തിരുവനന്തപുരം: മുഖ്യമന്ത്രിയുടെ മുന്‍ മാധ്യമ ഉപദേഷ്ടാവും കൈരളി ടിവി എംഡിയുമായ ജോണ്‍ ബ്രിട്ടാസും സിപിഎം സംസ്ഥാന സമിതി അംഗവുമായ ഡോ.വി ശിവദാസനും രാജ്യസഭയിലേക്ക് മത്സരിക്കും. ഒഴിവ് വരുന്ന രാജ്യസഭാ സീറ്റുകളിലേക്ക് ഇരുവരും മത്സരിക്കാന്‍ സിപിഎം സെക്രട്ടറിയേറ്റാണ് തീരുമാനമെടുത്തത്. വിജു കൃഷ്ണന്‍, കെ.കെ രാഗേഷ് എന്നിവര്‍ അടക്കമുള്ളവരുടെ പേര് പരിഗണനയിലുണ്ടായിട്ടും പുതുമുഖങ്ങള്‍ വരട്ടെയെന്നാണ് സിപിഎം തീരുമാനം. ദേശാഭിമാനിയില്‍ പ്രവര്‍ത്തിച്ച ശേഷമാണ് ബ്രിട്ടാസ് കൈരളിയിലെത്തുന്നത്.
കേരളത്തിലെ ഒഴിവുവരുന്ന മൂന്ന് രാജ്യസഭാ സീറ്റിലേക്കുള്ള തിരഞ്ഞെടുപ്പ് ഏപ്രില്‍ 30-നാണ് നടക്കുക. വയലാര്‍ രവി, പി.വി. അബ്ദുള്‍ വഹാബ്, കെ.കെ. രാഗേഷ് എന്നിവര്‍ ഏപ്രില്‍ 21-നു വിരമിക്കുമ്പോള്‍ ഒഴിയുന്ന സീറ്റുകളിലേക്കാണ് തിരഞ്ഞെടുപ്പ്. 30-ന് ഒമ്പതുമുതല്‍ നാലുവരെയാണ് വോട്ടെടുപ്പ്. അഞ്ചിന് വോട്ടെണ്ണും.
2021-04-16