Highlights (Page 174)

തിരുവനന്തപുരം: കൈവശാവകാശ സർട്ടിഫിക്കറ്റ് ലഭിക്കാൻ ഇനി അപേക്ഷയോടൊപ്പം സത്യവാങ്മൂലവും നൽകണം. റവന്യൂ വകുപ്പ് പുറത്തിറക്കിയ സർക്കുലറിലാണ് ഇക്കാര്യം അറിയിച്ചിരിക്കുന്നത്. കൈവശം ഉള്ള ഭൂമി പട്ടയം ലഭിച്ചതാണോ അല്ലയോ എന്നാണ് കൈവശാവകാശ സർട്ടിഫിക്കറ്റിനായി അപേക്ഷിക്കുമ്പോൾ അപേക്ഷകൻ സത്യവാങ്മൂലം നൽകേണ്ടത്. ഹൈക്കോടതി വിധി അടിസ്ഥാനത്തിലാണ് റവന്യു വകുപ്പ് ഇത്തരമൊരു സർക്കുലർ പുറത്തിറക്കിയത്. കഴിഞ്ഞ മാസം എട്ടിനാണ് ഹൈക്കോടതി ഇതുസംബന്ധിച്ച നിർദ്ദേശം നൽകിയത്. തുടർന്ന് ഒക്ടോബർ ഒന്നിന് റവന്യു വകുപ്പ് സർക്കുലർ ഇറക്കുകയായിരുന്നു.

ഇടുക്കിയിലെ ചില വില്ലേജുകളിൽ ഭൂ പതിവു ചട്ടങ്ങൾ പ്രകാരം പട്ടയം അനുവദിച്ചിട്ടുള്ള ഭൂമിയിൽ പട്ടയം ലംഘിച്ചു വാണിജ്യ നിർമ്മാണങ്ങൾ നടത്തുന്നത് തടയാൻ വേണ്ടി 2019 ഓഗസ്റ്റ് 22 ന് റവന്യൂ വകുപ്പ് ഉത്തരവിറക്കിയിരുന്നു. ഏത് ആവശ്യത്തിനാണോ പട്ടയം അനുവദിച്ചതെന്നുള്ള വില്ലേജ് ഓഫിസറുടെ സർട്ടിഫിക്കറ്റിന്റെ അടിസ്ഥാനത്തിലേ കെട്ടിട പെർമിറ്റ് അനുവദിക്കാവൂവെന്ന് വ്യക്തമാക്കിയായിരുന്നു റവന്യു വകുപ്പ് ഉത്തരവ് പുറപ്പെടുവിച്ചത്. ഇതു സംബന്ധിച്ച് വന്ന ഹർജികളെ തുടർന്ന് ഈ ഉത്തരവ് കേരളം മുഴുവൻ നടപ്പാക്കാൻ 2020 ജൂലൈ 29 നു ഹൈക്കോടതി നിർദ്ദേശം നൽകി. ഇതു നടപ്പാക്കുന്നില്ലെന്നു കാണിച്ച് കോടതിയലക്ഷ്യ ഹർജി വന്നതോടെ ഇതു സംബന്ധിച്ച സത്യവാങ്മൂലം അപേക്ഷകൻ നൽകണമെന്ന് ഹൈക്കോടതി ഉത്തരവിടുകയായിരുന്നു.

കൊച്ചി: പോലീസിനെതിരെ രൂക്ഷ വിമർശനവുമായി ഹൈക്കോടതി. പൊതുജനങ്ങളോട് അപമര്യാദയായി പെരുമാറുന്ന പോലീസുകാർക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കണമെന്ന് ഹൈക്കോടതി വ്യക്തമാക്കി.

പൊതുജനങ്ങളോട് എങ്ങനെ പെരുമാറണമെന്ന് പോലീസുകാർക്ക് ഇനിയും മനസിലായിട്ടില്ല. ഇക്കാര്യം വ്യക്തമാക്കി കോടതി പലതവണ നിർദേശം നൽകിയെങ്കിലും ഇതുവരെ പാലിക്കപ്പെട്ടിട്ടില്ല. ഇത്തരം നടപടികൾ ഇനിയും ആവർത്തിച്ചാൽ കർശന നടപടി സ്വീകരിക്കുമെന്നാണ് ഹൈക്കോടതി മുന്നറിയിപ്പ് നൽകുന്നത്.

പരാതിക്കാരനെ ഭീഷണിപ്പെടുത്തിയ സംഭവവുമായി ബന്ധപ്പെട്ട് തേവര എസ്എച്ച്ഒ, എസ്ഐ എന്നിവർക്കെതിരായ ഉത്തരവിലാണ് കോടതിയുടെ പരാമർശം. രണ്ട് ഉദ്യോഗസ്ഥർക്കുമെതിരെ കടുത്ത നടപടി സ്വീകരിക്കണമെന്നാണ് ജസ്റ്റിസ് ദേവൻ രാമചന്ദ്രൻ ഉത്തരവിട്ടിരിക്കുന്നത്. കുറ്റക്കാരായ പോലീസ് ഉദ്യോഗസ്ഥർക്കെതിരെ എന്ത് നടപടിയെടുത്തുവെന്ന് വ്യക്തമാക്കുന്ന ആക്ഷൻ ടേക്കൺ റിപ്പോർട്ട് സമർപ്പിക്കണമെന്നാണ് കോടതി നൽകിയിരിക്കുന്ന നിർദ്ദേശം. കൊച്ചി സ്വദേശികളായ കണ്ടെയ്നർ സന്തോഷ്, ഭാര്യ എന്നിവർ പോലീസിന്റെ പെരുമാറ്റത്തെ സംബന്ധിച്ച് സമർപ്പിച്ച ഹർജിയിലാണ് കോടതി ഇക്കാര്യങ്ങൾ വിശദമാക്കിയിരിക്കുന്നത്. ഈ മാസം 10 ന് വീണ്ടും ഹർജി പരിഗണിക്കും.

തിരുവനന്തപുരം: സംസ്ഥാന സർക്കാരിനെതിരെ വിമർശനവുമായി പ്രതിപക്ഷ നേതാവ് വി.ഡി. സതീശനും ഉപനേതാവ് പി.കെ. കുഞ്ഞാലിക്കുട്ടിയും. പ്ലസ് വൺ സീറ്റുമായി ബന്ധപ്പെട്ടാണ് നേതാക്കൾ സർക്കാരിനെതിരെ വിമർശനവുമായി രംഗത്തെത്തിയത്.

കഴിഞ്ഞ തവണ ഓപ്പൺ സ്‌കൂളിനെ ആശ്രയിച്ചതിനേക്കാൾ മൂന്നിരട്ടി കുട്ടികൾ ഇത്തവണ ഓപ്പൺ സ്‌കൂളിനെ ആശ്രയിക്കേണ്ട അവസ്ഥയാണെന്നാണ് നേതാക്കളുടെ കുറ്റപ്പെടുത്തൽ. ലക്ഷത്തിലധികം കുട്ടികൾക്ക് പ്ലസ് വൺ സീറ്റ് ലഭിക്കാത്ത സാഹചര്യമാണ് ഈ വർഷം സംസ്ഥാനത്തുള്ളതെന്നും നേതാക്കൾ പറയുന്നു. ഈ വർഷം പ്ലസ് വണ്ണിന് പുതിയ ബാച്ച് അനുവദിക്കില്ലെന്ന സർക്കാർ തീരുമാനത്തെ കുറിച്ച് മാദ്ധ്യമങ്ങളോട് സംസാരിക്കവെയാണ് നേതാക്കൾ ഇക്കാര്യം അറിയിച്ചത്. സംസ്ഥാനത്തെയാകെ ഒരു യൂണിറ്റായി കണ്ടാണ് സർക്കാർ സീറ്റുകളുടെ എണ്ണം സംബന്ധിച്ച കണക്ക് പറയുന്നത്. ഇത് ഒട്ടും പ്രായോഗികമല്ല. ഓരോ താലൂക്കിനെയും ഓരോ യുണിറ്റായി കണ്ട് സീറ്റുകൾ ഉറപ്പുവരുത്തുകയാണ് സർക്കാർ ചെയ്യേണ്ടതെന്നാണ് വി ഡി സതീശനും കുഞ്ഞാലിക്കുട്ടിയും ആവശ്യപ്പെടുന്നത്.

സംസ്ഥാനത്ത് ചില ഭാഗങ്ങളിൽ ഉയർന്ന മാർക്കോടെ വിജയിച്ചവർക്ക് പോലും പ്ലസ് വണ്ണിന് ആഗ്രഹിച്ച വിഭാഗത്തിൽ സീറ്റില്ലാത്ത സ്ഥിതിയാണ്. സീറ്റ് വർധിപ്പിക്കുന്നതിന് പകരം മറ്റു പരിഹാരങ്ങൾ കാണണമെന്ന് കോടതി തന്നെ നേരത്തെ ആവശ്യപ്പെട്ടതാണ്. ബാച്ചുകളുടെ എണ്ണം വർധിപ്പിക്കണം. 50 കുട്ടികൾക്ക് മാത്രമായി സജീകരിച്ച ക്ലാസിൽ കുട്ടികളുടെ എണ്ണം വർധിപ്പിക്കുന്നത് ശാസ്ത്രീയമല്ല. ബാച്ചുകൾ വർധിപ്പിച്ച് കുട്ടികൾക്ക് സീറ്റുറപ്പാക്കുന്നതിന് പകരം പൊതുവിദ്യാഭ്യാസത്തെ ദുർബലപ്പെടുത്തുന്ന സമീപനമാണ് സർക്കാറിന്റേത്. സംസ്ഥാനത്തെ രക്ഷിതാക്കളുടെ ആശങ്കയാണ് പ്രതിപക്ഷം സർക്കാറിന്റെ ശ്രദ്ധയിൽ കൊണ്ടുവന്നെന്നും നേരത്തെ തന്നെ പ്രതിപക്ഷം ഉന്നയിക്കുന്ന ഈ വിഷയത്തിൽ സർക്കാറിന് നിഷേധാത്മക നിലപാടാണെന്നും നേതാക്കൾ മാദ്ധ്യമങ്ങളോട് വെളിപ്പെടുത്തി.

അതേസമയം സംസ്ഥാന അടിസ്ഥാനത്തിൽ സീറ്റ് കണക്കാക്കാതെ ജില്ലാ അടിസ്ഥാനത്തിൽ സീറ്റ് കണക്കാക്കണമെന്നാവശ്യപ്പെട്ട് കെ കെ ശൈലജയും രംഗത്തെത്തിയിട്ടുണ്ട്. ശ്രദ്ധക്ഷണിക്കലിലൂടെയാണ് ശൈലജ ഇക്കാര്യം ആവശ്യപ്പെട്ടത്. സംസ്ഥാന യൂണിറ്റുകളായി കണ്ട് സീറ്റ് തീരുമാനിക്കരുത്. മറിച്ച് ജില്ലാ-സബ് ജില്ലാ അടിസ്ഥാനത്തിൽ സീറ്റുകളുടെ യൂണിറ്റ് കണക്കാക്കി അപര്യാപ്തത പരിഹരിക്കണമെന്നും ശ്രദ്ധക്ഷണിക്കലിൽ ശൈലജ ആവശ്യപ്പെട്ടിരുന്നു. സംസ്ഥാനത്തെ സ്ഥിതി ഗുരുതരമാണെന്നും സ്വാശ്രയ സ്ഥാപനങ്ങളിലെ അധിക ഫീസ് ഈടാക്കുന്നത് തടയാൻ നടപടി വേണമെന്നും വിദ്യാഭ്യാസ മന്ത്രി വി ശിവൻകുട്ടിയോട് ശൈലജ വ്യക്തമാക്കിയിരുന്നു. നേരത്തെ പ്രതിപക്ഷം അടിയന്തരപ്രമേയത്തിന് നോട്ടീസ് നൽകിയതും ഇക്കാര്യം ചൂണ്ടിക്കാട്ടിയായിരുന്നു. വിദ്യാർത്ഥികൾ നേരിടുന്ന പ്രശ്നം ചർച്ച ചെയ്യണമെന്നായിരുന്നു ഷാഫി പറമ്പിൽ നൽകിയ നോട്ടീസിൽ ഉന്നയിച്ചിരുന്ന ആവശ്യം. എന്നാൽ അധിക ബാച്ചുകൾ അനുവദിക്കാൻ കഴിയില്ലെന്ന് പൊതു വിദ്യാഭ്യാസ മന്ത്രി വി.ശിവൻകുട്ടി സഭയിൽ വിശദമാക്കി.

വാഷിംഗ്ടൺ: ഗർഭഛിദ്രം നിയമവിധേയമാക്കണം എന്നാവശ്യപ്പെട്ട് അമേരിക്കയിൽ പ്രതിഷേധവുമായി വനിതകൾ. ഗർഭസ്ഥശിശുവിന് ആറാഴ്ച പിന്നിട്ടാൽ ഗർഭഛിദ്രം പാടില്ലെന്ന ടെക്സസ് നിയമത്തിനെതിരാണ് സ്ത്രീകൾ പ്രതിഷേധവുമായി രംഗത്തെത്തിയത്. കഴിഞ്ഞ മാസം മുതലാണ് ടെക്സസിൽ നിയമം പ്രാബല്യത്തിൽ വന്നത്.

‘എന്റെ ശരീരം എന്റെ അവകാശം’, ‘അബോർഷൻ നിയമവിധേയമാക്കുക’ എന്നീ പ്ലക്കാർഡുകൾ ഉയർത്തിയായിരുന്നു സ്ത്രീകളുടെ പ്രതിഷേധം. വാഷിങ്ടൺ ഡി.സിയിലെ സുപ്രീംകോടതി കെട്ടിടത്തിനു ചുറ്റും ആയിരക്കണക്കിന് പ്രതിഷേധക്കാർ അണിനിരന്നു.

കുഞ്ഞുങ്ങളുടെ കാര്യത്തിൽ പുരുഷന്മാരോ സർക്കാറോ അല്ല സ്ത്രീകളാണ് തീരുമാനമെടുക്കേണ്ടതെന്ന് പ്രതിഷേധക്കാർ അറിയിച്ചു. 1973 ൽ രാജ്യവ്യാപകമായി അബോർഷൻ നിയമാനുസൃതമാക്കിയ റൂവി വേയ്ഡ് കേസിനെ അട്ടിമറിക്കാവുന്ന രീതിയിൽ കോടതിയിൽ കേസുകൾ വരാനിരിക്കെയാണ് ശക്തമായ പ്രതിഷേധം ഉയർത്തി സ്ത്രീകൾ രംഗത്തെത്തിയത്.

മുംബൈ: രാജ്യത്തെ ഏറ്റവും നീളം കൂടിയ കടൽപ്പാതയാണ് മുംബൈയിൽ ഒരുങ്ങുന്നത്. ദ മുംബൈ ട്രാൻസ് ഹാർബർ ലിങ്ക് (എം.ടി.എച്ച്എൽ.) അഥവാ സെവരി -നവസേവ സീലിങ്ക് പാലം നവിമുംബൈയിലാണ് നിർമ്മിക്കുന്നത്. ട്രാഫിക് തിരക്കുകൾ കുറയ്ക്കുക എന്ന ലക്ഷ്യം മുൻനിർത്തിയാണ് പാലം നിർമ്മിക്കാൻ തീരുമാനിച്ചത്.

22 കിലോ മീറ്റർ നീളമേറിയ കടൽപ്പാലത്തിന്റെ പതിനാറര കിലോ മീറ്റർ യാത്ര കടലിന് മുകളിലൂടെയാണ്. രാജ്യത്തെ ഏറ്റവും വലിയ കടൽപ്പാലം, ലോകത്തിലെ ഏറ്റവും വലിയ നാലാമത്തെ കടൽപ്പാലം തുടങ്ങിയ പ്രത്യേകതകളും ദ മുംബൈ ട്രാൻസ് ഹാർബർ ലിങ്കിന് സ്വന്തമാണ്. 2022 ആകുന്നതോടെ പദ്ധതി പൂർത്തിയാക്കാനാകുമെന്നാണ് പ്രതീക്ഷിക്കുന്നത്.

ദക്ഷിണ മുംബൈയിലെ സെവ്രിയിൽനിന്ന് തുടങ്ങി എലിഫന്റാ ദ്വീപിന്റെ വടക്കു വശത്തുകൂടി താനെ കടലിടുക്ക് മുറിച്ചുകടന്ന് നവസേവയ്ക്കടുത്തുള്ള ചിർലെ ഗ്രാമത്തിലാണ് പാലം അവസാനിക്കുന്നത്. നവി മുംബൈയെ മുംബൈയുമായി ബന്ധിപ്പിക്കുന്ന കടൽപ്പാലം യാഥാർഥ്യമാകുന്നതോടെ യാത്രാസമയം ചുരുക്കുകയും ഇന്ധനം ലാഭിക്കുകയും ചെയ്യാമെന്നാണ് വിലയിരുത്തപ്പെടുന്നത്. നവി മുംബൈയുടെ വികസനം, മുംബൈയിലെ തിരക്ക് കുറയ്ക്കൽ, നവി മുംബൈ അന്താരാഷ്ട്ര വിമാനത്താവളത്തിലേക്ക് വേഗത്തിലെത്താൻ സാധിക്കുക, പുണെ എക്സ്പ്രസ് വേയിലേക്ക് ബന്ധിപ്പിക്കൽ തുടങ്ങി ലക്ഷ്യങ്ങളോടെയാണ് പദ്ധതി രൂപകല്പന ചെയ്തിരിക്കുന്നത്.

ഓരോ വശത്തുമായി മൂന്നു പാതകൾ അടങ്ങിയ ആറുവരി പാതയാണ് കടൽപ്പാലത്തിലുള്ളത്. അടിയന്തരാവശ്യങ്ങൾക്കായി ഏഴാമത് ഒരു വരിയും എക്സ്പ്രസ്വേയിൽ ഉണ്ടായിരിക്കും. എഡ്ജ് സ്ട്രിപ്സ്, ക്രാഷ് ബാരിയർ എന്നിവയും പ്രത്യേകതകളാണ്. 22 കിലോ മീറ്റർ നീളമുളള ഈ പാതയിൽ പതിനാറര കിലോ മീറ്റർ യാത്ര കടലിന് മുകളിലൂടെയായിരിക്കും. സെവ്രിയിൽ ത്രീലെവൽ ഇന്റർചേഞ്ചാണ് ആസൂത്രണം ചെയ്തിട്ടുളളത്. ഇവിടെ ഈസ്റ്റേൺ ഫ്രീവേ, സെവ് രി-വർളി ഈസ്റ്റ്-വെസ്റ്റ് കണക്ടർ എംടിഎച്ച്എല്ലുമായി കൂടിച്ചേരും. ഇന്റലിജൻസ് ട്രാൻസ്പോർട്ട് സിസ്റ്റം, ഇന്റർചേഞ്ചസ്, അപ്രോച്ച് വിഭാഗങ്ങൾ, ഒരു മറൈൻ ബ്രിഡ്ജിന് ആവശ്യമായ മറ്റുസൗകര്യങ്ങൾ തുടങ്ങിയവും പാലത്തിന്റെ പ്രത്യേകതകളാണ്.

പാലത്തിലൂടെ മണിക്കൂറിൽ 100 കിലോ മീറ്റർ വേഗത്തിൽ സഞ്ചരിക്കാം. നവിമുംബൈയിൽനിന്ന് മുംബൈയിലെത്താനുള്ള സമയം ഒരു മണിക്കൂറിൽനിന്ന് 20 മിനിറ്റായി ചുരുങ്ങുമെന്നതാണ് മറ്റൊരു സവിശേഷത. മുംബൈ-പുണെ അതിവേഗപാത വഴി വരുന്ന വാഹനങ്ങൾക്ക് മുംബൈയിലേക്ക് പോകാൻ എളുപ്പവഴി കൂടിയായിരിക്കും പാലം.