General (Page 1,323)

തിരുവനന്തപുരം: കേന്ദ്രമന്ത്രി നിതിൻ ഗഡ്കരിയ്ക്ക് നന്ദി അറിയിച്ച് പൊതുമരാമത്ത് മന്ത്രി പി എ മുഹമ്മദ് റിയാസ്. കൊച്ചി നഗരത്തിന്റെ വികസനക്കുതിപ്പിന് കാരണമാകുന്ന കൊടുങ്ങല്ലൂർ – ഇടപ്പള്ളി ദേശീയ പാത ആറ് വരിപ്പാതയ്ക്ക് ഭാരത് മാല പദ്ധതിയിൽ 3465.82 കോടി രൂപ അനുവദിച്ചതിനാണ് അദ്ദേഹം നിതിൻ ഗഡ്ക്കരിയ്ക്ക് നന്ദി അറിയിച്ചത്. എറണാകുളം – തൃശൂർ ജില്ലകളിലെ ഏറ്റവും പ്രധാനപ്പെട്ട മുസിരിസ് പൈതൃക സംരക്ഷണ ടൂറിസം പദ്ധതിക്ക് വലിയ ഉണർവ്വ് ഉണ്ടാക്കാൻ ഈ പാതയുടെ വികസനത്തിലൂടെ സാധിക്കുമെന്ന് മുഹമ്മദ് റിയാസ് പറഞ്ഞു. ഫേസ്ബുക്ക് കുറിപ്പിലൂടെയാണ് അദ്ദേഹം ഇക്കാര്യം വ്യക്തമാക്കിയത്.

ദേശീയ പാതാ വികസനത്തിന്റെ ഭാഗമായി സംസ്ഥാന സർക്കാർ എല്ലാ സഹായവും ദേശീയപാത അതോറിറ്റിക്ക് നൽകും. പ്രവൃത്തികൾ സമയബന്ധിതമായി പൂർത്തിയാക്കാനാവശ്യമായ ഇടപെടലുകൾ നടത്തും. കൃത്യമായ ഇടവേളകളിൽ പുരോഗതി വിലയിരുത്തിക്കൊണ്ട് യോഗങ്ങൾ ചേരുമെന്നും അദ്ദേഹം വ്യക്തമാക്കി. ദേശീയപാത വികസനം യാഥാർഥ്യമാക്കാൻ മുൻകൈയ്യെടുത്ത് പ്രവർത്തിക്കുന്ന കേരളത്തിലെ ദേശീയപാത അതോറിറ്റി അധികൃതരെ പ്രത്യേകം അഭിനന്ദിക്കുന്നുവെന്നും അദ്ദേഹം കൂട്ടിച്ചേർത്തു.

ഫേസ്ബുക്ക് കുറിപ്പിന്റെ പൂർണ്ണരൂപം:

കൊടുങ്ങല്ലൂർ – ഇടപ്പള്ളി ദേശീയ പാത വികസനത്തിന് ഭാരത് മാല പദ്ധതിയിൽ 3465.82 കോടി രൂപ അനുവദിച്ചു.

ഒക്ടോബർ മാസം 28 ന് ഡൽഹിയിൽ വെച്ച് കേന്ദ്ര റോഡ് ഗതാഗത ഹൈവെ വകുപ്പ് മന്ത്രി ശ്രീ. നിതിൻ ഗഡ്കരിയുമായി കൂടിക്കാഴ്ച നടത്തിയപ്പോൾ ദേശീയപാത വികസനത്തെ കുറിച്ച് സംസാരിച്ചിരുന്നു. ആറ് വരിപ്പാതയാക്കി വികസിപ്പിക്കുന്ന പ്രവർത്തനങ്ങൾ വേഗത്തിലാക്കാൻ ഇടപെടണം എന്ന് അദ്ദേഹത്തോട് ആവശ്യപ്പെട്ടു.

കാസർകോട് തലപ്പാടി മുതൽ തിരുവനന്തപുരം കാരോട് വരെ ഏകദേശം 600 കിലോമീറ്റർ ദേശീയപാത 6 വരിയാക്കുന്നതിന്റെ പ്രവർത്തനങ്ങൾ പുരോഗമിക്കുന്നുണ്ട്. 20 റീച്ചുകളായാണ് ദേശീയപാത 66 ന്റെ വികസനപ്രവർത്തനം നടക്കുന്നത്. ഇതിൽ 16 റീച്ചുകളുടെ ടെൻഡർ നടപടികൾ പൂർത്തിയായിട്ടുണ്ട്.

ഇപ്പൊൾ കൊച്ചി നഗരത്തിന്റെ വികസനക്കുത്തിപ്പിന് കാരണമാകുന്ന കൊടുങ്ങല്ലൂർ – ഇടപ്പള്ളി ദേശീയ പാത ആറ് വരിപ്പാതയ്ക്ക് ഭാരത് മാല പദ്ധതിയിൽ 3465.82 കോടി രൂപ അനുവദിച്ചതായി ശ്രീ. നിതിൻ ഗഡ്കരി അറിയിച്ചിട്ടുണ്ട്. അദ്ദേഹത്തിന് നന്ദി അറിയിക്കുന്നു.

എറണാകുളം – തൃശൂർ ജില്ലകളിലെ ഏറ്റവും പ്രധാനപ്പെട്ട മുസിരിസ് പൈതൃക സംരക്ഷണ ടൂറിസം പദ്ധതിക്ക് വലിയ ഉണർവ്വ് ഉണ്ടാക്കാൻ ഈ പാതയുടെ വികസനത്തിലൂടെ സാധിക്കും.

ദേശീയ പാതാ വികസനത്തിൻറെ ഭാഗമായി സംസ്ഥാന സർക്കാർ എല്ലാ സഹായവും ദേശീയപാത അതോറിറ്റിക്ക് നൽകും. പ്രവൃത്തികൾ സമയബന്ധിതമായി പൂർത്തിയാക്കാനാവശ്യമായ ഇടപെടലുകൾ നടത്തും. കൃത്യമായ ഇടവേളകളിൽ പുരോഗതി വിലയിരുത്തിക്കൊണ്ട് യോഗങ്ങൾ ചേരും.

ദേശീയപാത വികസനം യാഥാർഥ്യമാക്കാൻ മുൻകൈയ്യെടുത്ത് പ്രവർത്തിക്കുന്ന കേരളത്തിലെ ദേശീയപാത അതോറിറ്റി അധികൃതരെ പ്രത്യേകം അഭിനന്ദിക്കുന്നു.

കണ്ണൂർ: റിയൽ എസ്റ്റേറ്റ് നിയമങ്ങൾ കർശനമാക്കാനൊരുങ്ങി റിയൽ എസ്റ്റേറ്റ് റെഗുലേറ്ററി അതോറിറ്റി. റിയൽ എസ്റ്റേറ്റ് മേഖലയുമായി ബന്ധപ്പെട്ട് ഉണ്ടാകുന്ന പ്രശ്‌നങ്ങൾ മുൻകൂട്ടി തടയാനും ഉപഭോക്താക്കൾക്കും ഡെവലപ്പർമാർക്കും നിയമപരിരക്ഷ ഉറപ്പാക്കാനുമാണ് (റെറ) ലക്ഷ്യമിടുന്നതെന്ന് ചെയർമാൻ പി.എച്ച്. കുര്യൻ വ്യക്തമാക്കി. വാർത്താ സമ്മേളനത്തിലാണ്അദ്ദേഹം ഇക്കാര്യം അറിയിച്ചത്.

അതോറിറ്റിയിൽ രജിസ്റ്റർ ചെയ്യാതെ റിയൽ എസ്റ്റേറ്റ് പ്രൊജക്ടുകൾ വിപണനം ചെയ്യുന്നതും ദീർഘകാല പാട്ടത്തിന് നൽകുന്നതും പദ്ധതി ചെലവിന്റെ പത്തുശതമാനം വരെ പിഴയീടാക്കാവുന്ന കുറ്റമാണെന്ന് അദ്ദേഹം പറഞ്ഞു. 500 ചതുരശ്ര മീറ്ററോ അതിൽ കൂടുതലോ ഭൂമിയിൽ എട്ടോ അതിലധികമോ പ്ലോട്ടോ, വില്ലയോ, ഫ്‌ളാറ്റോ, വാണിജ്യ യൂണിറ്റുകളോ, ഓഫീസുകളോ, വാണിജ്യ സ്ഥാപനങ്ങളോ, ഗോഡൗണുകളോ (ഉടമസ്ഥാവകാശമോ ദീർഘകാല പാട്ടമോ ഉള്ളവ) ആണ് ഈ നിയമപ്രകാരം റിയൽ എസ്റ്റേറ്റ് പദ്ധതിയെന്ന നിർവചനത്തിൽ വരുന്നത്. രജിസ്റ്റർ ചെയ്ത എല്ലാ റിയൽ എസ്റ്റേറ്റ് പദ്ധതികളുടേയും വിശദാംശങ്ങളും നിർമ്മാണ പുരോഗതിയും വെബ് പോർട്ടലിൽ ലഭ്യമാണെന്ന് അദ്ദേഹം അറിയിച്ചു.

ഇടപാടുകളിൽ ഏർപ്പെടുന്നതിനു മുൻപ് പോർട്ടൽ സന്ദർശിച്ച് രജിസ്ട്രേഷനുണ്ടെന്ന് ഉറപ്പാക്കണം. ഇത്തരം പ്രൊജക്ടുകളിലെ ഇടപാടുകളിൽ ഏജന്റായി പ്രവർത്തിക്കുന്നവരും (റിയൽ എസ്റ്റേറ്റ് ഏജന്റ്) നിർബന്ധമായും റെറയിൽ രജിസ്റ്റർ ചെയ്യണമെന്നും അദ്ദേഹം ആവശ്യപ്പെട്ടു.

അറുനൂറിലേറെ പദ്ധതികളും ഇരുനൂറോളം ഏജന്റുമാരുമാണ് ഒക്ടോബർ 30 വരെ റെറയിൽ രജിസ്റ്റർ ചെയ്തിട്ടുള്ളത്. 118 പ്രൊജക്ടുകൾ പൂർത്തിയായി. 919 കേസുകൾ രജിസ്റ്റർ ചെയ്തതിൽ 480 എണ്ണമാണ് തീർപ്പാക്കിയത്. റിയൽ എസ്റ്റേറ്റ് ഇടപാടുകളുമായി ബന്ധപ്പെട്ട് വിവിധ മേഖലകളിൽ പ്രവർത്തിക്കുന്നവർക്കും തദ്ദേശ സ്ഥാപന ഉദ്യോഗസ്ഥർക്കുമായി അതോറിട്ടി കണ്ണൂരിൽ ബോധവൽക്കരണ പരിപാടി നടത്തി. റെറ അംഗങ്ങളായ അഡ്വ. പ്രീത മേനോൻ, എം.പി. മാത്യൂസ് തുടങ്ങിയവരും ചടങ്ങിൽ പങ്കെടുത്തു.

തിരുവനന്തപുരം: സംസ്ഥാനത്ത് ബസ് ചാർജ് വർധിപ്പിക്കാൻ തീരുമാനിച്ചു. ഗതാഗതമന്ത്രി ആന്റണി രാജുവാണ് ഇക്കാര്യം അറിയിച്ചത്. എത്ര രൂപ കൂട്ടണമെന്ന കാര്യത്തിൽ ഉടൻ തീരുമാനമാനമെടുക്കുമെന്ന് അദ്ദേഹം പറഞ്ഞു. ബസ് ഉടമകളുമായുള്ള ചർച്ചയ്ക്ക് ശേഷം നടത്തിയ വാർത്താ സമ്മേളനത്തിലായിരുന്നു അദ്ദേഹത്തിന്റെ ഇക്കാര്യം വ്യക്തമാക്കിയത്.

ഇന്ധന വില വർധനവിന്റെ പശ്ചാത്തലത്തിൽ ബസ് ചാർജ് വർധിപ്പിക്കണമെന്ന ആവശ്യം പരിഗണിക്കണമെന്നാണ് സർക്കാരിന്റെ നിലപാട്. എന്നാൽ ബസ് ഉടമകൾ ഉന്നയിച്ച എല്ലാ ആവശ്യങ്ങളും അതേപടി സർക്കാർ അംഗീകരിച്ചേക്കില്ല. ബസ് ഉടമകളുടെ ആവശ്യങ്ങൾ വിദ്യാർഥികൾ അടക്കമുള്ള പൊതുജനങ്ങൾക്ക് അമിതഭാരമുണ്ടാക്കാതെ എങ്ങനെ നടപ്പാക്കാമെന്ന കാര്യമാണ് സർക്കാർ പരിശോധിക്കുന്നത്.

മിനിമം ചാർജ് 8 രൂപയിൽ നിന്ന് 12 ആയി ഉയർത്തണമെന്നും കിലോമീറ്റർ ചാർജ് 90 പൈസയിൽ നിന്ന് 1 രൂപയായി വർധിപ്പിക്കണമെന്നുമാണ് ബസ് ഉടമകൾ മുന്നോട്ട് വെയ്ക്കുന്ന ആവശ്യം.. വിദ്യാർഥികൾക്കുള്ള മിനിമം ചാർജ് 1 രൂപയിൽ നിന്ന് ആറ് രൂപയായി വർധിപ്പിക്കണമെന്നും ബസുടമകൾ ആവശ്യപ്പെടുന്നു. രാമചന്ദ്രൻ കമ്മീഷനുമായും മുഖ്യമന്ത്രിമായും ചർച്ച നടത്തിയ ശേഷം വിഷയത്തിൽ അന്തിമ തീരുമാനം സ്വീകരിക്കും.

തിരുവനന്തപുരം: ഫയർ ഫോഴ്‌സിന്റെ സേവനങ്ങളെ പ്രശംസിച്ച് മുഖ്യമന്ത്രി പിണറായി വിജയൻ. സംസ്ഥാനം നേരിട്ട ദുരന്ത സമയങ്ങളിലെ ഫയർഫോഴ്സിന്റെ പ്രവർത്തനങ്ങളെയാണ് അദ്ദേഹം അഭിനന്ദിച്ചത്. അടിയന്തര സാഹചര്യം നേരിടാൻ ഫയർഫോഴ്സ് സേനയെ സജ്ജമാക്കുകയാണ് സർക്കാർ ലക്ഷ്യമെന്ന് അദ്ദേഹം പറഞ്ഞു. നിരന്തരമായി ഉണ്ടാകുന്ന പ്രകൃതി ദുരന്തങ്ങളെ നേരിടാൻ നൂതനമായ മാർഗങ്ങൾ തേടണമെന്നും സിവിൽ ഡിഫൻസ് ഫോഴ്സ് പൂർണ തോതിൽ സജ്ജമാണെന്നും അദ്ദേഹം വ്യക്തമാക്കി.

നൂറ്റാണ്ടിലെ മഹാപ്രളയം, തുടർച്ചയായുണ്ടായ കാലവർഷക്കെടുതികൾ, ഉരുൾപൊട്ടൽ എന്നീ ദുരന്തങ്ങളിലെല്ലാം സ്വന്തം ജീവൻ പണയപ്പെടുത്തി പ്രവർത്തിച്ചവരാണ് കേരള ഫയർഫോഴ്സ്. ഒരു ഘട്ടത്തിൽ വീടുകളിലേക്ക് മരുന്നുകൾ നേരിട്ടെത്തിക്കുന്നതിൽ വരെയും ഫയർഫോഴ്സ് മുന്നിലുണ്ടായിരുന്നുവെന്ന് അദ്ദേഹം ചൂണ്ടിക്കാട്ടി.

സർക്കാർ സേവനങ്ങൾക്ക് പ്രധാനം ഉയർന്ന നിലവാരമുള്ള മാനവ വിഭവ ശേഷിയാണ്. അഗ്‌നിരക്ഷാ സേനയുടെ ആപ്തവാക്യത്തെ പൂർണമായും പ്രവർത്തിയിലൂടെ കാണിച്ചുകൊടുക്കേണ്ടവരാണ് ഫയർഫോഴ്സ്. കേരളത്തിലെ ഫയർഫോഴ്സിന് കഴിഞ്ഞ നാളുകളിൽ അതിന് കഴിഞ്ഞുവെന്നും അദ്ദേഹം അഭിപ്രായപ്പെട്ടു. സർക്കാർ സംവിധാനങ്ങൾ മെച്ചപ്പെടുത്തുന്നതിന് വേണ്ടി രണ്ടുതരത്തിലുള്ള ഇടപെടലുകളാണ് പ്രധാനമായും വേണ്ടത്. ഉയർന്ന നിലവാരമുള്ള മാനവവവിഭവ ശേഷി സർക്കാർ സർവീസിന്റെ ഭാഗമാകുക, രണ്ട്, അവരുടെ സേവനങ്ങൾ കാര്യക്ഷമമയായി നിർവഹിക്കാനാകുന്ന അടിസ്ഥാന സൗകര്യങ്ങളുണ്ടാവുക. ഇവയ്ക്ക് രണ്ടുമാണ് സർക്കാർ പ്രാധാന്യം നൽകുന്നതെന്നും അദ്ദേഹം കൂട്ടിച്ചേർത്തു.