Technology (Page 54)

മാധ്യമ പ്രവര്‍ത്തകരുടെ മരവിപ്പിച്ച അക്കൗണ്ടുകള്‍ ട്വിറ്റര്‍ പുനസ്ഥാപിച്ചു. വിമര്‍ശനം ശക്തമായതോടെയാണ് ട്വിറ്റര്‍ അക്കൗണ്ടുകള്‍ പുനസ്ഥാപിച്ചത്.

മാധ്യമപ്രവര്‍ത്തകരുടെ അക്കൗണ്ടുകള്‍ മരവിപ്പിച്ച ട്വിറ്ററിന്റെ നടപടിയെ യൂറോപ്യന്‍ യൂണിയനും ഐക്യരാഷ്ട്ര സഭയും അപലപിച്ചിരുന്നു. ഇത്തരം നടപടികള്‍ തുടര്‍ന്നാല്‍ ട്വിറ്ററിന് വിലക്കേര്‍പ്പെടുത്തുമെന്ന് യൂറോപ്യന്‍ യൂണിയന്‍ മുന്നറിയിപ്പും നല്‍കിയിരുന്നു.

ഇതിന് പിറകെയാണ് മാധ്യമ പ്രവര്‍ത്തകരുടെ അക്കൗണ്ടുകള്‍ പുനസ്ഥാപിക്കുമെന്ന് ഇലോണ്‍ മസ്‌ക് തന്നെ വ്യക്തമാക്കിയത്. ന്യൂയോര്‍ക്ക് ടൈംസ്, സിഎന്‍എന്‍, വാഷിങ്ടണ്‍ പോസ്റ്റ് എന്നീ പ്രമുഖ സ്ഥാപനങ്ങളില്‍ ജോലി ചെയ്യുന്ന മാധ്യമ പ്രവര്‍ത്തകരുടെ അക്കൗണ്ടുകളും മരവിപ്പിച്ചിരുന്നു. ലൊക്കേഷന്‍ ഡാറ്റ ലൈവായി ഷെയര്‍ ചെയ്തതിനാണ് അക്കൗണ്ട് മരവിപ്പിച്ചതെന്നാണ് ട്വിറ്റര്‍ മാനേജ്മെന്റെ പറയുന്നത്.

ബ്ലൂ ടിക്ക് സേവനം പുനരാരംഭിച്ച് ട്വിറ്റര്‍. ട്വിറ്റര്‍ തന്നെയാണ് ട്വീറ്റിലൂടെ ഇക്കാര്യം ഉപയോക്താക്കളെ അറിയിച്ചിരിക്കുന്നത്. ബ്ലൂ ടിക്ക് പുനരാരംഭിക്കുന്നതിനോടൊപ്പം പുതിയ ഫീച്ചറുകളും ഉള്‍പ്പെടുത്തുന്നുണ്ട്.

ട്വിറ്ററിന്റെ ‘ട്വിറ്റര്‍ ബ്ലൂ’ സബ്‌സ്‌ക്രിപ്ഷന്‍ എടുക്കുന്നവര്‍ക്ക് ട്വീറ്റുകള്‍ എഡിറ്റ് ചെയ്യാനുള്ള അവസരവും ലഭിക്കുന്നതാണ്. കൂടാതെ, 1080p വീഡിയോ പോസ്റ്റ് ചെയ്യാനും സാധിക്കും. സബ്‌സ്‌ക്രിപ്ഷന്‍ എടുക്കുന്നവരുടെ അക്കൗണ്ട് കൃത്യമായ വെരിഫിക്കേഷന്‍ പ്രക്രിയയ്ക്ക് വിധേയമാക്കിയതിനു ശേഷം മാത്രമാണ് ബ്ലൂ ടിക്ക് നല്‍കുകയുള്ളൂ.

വ്യാജ അക്കൗണ്ടുകളെ നിയന്ത്രിക്കാനാണ് പേയ്ഡ് വെരിഫിക്കേഷന്‍ സംവിധാനം നടപ്പിലാക്കിയതെങ്കിലും, നിരവധി സ്പാം അക്കൗണ്ടുകള്‍ക്ക് വെരിഫിക്കേഷന്‍ ലഭിച്ചതോടെയാണ് സബ്‌സ്‌ക്രിപ്ഷന്‍ താല്‍ക്കാലികമായി നിര്‍ത്തലാക്കിയത്. സേവനം പുനരാരംഭിക്കുന്നതിനോടൊപ്പം ഉപയോക്താക്കളില്‍ നിന്ന് ഈടാക്കുന്ന സബ്‌സ്‌ക്രിപ്ഷന്‍ നിരക്കുകളിലും വ്യത്യാസമുണ്ടെന്ന് ട്വിറ്റര്‍ അറിയിച്ചിട്ടുണ്ട്.

കാരണം വ്യക്തമാക്കാതെ മാധ്യമപ്രവര്‍ത്തകരുടെ അക്കൗണ്ടുകള്‍ സസ്‌പെന്‍ഡ് ചെയ്ത് ട്വിറ്റര്‍. ന്യൂയോര്‍ക് ടൈംസ്, സിഎന്‍എന്‍, വാഷിംഗ്ടണ്‍ പോസ്റ്റ് ഉള്‍പ്പടെയുള്ള സ്ഥാപനങ്ങളിലെ മാധ്യമപ്രവര്‍ത്തകരുടെ അക്കൗണ്ട് ആണ് സസ്‌പെന്‍ഡ് ചെയ്തത്. എന്നാല്‍, ഇത് സംബന്ധിച്ച് ട്വിറ്ററിന്റെ ഭാഗത്ത് നിന്നും ഔദ്യോഗിക വിദശീകരണം ഉണ്ടായിട്ടില്ല.

കഴിഞ്ഞ ദിവസം മസ്‌ക്കിന്റെ സ്വകാര്യ ജെറ്റ് വിമാനത്തിന്റെ യാത്ര തത്സമയം പിന്തുടര്‍ന്ന് വിവരങ്ങള്‍ പങ്കുവച്ച അക്കൗണ്ടുകള്‍ ട്വിറ്റര്‍ സസ്പെന്‍ഡ് ചെയ്തിരുന്നു. ഇതിന് പിന്നാലെ ആണ് മാധ്യമപ്രവര്‍ത്തകരുടെ അക്കൗണ്ടുകളും സസ്പെന്‍ഡ് ചെയ്തിരിക്കുന്നത്. മാഷബിള്‍ മാറ്റ് റിപ്പോര്‍ട്ടര്‍ ബിന്‍ഡര്‍, ദി ഇന്റര്‍സെപ്‌റ് റിപ്പോര്‍ട്ടര്‍ മൈക്ക ലീ, ആരോണ്‍ രുപാര്‍,ടോണി വെബ്സ്റ്റര്‍ എന്നിവര്‍ ഉള്‍പ്പെടെയുള്ള മാധ്യമപ്രവര്‍ത്തകരുടെ അക്കൗണ്ടുകളാണ് മരവിപ്പിച്ചിരിക്കുന്നത്. ഡോക്‌സിങ് റൂള്‍ അടിസ്ഥാനമാക്കിയാണ് അക്കൗണ്ടുകള്‍ക്ക് വിലക്ക് ഏര്‍പ്പെടുത്തിയേക്കുന്നതെന്നാണ് സൂചന. മറ്റുള്ളവരുടെ വ്യക്തിവിവരങ്ങള്‍ പൊതുമാധ്യമത്തില്‍ പങ്കുവെക്കുന്നതില്‍ നിയന്ത്രണം ഏര്‍പ്പെടുത്തിട്ടുള്ളതാണ് ട്വിറ്ററിന്റെ ഡോക്‌സിങ് റൂള്‍. ഈ നിയമം മാധ്യമപ്രവര്‍ത്തകര്‍ക്കും ബാധകമാണെന്ന് ട്വിറ്റര്‍ ട്രസ്റ്റ് ആന്‍ഡ് സേഫ്റ്റി മേധാവി എല്ല ഇര്‍വിന്‍ പറഞ്ഞു. ഈ നിയമങ്ങള്‍ പാലിക്കാത്ത അക്കൗണ്ടുകള്‍ സസ്പെന്‍ഡ് ചെയ്യുമെന്നും എല്ല വ്യക്തമാക്കി.

Elon@jet, Jack Sweeny എന്നീ ട്വിറ്റര്‍ അക്കൗണ്ടുകള്‍ മസ്‌കിന്റെ സ്വകാര്യ യാത്ര വിവരങ്ങള്‍ പൊതുമാധ്യമത്തില്‍ പങ്കുവച്ചതിനെ തുടര്‍ന്ന് കഴിഞ്ഞ ദിവസം സസ്പെന്‍ഡ് ചെയ്തിരുന്നു. ഈ അക്കൗണ്ട് ഉടമകള്‍ക്കെതിരെ നിയമനടപടി സ്വീകരിക്കുമെന്നും മസ്‌ക് വ്യക്തമാക്കിയിരുന്നു. തന്നെ വിമര്‍ശിക്കുന്നതിലും നിരീക്ഷിക്കുന്നതിലും കുഴപ്പമില്ല എന്നാല്‍ താന്‍ നില്‍ക്കുന്ന സ്ഥലത്തിന്റെ തത്സമയ വിവരങ്ങള്‍ പുറത്തു വിടുന്നതും കുടുംബത്തെ അപകടത്തിലാക്കുന്ന വിധത്തില്‍ വിവരങ്ങള്‍ പങ്കുവയ്ക്കുന്നതും അനുവദിക്കില്ലെന്നും മസ്‌ക് പ്രതികരിച്ചു.