International (Page 230)

യുഎസ് വൈസ് പ്രസിഡണ്ട് കമലാ ഹാരിസിനെ കൊല്ലുമെന്ന് ഭീഷണി. സംഭവത്തിൽ നഴ്‌സിനെ അറസ്‌റ്റ് ചെയ്‌തു. 39കാരിയായ നിവിയാനെ പെറ്റിറ്റ് ഫെൽപ്പ്സ് എന്ന നഴ്‌സ്‌ ആണ് അറസ്‌റ്റിൽ ആയത്. ഇവർ കമലാ ഹാരിസിനെ കൊല്ലുമെന്ന് ഭീഷണിപ്പെടുത്തുകയും മുറിപ്പെടുത്തുമെന്ന് പ്രഖ്യാപിക്കുകയും ആയിരുന്നു.ജയിലിൽ കഴിയുന്ന ഭർത്താവിന് അയച്ച വീഡിയോ സന്ദേശത്തിലൂടെയാണ് കമലാ ഹാരിസിനെ കൊല്ലുമെന്ന് ഫെൽപ്പ്സ് ഭീഷണിപ്പെടുത്തിയത്. “കമലാ ഹാരിസ് നിങ്ങൾ മരിക്കാൻ പോവുകയാണ്.

നിങ്ങളുടെ ദിവസങ്ങൾ എണ്ണപ്പെട്ടിരിക്കുന്നു,” – എന്നാണ് ഒരു വീഡിയോയിൽ ഫെൽപ്പ്സ് പറയുന്നത്.ഫെബ്രുവരി 18ന് പുറത്തിറക്കിയ മറ്റൊരു വീഡിയോയിൽ “ഇന്ന് മുതൽ 50 ദിവസത്തിനുള്ളിൽ നിങ്ങൾ മരിക്കും. ഈ ദിവസം രേഖപ്പെടുത്തൂ,”- എന്നും പറയുന്നുണ്ട്. അതേസമയം, കമലാ ഹാരിസ് വൈസ് പ്രസിഡണ്ട് ആയതിനോടുള്ള ദേഷ്യത്തിലാണ് താൻ അങ്ങനെ പറഞ്ഞതെന്നും ഇപ്പോൾ ആ ദേഷ്യമില്ലെന്നുമാണ് സീക്രട്ട് സർവ്വീസ് നടത്തിയ ചോദ്യം ചെയ്യലിൽ ഫെൽപ്പ്സ് പറഞ്ഞത്.

വാഷിംഗ്ടണ്‍: ഇന്ത്യ പാകിസ്ഥാനെതിരെ ശക്തമായി പ്രതികരിക്കുമെന്ന മുന്നറിയിപ്പ് നല്‍കി അമേരിക്കയുടെ വാര്‍ഷിക രഹസ്യാന്വേഷണ റിപ്പോര്‍ട്ട്. പ്രധാനമന്ത്രിയായി നരേന്ദ്രമോദി അധികാരത്തില്‍ വന്നശേഷമാണ് ഇന്ത്യയില്‍ ഈ മാറ്റം കണ്ടുതുടങ്ങിയതെന്നും റിപ്പോര്‍ട്ടില്‍ ചൂണ്ടിക്കാട്ടുന്നു. പാകിസ്ഥാന്‍ ഭീകരരെ നിയന്ത്രിക്കുന്നതില്‍ നിഷേധാത്മക നിലപാട് സ്വീകരിച്ചപ്പോള്‍ ഐക്യരാഷ്ട്ര സഭ, ഐക്യരാഷ്ട്ര മനുഷ്യാവകാശ സമിതി എന്നിവിടങ്ങളില്‍ വിഷയം ഉയര്‍ത്തിക്കൊണ്ടുവന്ന് പാകിസ്ഥാന്റെ തനിനിറം ലോകത്തിന് കാട്ടിക്കൊടുക്കാനും ഇന്ത്യയ്ക്ക് കഴിഞ്ഞിരുന്നു. മോദി അധികാരത്തിലെത്തിയശേഷമാണ് ഇത്തരം പ്രവര്‍ത്തനങ്ങള്‍ക്കുള്ള ആക്കം കൂടിയതെന്നും റിപ്പോര്‍ട്ടില്‍ സൂചിപ്പിക്കുന്നുണ്ട്. ചൈനയുമായുള്ള അതിര്‍ത്തി പ്രശ്‌നങ്ങളെക്കുറിച്ചും റിപ്പോര്‍ട്ടില്‍ പരാമര്‍ശമുണ്ട്. ഗല്‍വാന്‍ സംഭവത്തില്‍ ഇന്ത്യന്‍ സൈനികര്‍ വീരമൃത്യുവരിച്ചതോടെയാണ് ബന്ധം കൂടുതല്‍ വഷളായത്. മാത്രമല്ല, ഗല്‍വാനിലേതുപോലുളള സംഘര്‍ഷങ്ങള്‍ വീണ്ടും ഉണ്ടായേക്കാം എന്ന മുന്നറിയിപ്പും റിപ്പോര്‍ട്ടിലുണ്ട്.

ബീജിംഗ്: നിരന്തരം ചൈന വിരുദ്ധ വാർത്തകൾ ലോകത്തെത്തിക്കുന്നുവെന്ന് ആരോപിച്ച് വിദേശ മാദ്ധ്യമങ്ങളുടെ ചൈനയിലും ഹോങ്കോംഗിലും പ്രവർത്തിക്കുന്ന ഓഫീസുകളും മാദ്ധ്യമപ്രവർത്തകരും എതിരെകടുത്തനിരീക്ഷണം ഏർപ്പെടുത്തി ചൈന. ചൈനീസ് രാഷ്ട്രീയ നേതാക്കളിൽ നിന്നും സുരക്ഷാ ഉദ്യോഗസ്ഥരിൽ നിന്നും നിരന്തരം അവഹേളനവും ഭീഷണിയുമാണ് നേരിടുന്നതെന്ന് മാദ്ധ്യമപ്രവർത്തകർ ആരോപിക്കുന്നു.

ദേശീയ സുരക്ഷാ നിയമം അനുസരിച്ചുള്ള അന്വേഷണ പരിധിയിലാണ് മാദ്ധ്യമങ്ങളുടെ പ്രവർത്തനത്തെ നിരീക്ഷിക്കുന്നത്. ചൈനയിലെ മാദ്ധ്യമസ്വാതന്ത്ര്യം ഇനിയും മെച്ചപ്പെട്ടിട്ടില്ല. ചൈനീസ് പൗരന്മാരാണ് വിദേശ മാദ്ധ്യമത്തിൽ ജോലിചെയ്യുന്നതെങ്കിൽ ഉടൻ തടവിലാക്കപ്പെടുകയാണ്. ഫോറിൻ കറസ്‌പോ ണ്ടന്റ്‌സ് ക്ലബ്ബ് ഓഫ് ചൈന എന്ന സംഘടനയാണ് വിദേശമാദ്ധ്യമ പ്രവർത്തകരുടെ ദുരവസ്ഥ വീണ്ടും പുറത്തുകൊണ്ടുവന്നിരിക്കുന്നത്.

കൊറോണ വൈറസ് ചൈനയിൽ എങ്ങനെ ഉദ്ഭവിച്ചുവെന്ന വിഷയത്തിൽ ഇന്നും അവ്യക്തത നിലനിൽക്കുന്ന പശ്ചാത്തലത്തിൽ രാജ്യത്തെ ഒരു വിവരവും പുറത്തുപോകാതിരിക്കാനാണ് ബീജിംഗ് ശ്രമിക്കുന്നത്. നിരീക്ഷണത്തിന്റെ ഭാഗമായി സമൂഹമാദ്ധ്യമങ്ങളും ഇ-മെയിലുകളും മറ്റ് സന്ദേശങ്ങളുമെല്ലാം സുരക്ഷാ ഉദ്യോഗസ്ഥർ പരിശോധിച്ചുവരികയാണ്.

കെയ്‌റോ: സൂയസ് കനാലില്‍ തടസം സൃഷ്ടിച്ച ചരക്ക് കപ്പലായ എവര്‍ ഗിവണ്‍ ഈജിപ്ത് പിടിച്ചെടുത്തു. നഷ്ടപരിഹാരമായ 900 മില്യണ് യുഎസ് ഡോളര്‍ അടയ്ക്കാത്തതുകൊണ്ടാണ് നടപടി. കനാല്‍ അതോറിറ്റി മേധാവി ഒസാമ റാബി തന്നെയാണ് ഇക്കാര്യം വ്യക്തമാക്കിയത്. തിങ്കളാഴ്ചയാണ് ഇസ്മായിലിയയിലെ കോടതി കപ്പല്‍ പിടിച്ചെടുക്കാനുള്ള ഉത്തരവ് പുറപ്പെടുവിച്ചത്. പിന്നാലെ ഇക്കാര്യം കപ്പലിലെ ജീവനക്കാരെ അധികൃതര്‍ അറിയിക്കുകയും ചെയ്തു. അതേസമയം, നഷ്ടപരിഹാര തുക സംബന്ധിച്ച് കനാല്‍ അതോറിറ്റിയും കപ്പല്‍ ഉടമകളും ഇന്‍ഷുറന്‍സ് കമ്പനിയും തമ്മില്‍ ഇപ്പോഴും ചര്‍ച്ചകള്‍ തുടരുന്നതായും വിവരമുണ്ട്.