ഇന്ത്യൻ ബഹിരാകാശ ദൗത്യത്തിന്റെ ക്യാപ്റ്റനുമായി വിവാഹം കഴിഞ്ഞു; വെളിപ്പെടുത്തലുമായി ലെന
തന്റെ വിവാഹ വിവരം വെളിപ്പെടുത്തി നടി ലെന. ഇന്ത്യൻ ബഹിരാകാശ ദൗത്യമായ ഗഗൻയാന്റെ ക്യാപ്റ്റൻ പ്രശാന്ത് ബാലകൃഷ്ണനെയാണ് താൻ വിവാഹം ചെയ്തതെന്ന് വെളിപ്പെടുത്തിയിരിക്കുകയാണ് ലെന. 2024 ജനുവരി 17 ന് ആയിരുന്നു തങ്ങളുടെ വിവാഹമെന്നും ലെന പറഞ്ഞു. ഇൻസ്റ്റഗ്രാമിലൂടെയാണ് ലെന ഇക്കാര്യം അറിയിച്ചത്.
വളരെ രഹസ്യമായ ദേശീയ പദ്ധതിയുടെ ഭാഗമായതുകൊണ്ടാണ് വിവാഹ കാര്യം വെളിപ്പെടുത്താൻ കഴിയാതിരുന്നത്. ഗഗൻയാൻ ദൗത്യത്തിന് വേണ്ടി തെരഞ്ഞെടുക്കപ്പെട്ടവരുടെ പേര് പ്രധാനമന്ത്രി പ്രഖ്യാപിച്ചത് കൊണ്ടാണ് തനിക്ക് ഇത് ഇപ്പോൾ പുറത്തു പറയാൻ കഴിയുന്നത്. രാജ്യത്തിന് എന്നപോലെ തനിക്കും ഇത് അഭിമാന നിമിഷമാണെന്നും ലെന അറിയിച്ചു. സ്വകാര്യ ചടങ്ങായാണ് വിവാഹം നടന്നത്. വിവാഹത്തിന്റെ ചിത്രങ്ങളും ലെന പങ്കുവെച്ചിട്ടുണ്ട്.
ജനുവരിയിലാണ് തങ്ങൾ വിവാഹിതരായത്. ഗഗൻയാൻ ദൗത്യ സംഘത്തിന്റെ ഔദ്യോഗിക പ്രഖ്യാപനത്തിനായി ഇതുവരെ കാത്തിരിക്കുകയായിരുന്നുവെന്നും താരം വെളിപ്പെടുത്തി.
കഴിഞ്ഞ ദിവസമാണ് പ്രധാനമന്ത്രി നരേന്ദ്രമോദി ഗഗൻയാൻ ദൗത്യ സംഘത്തിലെ ബഹിരാകാശ സഞ്ചാരികളെ പ്രഖ്യാപിച്ചത്. ലെനയും ഈ വേദിയിൽ എത്തിയിരുന്നു.
കേരള സന്ദർശന വേളയിൽ തുമ്പ വിക്രം സാരാഭായ് സ്പേസ് സെന്ററിലെത്തിയപ്പോഴാണ് പ്രധാനമന്ത്രി പദ്ധതിയിൽ ഉൾപ്പെട്ട യാത്രികരുടെ പേര് പ്രഖ്യാപിച്ചത്.
പദ്ധതിയുടെ തയ്യാറെടുപ്പുകളുടെ വിശകലനത്തിന് ശേഷമാണ് അദ്ദേഹം യാത്രികരെ പ്രഖ്യാപിച്ചത്. മുഖ്യമന്ത്രി പിണറായി വിജയൻ, ഗവർണർ ആരിഫ് മുഹമ്മദ് ഖാൻ, കേന്ദ്രമന്ത്രി വി മുരളീധരൻ, ഐഎസ്ആർഒ ചെയർമാൻ എസ് സോമനാഥ് തുടങ്ങിയവരെല്ലാം പ്രഖ്യാപന ചടങ്ങിൽ പങ്കെടുത്തു.
പാലക്കാട് നെന്മാറ സ്വദേശിയായ പ്രശാന്ത് ബാലകൃഷ്ണൻ നായരാണ് ഗഗൻയാൻ ദൗത്യത്തിലെ നാല് ബഹിരാകാശ സഞ്ചാരികളിൽ ഒരാൾ. ദൗത്യ സംഘത്തിന്റെ തലവനായി പ്രശാന്ത് ബാലകൃഷ്ണനെ തിരഞ്ഞെടുത്തു. അംഗദ് പ്രതാപ്, അജിത് കൃഷ്ണൻ, ശുഭാൻശുക്ല എന്നിവരാണ് മറ്റ് അംഗങ്ങൾ.
ഗഗൻയാൻ ദൗത്യത്തിന്റെ കമാൻഡറും മലയാളിയുമായ പ്രശാന്ത് ബാലകൃഷ്ണൻ നായർ സുഖോയ് യുദ്ധവിമാനത്തം പറത്തുന്ന ഫൈറ്റർ പൈലറ്റാണ്. നാഷണൽ ഡിഫൻസ് അക്കാദമിയിൽ നിന്നും പഠനം പൂർത്തിയാക്കിയ ശേഷമാണ് അദ്ദേഹം വ്യോമസേനയുടെ ഭാഗമായത്.
