ബെയ്ജിംഗ്: 28 മണിക്കൂറിനുള്ളിൽ ഉയർന്നത് 10 നില കെട്ടിടം. സാമൂഹ്യ മാദ്ധ്യമങ്ങളിൽ വൈറലാകുന്ന ഒരു വീഡിയോയിലെ ദൃശങ്ങളാണിത്. ചൈനയിലാണ് ഇത്രയും കുറഞ്ഞ സമയം കൊണ്ട് 10 നില കെട്ടിടം പണിതുയർത്തിയത്. ചാങ്ഷാ നഗരത്തിലാണ് 28 മണിക്കൂറിനുള്ളിൽ പത്ത് നില കെട്ടിടം നിർമ്മിച്ചത്.
ബ്രോഡ് ഗ്രൂപ്പ് എന്ന റിയൽ എസ്റ്റേറ്റ് കമ്പനിയാണ് നിർമ്മാണം നടത്തിയത്. കെട്ടിടത്തിനു വേണ്ട മുറികളും മറ്റ് കെട്ടിട മൊഡ്യൂളുകളും നേരത്തെ തന്നെ ഒരു ഫാക്ടറിയിൽ തയാറാക്കിയിരുന്നു. ഈ ഭാഗങ്ങളെല്ലാം ട്രക്കുകളിൽ സൈറ്റിലേക്ക് കൊണ്ടുപോയി യോജിപ്പിച്ചാണ് കമ്പനി നിർമ്മാണ പ്രവർത്തനങ്ങൾ നടത്തിയിരിക്കുന്നത്. ഓരോ കെട്ടിട മൊഡ്യൂളിനും ഷിപ്പിംഗ് കണ്ടെയ്നറിന് സമാനമായ അളവുകളായതിനാൽ ഒരു സ്ഥലത്ത് നിന്ന് മറ്റൊരിടത്തേക്ക് കൊണ്ടുപോകാനും വളരെ എളുപ്പമായിരുന്നു. കെട്ടിട നിർമ്മാണത്തിന് വേണ്ട ഭാഗങ്ങളെല്ലാം നേരത്തെ തന്നെ നിർമാണ സ്ഥലത്ത് എത്തിക്കുകയും പിന്നീട് യൂണിറ്റുകൾ പരസ്പരം ബന്ധിപ്പിച്ചു വയ്ക്കുകയുമായിരുന്നു. സാങ്കേതിക സംവിധാനങ്ങളുടെ സഹായത്തോടെയാണ് ബ്രോഡ് ഗ്രൂപ്പ് കെട്ടിട നിർമ്മാണം പൂർത്തിയാക്കിയത്.