Politics (Page 594)

തിരുവനന്തപുരം: മുഖ്യമന്ത്രിയുടെ മുന്‍ മാധ്യമ ഉപദേഷ്ടാവും കൈരളി ടിവി എംഡിയുമായ ജോണ്‍ ബ്രിട്ടാസും സിപിഎം സംസ്ഥാന സമിതി അംഗവുമായ ഡോ.വി ശിവദാസനും രാജ്യസഭയിലേക്ക് മത്സരിക്കും. ഒഴിവ് വരുന്ന രാജ്യസഭാ സീറ്റുകളിലേക്ക് ഇരുവരും മത്സരിക്കാന്‍ സിപിഎം സെക്രട്ടറിയേറ്റാണ് തീരുമാനമെടുത്തത്. വിജു കൃഷ്ണന്‍, കെ.കെ രാഗേഷ് എന്നിവര്‍ അടക്കമുള്ളവരുടെ പേര് പരിഗണനയിലുണ്ടായിട്ടും പുതുമുഖങ്ങള്‍ വരട്ടെയെന്നാണ് സിപിഎം തീരുമാനം. ദേശാഭിമാനിയില്‍ പ്രവര്‍ത്തിച്ച ശേഷമാണ് ബ്രിട്ടാസ് കൈരളിയിലെത്തുന്നത്.
കേരളത്തിലെ ഒഴിവുവരുന്ന മൂന്ന് രാജ്യസഭാ സീറ്റിലേക്കുള്ള തിരഞ്ഞെടുപ്പ് ഏപ്രില്‍ 30-നാണ് നടക്കുക. വയലാര്‍ രവി, പി.വി. അബ്ദുള്‍ വഹാബ്, കെ.കെ. രാഗേഷ് എന്നിവര്‍ ഏപ്രില്‍ 21-നു വിരമിക്കുമ്പോള്‍ ഒഴിയുന്ന സീറ്റുകളിലേക്കാണ് തിരഞ്ഞെടുപ്പ്. 30-ന് ഒമ്പതുമുതല്‍ നാലുവരെയാണ് വോട്ടെടുപ്പ്. അഞ്ചിന് വോട്ടെണ്ണും.

ചാരക്കേസ് ഗൂഢാലോചനയുമായി ബന്ധപ്പെട്ട അന്വേഷണത്തിലൂടെ കോണ്‍ഗ്രസിന്റെ ചരിത്രത്തിലെ ഏറ്റവും നിന്ദ്യമായതും നികൃഷ്ടമായതുമായ ഒരു ഗൂഢാലോചനയുടെ ചുരുളുകളാണ് അഴിയാന്‍ പോകുന്നതെന്ന് എന്‍.സി.പി നേതാവ് പി.സി ചാക്കോ. അന്വേഷണം ആരംഭിക്കേണ്ടത് എ.കെ ആന്റണിയെയും ഉമ്മന്‍ ചാണ്ടിയെയും ചോദ്യം ചെയ്തുകൊണ്ടാകണമെന്നും പി.സി ചാക്കോ പറഞ്ഞു.

ഐഎസ്ആര്‍ഒ ചാരക്കേസില്‍ നിഷ്പക്ഷമായ ഒരു അന്വേഷണം നടക്കുകയാണെങ്കില്‍ അത് രാഷ്ട്രീയ നേതൃത്വത്തില്‍ നിന്ന് തന്നെ ആരംഭിക്കണം. രാഷ്ട്രീയ നേതൃത്വത്തെയും സിബി മാത്യൂസിനെ പോലെയുള്ള പോലീസ് ഉദ്യോഗസ്ഥരെയും ചോദ്യം ചെയ്യാതെ ഈ സംഭവത്തിന് പിന്നിലെ ഗൂഢാലോചന പുറത്തുകൊണ്ടുവരാനാകില്ലെന്നും പിസി ചാക്കോ പറഞ്ഞു.

ഐഎസ്ആര്‍ഒ ചാരക്കേസുമായി ബന്ധപ്പെട്ട ഗൂഢാലോചന സിബിഐ അന്വേഷിക്കണമെന്ന സുപ്രീം കോടതി ഉത്തരവിന്റെ പശ്ചാത്തലത്തിൽ സംസാരിക്കുകയായിരുന്നു അദ്ദേഹം.

തിരുവനന്തപുരം: ചാരക്കേസ് സിബിഐ അന്വേഷണത്തിലേക്ക് പോകുമ്പോള്‍ സംസ്ഥാന കോണ്‍ഗ്രസില്‍ അത് സൃഷ്ടിക്കുന്ന പ്രശ്‌നങ്ങളെന്താകുമെന്നാണ് രാഷ്ട്രീയ നിരീക്ഷകര്‍ ഉറ്റുനോക്കുന്നത്. ഒരുകാലത്ത് സംസ്ഥാ രാഷ്ട്രീയത്തെ ഉള്ളം കൈയ്യിലിട്ട് അമ്മാനമാടിയ കെ കരുണാകരന്റെ അപ്രമാദിത്വം നശിച്ചതും , കരുണാകരന്റെ പ്രതാപകാലം അസ്തമിച്ചതും ചാരക്കേസ് മൂലമായിരുന്നു. എ ഗ്രൂപ്പ് നേതാക്കള്‍ കരുണാകരനെ ചാരനെന്ന് പരസ്യമായി അധിക്ഷേപിക്കുക വരെയുണ്ടായി. ചാരക്കേസിന്റെ പരിണിതഫലമായിട്ടായിരുന്നു കരുണാകരന് മുഖ്യമന്ത്രിസ്ഥാനം രാജി വയ്‌ക്കേണ്ടി വന്നത്. പില്‍ക്കാലത്ത് ഈ കേസ് സൃഷ്ടിക്കപ്പെട്ടത് തന്നെ കരുണാകരന്റെ കസേര തെറിപ്പിക്കാനായിരുന്നോ എന്ന സംശയം വരെയുണ്ടായി. ഇതാണ് ചാരക്കേസ് ഗൂഢാലോചന പുനരന്വേഷണത്തിന് വിധേയമാകമ്പോള്‍ കോണ്‍ഗ്രസ് ക്യാമ്പിനെ ശ്രദ്ധാകേന്ദ്രമാക്കുന്നത്.

കൊച്ചി: സ്വർണക്കടത്ത് കേസുമായി ബന്ധപ്പെട്ട് എൻഫോഴ്സ്മെന്‍റ് ഡയറക്ടറേറ്റിനെതിരെ ക്രൈംബ്രാഞ്ച് റജിസ്റ്റർ ചെയ്ത രണ്ട് എഫ്ഐആറുകളും ഹൈക്കോടതി റദ്ദാക്കി.കൃത്യമായ നടപടിക്രമങ്ങൾ പാലിക്കാതെയാണ് ക്രൈംബ്രാഞ്ച് എഫ്ഐആർ റജിസ്റ്റർ ചെയ്തതെന്ന് കോടതി വിമർശിച്ചു.

ഏതെങ്കിലും തരത്തിൽ ഇഡി കൃത്രിമത്തെളിവ് ഉണ്ടാക്കാൻ ശ്രമിച്ചെന്ന് ആരോപണമുണ്ടെങ്കിൽ കേസ് പരിഗണിക്കുന്ന കോടതിയിലാണ് ക്രൈംബ്രാഞ്ച് പരാതി നൽകേണ്ടതെന്നും ഹൈക്കോടതി വ്യക്തമാക്കി.കേസിന്‍റെ മെറിറ്റിലേക്ക് ഹൈക്കോടതി കടന്നിട്ടില്ല. ഒരു ഏജൻസി നടത്തുന്ന അന്വേഷണത്തിൽ മറ്റൊരു ഏജൻസി ഇടപെടുന്നത് ശരിയല്ല എന്ന നിരീക്ഷണത്തോടെയാണ് ഹൈക്കോടതി വിധി.

തിരുവനന്തപുരം: ആര്‍.എസ്.എസിന്റെ വാലാകാനാണ് സുകുമാരന്‍ നായരുടെ ശ്രമമെന്നും ഇതിനെ സമുദായാംഗങ്ങള്‍ ചെറുക്കുമെന്നും സിപിഎം സംസ്ഥാന സെക്രട്ടറി വിജയരാഘവന്‍. പാര്‍ട്ടിമുഖപത്രത്തില്‍ പ്രസിദ്ധീകരിച്ച ലേഖനത്തിലാണ് വിശ്വാസത്തെ ചൊല്ലി എന്‍.എസ്.എസ് ജനറല്‍ സെക്രട്ടറി സുകുമാരന്‍ നായരുടെ പ്രസ്താവനയുണ്ടാക്കിയ ക്ഷീണത്തില്‍ പ്രതികരിച്ചിരിക്കുന്നത്. സി.പി.എം സംസ്ഥാന സെക്രട്ടറി എ.വിജയരാഘവന്‍ നേരിട്ടാണ് പ്രസ്താവന ലേഖനരൂപത്തില്‍ നല്‍കിയിരിക്കുന്നത്.

തെരഞ്ഞുടപ്പ് ദിനത്തില്‍ വിശ്വാസത്തെ ഊന്നി സുകുമാരന്‍ നായരുടെ നിലപാട് സമുദായം തന്നെ തിരുത്തും. അന്നത്തെ പ്രസ്താവനയോട് കടുത്ത വിയോജിപ്പുള്ള നിരവധി പേര്‍ എന്‍.എസ്.എസിലുണ്ടെന്ന് സുകുമാരന്‍ നായര്‍ക്ക് വൈകാതെ ബോധ്യപ്പെടുമെന്നും ജാതിമത സംഘടനകളുടെ ഒരു സമ്മര്‍ദ്ദത്തിനും ഒരിക്കലും സി.പി.എം വഴങ്ങിയിട്ടില്ലെന്നും ഇനി തയ്യാറുമല്ല. സമുദായ സംഘടനകള്‍ അവരുടെ പരിധി മറക്കരുതെന്നും വെല്ലുവിളിയായിട്ടാണ് വിജയരാഘവന്റെ ലേഖനം.

അമ്പലപ്പുഴ ; മന്ത്രി ജി സുധാകരനെതിരെ പൊലീസിൽ പരാതി. സ്ത്രീത്വത്തെ അപമാനിക്കുകയും വർഗീയ സംഘർഷത്തിനിടയാക്കുകയും ചെയ്യുന്ന പരാമർശങ്ങൾ നടത്തിയെന്നാരോപിച്ച് ജി സുധാകരനെതിരെ പരാതി ഉയര്‍ന്നത്. മന്ത്രിയുടെ മുൻ പേഴ്സണൽ സ്റ്റാഫ് അംഗത്തിന്റെ ഭാര്യയാണ് അമ്പലപ്പുഴ പൊലീസിൽ പരാതി നൽകിയത്. എസ്എഫ്ഐ ആലപ്പുഴ മുൻ ജില്ലാ കമ്മിറ്റി അംഗവുമാണ് ഇവര്‍.

കഴിഞ്ഞ ദിവസം ആലപ്പുഴയിലെ വാർത്താസമ്മേളനത്തിൽ മന്ത്രി സ്ത്രീത്വത്തെ അപമാനിക്കുന്നവിധം പ്രസ്താവന നടത്തിയെന്ന് പരാതിയിൽ പറയുന്നു. കഴിഞ്ഞ ജനുവരി 8 ന് പരാതിക്കാരിയെ വിവാഹം ചെയ്തതിന് പിന്നാലെ മന്ത്രി പേഴ്സനൽ സ്റ്റാഫിനെ ഒഴിവാക്കിയെന്ന് പരാതി ഉയർന്നിരുന്നു.വേണുഗോപാലിനെ താൻ പിടിച്ചുവച്ചിരിക്കുകയാണെന്ന മന്ത്രിയുടെ പ്രസ്താവന വേദനിപ്പിക്കുന്നതാണെന്നും പരാതിയിൽ പറയുന്നു.

കൂടാതെ, ആലപ്പുഴ എസ്ഡി കോളജിൽ ശാലുവിന് പിജി പ്രവേശനം ലഭിക്കുന്നതു തടയാൻ മന്ത്രിയുടെ കുടുംബം ശ്രമിച്ചതായും പരാതിയിലുണ്ട്. സ്ത്രീത്വത്തെ അപമാനിച്ചതിനു പുറമെ വർഗീയ സംഘർഷത്തിന് ഇടയാക്കുന്ന മന്ത്രിയുടെ പ്രസ്താവനയ്ക്കെതിരെയും കേസെടുക്കണമെന്ന് ശാലു പരാതിയിൽ ആവശ്യപ്പെട്ടു.പൊലീസിൽ പരാതി നൽകിയതിനെത്തുടർന്ന് ഭീഷണിയും സമ്മർദവുമുണ്ടെന്ന് വേണുഗോപാൽ പറഞ്ഞു. പരാതിയിൽ കേസെടുത്തിട്ടില്ലെന്ന് അമ്പലപ്പുഴ എസ്ഐ: കെ.എച്ച്.ഹാഷിം അറിയിച്ചു. മന്ത്രി പ്രസ്താവന നടത്തിയത് ആലപ്പുഴയിലായതിനാലാണ് കേസെടുക്കാത്തതെന്നാണു പൊലീസിന്റെ വിശദീകരണം.

കോഴിക്കോട്ടെത്തിയ ഉടൻ ചോദ്യം ചെയ്യാനുള്ള നോട്ടീസ് വിജിലൻസിൽ നിന്ന് സ്വീകരിക്കുമെന്ന് കെ എം ഷാജി എംഎൽഎ.ചോദ്യം ചെയ്യലുമായി പൂർണമായി സഹകരിക്കുമെന്നും റെയ്ഡ് സംബന്ധിച്ച് ചില മാധ്യമങ്ങളിൽ വരുന്ന വ്യാജ വാർത്തകൾക്കെതിരെ നിയമപരമായി നീങ്ങാൻ തീരുമാനിച്ച സാഹചര്യത്തിലാണ് പരസ്യ പ്രതികരണം ഒഴിവാക്കുന്നതെന്നും ഷാജി പറഞ്ഞു.കോഴിക്കോട് വിജിലൻസ് എസ് പി ശശിധരന്‍റെ നേതൃത്വത്തിലായിരുന്നു ഏപ്രിൽ 13 ന് ഷാജിയുടെ കോഴിക്കോട്ടെയും കണ്ണൂരേയും വീടുകളിൽ പരിശോധന നടത്തിയത്.

പരിശോധനയിൽ ഷാജിയുടെ അഴീക്കോട് ചാലാട്ടെ വീട്ടിൽ നിന്ന് അരക്കോടി രൂപയും കോഴിക്കോട് മാലൂർകുന്നിലെ വീട്ടിൽ നിന്ന് വിദേശകറൻസികളും സ്വർണാഭരണങ്ങളും വിജിലൻസ് പിടിച്ചെടുത്തിരുന്നു.കെ എം ഷാജിയുടെ കണ്ണൂർ, കോഴിക്കോട് വീടുകളിൽ നിന്നായി 48 ലക്ഷത്തിലധികം രൂപ കണ്ടെത്തിയെന്നാണ് വിജിലൻസ് അറിയിച്ചത്. പണവും കണ്ടെത്തിയ 77 രേഖകളും അന്വേഷണ സംഘം കോഴിക്കോട് വിജിലൻസ് കോടതിക്ക് കൈമാറി. വിശദമായ അന്വേഷണ റിപ്പോർട്ട് വൈകാതെ സമർപ്പിക്കും. ഷാജിയെ ചോദ്യം ചെയ്യുന്ന കാര്യത്തിൽ തീരുമാനം പിന്നീടെന്നും അന്വേഷണ സംഘം അറിയിച്ചു.

തിരുവനന്തപുരം: കെ ടി ജലീലും മുഖ്യമന്ത്രി പിണറായി വിജയനും ഗൂഢാലോചന നടത്തിയതായി പ്രതിപക്ഷനേതാവ് രമേശ് ചെന്നിത്തല. ബന്ധുനിയമനത്തില്‍ തുല്യ പങ്കാളിയായ മുഖ്യമന്ത്രിക്ക് ധാര്‍മ്മികത ലവലേശമെങ്കിലും അവശേഷിക്കുന്നുണ്ടെങ്കില്‍ രാജിവയ്ക്കണമെന്നും ചെന്നിത്തല ആവശ്യപ്പെട്ടു.ഒരുവശത്ത് ധാര്‍മ്മികത പ്രസംഗിക്കുകയും മറുവശത്ത് കൂടി ധാര്‍മ്മികതയെ തകിടം മറിക്കാനുള്ള നീക്കം നടത്തുകയുമാണ് സര്‍ക്കാര്‍ ചെയ്യുന്നതെന്ന് ചെന്നിത്തല വിമര്‍ശിച്ചു.യോഗ്യതയില്‍ മാറ്റം വരുത്തുന്നത് എന്തു കൊണ്ടാണ്. മന്ത്രിസഭയില്‍ വച്ചാല് ബന്ധുവിനെ നിയമിക്കാന്‍ കഴിയില്ല എന്ന് കരുതിയിട്ടാണോ എന്നും ചെന്നിത്തല ചോദിച്ചു.