ന്യൂഡൽഹി: അന്താരാഷ്ട്ര വിമാനങ്ങൾ നിർത്തലാക്കണമെന്ന ആവശ്യവുമായി ഡൽഹി മുഖ്യമന്ത്രി അരവിന്ദ് കെജ്രിവാൾ. കോവിഡിന്റെ പുതിയ വകഭേദം കണ്ടെത്തിയ സാഹചര്യത്തിലാണ് അദ്ദേഹം ഇത്തരമൊരു ആവശ്യം മുന്നോട്ടു വെച്ചത്. ഒമിക്രോൺ സ്ഥിരീകരിച്ച രാജ്യങ്ങളിൽ നിന്നുള്ള വിമാനങ്ങൾ നിരവധി രാജ്യങ്ങൾ നിരോധിച്ചുവെന്നും എന്തുകൊണ്ട് ഇന്ത്യ വൈകുന്നുവെന്നുമാണ് അദ്ദേഹത്തിന്റെ ചോദ്യം. അന്താരാഷ്ട്ര വിമാനങ്ങൾ നിരോധിച്ചില്ലെങ്കിൽ ഗുരുതര പ്രതിസന്ധിയുണ്ടാകുമെന്നും ഡൽഹിയെയായിരിക്കും ഇത് ഏറ്റവും അധികം ബാധിക്കുകയെന്നും അദ്ദേഹം വ്യക്തമാക്കി.
കോവിഡിന്റെ ആദ്യ തരംഗത്തിലും അന്താരാഷ്ട്ര വിമാനങ്ങൾക്ക് വിലക്ക് ഏർപ്പെടുത്തുന്നത് വൈകിയിരുന്നു. വിദേശ വിമാന സർവീസുകൾ അടിയന്തരമായി നിർത്തലാക്കാൻ പ്രധാനമന്ത്രി നടപടിയെടുക്കണമെന്നും അദ്ദേഹം ആവശ്യപ്പെട്ടു. അതേസമയം ഒമിക്രോൺ റിപ്പോർട്ട് ചെയ്ത പന്ത്രണ്ട് രാജ്യങ്ങളിൽ നിന്നുള്ള വിമാന സർവീസുകൾ നിർത്തലാക്കണമെന്ന് കേന്ദ്ര സർക്കാരിനോട് അപേക്ഷിക്കാൻ തീരുമാനിച്ചതായി മഹാരാഷ്ട്ര സർക്കാരും വ്യക്തമാക്കിയിട്ടുണ്ട്.
അന്താരാഷ്ട്ര യാത്രക്കാർക്ക് കർശന മാർഗനിർദേശങ്ങൾ ഏർപ്പെടുത്തുന്നതുമായി ബന്ധപ്പെട്ട് മഹാരാഷ്ട്ര മുഖ്യമന്ത്രി പ്രധാനമന്ത്രിയുമായി കൂടിക്കാഴ്ച നടത്തുമെന്നും ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു.