Highlights (Page 211)

തിരുവനന്തപുരം : സംസ്ഥാനം ലോക്ക്ഡൗണിന്റെ രണ്ടാം ആഴ്ചയിലേക്ക് കടക്കവേ കൊവിഡ് കേസുകളിൽ നേരിയ കുറവ്. എന്നാൽ പുതിയ വൈറസ് വകഭേദങ്ങൾ വ്യാപിക്കുന്നത് ആശങ്ക സൃഷ്ടിക്കുന്നുണ്ട്.ഇതിനൊപ്പം ബ്ളാക്ക് ഫംഗസും ഭീഷണി ഉയർത്തുന്നുണ്ട്. ട്രിപ്പിൾ ലോക്ക്ഡൗൺ നടപ്പാക്കിയ നാല് ജില്ലകളിൽ ടിപിആർ റേറ്റ് കുറഞ്ഞുവരുന്നുണ്ട്. മൊത്തം രോഗികളുടെ എണ്ണത്തിൽ കുറവുണ്ടെങ്കിലും പുതുതായി രോഗം ബാധിച്ചവരുടെ എണ്ണത്തിൽ കാര്യമായി കുറവുണ്ടെങ്കിലേ ലോക്ക്ഡൗണിൽ ഇളവ് ആലോചിക്കാനാവൂ.

പുതിയ വൈറസ് വഭേദങ്ങൾ കണ്ടെത്തിയിട്ടുണ്ടെന്ന് കഴിഞ്ഞ ദിവസം പത്രസമ്മേളനത്തിൽ മുഖ്യമന്ത്രി പിണറായി വിജയൻ സ്ഥിരീകരിച്ചിരുന്നു, ഇതിൽ മൂന്ന് എണ്ണം വളരെ കൂടുതലായി സംസ്ഥാനത്ത് വ്യാപിച്ചിട്ടുണ്ട്. അതേസമയം നാല് ജില്ലകളിൽ ട്രിപ്പിൾ ലോക്ക് ഡൗണും ,മറ്റ് ജില്ലകളിൽ ലോക്ക് ഡൗണും ഏർപ്പെടുത്തിയുള്ള കൊവിഡ് നിയന്ത്രണത്തിന് ഫലം കണ്ടുതുടങ്ങിയെന്ന് അഭിപ്രായപ്പെട്ട മുഖ്യമന്ത്രി എന്നാൽ നിയന്ത്രണങ്ങളിൽ ഇളവ് വരുത്താനായിട്ടില്ലെന്നും വ്യക്തമാക്കി. ഇതോടെ ലോക്ക്ഡൗൺ ഇനിയും നീളുമെന്ന് ഉറപ്പായിട്ടുണ്ട്.

ഹൈദരാബാദ്: സ്പുട്നിക് 5 വാക്സിനു പിന്നാലെ റഷ്യയിൽ നിന്ന് പുതിയ ഒറ്റ ഡോസ് കൊവിഡ് 19 വാക്സിൻ ഇന്ത്യയിൽ എത്തുന്നു. നിലവിൽ ഇന്ത്യ അനുമതി നല്‍കിയിട്ടുള്ള സ്പുട്നിക് 5 വാക്സിൻ്റെ ഒറ്റ ഡോസ് പതിപ്പാണ് സ്പുട്നിക് ലൈറ്റ്. ക്ലിനിക്കൽ പരീക്ഷണം ഒഴിവാക്കിയാൽ ഇന്ത്യയിൽ അതിവേഗം വാക്സിൻ നിര്‍മിച്ച് വിതരണം ചെയ്യാനാകുമെന്ന് ഡോ. റെഡ്ഡീസ് തിങ്കളാഴ്ച പ്രസ്താവനയിൽ അറിയിച്ചു.അതേസമയം, ഇതിനോടകം അനുമതി ലഭിച്ചിട്ടുള്ള റഷ്യൻ ഇരട്ട ഡോസ് വാക്സിനായ സ്പുട്നിക് 5 വാക്സിൻ വ്യാവസായികാടിസ്ഥാനത്തിൽ നിര്‍മിക്കാൻ ഹെറ്ററോ ഗ്രൂപ്പിന് കരാര്‍ ലഭിച്ചിട്ടുണ്ട്.

10 കോടി ഡോസ് വാക്സിനാണ് കമ്പനി ഉത്പാദിപ്പിക്കുക. പ്രാദേശികമായി ഉത്പാദിപ്പിക്കുന്ന ഈ വാക്സിൻ 300ഓളം പേരിൽ ക്ലിനിക്കൽ പരീക്ഷണം നടത്തും.വിദേശത്ത് പരീക്ഷിച്ചു തെളിഞ്ഞ വാക്സിൻ്റെ സാങ്കേതികവിദ്യയാണ് ഇന്ത്യയ്ക്ക് കൈമാറുന്നതെന്നും പുതിയ വാക്സിനല്ലാത്തതിനാൽ ക്ലിനിക്കൽ പരീക്ഷണം ഒഴിവാക്കണമെന്നും ഡിസിജിഐയോട് അഭ്യര്‍ഥിച്ചതായി ഡോ. റെഡ്ഡീസ് വ്യക്തമാക്കി.അതേസമയം, ഇന്ത്യയിൽ അനുമതി നേടുന്നതിനായി ഒറ്റ ഡോസ് വാക്സിൻ്റെ ക്ലിനിക്കൽ പരീക്ഷണം സംബന്ധിച്ച എല്ലാ രേഖകളും റഷ്യയിൽ നിന്നു ശേഖരിക്കുന്നുണ്ടെന്നും കമ്പനി വ്യക്തമാക്കി.

ക്ലിനിക്കൽ പരീക്ഷണം ഒഴിവാക്കാൻ ഈ വിവരങ്ങള്‍ മതിയാകുമോ എന്നു പരിശോധിക്കുമെന്നും അവര്‍ വ്യക്തമാക്കി.ഹൈദരാബാദ് ആസ്ഥാനമായ ഡോ. റെഡ്ഡീസ് ലബോറട്ടീസാണ് ഇന്ത്യയിൽ വാക്സിനെത്തിക്കുന്നത്. വിദേശത്ത് ക്ലിനിക്കൽ പരീക്ഷണം നടത്തി ഫലപ്രാപ്തി വിജയിച്ച വാക്സിന് ഇന്ത്യയിൽ പ്രത്യേകം ക്ലിനിക്കൽ പരീക്ഷണം നടത്തുന്നത് ഒഴിവാക്കാൻ കമ്പനിയും വാക്സിൻ വികസിപ്പിച്ച റഷ്യൻ സ്ഥാപനവും കേന്ദ്രത്തിന് അപേക്ഷ നല്‍കിയിട്ടുണ്ട്.

രണ്ടാം പിണറായി മന്ത്രിസഭയിൽ മൂന്ന് വനിത മന്ത്രിമാരാണ് ഇടംപിടിച്ചിരിക്കുന്നത്. ഡോ. ആർ ബിന്ദു, വീണ ജോർജ്, ജെ. ചിഞ്ചുറാണി എന്നിവരാണ് മന്ത്രിസഭയിൽ സ്ഥാനം പിടിച്ചിരിക്കുന്നത്. സിപിഎം രണ്ടു പേർക്ക് അവസരം നൽകിയപ്പോൾ, നാല് മന്ത്രിസ്ഥാനങ്ങളിൽ ഒരെണ്ണം വനിതയ്ക്ക് നൽകി സിപിഐയും ചരിത്രം കുറിച്ചിരിക്കുകയാണ്.

ജെ ചിഞ്ചുറാണി

ഒന്നാം ഇഎംഎസ് മന്ത്രിസഭയിൽ അംഗമായിരുന്ന കെ.ആർ ഗൗരിയമ്മയ്ക്ക് ശേഷം സിപിഐയിൽ ഒരു വനിതാ മന്ത്രിയുണ്ടായിട്ടില്ല. 64 വർഷത്തെ കാത്തിരിപ്പിനൊടുവിലാണ് സിപിഐ മന്ത്രിസഭയിലേക്ക് ഒരു വനിത പ്രതിനിധിയെ അയക്കുന്നത്. ചടയമംഗലം മണ്ഡലത്തിൽ നിന്നാണ് ചിഞ്ചുറാണി നിയമസഭയിലെത്തിയത്. 10,923 വോട്ടിന്‍റെ ഭൂരിപക്ഷം. ചിഞ്ചുറാണിയുടെ സ്ഥാനാർഥിത്വത്തിന് എതിരെ പാർട്ടിക്കുള്ളിൽ കലാപമുയരുകയും പരസ്യ പ്രകടനങ്ങൾ വരെ നടക്കുകയും ചെയ്തിരുന്നു. സിപിഐ ദേശീയ കൗൺസിൽ അംഗവും സംസ്ഥാന എക്സിക്യൂട്ടീവ് അംഗവും കേരള മഹിളാസംഘം സംസ്ഥാന പ്രസിഡന്‍റായും പ്രവർത്തിച്ചു വരികെയാണ് തെരഞ്ഞെടുപ്പിൽ മത്സരിച്ചത്.

ഡോ. ആർ. ബിന്ദു

ഇരിങ്ങാലക്കുടയിൽ നിന്ന് നിയമസഭയിലെത്തിയ ഡോ. ആർ ബിന്ദു സഭയിൽ പുതുമുഖമാണ്. തൃശൂർ മുനിസിപ്പൽ കോർപ്പറേഷന്‍റെ മുൻ മേയർ ആണ് ആർ. ബിന്ദു. തൃശൂരിലെ ശ്രീ കേരളവർമ കോളെജിൽ ഇംഗ്ലീഷ് പ്രൊഫസറർ കൂടിയാണ്. എസ്എഫ്ഐയിലൂടെ പൊതുരംഗത്തേക്ക് കടന്നുവന്ന ബിന്ദു, സിപിഎം ആക്ടിങ് സെക്രട്ടറി എ.വിജയരാഘവന്‍റെ ഭാര്യയാണ്. ബിന്ദുവിന്‍റെ സ്ഥാനാർഥിത്വത്തെ ചൊല്ലി വിമർശനങ്ങൾ ഉയർന്നിരുന്നു. 62,493വോട്ട് നേടിയാണ് ബിന്ദു നിയമസഭയിലെത്തിയത്.

വീണ ജോർജ്

ആറന്മുളയിൽ നിന്ന് രണ്ടാംവട്ടം സഭയിലെത്തിയ വീണ ജോർജ് മാധ്യമപ്രവർത്തക എന്ന നിലയിൽ പ്രശസ്തയാണ്. എസ്എഫ്ഐയിലൂടെയാണ് പൊതുരംഗത്തേക്ക് കടന്നുവരുന്നത്. ആദ്യ തെരഞ്ഞെടുപ്പിൽ 64,523 വോട്ടിനാണ് വിജയിച്ചത്. രണ്ടാം അങ്കത്തിനിറങ്ങിയപ്പോൾ 74,950 വോട്ടിനാണ് വിജയിച്ചു കയറിയത്.

ന്യൂഡൽഹി : കൊവിഡ് വ്യാപനം രണ്ടാം തരംഗത്തിൽ രാജ്യത്തെയാകെ ഭീതിയുടെ മുൾമുനയിൽ നിർത്തിയിരിക്കുന്ന നാളുകളിലൂടെയാണ് നാം കടന്നു പോകുന്നത്. ബി ജെ പി ഇതര സർക്കാരുകൾ ഭരിക്കുന്ന പഞ്ചാബിലും രാജസ്ഥാനിൽ നിന്നും കേന്ദ്ര സർക്കാരിനെതിരെ ഇത്തരത്തിൽ ഗുരുതരമായ ആരോപണം ഉയർന്നപ്പോൾ അതിൽ രാഷ്ട്രീയം കണ്ടവരും ഏറെയാണ്. ഇന്ത്യയിൽ നിർമ്മിക്കുന്നത് ചാത്തൻ വെന്റിലേറ്ററുകളാണെന്ന ആരോപണം പോലും രാജസ്ഥാനിലെ മന്ത്രിസഭയിലെ ഒരംഗം ഉയർത്തിയിരുന്നു.

എന്നാൽ ഇപ്പോൾ പുറത്തുവരുന്ന റിപ്പോർട്ടുകൾ പ്രകാരം കേന്ദ്രം കൈമാറിയ വെന്റിലേറ്ററുകൾ കൃത്യസമയത്ത് ഇൻസ്റ്റാൾ ചെയ്യാതിരുന്നതും, പ്രവർത്തിപ്പിക്കുന്നതിലെ പരിചയക്കുറവുമെല്ലാമാണ് ഉപകരണങ്ങൾ തകരാറിലാവാൻ കാരണമെന്ന് കണ്ടെത്തിയിട്ടുണ്ട്.കഴിഞ്ഞ വർഷം കൊവിഡ് വ്യാപന സമയത്താണ് രാജ്യം വെന്റിലേറ്ററുകളുടെ കാര്യത്തിൽ പിന്നോട്ടാണെന്ന് മനസിലാക്കി സംസ്ഥാനങ്ങൾക്ക് അവ നൽകാൻ കേന്ദ്രം തീരുമാനിക്കുന്നത്. എന്നാൽ ഇപ്പോൾ പരിശോധിക്കുമ്പോൾ സംസ്ഥാനങ്ങൾക്ക് നൽകിയവയുടെ എണ്ണത്തിലും, അവർ ആശുപത്രിയിൽ സ്ഥാപിച്ചതിന്റെ എണ്ണത്തിലും വലിയ വിടവ് കാണാനാവും.

വെയർ ഹൗസുകളിൽ ഏറെ നാൾ കെട്ടിക്കിടന്ന ശേഷമാണ് ഇവ ആശുപത്രിയിൽ സ്ഥാപിക്കപ്പെട്ടതെന്നും കണ്ടെത്തിയിട്ടുണ്ട്.കൊവിഡ് ഒന്നാം തരംഗത്തെ അപേക്ഷിച്ച് രണ്ടാം തരംഗത്തിൽ ശ്വാസ തടസവും, ഓക്സിജൻ ക്ഷാമവുമാണ് ആരോഗ്യമേഖലയെ കടുത്ത ആശങ്കയിലാഴ്ത്തിയത്. ഇതിനൊപ്പം കേന്ദ്രം പി എം കെയർ പദ്ധതി പ്രകാരം സംസ്ഥാനങ്ങൾക്ക് കൈമാറിയ വെന്റിലേറ്ററുകൾ പ്രവർത്തന രഹിതമാണെന്ന് വിവരവും പുറത്തു വന്നിരുന്നു. പ്രധാനമായും പഞ്ചാബ്, രാജസ്ഥാൻ തുടങ്ങിയ സംസ്ഥാനങ്ങളിൽ നിന്നുമാണ് ഇത്തരത്തിലുള്ള റിപ്പോർട്ടുകൾ വന്നത്.

ഇതേ തുടർന്ന് കേന്ദ്ര ആരോഗ്യമന്ത്രാലയം സംഭവത്തിൽ വിശദമായ പരിശോധന നടത്തിയിരുന്നു.പഞ്ചാബിൽ പിഎം കെയേഴ്സ് ഫണ്ട് വഴി ലഭിച്ച 320 വെന്റിലേറ്ററുകളിൽ 237 എണ്ണത്തോളം പ്രവർത്തിക്കുന്നില്ലെന്നാണ് കണ്ടെത്തിയിരിക്കുന്നത്. ഇതു കൂടാതെ ചില സംസ്ഥാനങ്ങളിൽ രോഗികളുടെ ജീവൻ അപകടത്തിലാകുമെന്ന് ഭയന്ന് പി എം കെയേഴ്സ് വഴി ലഭിച്ച വെന്റിലേറ്ററുകൾ ഉപയോഗിക്കാൻ അനസ്‌തെറ്റിസ്റ്റുകൾ തയ്യാറാകുന്നില്ലെന്നും റിപ്പോർട്ടുകളുണ്ടായിരുന്നു.എന്നാൽ കേന്ദ്ര ആരോഗ്യ മന്ത്രാലയം ഇപ്പോൾ ഉയരുന്ന ആരോപണങ്ങളെ തള്ളിക്കളയുകയാണ്.

വാട്‌സാപ്പ് അവരുടെ പുതിയ സ്വകാര്യതാ നയം അംഗീകരിക്കാത്തവരുടെ അക്കൗണ്ടുകൾ ഡിലീ‌റ്റ് ചെയ്യുകയില്ല. എന്നാൽ അവർക്ക് നൽകുന്ന സേവനങ്ങളിൽ വാട്‌സാപ്പ് കുറവ് വരുത്തുമെന്നാണ് അറിയിച്ചിരിക്കുന്നത്. അവർക്ക് ഇന്നുമുതൽ ചാ‌റ്റ് ലിസ്‌റ്റിലേക്കോ,​ വാട്‌സാപ്പ് വീഡിയോ കോൾ നടത്താനോ നോട്ടിഫിക്കേഷൻ വരുന്നതിലോ എല്ലാം കുറവുണ്ടാകും. പിന്നീട് മെസേജ് അയക്കാൻ സാധിക്കാത്ത തരത്തിലേക്ക് വാട്‌സാപ്പ് നയം കർശനമാക്കിയേക്കും. എന്നാൽ നയം അംഗീകരിക്കുന്നവർക്ക് സേവനത്തിൽ ഒരു തടസവും ഉണ്ടാകില്ല.

കുറച്ച് നാളുകൾക്ക് ശേഷം മെസേജ് അയക്കാനോ സ്വീകരിക്കാനോ കഴിയാതെ വരുമ്പോൾ തങ്ങളുടെ നയം സ്വീകരിക്കണോ വേണ്ടേ എന്ന് ഉപഭോക്താക്കൾ തീരുമാനിക്കേണ്ട സ്ഥിതിയിലാകും. അപ്പോഴേക്കും അവ‌ർക്ക് വാട്‌സാപ്പ് ഉപയോഗിക്കാനാവാതെ തടയുന്ന സ്ഥിതിയുണ്ടായേക്കുമെന്നാണ് ഒരു അന്താരാഷ്‌ട്ര മാദ്ധ്യമത്തിനോട് കമ്പനി പ്രതികരിച്ചത്.ഇക്കഴിഞ്ഞ ജനുവരിയിലാണ് വാട്‌സാപ്പ് അവരുടെ പുതിയ സ്വകാര്യതാ നയം പ്രഖ്യാപിച്ചത്. ഒപ്പം നിലവിലെ ചാ‌റ്റുകൾ സുരക്ഷിതമാണെന്ന വാഗ്ദാനവും.

എന്നാൽ ഉപഭോക്താക്കളുടെ വിവരങ്ങൾ ഫേസ്‌ബുക്ക് തന്നെ ചോർത്തി നൽകിയെന്ന വിവാദത്തിന് ശേഷവും വാട്‌സാപ്പ് ഉപഭോക്താക്കളുടെ വിവരങ്ങൾ ഫേസ്‌ബുക്കുമായി പങ്കുവയ്‌ക്കാൻ തയ്യാറാകണമെന്ന ആവശ്യം വലിയ വിമർശനം ഉണ്ടാക്കിയിട്ടുണ്ട്.വാട്‌സപ്പ് നയം തിരുത്തണമെന്ന് കേന്ദ്ര സർക്കാരും ആവശ്യപ്പെട്ടിരുന്നു.

ഫേസ്‌ബുക്കുമായി തങ്ങളുടെ വിവരങ്ങൾ പങ്കുവയ്‌ക്കുന്നതിന് തയ്യാറാണെന്ന് സമ്മതിക്കുന്നതാണ് പുതിയ സ്വകാര്യതാ നയത്തിൽ പ്രധാനം. പ്രത്യേകിച്ച് ബിസിനസ് അക്കൗണ്ടുകൾ ഇങ്ങനെ ചെയ്‌തേ മതിയാകൂ. തങ്ങളുടെ നയം അംഗീകരിക്കാൻ ഫെബ്രുവരി 8 വരെ കമ്പനി സമയവും അനുവദിച്ചു. എന്നാൽ വ്യാപക വിമർശനമുണ്ടായതോടെ അത് നീട്ടിവയ്‌ക്കേണ്ടി വന്നു.

തിരുവനന്തപുരം: സംസ്ഥാനത്തെ ഒന്‍പത് ജില്ലകളില്‍ കാലാവസ്ഥാ വകുപ്പ് റെഡ് അലര്‍ട്ട് പ്രഖ്യാപിച്ചു. ടൗട്ടെ ചുഴലിക്കാറ്റിനെത്തുടര്‍ന്നാണ് തൃശൂര്‍, ഇടുക്കി, എറണാകുളം, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് റെഡ് അലര്‍ട്ട് പ്രഖ്യാപിച്ചിരിക്കുന്നത്. കേരള തീരത്ത് ചുഴലിക്കാറ്റിന്റെ സ്വാധീനം മെയ് 16 വരെ തുടരുമെന്നതിനാല്‍ അതിതീവ്രമോ അതിശക്തമായതോ ആയ മഴക്കും ശക്തമായ കാറ്റിനും സാധ്യതയുണ്ട്. കണ്ണൂര്‍, കാസര്‍കോട്, കോഴിക്കോട്, വയനാട്, മലപ്പുറം ജില്ലകളില്‍ ചുഴലിക്കാറ്റിന്റെ പ്രഭാവം മൂലമുള്ള അതിശക്തമായ കാറ്റും അതിശക്തമായ മഴയും കടല്‍ക്ഷോഭവും വരും മണിക്കൂറുകളിലും തുടരുമെന്നും മുന്നറിയിപ്പുണ്ട്.അടുത്ത 6 മണിക്കൂറില്‍ കൂടുതല്‍ ശക്തിപ്രാപിച്ച് ശക്തമായ ചുഴലിക്കാറ്റായി മാറുകയും അതിനു ശേഷമുള്ള 12 മണിക്കൂറിനുള്ളില്‍ അതിശക്ത ചുഴലിക്കാറ്റായി മാറുമെന്നും കേന്ദ്ര കാലാവസ്ഥ വകുപ്പിന്റെ ചുഴലിക്കാറ്റ് നിരീക്ഷണ കേന്ദ്രം അറിയിക്കുന്നു.