General (Page 1,318)

തിരുവനന്തപുരം: കഴിഞ്ഞ പത്ത് വർഷമായി ശമ്പള വർധനവില്ലാതെ ജോലി ചെയ്ത് കെഎസ്ആർടിസിയിലെ തൊഴിലാളികൾ. കിട്ടുന്ന ശമ്പളം കൊണ്ട് ജീവിത ചെലവുകൾ മുന്നോട്ടു കൊണ്ടു പോകാൻ കഴിയാതെ ദുരിതത്തിലായിരിക്കുകയാണ് ഇവർ.

‘ശമ്പളം എന്ന് കിട്ടുമെന്നറിയില്ല, എടുത്ത ലോണിന്റെ അടവുകൾ മുടങ്ങുമ്പോൾ പലിശ കൂടും. വാടക കൃത്യമായി നൽകാൻ കഴിയാത്ത അവസ്ഥയാണ്. ഇപ്പോൾ കിട്ടുന്ന ശമ്പളം കൊണ്ട് ജീവിതം മുന്നോട്ടു പോകാൻ കഴിയുന്നില്ല. സ്വന്തമായി ഒരു കൂര പോലുമില്ല. ആത്മഹത്യയെ കുറിച്ചുവരെ ആലോചിച്ചിട്ടുണ്ട്…’ കെ.എസ്.ആർ.ടി.സി സിറ്റി ഡിപ്പോയിലെ ഡ്രൈവർ സുനിൽകുമാറിന്റെ വാക്കുകളാണിത്. ജീവിത പ്രതിസന്ധി എത്രത്തോളമുണ്ടെന്ന് ഈ വാക്കുകളിൽ നിന്നു തന്നെ വ്യക്തമാണ്.

ജൂൺ മാസം മുതൽ ശമ്പളം വർദ്ധിക്കുന്നതോടെ പ്രശ്‌നങ്ങളെല്ലാം പരിഹരിക്കപ്പെടുമെന്ന് വിശ്വസിച്ചിരിക്കുകയായിരുന്നു സുനിൽ. എന്നാൽ ഇപ്പോൾ അദ്ദേഹത്തിന് ലഭിക്കുന്ന തുക 24,500 രൂപയാണ്. മകളുടെ വിവാഹച്ചെലവ് ഉൾപ്പെടെയുള്ള ആവശ്യത്തിനായി വായ്പ വാങ്ങിയ ഇനത്തിൽ അഞ്ചു ലക്ഷം രൂപയുടെ ബാധ്യതയും ഇദ്ദേഹത്തിനുണ്ട്. മാസം ആരംഭിച്ച് രണ്ടാം വാരമാകുമ്പോഴാണ് പലപ്പോഴും തുച്ഛമായ ശമ്പളം ലഭിക്കുന്നതെന്നും സുനിൽ പറയുന്നു. സുനിലിനെ പോലെ നിരവധി പേരാണ് ഇത്തരത്തിൽ ദുരിതം അനുഭവിക്കുന്നത്.

2011 ലാണ് ഏറ്റവും ഒടുവിൽ കെ.എസ്.ആർ.ടി.സി ശമ്പളം വർധിപ്പിച്ചത്. ഇത്രയും ഇടവേളയ്ക്കു ശേഷം, കെ.എസ്.ആർ.ടി.സി തയ്യാറാക്കിയ ശമ്പള പരിഷ്‌കരണ പാക്കേജിൽ,10 വർഷത്തിൽ കൂടുതൽ സർവീസുള്ളവർക്ക് പോലും 1500-2500 രൂപയുടെ വർധനവ് മാത്രമാണ് ഉണ്ടായിരിക്കുന്നത്.അതേസസമയം കോവിഡ് സാഹചര്യം നിലനിൽക്കെ തന്നെയല്ലേ സർക്കാർ ജീവനക്കാരുടേയും അദ്ധ്യാപകരുടേയും ശമ്പളം സർക്കാർ കുത്തനെ വർധിപ്പിച്ചതെന്നും കെഎസ്ആർടിസി ജീവനക്കാർ ചോദിക്കുന്നു. കൂടുതൽ ബസുകൾ നിരത്തിലിറക്കുക, കൃത്യമായി സർവീസ് നടത്തുക, ചീഫ് ഓഫീസിൽ പുതിയ നിയമനങ്ങൾ നിർത്തലാക്കുക, ശമ്പള വർദ്ധന യാഥാർത്ഥ്യമാക്കണം എന്നിവയാണ് തൊഴിലാളികൾ മുന്നോട്ടു വെയ്ക്കുന്ന ആവശ്യം. ആവശ്യങ്ങൾ അംഗീകരിച്ചില്ലെങ്കിൽ മൂന്ന് അംഗീകൃത സംഘടനകളും ഒരുമിച്ച് അനിശ്ചിത കാല പണിമുടക്ക് നടത്തുമെന്നും തൊഴിലാളികൾ പറയുന്നു.

തിരുവനന്തപുരം: സിൽവർലൈൻ പദ്ധതിക്കെതിരെ ഉയരുന്ന വിമർശനങ്ങൾക്ക് മറുപടി നൽകി കെ റെയിൽ എംഡി. കെ റെയിൽ കേരളത്തെ രണ്ടായി വിഭജിക്കില്ലെന്ന് അദ്ദേഹം പറഞ്ഞു. കേരളത്തെ രണ്ടായി മുറിക്കുന്ന മതിലുകൾ നിർമിക്കില്ല. റെയിൽവേ നിയമ പ്രകാരമുള്ള സംരക്ഷണ വേലി മാത്രമാണ് കെട്ടുന്നത്. ഓരോ 500 മീറ്ററിലും റോഡ് മുറിച്ച് കടക്കാനുള്ള സംവിധാനങ്ങൾ ഉണ്ടാകും. അഞ്ചുകൊല്ലം കൊണ്ട് പണി പൂർത്തിയാക്കുമെന്നും അദ്ദേഹം വ്യക്തമാക്കി.

കേരളത്തിന്റെ തെക്കേ അറ്റത്തുനിന്ന് വടക്കേ അറ്റത്തേക്ക് നാല് മണിക്കൂറിൽ എത്തിച്ചേരാൻ കഴിയുന്ന റെയിൽവേ പദ്ധതിയാണ് കാസർകോട് – തിരുവനന്തപുരം അർധ അതിവേഗപാതയായ സിൽവർലൈൻ. നിലവിലെ തീവണ്ടി യാത്രാസൗകര്യങ്ങളുടെ അപര്യാപ്തത പരിഹരിക്കുന്നതിനുള്ള ബദൽ മാർഗമുണ്ടാക്കുന്നതിനും സംസ്ഥാനത്തെ പൊതുഗതാഗതം ശക്തിപ്പെടുത്തുന്നതിനുമാണ് സിൽവർലൈൻ ആവിഷ്‌കരിച്ചിരിക്കുന്നത്. 11 സ്റ്റേഷനുകളാണ് സിൽവർലൈൻ പദ്ധതിക്കുള്ളത്. അഞ്ചുവർഷം കൊണ്ട് പൂർത്തിയാക്കുന്നതിന് ഫാസ്റ്റ് ട്രാക്ക് അടിസ്ഥാനത്തിലാണ് സിൽവർലൈൻ പദ്ധതി ആസുത്രണം ചെയ്തിരിക്കുന്നത്. പദ്ധതി പൂർത്തിയാക്കാനുള്ള മൊത്തം ചെലവ് പ്രതീക്ഷിക്കുന്നത് 63, 941 കോടി രൂപയാണെന്നും 2025 വരെയുള്ള ചെലവ് വർധനവും നികുതികളും നിർമ്മാണ ഘട്ടത്തിലെ പലിശയും ഉൾപ്പെടെയാണ് ഈ തുക കണക്കാക്കിയിട്ടുള്ളതെന്ന് അദ്ദേഹം വിശദമാക്കി.

ഒരു റെയിൽവേലൈൻ പണിയുന്നതിന് അഞ്ചുകൊല്ലം ധാരാളമാണ്. രണ്ട് കൊല്ലത്തിനകം ഭൂമി ഏറ്റെടുക്കൽ നടപടികൾ പൂർത്തിയാക്കിയാൽ അഞ്ചുവർഷം കൊണ്ട് പണിപൂർത്തിയാക്കും. 8, 10 കൊല്ലം കൊണ്ട് പൂർത്തിയാക്കുന്ന പദ്ധതിയുടെ ചെലവ് വല്ലാതെ ഉയരും. അഞ്ചുകൊല്ലം പൂർത്തിയാക്കിയാൽ ആ പദ്ധതി പ്രായോഗികമായിരിക്കും. ഏത് പദ്ധതിയും എത്ര പെട്ടെന്ന് പൂർത്തിയാക്കുന്നുവോ അത്രയും ലാഭകരമായിരിക്കും. പദ്ധതിയുടെ വിശദമായ രൂപരേഖയ്ക്ക് (ഡിപിആർ) റെയിൽവേ ബോർഡിൻറെ അന്തിമാനുമതി കാത്തിരിക്കുകയാണ്. വായ്പകൾക്കായുള്ള നടപടികൾ ആരംഭിക്കുന്നതിന് റെയിൽവേ മന്ത്രാലയം അനുമതി നൽകിയിട്ടുണ്ട്. പദ്ധതിയുടെ വിശദമായ രൂപരേഖ പരിശോധിച്ച നീതി ആയോഗ് വിദേശ വായ്പകൾക്കായുള്ള നടപടികളുമായി മുന്നോട്ട് പോകാമെന്ന് സാമ്പത്തികകാര്യ വകുപ്പിനോട് ശുപാർശ ചെയ്തിട്ടുണ്ട്. ഡിപിആർ ഒരു വാണിജ്യരേഖ ആയതുകൊണ്ടാണ് അത് പുറത്തുവിടാത്തത്. ഇത്തരം പദ്ധതികളുടെ വിശദമായ പദ്ധതി റിപ്പോർട്ടുകൾ കമ്പനികൾ സാധാരണ പ്രസിദ്ധീകരിക്കാറില്ല. കമ്പനികളുടെ ഈ നിലപാടിനെ സുപ്രീംകോടതിയും അഗീകരിച്ചതാണെന്ന് അദ്ദേഹം ചൂണ്ടിക്കാട്ടി.

2017 ഒക്ടോബർ 27 ന് കേരള മുഖ്യമന്ത്രിയും റെയിൽവേ ബോർഡ് ചെയർമാനും പങ്കെടുത്ത യോഗത്തിലെ തീരുമാനം അനുസരിച്ചാണ് സിൽവർലൈൻ അലൈൻമെൻറ് നിലവിലെ പാതക്ക് സമാന്തരമായി നിർമിക്കാൻ തീരുമാനിച്ചത്. കാസർകോട് മുതൽ തിരൂർ വരെ നിലവിലുള്ള പാതയ്ക്ക് സമാന്തരമായാണ് സിൽവർലൈൻ വരുന്നത്. തിരൂർ മുതൽ തിരുവനന്തപുരം വരെ അനേകം വളവുകളും മറ്റുമുള്ളതിനാൽ സമാന്തര പാത സാധ്യമല്ലെന്ന് പഠനത്തിൽ കണ്ടെത്തി. അതിൻറെ അടിസ്ഥാനത്തിലാണ് ഈ മേഖലയിൽ ഗ്രീൻ ഫീൽഡിൽ പുതിയ പാത ആസൂത്രണം ചെയ്തിട്ടുള്ളത്. ഇന്ത്യൻ റെയിൽവെയുടെ ഭാവി ഗതാഗത ആവശ്യങ്ങൾ ഒരുപരിധി വരെ നിറവേറ്റാൻ പറ്റുന്ന വിധത്തിലാണ് സിൽവർലൈൻ വിഭാവനം ചെയ്തിരിക്കുന്നത്. അതുകൊണ്ട് തന്നെ കേരളത്തിൽ ഭാവിയിൽ പുതിയ റെയിൽവേ ലൈനുകൾ ആവശ്യമായി വരില്ല. കേന്ദ്ര റെയിൽവേ മന്ത്രാലയവും സംസ്ഥാന സർക്കാരും സംയുക്തമായി തുടങ്ങിയ ഈ സംരംഭത്തിൻറെ ലക്ഷ്യവും അതുതന്നെയാണ്. മതിയായ വിഭവേശഷിയില്ലാത്ത റെയിൽവേ, അടിസ്ഥാന സൗകര്യ വികസനത്തിൽ നേരിട്ട് നിക്ഷേപം നടത്തുന്നതിന് പകരം ഇത്തരം സംയുക്ത സംരംഭങ്ങളിലൂടെയാണ് നിക്ഷേപം നടത്തുന്നത്. പല സംസ്ഥാനങ്ങളിലും സംയുക്ത സംരംഭത്തിൽ റെയിൽവേ വികസനം നടപ്പാക്കി വരുന്നുണ്ട്. തണ്ണീർതടങ്ങളും നെൽവയലുകളുമുള്ള സ്ഥലങ്ങളിൽ വയഡക്ടിലൂടെയാണ് (തൂണുകൾ) പാത പോകുന്നത്. മറ്റ് സ്ഥലങ്ങളിൽ മണ്ണ് ശക്തിപ്പെടുത്താനുള്ള സാങ്കേതിക വിദ്യകൾ ഉപയോഗിക്കുന്നുണ്ടെന്ന് അദ്ദേഹം അറിയിച്ചു.

തിരുവനന്തപുരം: ദത്ത് വിഷയത്തിൽ ചൈൽഡ് വെൽഫയർ കമ്മിറ്റിക്കും (സി.ബ്ല്യു.സി) ശിശുക്ഷേമ സമിതിക്കും ഗുരുതരമായ വീഴ്ച സംഭവിച്ചതായി റിപ്പോർട്ട്. വനിതാ ശിശു വികസന വകുപ്പ് ഡയറക്ടർ ടിവി അനുപമയുടെ നേതൃത്വത്തിൽ നടത്തിയ വകുപ്പുതല അന്വേഷണ റിപ്പോർട്ടിലാണ് ഇക്കാര്യം വ്യക്തമാക്കിയത്. ആരോഗ്യ മന്ത്രി വീണാ ജോർജിന് റിപ്പോർട്ട് ഉടൻ കൈമാറും.

കുട്ടി തന്റേതാണെന്നും തിരികെ നൽകണമെന്നും ആവശ്യപ്പെട്ട് അനുപമയും അജിത്തും സി.ബ്ല്യു.സിയെയും ശിശുക്ഷേമ സമിതിയെയും സമീപിച്ചുവെങ്കിലും നടപടി സ്വീകരിച്ചിരുന്നില്ല. ഇവർ എത്തിയിട്ടും കുട്ടിയുടെ സ്ഥിരം ദത്ത് തടയാനുള്ള നടപടികളെടുത്തില്ലെന്നും റിപ്പോർട്ടിൽ കണ്ടെത്തിയിട്ടുണ്ട്. തന്റെ കുട്ടി ആണ് ഇവിടെ എത്തിച്ചിരിക്കുന്നതെന്നും തിരികെ വേണമെന്നും ആവശ്യപ്പെട്ട് അനുപമ ഓഗസ്റ്റ് 11 ന് സിഡബ്ല്യൂസിയെ സമീപിച്ചിരുന്നു. ഓഗസ്റ്റ് ആറിനാണ് കുട്ടിയെ ദത്ത് നൽകാൻ അഡോപ്ഷൻ കമ്മിറ്റി തീരുമാനിക്കുന്നത്. തുടർന്ന് അടുത്ത ദിവസം തന്നെ ആന്ധ്രയിലെ ദമ്പതികൾക്ക് ദത്ത് നൽകുകയും ചെയ്തു.

എന്നാൽ കുട്ടിയെ വേണമെന്നാവശ്യപ്പെട്ട് അനുപമ സമീപിച്ചതിന് ശേഷവും ദത്ത് നടപടികൾ സ്ഥിരപ്പെടുത്താനുള്ള നടപടികളുമായി സിഡബ്ല്യൂസി മുന്നോട്ട് പോയി. ഇതുമായി ബന്ധപ്പെട്ട് സിഡബ്ല്യൂസി ഓഗസ്റ്റ് 16 ന് കോടതിയിൽ സത്യവാങ്മൂലം നൽകുകയും ചെയ്തുവെന്നും റിപ്പോർട്ടിൽ പറയുന്നു. സംഭവത്തിൽ ശിശുക്ഷേമ സമിതി ജനറൽ സെക്രട്ടറി ഷിജു ഖാൻ അടക്കമുള്ളവരെ അനുപമയും അജിത്തും നേരിൽ കണ്ട് പല തവണ കുട്ടിയെ തിരികെ വേണമെന്ന് ആവശ്യപ്പെട്ടുവെങ്കിലും തിരികെ എത്തിക്കാനുള്ള ഒരു നടപടിയും നൽകിയില്ല എന്ന് മാത്രമല്ല സ്ഥിരം ദത്ത് നൽകാനുള്ള നടപടികളുമായി മുന്നോട്ട് പോയെന്നും റിപ്പോർട്ടിൽ ചൂണ്ടിക്കാട്ടിയിട്ടുണ്ട്.

തിരുവനന്തപുരം: അമ്മ അറിയാതെ കുഞ്ഞിനെ ദത്ത് നൽകിയ കേസുമായി ബന്ധപ്പെട്ട് കുഞ്ഞിനെ നാട്ടിലെത്തിച്ച് ഒരുദിവസത്തിനുള്ളിൽ ഡിഎൻഎ പരിശോധന ഫലം പുറത്തുവന്ന സാഹചര്യത്തിൽ സാമൂഹ്യ മാദ്ധ്യമങ്ങളിൽ മറ്റൊരു വിഷയം ചർച്ചാ വിഷയമാകുകയാണ്. സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ മകൻ ബിനോയ് കോടിയേരിക്കെതിരായ ബിഹാർ സ്വദേശിനിയുടെ പരാതിയെ കുറിച്ചുള്ള ചർച്ചകളാണ് വീണ്ടും സജീവമാകുന്നത്. യുവതിയുടെ കുട്ടിയുടെ പിതൃത്വം തെളിയിക്കാനുള്ള ഡിഎൻഎ പരിശോധനാ ഫലം സമർപ്പിക്കപ്പെടാത്തതാണ് വിമർശനം ഉയരാനുള്ള കാരണം. ഡിഎൻഎ പരിശോധനാ ഫലം ലാബിൽ നിന്ന് ലഭിച്ചിട്ടില്ലെന്നാണ് പൊലീസ് മുൻപ് കോടതിയെ അറിയിച്ചത്.

സിപിഎം നേതൃത്വത്തെ ഒരു പോലെ പ്രതിരോധത്തിലാക്കിയ രണ്ട് കേസുകളിൽ ഉണ്ടായ വൈരുദ്ധ്യമാണ് വിമർശനങ്ങൾക്ക് ആധാരം. ബിജെപി ബൗദ്ധിക സെൽ കൺവീനറും രാഷ്ട്രീയ നിരീക്ഷകനുമായ ടി ജി മോഹൻദാസും സംഭവത്തിനെതിരെ പ്രതികരണവുമായി രംഗത്തെത്തി. ഡിഎൻഎ ഫലം അനുപമയുടെ മകന്റെ ആണെങ്കിൽ ഒറ്റ ദിവസം കൊണ്ട് കിട്ടും. കോടിയേരിയുടെ മകന്റെ ആണെങ്കിൽ കിട്ടില്ലെന്ന് അദ്ദേഹം പറഞ്ഞു. ഇന്നസെന്റ് പറഞ്ഞത് എത്ര സത്യം! ചെന്തെങ്ങിന്റെ കുല ആടും; ടിxഡി ആണെങ്കിൽ ആടുകയില്ലെന്നും അദ്ദേഹം പരിഹസിച്ചു. ഫേസ്ബുക്കിൽ പങ്കുവെച്ച കുറിപ്പിലൂടെയായിരുന്നു അദ്ദേഹത്തിന്റെ പരാമർശം.

ദത്ത് വിവാദവുമായി ബന്ധപ്പെട്ട് ചൊവ്വാഴ്ച്ചയാണ് കുട്ടിയുടെ ഡിഎൻഎ ഫലം പുറത്തു വന്നത്. കുഞ്ഞ് അനുപമയുടേത് തന്നെയാണെന്ന് ഡിഎൻഎ പരിശോധനയിൽ വ്യക്തമായി. മൂന്ന് തവണ ഡിഎൻഎ സാമ്പിൾ ക്രോസ് മാച്ച് ചെയ്തപ്പോഴും മാതാവ് അനുപമയും പിതാവ് അജിത്തുമാണെന്ന് ഫലം ലഭിച്ചു. ഡിഎൻഎ പരിശോധനാ ഫലം സിഡബ്ല്യുസിക്ക് കൈമാറി. ഈ റിപ്പോർട്ട് സിഡബ്ല്യുസി കോടതിയിൽ സമർപ്പിക്കും. രാജീവ് ഗാന്ധി സെന്റർ ഫോർ ബയോടെക്നോളജിയിലാണ് ഡിഎൻഎ പരിശോധന നടത്തിയത്.