്ടിയുമായി ബന്ധപ്പെട്ട കേസിന്റെ അന്വേഷണ ചുമതലയിൽ നിന്ന് മുതിർന്ന എൻസിബി ഉദ്യോഗസ്ഥൻ സമീർ വാംഖഡെയെ ഒഴിവാക്കി. ബോളിവുഡ് താരം ഷാരൂഖ് ഖാന്റെ മകൻ ആര്യൻ ഖാൻ ഉൾപ്പെട്ട കേസിന്റെ അന്വേഷണ ചുമതല ഇനി മുതിർന്ന ഉദ്യോഗസ്ഥൻ സഞ്ജയ് സിംഗിന്റെ നേതൃത്വത്തിലുള്ള നാലംഗ സംഘത്തിനാണ്. കൈക്കൂലി ആരോപണം നേരിടുന്നതിനാലാണ് കേസിൽ നിന്നും സമീർ വാംഖഡെയെ ഒഴിവാക്കിയത്.

കേസുമായി ബന്ധപ്പെട്ട് കൈക്കൂലി ആവശ്യപ്പെട്ടെന്നാണ് സമീർ വാംഖഡെയ്ക്ക് എതിരെ ഉയർന്ന ആരോപണം. സംഭവത്തിൽ വാംഖഡെ വിജിലൻസ് അന്വേഷണവും നേരിടുന്നുണ്ട്. കേസിലെ സാക്ഷികളിലൊരാൾ തന്നെ 25 കോടി രൂപയുടെ കൈക്കൂലി ആരോപണം ഉന്നയിച്ചതോടെയാണ് വാഖഡെക്കെതിരെ എൻ.സി.ബി. അന്വേഷണം പ്രഖ്യാപിച്ചത്.

കേസിലെ സാക്ഷിയായ പ്രഭാകർ സെയിലിന്റെ ആരോപണങ്ങളെ സംബന്ധിച്ചുള്ള വിശദമായ റിപ്പോർട്ട് മുംബൈയിലെ എൻ.സി.ബി. ഉദ്യോഗസ്ഥർ ഡയറക്ടർ ജനറലിന് കൈമാറിയിരുന്നു. തുടർന്നാണ് സമീർ വാംഖഡെക്കെതിരെ വിജിലൻസ് അന്വേഷണത്തിന് ഉത്തരവിട്ടത്.

On:

തിരുവനന്തപുരം: മരയ്ക്കാർ സിനിമയുടെ റിലീസുമായി ബന്ധപ്പെട്ട് നിർമ്മാതാവ് ആന്റണി പെരുമ്പാവൂരിന്റെ ആരോപണങ്ങൾ നിഷേധിച്ച് ഫിയോക്. മരയ്ക്കാർ തിയറ്ററിൽ റിലീസ് ചെയ്യുന്നത് സംബന്ധിച്ച് തിയറ്റർ ഉടമകളുടെ പിന്തുണ ലഭിച്ചില്ലെന്ന ആരോപണമാണ് ഫിയോക് തള്ളിയത്.

15 കോടി രൂപ വരെ അഡ്വാൻസ് നൽകാൻ തയ്യാറായിരുന്നുവെന്നും പക്ഷേ അതംഗീകരിക്കാൻ ആന്റണി പെരുമ്പാവൂർ തയ്യാറായില്ലെന്നും ഫിയോക് പറയുന്നു. മരയ്ക്കാർ തിയേറ്ററിലേക്ക് എത്തിക്കാൻ എല്ലാ വിട്ടുവീഴ്ചകൾക്കും തയ്യാറാണ്. എന്നാൽ മന്ത്രിയുമായുള്ള ചർച്ചയ്ക്കു പോലും നിർമ്മാതാവ് ആന്റണി പെരുമ്പാവൂർ വന്നില്ലെന്നും തിയറ്ററിലേക്ക് സിനിമയെത്തിക്കാൻ ഇനിയും ചർച്ചയ്ക്ക് തയ്യാറാണെന്നും ഫിയോക് വ്യക്തമാക്കി.

മരയ്ക്കാർ സിനിമ തീയറ്ററിൽ റിലീസ് നടത്താനുള്ള എല്ലാ ശ്രമങ്ങളും തേടിയിരുന്നതായി നിർമാതാവ് ആന്റണി പെരുമ്പാവൂർ കഴിഞ്ഞ ദിവസം പറഞ്ഞത്. സിനിമ റിലീസിംഗ് പ്രതിസന്ധി സംബന്ധിച്ച് മോഹൻലാലുമായി ചർച്ച നടത്തിയിരുന്നെന്നും തിയറ്റർ ഉടമകളിൽ നിന്ന് വേണ്ടത്ര പിന്തുണ ലഭിച്ചില്ലെന്നുമായിരുന്നു അദ്ദേഹത്തിന്റെ ആരോപണം.

40 കോടി രൂപ അഡ്വാൻസ് തന്നെന്നുള്ള വാദം വ്യാജമാണ്. ചർച്ചകൾക്ക് വിളിക്കാതിരിക്കുകയും തിയറ്റർ റിലീസ് നടക്കില്ലെന്നും മനസിലായതോടെയാണ് ആ പണം തിരികെ നൽകിത്തുടങ്ങിയത്. പക്ഷേ ഒരു തീയറ്റർകാരനും എന്നോട് പണം തിരികെ ചോദിച്ചിരുന്നില്ല. നാലുവർഷം മുൻപത്തെ കണക്കനുസരിച്ച് എനിക്കിപ്പോഴും ഒരു കോടി രൂപ തീയറ്ററുടമകൾ തരാനുണ്ട്. തിയറ്റർ ഉടമകൾ ചെയ്ത സഹായമൊന്നും വിസ്മരിക്കുന്നില്ലെന്നും അവരും പ്രതിസന്ധിയിലാണെന്ന് അറിയാമെന്നും അദ്ദേഹം മാദ്ധ്യമങ്ങളോട് വെളിപ്പെടുത്തിയിരുന്നു.

On:

തിരുവനന്തപുരം: സംസ്ഥാന സർക്കാരിനെതിരെ രൂക്ഷ വിമർശനവുമായി കെപിസിസി പ്രസിഡന്റ് കെ. സുധാകരൻ. ഇന്ധനനികുതിയിൽ കേന്ദ്രസർക്കാർ നേരിയ ഇളവ് വരുത്തിയെങ്കിലും ഇളവ് നൽകാത്ത പിണറായി സർക്കാരിനെ പ്രക്ഷോഭങ്ങൾകൊണ്ടും ജനകീയ സമരങ്ങൾകൊണ്ടും മുട്ടുകുത്തിക്കുമെന്ന് അദ്ദേഹം പറഞ്ഞു. ഇന്ധനനികുതി കുറയ്ക്കുന്നതുവരെ അരങ്ങേറാൻ പോകുന്ന സമരപരമ്പരകൾ മൂലം പിണറായി സർക്കാരിന് ഇനി ഉറക്കമില്ലാത്ത രാവുകളാണ് വരാൻ പോകുന്നതെന്ന് അദ്ദേഹം പറഞ്ഞു.

പെട്രോൾ/ ഡീസൽ വിലവർധനവിനെ തുടർന്ന് 2016-21 കാലയളവിൽ പിണറായി സർക്കാർ അധിക നികുതിയിനത്തിൽ മാത്രം 2190 കോടി രൂപ പിഴിഞ്ഞെടുത്തിട്ടാണ് കോവിഡ് കാലത്ത് ജനങ്ങൾ മഹാദുരിതങ്ങളിൽക്കൂടി കടന്നുപോകുമ്പോൾ നയാപൈസയുടെ ഇളവ് അനുവദിക്കാതിരിക്കുന്നത്. സമീപകാലത്ത് 18,355 കോടിരൂപയാണ് ഇന്ധനനികുതിയിനത്തിൽ പിണറായി സർക്കാരിനു ലഭിച്ചത്. മോദി സർക്കാർ ഇന്ധനവിലയും നികുതിയും കുത്തനെ കൂട്ടിയപ്പോൾ അതിനോടൊപ്പം സംസ്ഥാന നികുതി കൂട്ടിയും കേന്ദ്രത്തിന്റെ കൊള്ളമുതലിൽ പങ്കുപറ്റിയുമാണ് സംസ്ഥാന സർക്കാർ ഇത്രയും തുക പോക്കറ്റിലാക്കിയതെന്നും സുധാകരൻ വ്യക്തമാക്കി.

കൊള്ളമുതലിൽ നിന്ന് നയാപൈസ പാവപ്പെട്ടവർക്കു നൽകാൻ കഴിയാത്ത വിധം പിണറായിയുടെ ഹൃദയം കഠിനമായിരിക്കുന്നു. അധികാരം ഇവരെ മത്തുപിടിപ്പിച്ചിരിക്കുകയാണ്. ഹെലിക്കോപ്റ്റർ വാങ്ങാനും കൊലയാളികൾക്കുവേണ്ടിയും പാർട്ടിക്കാർക്കുവേണ്ടിയും ഖജനാവിൽ നിന്ന് കോടാനുകോടി ചെലവഴിക്കുമ്പോഴാണ് ജനങ്ങളെ പുറംകാൽ കൊണ്ടു തൊഴിക്കുന്ന സമീപനം സ്വീകരിച്ചിരിക്കുന്നതെന്നും ജനങ്ങൾ ഇവരെ പുറംകാൽ കൊണ്ട് തോണ്ടിയെറിയുന്നത് സമീപ ഭാവിയിൽ കേരളം കാണുമെന്നും അദ്ദേഹം അഭിപ്രായപ്പെട്ടു.

കോവിഡിനെ തുടർന്ന് വരുമാനം നഷ്ടമായി തീ തിന്നുകഴിയുന്ന ജനതയ്ക്ക് തെല്ലെങ്കിലും ആശ്വാസം നൽകാനുള്ള ഉത്തരവാദിത്തം സംസ്ഥാന സർക്കാരിനുണ്ട്. ഇന്ധനവില വർധനവിനെതിരെ തുടർച്ചയായ സമരങ്ങളും ഹർത്താലുകളും നടത്തിയ സിപിഎമ്മാണ് നികുതി കുറയ്ക്കണ്ടെന്ന് സംസ്ഥാന സർക്കാരിനെ ഉപദേശിക്കുന്നതെന്നും ഇതിൽ നിന്ന് തന്നെ ജനങ്ങളോടുള്ള സിപിഎമ്മിന്റെ ആത്മാർത്ഥത ഇല്ലായ്മ വ്യക്തമാണെന്നും സുധാകരൻ കുറ്റപ്പെടുത്തി.

On:

തിരുവനന്തപുരം: പണിമുടക്കിൽ പങ്കെടുക്കാത്ത കെഎസ്ആർടിസി ജീവനക്കാരെ ഉപയോഗിച്ച് പരമാവധി സർവീസ് നടത്തണമെന്ന് നിർദ്ദേശം.കെഎസ്ആർടിസി സിഎംഡിയാണ് ഇതുസംബന്ധിച്ച നിർദ്ദേശം നൽകിയത്. ഒരു വിഭാഗം ജീവനക്കാർ മാത്രം പണിമുടക്ക് നടത്തുന്ന നവംബർ ആറിന് സമരത്തിൽ പങ്കെടുക്കാത്ത ജീവനക്കാരെ ഉപയോഗിച്ച് സർവീസ് നടത്തണമെന്നാണ് സിഎംഡി നൽകിയിരിക്കുന്ന നിർദ്ദേശം. ഇതിന് വേണ്ടി പരമാവധി സൗകര്യം ഒരുക്കണമെന്ന് യൂണിറ്റ് ഓഫീസർമാർക്ക് സിഎം ഡി നിർദ്ദേശം നൽകി.

സമരത്തിൽ പങ്കെടുക്കാതെ ഹാജരാകുന്ന ജീവനക്കാരെ ഉപയോഗിച്ച് സർവ്വീസുകൾ അയയ്ക്കണമെന്നും അതിനായി ജീവനക്കാരെ മുൻകൂട്ടി നിയോഗിക്കണമെന്നും നിർദ്ദേശത്തിലുണ്ട്. ശനിയാഴ്ച വാരാന്ത്യ ദിനത്തിൽ വിവിധ സ്ഥലങ്ങളിൽ നിന്നും യാത്രക്കാർ തിരികെ വീട്ടിൽ എത്തേണ്ടതിനാൽ യാത്രക്കാർക്ക് ബുദ്ധിമുട്ട് ഉണ്ടാകാതെ സർവീസുകൾ നടത്തുമെന്നും ഹാജരാകുന്ന ജീവനക്കാരെ ഉപയോഗിച്ച് ഡബിൾ ഡ്യൂട്ടി ഉൾപ്പടെ നൽകി പരമാവധി ട്രിപ്പുകൾ ഓടിക്കുമെന്നും അധികൃതർ വ്യക്തമാക്കി.

ആവശ്യ റൂട്ടുകൾക്ക് പ്രാധാന്യം നൽകി ദീർഘദൂര സർവ്വിസുകൾ, ഒറ്റപ്പെട്ട സർവ്വീസുകൾ, പ്രധാന റൂട്ടുകളിലെ സർവ്വിസുകൾ എന്നിങ്ങനെ അയക്കുന്നതിനും റിസർവേഷൻ നൽകിയിട്ടുള്ള സർവ്വീസുകൾ എന്നിവ നടത്തുകയും ചെയ്യുമെന്നും അധികൃതർ അറിയിച്ചു.

On:

ചണ്ഡീഗഡ്: പഞ്ചാബ് കോൺഗ്രസ് അധ്യക്ഷ സ്ഥാനത്ത് നിന്ന് രാജിവെച്ച തീരുമാനം പിൻവലിച്ച് നവ്‌ജ്യോത് സിങ് സിദ്ദു. അഹംഭാവം കൊണ്ടല്ല രാജിക്കത്ത് നൽകിയതെന്നും വിശ്വസ്തനായ കോൺഗ്രസ് പ്രവർത്തകനായി എന്നും തുടരുമെന്നും സിദ്ദു വ്യക്തമാക്കി. സെപ്റ്റംബർ 28 നാണ് സിദ്ദു പഞ്ചാബ് പി സി സി അധ്യക്ഷ സ്ഥാനം രാജിവച്ചത്. ചരൺജിത് സിങ് ചാന്നി മുഖ്യമന്ത്രിയാകുകയും മന്ത്രിസഭ പുനഃസംഘടിപ്പിക്കുകയും ചെയ്തതിന് പിന്നാലെയായിരുന്നു രാജി. രാജി പ്രഖ്യാപിച്ചിരുന്നെങ്കിലും ഹൈക്കമാൻഡ് സിദ്ദുവിന്റെ രാജി അംഗീകരിച്ചിരുന്നില്ല. നിരവധി തവണ കോൺഗ്രസ് സിദ്ദുവുമായി അനുരജ്ഞന ചർച്ചകൾ നടത്തിയിരുന്നു.

തന്നോട് കൂടി ആലോചിച്ചായിരിക്കണം സംസ്ഥാന സർക്കാർ തീരുമാനങ്ങൾ എടുക്കേണ്ടതെന്ന നിബന്ധന നേരത്തെ സിദ്ദു മുന്നോട്ടുവെച്ചിരുന്നു. എന്നാൽ പുതിയ പഞ്ചാബ് മുഖ്യമന്ത്രിയെ തെരഞ്ഞെടുക്കുന്നതിൽ താനുമായി കൂടിയാലോചന നടത്താതിരുന്നതാണ് സിദ്ദുവിനെ പ്രകോപിപ്പിച്ചത്. മന്ത്രിസഭാ പുനഃസംഘടനയെ ചൊല്ലിയും അഭിപ്രായ വ്യത്യാസമുണ്ടായിരുന്നു. സിദ്ദുവിന്റെ രാജി ഹൈക്കമാൻഡ് അംഗീകരിച്ചില്ലെങ്കിലും സിദ്ദു എന്തെങ്കിലും നിബന്ധന മുന്നോട്ടുവെച്ചാൽ സമ്മർദത്തിന് വഴങ്ങേണ്ടെന്ന് ഹൈക്കമാൻഡ് പഞ്ചാബ് മുഖ്യമന്ത്രിക്ക് നിർദേശം നൽകിയിരുന്നു. തുടർന്നാണ് സിദ്ദു രാജി പിൻവലിക്കാൻ തീരുമാനിച്ചത്.

അതേസമയം പുതിയ അഡ്വക്കറ്റ് ജനറലിനെ നിയമിച്ചാൽ മാത്രമേ താൻ ഓഫീസിലെത്തി ചുമതലയേൽക്കൂവെന്ന നിബന്ധനയും സിദ്ദു മുന്നോട്ടു വെച്ചിട്ടുണ്ട്.