Highlights (Page 176)

ന്യുഡൽഹി: ഇന്ത്യയിലേക്കുള്ള നുഴഞ്ഞുകയറ്റ ശ്രമം ചൈനീസ് സേന തുടരുന്നതായി റിപ്പോർട്ട്. ലഡാക്കിലെ സൈനിക നടപടി പിൻവലിച്ചുവെങ്കിലും ഇന്ത്യയിലേക്കുള്ള കടന്നുകയറ്റം ചൈനീസ് സൈന്യം ഉപേക്ഷിച്ചിട്ടില്ലെന്ന റിപ്പോർട്ടുകളാണ് പുറത്തു വരുന്നത്.

ഉത്തരാഖണ്ഡിലെ ബരഹോട്ടിയിൽ ചൈനീസ് പീപ്പിൾസ് ആർമി നുഴഞ്ഞുകയറിയെന്നാണ് വിവരം. കഴിഞ്ഞ മാസമായിരുന്നു സംഭവം. കുതിരപ്പുറത്തെത്തിയ സൈനികർ ഏതാനും മണിക്കൂറുകൾ സ്ഥലത്ത് തമ്പടിച്ചുവെന്നും വിവരമുണ്ട്. പ്രദേശത്തെ നടപ്പാലം ചൈനീസ് സൈന്യം നശിപ്പിച്ചുവെങ്കിലും ഇന്ത്യൻ സേനയുമായി ഒരു ഏറ്റുമുട്ടലിന് നിൽക്കാതെ അവർ മടങ്ങുകയായിരുന്നുവെന്നാണ് സൂചന. ഇന്ത്യൻ സൈന്യവും ഇന്തോ ടിബറ്റൻ ബോർഡർ പോലീസും എത്തിയപ്പോഴേക്കും ചൈനീസ് സേന മടങ്ങിയെന്നാണ് അധികൃതർ വിശദമാക്കുന്നത്. എന്നാൽ ഇത്തരമൊരു വിവരം സർക്കാരിന് ലഭിച്ചിട്ടില്ലെന്ന് മുഖ്യമന്ത്രി അറിയിച്ചു.

കിഴക്കൻ ലഡാക്കിൽ ചൈനീസ് സേന നടത്തിയ കടന്നുകയറ്റം 17 മാസത്തോളം തർക്കത്തിന് ഇടയാക്കിയിരുന്നു.

ന്യൂഡൽഹി: ത്രിദിന സന്ദർശനം പൂർത്തിയാക്കി മടങ്ങവെ പ്രധാനമന്ത്രിയ്ക്ക് അമൂല്യമായ സമ്മാനമാണ് അമേരിക്ക നൽകിയത്. ഇന്ത്യൻ സംസ്‌കാരവുമായി ബന്ധപ്പെട്ട 157 പുരാവസ്തുക്കളാണ് അമേരിക്ക അദ്ദേഹത്തിന് നൽകിയത്. അമൂല്യമായ പുരാവസ്തു ശേഖരം ഇന്ത്യക്ക് കൈമാറുന്നതിൽ പ്രധാനമന്ത്രി അമേരിക്കയ്ക്ക് നന്ദി അറിയിച്ചു.

അമൂല്യങ്ങളായ പുരാവസ്തുക്കളുടെ മോഷണം, അനധികൃത വ്യാപാരം, കടത്ത് എന്നിവയ്ക്കെതിരായ പോരാട്ടം ശക്തിപ്പെടുത്താൻ പ്രതിജ്ഞാബദ്ധരാണെന്നും പ്രധാനമന്ത്രി മോദിയും അമേരിക്കൻ പ്രസിഡന്റ് ജോ ബൈഡനും വ്യക്തമാക്കി.

പത്താം നൂറ്റാണ്ടിൽ മണൽക്കല്ലിൽ തീർത്ത രേവന്തയുടെ 8.5 സെന്റിമീറ്റർ വരെ പ്രതിമ, 12-ാം നൂറ്റാണ്ടിലെ അതിമനോഹരമായ നടരാജ വെങ്കല പ്രതിമ തുടങ്ങിയവ 157 പുരാവസ്തുക്കളുടെ പട്ടികയിൽ ഉൾപ്പെടുന്നു. അമേരിക്ക ഇന്ത്യയ്ക്ക് കൈമാറിയ പുരാവസ്തുക്കളിൽ കൂടുതൽ ശേഖരങ്ങൾ 11-14 നൂറ്റാണ്ടിലേതാണ്. ബിസി 2000 കാലഘട്ടത്തിലെയും രണ്ടാം നൂറ്റാണ്ടിലെയും ചെമ്പ്, ടെറാക്കോട്ട ശിൽപങ്ങളും ഉൾപ്പെടുന്നു. 45 ശിൽപങ്ങൾ ബിസി കാലഘട്ടത്തിലേതാണ്. 71 ശിൽപങ്ങൾ സാംസ്‌കാരികവും ബാക്കി ഹിന്ദുയിസം, ബുദ്ധിസം, ജൈനിസം എന്നിവയുമായി ബന്ധപ്പെട്ടതാണ്.

ലക്ഷ്മി നാരായണ, ബുദ്ധൻ, വിഷ്ണു, ശിവ പാർവതി, ജൈന തീർത്ഥങ്കരർ, കങ്കാല മൂർത്തി, ബ്രഹ്മി, നന്ദികേശ, ഗണപതി തുടങ്ങിയവരുടെ പ്രതിമകളാണ് ഏറെയും. കല്ലിലും ടെറാക്കോട്ടയിലും ലോഹങ്ങളിലുമാണ് പ്രതികൾ തീർത്തിരിക്കുന്നത്. അതിപുരാതനവും ബിസി 2000ത്തിലുള്ളതുമായ 45 ശിൽപങ്ങളും ഇവയിൽ ഉൾപ്പെടുന്നുണ്ടെന്ന് കേന്ദ്ര സർക്കാർ വൃത്തങ്ങൾ അറിയിച്ചു.

കൊച്ചി: പുരാവസ്തു തട്ടിപ്പിന്റെ പേരിൽ അറസ്റ്റിലായ മോൻസൺ മാവുങ്കലുമായി അടുപ്പമുണ്ടായിരുന്നുവെന്ന് ഡി ഐ ജി സുരേന്ദ്രൻ. തന്റെ കുടുംബത്തിലെ മിക്ക ചടങ്ങുകളിലും മോൻസൻ പങ്കെടുക്കുമായിരുന്നുവെന്നും അദ്ദേഹം പറഞ്ഞു. കൊച്ചി കമ്മിഷണർ ആയിരുന്ന അവസരത്തിലാണ് മോൻസണിനെ പരിചയപ്പെടുന്നത്. അതിനു ശേഷം തങ്ങൾ നല്ല സുഹൃത്തുക്കളായിരുന്നുവെന്നും അദ്ദേഹം അറിയിച്ചു.

എന്നാൽ കുറച്ചു കഴിഞ്ഞപ്പോൾ മോൻസണിന്റെ ഇടപാടുകളിൽ തനിക്ക് ചില സംശയങ്ങൾ തോന്നിയിരുന്നു. അടുത്ത കാലത്തായി ബന്ധമൊന്നുമുണ്ടായിരുന്നില്ലെന്നും സുരേന്ദ്രൻ വിശദമാക്കി. ആരിൽ നിന്നും പരാതികൾ ഒന്നും ലഭിക്കാത്തതിനാലാണ് മോൻസണിന്റെ ഇടപാടുകളെ കുറിച്ച് കൂടുതലായി അന്വേഷിക്കാത്തത്. മോൻസൺ നിയമവിരുദ്ധ ഇടപാടുകളെ കുറിച്ച് തനിക്ക് യാതൊരു അറിവുമില്ല. തന്റെ സാന്നിദ്ധ്യത്തിൽ പരാതിക്കാർ മോൻസണിന് പണം കൈമാറിയെന്ന് പറയുന്നത് ശരിയല്ല. തന്റെ സാന്നിദ്ധ്യത്തിൽ ആരും പണം കൈമാറ്റം നടത്തിയിട്ടില്ലെന്നും അദ്ദേഹം കൂട്ടിച്ചേർത്തു.

നൂറ്റാണ്ടുകൾ പഴക്കമുള്ള പുരാവസ്തുക്കൾ വിദേശത്ത് വിറ്റതിലൂടെ ലഭിച്ച കോടികൾ കേന്ദ്രസർക്കാർ തടഞ്ഞുവച്ചിരിക്കുകയാണെന്നും ഇത് നിയമ പോരാട്ടത്തിലൂടെ സ്വന്തമാക്കാൻ സഹായിച്ചാൽ 25 കോടി രൂപ പലിശരഹിത വായ്പ നൽകാമെന്നും വിശ്വസിപ്പിച്ചാണ് മോൻസൺ തട്ടിപ്പ് നടത്തിയത്. ആറു പേരിൽ നിന്നും മൂന്ന് വർഷത്തോളം മോൻസൺ തട്ടിപ്പ് നടത്തിയിരുന്നു.

വാഷിംഗ്ടൺ: കോവിഡ് വൈറസ് വ്യാപനവുമായി ബന്ധപ്പെട്ട് നിർണായക വെളിപ്പെടുത്തലുകളുമായി ആരോഗ്യ വിദഗ്ധർ. കോവിഡ് കേസുകൾ വീണ്ടും വർധിക്കുന്നതിനിടെയാണ് മുന്നറിയിപ്പുമായി ആരോഗ്യ വിദഗ്ധർ രംഗത്തെത്തിയത്.

നിലവിലുള്ളതിൽ ഏറ്റവും അപകടകാരിയായ ആർ വൺ ടൈപ്പ് വൈറസിനെ അമേരിക്കയിൽ വീണ്ടും കണ്ടെത്തിയതായുള്ള റിപ്പോർട്ടുകളാണ് പുറത്തു വന്നിരിക്കുന്നത്. ആർ വൺ ടൈപ്പ് വൈറസിനെ കഴിഞ്ഞ വർഷം ജപ്പാനിൽ കണ്ടെത്തിയിരുന്നു. മറ്റു ചില രാജ്യങ്ങളിലും ഈ വൈറസിന്റെ സാന്നിദ്ധ്യം റിപ്പോർട്ടു ചെയ്തിരുന്നു.

ലോകത്ത് ആർ വൺ വേരിയന്റ് വൈറസ് ബാധിച്ചവർ കുറവാണെന്നതാണ് ഏക ആശ്വാസം. എന്നാൽ ആർ വൺ വേരിയന്റ് ബാധിച്ചവരുടെ എണ്ണം എപ്പോൾ വേണമെങ്കിലും ഉയരാൻ സാധ്യതയുണ്ടെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. അതിനാൽ തന്നെ ജാഗ്രത കൈവിടരുതെന്നും ആവശ്യമായ സുരക്ഷാ മുൻകരുതലുകൾ സ്വീകരിക്കുന്നതിൽ വിട്ടുവീഴ്ച അരുതെന്നും വിദഗ്ദ്ധർ അറിയിച്ചു.

അതേസമയം അമേരിക്കയിലെ ജനങ്ങളിൽ ഭൂരിഭാഗവും ഇപ്പോൾ മാസ്‌ക് ധരിക്കാൻ കൂട്ടാക്കുന്നില്ലെന്ന വിവരവും പുറത്തു വരുന്നുണ്ട്. അമേരിക്കയിൽ ആർ വൺ വേരിയന്റ് വൈറസുകളുടെ സാന്നിദ്ധ്യം കണ്ടെത്തിയ സാഹചര്യത്തിൽ ഇത് കൂടുതൽ അപകടത്തിന് ഇടയാക്കിയേക്കും എന്ന ആശങ്ക നിലനിൽക്കുന്നുണ്ട്. ലോകത്ത് ഇപ്പോൾ ഏറ്റവും കൂടുതൽ കോവിഡ് രോഗികൾ ഉള്ള രാജ്യം അമേരിക്കയാണ്. വേൾഡോമീറ്ററിന്റെ കണക്കുപ്രകാരം അമേരിക്കയിൽ ഇതുവരെ കൊവിഡ് ബാധിച്ചത് 43,725,604 പേർക്കാണ്. ഏറ്റവും അധികം മരണ സംഖ്യ റിപ്പോർട്ട് ചെയ്യപ്പെട്ടിരിക്കുന്നതും അമേരിക്കയിലാണ്. 706,058 പേർക്കാണ് അമേരിക്കയിൽ കോവിഡിനെ തുടർന്ന് ജീവൻ നഷ്ടപ്പെട്ടത്.