Highlights (Page 175)

ന്യൂഡൽഹി: പാക് സൈനികരെ മുൻനിർത്തി ചൈന ഇന്ത്യയ്‌ക്കെതിരെ രഹസ്യ നീക്കം നടത്തുവെന്ന് റിപ്പോർട്ട്. ഇന്റിലിജൻസ് ഏജൻസികളാണ് ഇതുസംബന്ധിച്ച മുന്നറിയിപ്പ് നൽകിയത്. ചൈനീസ് സൈന്യത്തിന്റെ പടിഞ്ഞാറൻ, ദക്ഷിണ തിയേറ്റർ കമാൻഡുകളിൽ പാകിസ്താൻ സൈനിക ഓഫീസർമാരെ നിയമിക്കുന്നതായാണ് വിവരം. ഇക്കാര്യം സംബന്ധിച്ച് ചൈനീസ് പീപ്പിൾസ് ലിബറേഷൻ ആർമിയുടെ ആസ്ഥാനത്ത് ഇരു രാജ്യങ്ങളും തമ്മിൽ രഹസ്യ ചർച്ചകളും നീക്കങ്ങളും നടക്കുന്നതായും റിപ്പോർട്ടുകളുണ്ട്.

ജനറൽ വാങ് ഹൈജിയാങ്ങിനെ കഴിഞ്ഞ മാസം ചൈന വെസ്റ്റേൺ തിയറ്റർ കമാൻഡിന്റെ പുതിയ കമാൻഡറായി നിയമിച്ചിരുന്നു. ചൈനയുടെ വെസ്റ്റേൺ തിയേറ്റർ കമാൻഡിൽ ഉൾപ്പെടുന്ന സിൻജിയാംഗും ടിബറ്റ് സ്വയംഭരണ പ്രദേശവും ഇന്ത്യയുമായി അതിർത്തികൾ പങ്കിടുന്നവയാണ്. ഈ കമാൻഡിൽ നിന്നുള്ള ചൈനീസ് സൈനികരെ കിഴക്കൻ ലഡാക്ക് മേഖലയിൽ ചൈന വിന്യസിക്കുന്നുണ്ട്.

അതിർത്തിയിലെ സ്ഥിതിഗതികലും ചൈനയുടെ നീക്കങ്ങളും ഇന്ത്യ സൂക്ഷമമായി നിരീക്ഷിക്കുന്നുണ്ട്. പാകിസ്താൻ സേനയിലെ കേണൽ റാങ്ക് ഓഫീസർമാരെ ചൈനയുടെ കേന്ദ്ര സൈനിക കമ്മിഷന്റെ ജോയിന്റ് സ്റ്റാഫ് ഡിപ്പാർട്ട്മെന്റിൽ നിയമിച്ചിട്ടുണ്ടെന്നാണ് ഇന്റലിജൻസ് റിപ്പോർട്ട്. പാകിസ്താൻ സൈന്യത്തിലെ 10 അധിക ഉദ്യോഗസ്ഥരെ വിവിധ പ്രോജക്ടുകൾക്കായി ബെയ്ജിംഗിലെ പാകിസ്താൻ എംബസിയിൽ നിയമിക്കുകയും ചെയ്തുവെന്നാണ് വിവരം.

വിവിധ വിഭാഗങ്ങളിലെ പാകിസ്തൻ സൈനിക ഉദ്യോഗസ്ഥരുടെ എണ്ണം വർദ്ധിച്ചുവെന്നും റിപ്പോർട്ടുണ്ട്. പാകിസ്താൻ സേനയിലെ കേണൽ റാങ്ക് ഓഫീസർമാരെ ചൈനയുടെ കേന്ദ്ര സൈനിക കമ്മീഷന്റെ ജോയിന്റ് സ്റ്റാഫ് ഡിപ്പാർട്ട്മെന്റിൽ നിയമിച്ചിട്ടുണ്ട്. ചൈനയുടെ സായുധ സേനയുടെ പോരാട്ട ആസൂത്രണം, പരിശീലനം, തന്ത്രങ്ങൾ മെനയൽ എന്നിവ നടക്കുന്ന ഇടങ്ങളാണിത്.

തിരുവനന്തപുരം: കോവിഡ് മരണം നിശ്ചയിക്കാൻ മാർഗ രേഖ പുറത്തിറക്കി സർക്കാർ. നഷ്ടപരിഹാര വിതരണത്തിന് മുന്നോടിയായാണ് സർക്കാർ മാർഗരേഖ പുറത്തിറക്കിയത്. മരണ സ്ഥിരീകരണ സർട്ടിഫിക്കറ്റിനായി ഒക്ടോബർ 10 മുതൽ ഓൺലൈൻ ആയി അപേക്ഷ നൽകണമെന്നാണ് സർക്കാർ വൃത്തങ്ങൾ അറിയിക്കുന്നത്. ഔദ്യോഗിക പട്ടികയിൽ ഉൾപ്പെടാത്ത മരണങ്ങൾ പ്രത്യേകമായി പ്രസിദ്ധീകരിക്കാനും തീരുമാനമായി. മരണ സ്ഥിരീകരണ സർട്ടിഫിക്കറ്റിനായി അപേക്ഷ നൽകാൻ ഇ-ഹെൽത്ത് പ്രത്യേക സംവിധാനം തയാറാക്കും.

ആരോഗ്യ- തദ്ദേശ വകുപ്പുകൾ നൽകുന്ന സർട്ടിഫിക്കറ്റുകൾ സഹിതമാണ് ആശ്രിതർ അപേക്ഷ സമർപ്പിക്കേണ്ടത്. അഡീഷണൽ ഡിസ്ട്രിക് മജിസ്‌ട്രേറ്റ്, ഡിഎംഒ, ഡിസ്ട്രിക് സർവൈലൻസ് ടീം- മെഡിക്കൽ ഓഫീസർ, മെഡിക്കൽ കൊളോജിലെ മെഡിസിൻ തലവൻ, പൊതുജനാരോഗ്യ വിദഗ്ധൻ തുടങ്ങിയവർ അംഗങ്ങളായ കമ്മിറ്റി പുതിയ കേന്ദ്ര മാനദണ്ഡ പ്രകാരം കോവിഡ് മരണം തീരുമാനിക്കും.

കോവിഡ് വന്ന് 30 ദിവസത്തിനകത്തുള്ള മരണങ്ങൾ കോവിഡ് മരണമായി കണക്കാക്കുമെന്നാണ് അധികൃതർ അറിയിച്ചിരിക്കുന്നത്. അപേക്ഷയിൽ 30 ദിവസത്തിനകം തീരുമാനമുണ്ടാകും. ഇതിനു മുന്നോടിയായി കോവിഡ് ബാധിച്ച് മരിച്ചവരുടെ പട്ടിക സർക്കാർ പ്രസിദ്ധീകരിക്കുമെന്നും ആദ്യ തരംഗ സമയത്തുൾപ്പെടെയുള്ള മരണങ്ങൾ പ്രത്യേക പട്ടികയായി രേഖപ്പെടുത്തുമെന്നും സർക്കാർ വൃത്തങ്ങൾ വ്യക്തമാക്കി. നഷ്ടപരിഹാര തുക വിതരണത്തിന് ദുരന്ത നിവാരണ വകുപ്പ് പ്രത്യേക മാനദണ്ഡം നിശ്ചയിക്കും. ഇതുവരെ ഔദ്യോഗിക മരണസംഖ്യ കാൽ ലക്ഷമാണ്. പുതുതായി പതിനായിരത്തോളം മരണങ്ങൾ കൂടി ഉൾപ്പെടുത്തേണ്ടി വരുമെന്നാണ് കണക്കാക്കപ്പെടുന്നത്.

പുതുക്കിയ കേന്ദ്ര മാനദണ്ഡം വരുമ്പോൾ ഔദ്യോഗിക മരണസംഖ്യ 35000 ത്തോളമാകും. 50000 രൂപ വീതമാണ് നഷ്ടപരിഹാരം. ഔദ്യോഗിക കണക്ക് മാത്രമെടുത്താൽ തന്നെ 125 കോടിയിലേറെ രൂപ നഷ്ടപരിഹാരം നൽകാൻ ആവശ്യമായി വരും. കോവിഡ് നെഗറ്റീവായിട്ടും ഒരു മാസത്തിലധികം ആശുപത്രിയിൽ ചികിത്സയിൽ തുടരേണ്ടിവന്ന് മരിച്ചവരും കോവിഡ് മരണങ്ങളുടെ പട്ടികയിൽ വരും. ഈ മാനദണ്ഡങ്ങൾ അനുസരിച്ചാകും സംസ്ഥാനം കോവിഡ് മരണപട്ടിക പരിഷ്‌കരിക്കുന്നത്.

ജനീവ: കോംഗോയിൽ ലോകാരോഗ്യ സംഘടനാ പ്രവർത്തകർക്കെതിരായ ലൈംഗിക പീഡന പരാതിയിൽ കൂടുതൽ വിവരങ്ങൾ പുറത്ത്. എബോള നിർമ്മാർജന പ്രവർത്തനങ്ങൾക്കെത്തിയ ലോകാരോഗ്യ സംഘടനാ പ്രവർത്തകർ സ്ത്രീകൾക്കെതിരെ ലൈംഗിക അതിക്രമം നടത്തിയതായാണ് ലോകാരോഗ്യ അന്വേഷണ റിപ്പോർട്ടിൽ വ്യക്തമാക്കിയിരിക്കുന്നത്. സംഘടന സ്വതന്ത്രമായി നടത്തിയ അന്വേഷണത്തിലാണ് ഇത്തരം 83 കേസുകൾ കണ്ടെത്തിയത്. ഇതിൽ 9 പീഡന ആരോപണങ്ങളും ഉൾപ്പെടുന്നുണ്ടെന്നാണ് അന്വേഷണ റിപ്പോർട്ട് ചൂണ്ടിക്കാട്ടുന്നത്.

ലോകാരോഗ്യ സംഘടനാ ജീവനക്കാരായ 20 അംഗങ്ങൾ ഉൾപ്പെടെയുള്ളവരാണ് സ്ത്രീകളെ ലൈംഗികമായി ദുരുപയോഗം ചെയ്തതായി കണ്ടെത്തിയത്. 2018 മുതൽ 2020 വരെ നീണ്ടു നിന്ന കാലയളവിൽ പ്രാദേശികമായും കോംഗോയിലെ അന്താരാഷ്ട്ര സംഘടനകളുടെ ഭാഗമായും പ്രവർത്തിച്ചവരാണ് സ്ത്രീകൾക്കെതിരെ ലൈംഗിക അതിക്രമം നടത്തിയത്. 35 പേജുള്ള അന്വേഷണ റിപ്പോർട്ട് ലോകാരോഗ്യസംഘടന അന്വേഷണ സംഘം പുറത്തുവിട്ടിരിക്കുന്നത്. ലോകാരോഗ്യ സംഘടനയുടെ ഭാഗമായി എബോള നിർമ്മാർജനത്തിന് എത്തിയവർ തങ്ങളെ ഉപദ്രവിക്കുകയായിരുന്നു എന്നാണ് ലൈംഗിക അതിക്രമം നേരിട്ട കോംഗോയിലെ സ്ത്രീകൾ അന്വേഷണ കമ്മീഷനെ അറിയിച്ചത്. കോംഗോയിലെ അൻപതിലധികം സ്ത്രീകളാണ് ഇക്കാര്യം ചൂണ്ടിക്കാട്ടി പരാതി നൽകിയത്.

പീഡനത്തിന് ശേഷം ചിലർ ഗർഭിണികളാകുകയും അബോർഷന് വേണ്ടി നിർബന്ധിക്കപ്പെട്ടതായും സ്ത്രീകൾ അന്വേഷണ സംഘത്തിന് മൊഴി നൽകി. കുറ്റാരോപിതരായ 83 പേരെ അന്വേഷണ സംഘം തിരിച്ചറിയുകയും ചെയ്തു. ഇവരിൽ കോംഗോ പൗരന്മാരും വിദേശികളും ഉൾപ്പെടുന്നുണ്ട്. ലോകാരോഗ്യ സംഘടനയുടെ സംഘടനാ പ്രവർത്തനത്തിലെ പിഴവാണ് സംഭവങ്ങൾ തെളിയിക്കുന്നതെന്നാണ് അന്വേഷണ റിപ്പോർട്ടിൽ വ്യക്തമാക്കുന്നതെന്നാണ് വിവരം.

വർഷങ്ങളായി കോംഗോ നിരവധി സംഘർഷങ്ങളിലൂടെയാണ് കടന്നുപോകുന്നതെന്നും പുറത്തു വന്നിരിക്കുന്ന വാർത്തകൾ ഒട്ടും സ്വീകാര്യമല്ലെന്നും കോംഗോയിലെ സ്ത്രീകൾക്കും കുട്ടികൾക്കും വേണ്ടി പ്രവർത്തിക്കുന്ന ആക്ഷൻ ആൻഡ് ഡെവലപ്പ്‌മെന്റ് ഇനീഷ്യേറ്റീവ് സ്ഥാപകയും എക്‌സിക്യൂട്ടീവ് ഡയറക്ടറുമായ പാസ്സി മലബമ അറിയിച്ചു.

ന്യൂഡൽഹി: കോൺഗ്രസ് നേതൃത്വത്തിനെതിരെ രൂക്ഷ വിമർശനവുമായി മുതിർന്ന നേതാവ് കപിൽ സിബൽ. പഞ്ചാബ് കോൺഗ്രസിലെ പ്രശ്നങ്ങളുമായി ബന്ധപ്പെട്ടാണ് അദ്ദേഹം പാർട്ടി ഉന്നത നേതൃത്വത്തെ വിമർശിച്ച് രംഗത്തെത്തിയത്. പ്രസിഡന്റ് ഇല്ലാതെ പാർട്ടി മുന്നോട്ടു പോകുന്നത് തുടരുകയാണെന്നും ആരാണ് തീരുമാനങ്ങൾ എടുക്കുന്നതെന്ന് ആർക്കും അറിയില്ലെന്നും അദ്ദേഹം കുറ്റപ്പെടുത്തി.

തങ്ങളുടെ പാർട്ടിയിൽ പ്രസിഡന്റ് ഇല്ല. അതുകൊണ്ടു തന്നെ ആരാണ് തീരുമാനങ്ങൾ കൈക്കൊള്ളുന്നതെന്ന് തങ്ങൾക്ക് അറിയുകയില്ല. ഞങ്ങൾക്കറിയാം, എന്നാലും അറിയില്ലെന്ന് അദ്ദേഹം മാദ്ധ്യമങ്ങളോട് പറഞ്ഞു.

ആരെയും പേരെടുത്തു പറഞ്ഞായിരുന്നില്ല, സിബലിന്റെ വിമർശനം. പഞ്ചാബ് വിഷയത്തിൽ തീരുമാനം കൈക്കൊണ്ട കോൺഗ്രസ് മുൻ അധ്യക്ഷൻ രാഹുൽ ഗാന്ധിയെയും താത്കാലിക അധ്യക്ഷ സോണിയാ ഗാന്ധിയെയും ഉദ്ദേശിച്ചായിരുന്നു സിബലിന്റെ പരാമർശങ്ങളെന്നാണ് റിപ്പോർട്ട്. തങ്ങൾ ഗ്രൂപ്പ് 23 ആണെന്നും അല്ലാതെ ‘ജി ഹുസൂർ-23’ (ശരി അങ്ങുന്നേ) അല്ലെന്നും കബിൽ സിബൽ വ്യക്തമാക്കി.

അതേസമയം പാർട്ടിയിലെ തുടർച്ചയായ കൊഴിഞ്ഞുപോക്കിന്റെയും പഞ്ചാബ് പ്രതിസന്ധിയുടെയും പശ്ചാത്തലത്തിൽ പ്രവർത്തക സമിതി യോഗം വിളിച്ചു ചേർക്കണമെന്ന് ആവശ്യപ്പെട്ട് ജി 23-ൽ ഉൾപ്പെട്ട മറ്റൊരു നേതാവായ ഗുലാം നബി ആസാദ് കോൺഗ്രസ് താത്ക്കാലിക അദ്ധ്യക്ഷ സോണിയാ ഗാന്ധിക്ക് കഴിഞ്ഞ ദിവസം കത്തു നൽകിയിരുന്നു. ‘എന്തുകൊണ്ടാണ് ആളുകൾ വിട്ടുപോകുന്നത്? നമ്മുടെ കുഴപ്പം കൊണ്ടാണോ എന്ന് നാം പരിശോധിക്കേണ്ടതുണ്ട്. അടിയന്തരമായി കോൺഗ്രസ് പ്രവർത്തകസമിതി വിളിച്ചുചേർക്കണം. അങ്ങനെയെങ്കിൽ ചുരുങ്ങിയത് ഒരു ചർച്ചയെങ്കിലും നടക്കും. ഞങ്ങൾ പാർട്ടിയുടെ തത്വസംഹിത ഉപേക്ഷിക്കുകയോ മറ്റെവിടേക്കെങ്കിലും പോവുകയോ ഇല്ല. അവരോട് (നേതൃത്വം) അടുപ്പമുള്ളവർ പാർട്ടി വിടുകയും അവരോട് അടുപ്പമില്ലെന്ന് കരുതുന്നവർ ഇപ്പോഴും പാർട്ടിയിൽ തുടരുകയും ചെയ്യുന്നു എന്നതാണ് കോൺഗ്രസിലെ വൈരുധ്യമെന്നും അദ്ദേഹം പറഞ്ഞു.