Highlights (Page 188)

കാബൂൾ: നാല് വർഷത്തിനുള്ളിൽ താലിബാൻ ഉണ്ടാക്കിയത് 400 ശതമാനത്തിലേറെ സാമ്പത്തിക വളർച്ച. 2016 ൽ ഫോബ്സ് പുറത്തിറക്കിയ പട്ടികയിൽ ഏറ്റവും കൂടുതൽ സമ്പത്തുള്ള ആറാമത്തെ തീവ്രവാദ സംഘടനയായിരുന്നു താലിബാൻ. പ്രതിവർഷം 400 മില്ല്യൺ ഡോളർ ആണ് താലിബാന്റെ വരുമാനം. നാറ്റോയുടെ ഔദ്യോഗിക റിപ്പോർട്ടുകൾ പ്രകാരം 2019-20 വർഷത്തിൽ 1.6 ബില്ല്യൺ ഡോളറാണ് താലിബാന്റെ പ്രതിവർഷ വരുമാനം.

മയക്കുമരുന്ന് കച്ചവടം, കള്ളക്കടത്ത് വിദേശ സ്രോതസുകളിൽ നിന്നുള്ള നിക്ഷേപം തുടങ്ങിയവയാണ് താലിബാന്റെ പ്രധാന വരുമാനമാർഗമെന്ന് ഫോബ്‌സ് റിപ്പോർട്ടിൽ പറയുന്നു. റേഡിയോ ലിബർട്ടി, റേഡിയോ ഫ്രീ യൂറോപ്പ് എന്നിവർ പുറത്തുവിട്ട റിപ്പോർട്ടുകൾ പ്രകാരം ഖനനം, നികുതി, കയറ്റുമതി, റിയൽ എസ്റ്റേറ്റ് വ്യാപാരം എന്നിവയും താലിബാന്റെ വരുമാന മാർഗങ്ങളാണ്.

ലോകത്തെ തന്നെ ഏറ്റവും വലിയ കറുപ്പ് (ഓപ്പിയം) നിർമാതാക്കളാണ് അഫ്ഗാനിസ്ഥാൻ. പ്രതിവർഷം 1.5-3 ബില്ല്യൺ ഡോളർ ഓപിയം കയറ്റുമതിയാണ് അഫ്ഗാനിൽ നടക്കുന്നത്. രാജ്യത്ത് ഓപിയം ഉത്പാദനം നടക്കുന്ന മുക്കാൽ ഭാഗം പ്രദേശങ്ങളും താലിബാന്റെ നിയന്ത്രണത്തിലാണ്. ഉത്പാദന വിതരണത്തിന്റെ വിവിധ ഘട്ടങ്ങളിൽ താലിബാൻ ഏർപ്പെടുത്തിയ നികുതി ഇവരുടെ വരുമാനത്തിന്റെ പ്രധാന മാർഗമാണ്. ഖനനമാണ് മറ്റൊരു താലിബാന്റെ പ്രധാന വരുമാനം. താലിബാന്റെ നിയന്ത്രണത്തിലുള്ള അഫ്ഗാൻ മലനിരകൾ ഖനനം നടക്കുന്ന മേഖലകളാണ്. നിയമ വിധേയവും നിയമവിരുദ്ധവുമായുള്ള ഖനനങ്ങൾ ഇവിടെ നടക്കുന്നുണ്ട്. താലിബാന് വൻ തുക നൽകിയാണ് ചെറുകിട ഖനന കമ്പനികൾ മുതൽ വമ്പൻ ഖനന കമ്പനികൾ വരെ ഈ കച്ചവടം നടത്തുന്നത്. താലിബാന് പണം നൽകാതെ ഈ മേഖലകളിൽ ഖനനം നടത്താൻ കഴിയില്ല.

പാകിസ്താൻ, റഷ്യ, ഇറാൻ തുടങ്ങിയ രാജ്യങ്ങൾ താലിബാന് വിദേശ സഹായം നൽകുന്നുണ്ടെന്ന് അഫ്ഗാനും അമേരിക്കയും നിരവധി തവണ ആരോപണം ഉന്നയിച്ചിട്ടുണ്ട്. പ്രതിവർഷം 500 മില്ല്യൺ ഡോളർ വരെ താലിബാന് വിദേശ നിക്ഷേപം ലഭിക്കുന്നുണ്ടെന്നാണ് വിവരം. അഫ്ഗാനിസ്ഥാനിലെ വ്യാവസായിക പ്രാധാന്യമുള്ള സ്വാത് മേഖലയുടെ നിയന്ത്രണം കൈയിലാക്കിയ താലിബാൻ ജനങ്ങളിൽ നിന്നും വ്യവസായ സ്ഥാപനങ്ങളിൽ നിന്നും നികുതി ഈടാക്കുന്നുണ്ട്. ഇതാണ് താലിബാന്റെ മറ്റൊരു വരുമാന മാർഗം.

കാബൂൾ: കാബൂളിന്റെ നിയന്ത്രണം താലിബാൻ പിടിച്ചടക്കിയതിന് പിന്നാലെ പ്രതികരണവുമായി നൊബേൽ ജേതാവും വിദ്യാഭ്യാസ അവകാശ പ്രവർത്തകയുമായ മലാല യൂസഫ്സായി. അഫ്ഗാനിലെ സ്ത്രീകൾ, ന്യൂനപക്ഷങ്ങൾ, മനുഷ്യാവകാശ പ്രവർത്തകർ എന്നിവരെക്കുറിച്ചോർത്ത് അഗാധമായ ആശങ്കയുണ്ടെന്ന് മലാല വ്യക്തമാക്കി. താലിബാൻ അഫ്ഗാൻ പിടിച്ചടക്കുന്നത് ഞെട്ടലോടെയാണ് കണ്ടുകൊണ്ടിരിക്കുന്നതെന്നും മലാല പറഞ്ഞു. ട്വിറ്ററിലൂടെയായിരുന്നു മലാലയുടെ പ്രതികരണം.

അഫ്ഗാനിൽ വെടിനിർത്തലിന് ആഗോള സമൂഹം രംഗത്തുവരണം. അഭയാർത്ഥികൾക്കും പൗരന്മാർക്കും ഉടൻ സഹായം ലഭ്യമാക്കണം. മാനുഷികമായ സഹായങ്ങൾ അഫ്ഗാൻ ജനതയ്ക്ക് ഒരുക്കണമെന്നും മലാല ആവശ്യപ്പെട്ടു.

അതേസമയം കാബൂളിന്റെ നിയന്ത്രണം അഫ്ഗാൻ പിടിച്ചെടുത്തതോടെ പ്രസിഡന്റ് അഷ്റഫ് ഗനി രാജ്യം വിട്ടു. അഫ്ഗാന്റെ നിയന്ത്രണം ഉടൻ താലിബാൻ ഏറ്റെടുക്കുമെന്നാണ് വിവരം. താലിബാൻ കമാൻഡർ മുല്ല അബ്ദുൾ ഗനി ബറാദർ ആവും അഫ്ഗാന്റെ പുതിയ പ്രസിഡന്റെന്നാണ് റിപ്പോർട്ട്. കാബൂളിന്റെ നിയന്ത്രണം കൂടി പിടിച്ചെടുത്തതോടെയാണ് അഫ്ഗാന്റെ നിയന്ത്രണം താലിബാന് കൈമാറാൻ സർക്കാർ നിർബന്ധിതരായത്. അഫ്ഗാൻ വൈസ് പ്രസിഡന്റ് അമിറുള്ള സാലെയും രാജ്യത്ത് നിന്നും പലായനം ചെയ്തുവെന്നാണ് പുറത്തു വരുന്ന വിവരം.

പത്തനംതിട്ട: ശബരിമല നട തുറന്നു. നിറപുത്തരി, ചിങ്ങമാസ, ഓണം നാളുകളിലെ പൂജകൾക്കായാണ് ശബരിമല നട തുറന്നത്. ക്ഷേത്രം തന്ത്രി കണ്ഠരര് മഹേഷ് മോഹനരുടെ മുഖ്യകാർമികത്വത്തിൽ മേൽശാന്തി വി കെ ജയരാജ് പോറ്റി ശ്രീകോവിൽ തുറന്ന് ദീപം തെളിച്ചു. തിങ്കളാഴ്ച്ചയാണ് നിറപുത്തരി ചടങ്ങ്.

നിറപുത്തരി പൂജകൾക്ക് ഉപയോഗിക്കുന്നത് ശബരിമലയിൽ തന്നെ കൃഷി ചെയ്ത നെൽകറ്റകൾ ആണ്. ഓണം നാളുകളിൽ ഭക്തർക്ക് ഓണ സദ്യ നൽകുമെന്ന് അധികൃതർ അറിയിച്ചു. കോവിഡ് പ്രോട്ടോകോൾ പാലിച്ചായിരിക്കും ഓണസദ്യ നൽകുക. 23-ാം തീയതി വൈകിട്ട് ഹരിവരാസനം പാടി നട അടയ്ക്കും.

ന്യുഡൽഹി: 75-ാം സ്വാതന്ത്ര്യദിനത്തിൽ പുതിയ വന്ദേഭാരത് ട്രെയിനുകൾ പ്രഖ്യാപിച്ച് പ്രധാനമന്ത്രി നരേന്ദ്ര മോദി. 75 വന്ദേഭാരത് ട്രെയിൻ സർവ്വീസുകളെ കുറിച്ചാണ് അദ്ദേഹം പ്രഖ്യാപിച്ചത്. രാജ്യത്തിന്റെ എല്ലാ മേഖലയേയും ബന്ധിപ്പിക്കുന്നതാകും ഈ ട്രെയിനുകളെന്ന് അദ്ദേഹം അറിയിച്ചു. ചെറുവിമാനത്താവളങ്ങളെ ബന്ധപ്പെടുത്തി ഉഡാൻ വിമാന സർവീസ് തുടങ്ങിയ മാതൃകയിലാണ് പദ്ധതി നടപ്പാക്കുകയെന്നും അദ്ദേഹം വ്യക്തമാക്കി. 75-ാം സ്വാതന്ത്ര്യ ദിനത്തോടനുബന്ധിച്ച് ചെങ്കോട്ടയിൽ രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

ആസാദി കാ അമൃത് മഹോത്സവം എന്ന പേരിൽ നടക്കുന്ന 75-ാം വർഷികാഘോഷഭാഗമായാണ് വന്ദേഭാരത് ട്രെയിനുകൾ പ്രഖ്യാപിച്ചത്. മുഴുവൻ സർവ്വീസുകളും ഒരു വർഷത്തിനുള്ളിൽ ആരംഭിക്കുമെന്ന് അദ്ദേഹം അറിയിച്ചു. വന്ദേഭാരത് ട്രെയിനുകളുടെ നിലവിലുള്ള രൂപകൽപ്പനയിൽ മാറ്റം വരുത്തിയാണ് പുതിയ ട്രെയിനുകളുടെ നിർമ്മാണം. അടുത്ത വർഷം ജൂണിൽ ട്രെയിനുകളുടെ സർവീസ് ആരംഭിക്കുമെന്നാണ് പ്രതീക്ഷിക്കുന്നതെന്ന് അദ്ദേഹം വിശദമാക്കി.

നിരവധി സവിശേഷതകൾ ട്രെയിനുകൾക്ക് ഉണ്ടാകും. ഓട്ടോ മാറ്റിക് ഡോറുകൾ, യുറോപ്യൻ സീറ്റുകൾ, അതത് സീറ്റുകളിലെ ലൈറ്റുകൾ ഓരോ യാത്രക്കാരനും സജ്ജീകരിക്കാനുള്ള സംവിധാനം തുടങ്ങിയാണ് പ്രധാന പ്രത്യേകതകൾ. ബാക്റ്റീരിയ രഹിത എയർകണ്ടീഷൻ സംവിധാനം, പുഷ് ബാക്ക് സംവിധാനമുള്ള സീറ്റുകൾ, കേന്ദ്രീകൃത കോച്ച് മോണിറ്ററിംങ് സംവിധാനം, മറ്റ് ലൈറ്റുകൾ ഓഫായാൽ പ്രവർത്തിക്കുന്ന നാല് ഡിസാസ്റ്റർ ലൈറ്റുകൾ, വൈദ്യുതി മുടങ്ങിയാൽ വെന്റിലേഷൻ സംവിധാനം, നാല് എമർജൻസി പുഷ് ബട്ടണുകൾ, നാല് എമർജൻസി വിൻഡോകൾ, മഴക്കാലത്ത് സുരക്ഷ ഉറപ്പാക്കാൻ പ്രളയ സുരക്ഷാ സംവിധാനങ്ങൾ തുടങ്ങിയവയും വന്ദേഭാരത് ട്രെയിനുകളിൽ ഉണ്ടാകും.

ന്യൂഡൽഹി: 75 -ാമത് സ്വാതന്ത്ര്യ ദിനത്തോടനുബന്ധിച്ച് ചെങ്കോട്ടയിൽ ദേശീയ പതാക ഉയർത്തി പ്രധാനമന്ത്രി നരേന്ദ്ര മോദി. തുടർന്ന് അദ്ദേഹം രാജ്യത്തെ ജനങ്ങളെ അഭിസംബോധന ചെയ്ത് സംസാരിച്ചു. സ്വാതന്ത്ര്യസമര പോരാളികളെ അനുസ്മരിച്ചു കൊണ്ടാണ് അദ്ദേഹം പ്രസംഗം ആരംഭിച്ചത്. നേതാജി സുഭാഷ് ചന്ദ്ര ബോസ്, ഭഗത് സിങ്, രാജ്യത്തിന്റെ പ്രഥമ പ്രധാനമന്ത്രി ജവഹർലാൽ നെഹ്റു, സർദാർ വല്ലഭഭായ് പട്ടേൽ എന്നിവരെ അദ്ദേഹം അനുസ്മരിച്ചു. എല്ലാ സ്വാതന്ത്ര്യ സമര പോരാളികളേയും രാജ്യം സ്മരിക്കുന്നുവെന്നും അദ്ദേഹം വ്യക്തമാക്കി.

ടോക്കിയോ ഒളിംപിക്‌സിലെ മെഡൽ ജേതാക്കളെ അദ്ദേഹം അഭിനന്ദിക്കുകയും ചെയ്തു. കോവിഡ് പ്രതിരോധ പ്രവർത്തനങ്ങളിൽ ഏർപ്പെട്ടവർക്കും പ്രധാനമന്ത്രി ആദരവ് അറിയിച്ചു. ലോകത്തിലെ ഏറ്റവും വലിയ വാക്സിനേഷൻ ഡ്രൈവ് ഭാരതത്തിലാണ്. 54 കോടി ആളുകൾക്ക് വാക്സിൻ നൽകി. കോവിഡ് കാലത്ത് 80 കോടി ആളുകൾക്ക് റേഷൻ എത്തിച്ചു. രോഗവ്യാപനം ലോക രാജ്യങ്ങളെ അപേക്ഷിച്ച് കുറഞ്ഞു. എന്നാൽ വലിയ പരിശ്രമത്തിലും ഒരുപാട് പേരുടെ ജീവൻ രക്ഷിക്കാൻ കഴിയാതെ പോയി. കോവിഡ് വലിയ വെല്ലുവിളിയായിരുന്നുവെന്നും അദ്ദേഹം പറഞ്ഞു.

എല്ലാവരിലേക്കും ഒരുപോലെ എത്തുന്ന വികസനമാണ് ലക്ഷ്യം. കഠിനാദ്ധ്വാനത്തിലൂടെ മാത്രമേ ആ ലക്ഷ്യം കൈവരിക്കാനാകൂ. നേട്ടങ്ങൾക്കായി ഒരുപാട് കാലം കാത്തിരിക്കാനാകില്ല. ലക്ഷ്യങ്ങളിലേക്ക് രാജ്യം വേഗത്തിൽ എത്തിച്ചേരണമെന്നും അദ്ദേഹം വിശദമാക്കി.

കാർഷിക മേഖലയ്ക്ക് പുത്തൻ ഉണർവേകാൻ പുതിയ പദ്ധതികൾളും അദ്ദേഹം പ്രഖ്യാപിച്ചു. കാർഷികമേഖലയെ ആധുനികവത്കരിച്ച് അടിസ്ഥാന സൗകര്യങ്ങൾ വർദ്ധിപ്പിക്കും. കാർഷിക ഉൽപ്പന്നങ്ങൾ എത്തിക്കാൻ 70 കിസാൻ റെയിലുകളൊരുക്കും. കിസാൻ നിധിയും കിസാൻ റെയിലും പോലുള്ള പദ്ധതികൾ രാജ്യത്തെ കർഷകർക്ക് മുതൽകൂട്ടാകുമെന്ന് അദ്ദേഹം കൂട്ടിച്ചേർത്തു.

ന്യൂഡൽഹി: ചെലവ് ചുരുക്കലിനും ഫണ്ട് ശേഖരണത്തിനുമുള്ള നടപടികൾക്കൊരുങ്ങി കോൺഗ്രസ്. സെക്രട്ടറിമാർ മുതൽ ജനറൽ സെക്രട്ടറിമാർ വരെയുള്ള എല്ലാ പാർട്ടി ഭാരവാഹികൾക്കും കോൺഗ്രസ് ചെലവു ചുരുക്കൽ മാർഗ്ഗനിർദ്ദേശങ്ങൾ പ്രഖ്യാപിച്ചു. സെക്രട്ടറിമാരോട് ട്രെയിനിൽ യാത്ര ചെയ്യാനും സാധ്യമല്ലെങ്കിൽ ഏറ്റവും കുറഞ്ഞ നിരക്കിൽ വിമാന യാത്ര ചെയ്യാനും പാർട്ടി ആവശ്യപ്പെട്ടതായാണ് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. പാർലമെന്റ് അംഗങ്ങളായ ജനറൽ സെക്രട്ടറിമാരോട് അവരുടെ വിമാന യാത്രാ ആനുകൂല്യങ്ങൾ യാത്രയ്ക്കായി ഉപയോഗിക്കാനും പാർട്ടി വൃത്തങ്ങൾ ആവശ്യപ്പെട്ടതായി റിപ്പോർ്ട്ടുകളുണ്ട്.

ഓരോ രൂപയും ലാഭിക്കാൻ ശ്രമിക്കുന്നുവെന്നും ചെലവ് ഏറ്റവും കുറക്കുക എന്നതാണ് ആശയമെന്നും കോൺഗ്രസ് ട്രഷറർ പവൻ ബൻസാൽ ഒരു പ്രമുഖ മാദ്ധ്യമത്തോട് പറഞ്ഞു. 1400 കിലോമീറ്റർ വരെയുള്ള യാത്രക്ക് സെക്രട്ടറിമാർക്ക് അനുയോജ്യമായ ട്രെയിൻ നിരക്ക് നൽകുമെന്നും 1,400 കിലോമീറ്ററിന് മുകളിൽ ദൂരമുള്ള യാത്രകൾക്ക് കുറഞ്ഞ വിമാന നിരക്ക് നൽകുമെന്നും അദ്ദേഹം വ്യക്തമാക്കി. ട്രെയിൻ നിരക്ക് വിമാന നിരക്കിനേക്കാൾ കൂടുതലാണെങ്കിൽ മാത്രമേ മാസത്തിൽ രണ്ടുതവണ വിമാന നിരക്ക് നൽകൂയെന്നും അദ്ദേഹം വെളിപ്പെടുത്തി.

സെക്രട്ടറി, ജനറൽ സെക്രട്ടറി എന്നിവരിടെ അലവൻസുകൾ 12,000 രൂപ, 15,000 രൂപ എന്നതിൽ നിന്ന് വെട്ടിക്കുറയ്ക്കുമെന്നാണ് വിവരം. എംപിമാരോട് എല്ലാ വർഷവും 50,000 രൂപ സംഭാവന ചെയ്യാനും പാർട്ടി ആവശ്യപ്പെടുമെന്ന് സൂചനയുണ്ട്. കാന്റീൻ, സ്റ്റേഷനറി, വൈദ്യുതി, പത്രം, ഇന്ധനം മുതലായവയുടെ ചെലവുകൾ എഐസിസി ഭാരവാഹികൾ തന്നെ കുറയ്ക്കണമെന്നും ആവശ്യപ്പെടുമെന്നും റിപ്പോർട്ടുകളുണ്ട്.