General (Page 1,336)

തിരുവനന്തപുരം: കൈത്തറി മേഖലയ്ക്ക് കരുത്ത് പകർന്ന് സർക്കാരിന്റെ ബുധനാഴ്ച്ച ചട്ടം. സർക്കാർ ജീവനക്കാർ ബുധനാഴ്ചകളിൽ കൈത്തറിവസ്ത്രം ധരിക്കണമെന്ന സർക്കാർ ഉത്തരവാണ് കോവിഡ്-പ്രളയ പ്രതിസന്ധികളിൽ തളർന്ന കൈത്തറി മേഖലയ്ക്ക് സഹായകമാകുന്നത്. വി.എസ്. അച്യുതാനന്ദൻ സർക്കാരാണ് കൈത്തറി മേഖലയെ പ്രോത്സാഹിപ്പിക്കാൻ സർക്കാർ ജീവനക്കാർ ആഴ്ചയിൽ ഒരുദിവസം കൈത്തറി വസ്ത്രം ധരിക്കണമെന്ന് ആദ്യം ഉത്തരവിട്ടത്. 2019 ൽ പ്രളയവും 2020 ൽ കോവിഡും ഓണം, ക്രിസ്മസ്, വിഷു വിപണികളെ ബാധിച്ചപ്പോൾ കോടികളുടെ നഷ്ടമാണ് കൈത്തറി മേഖല നേരിട്ടത്.

കോവിഡ് തീവ്രത കുറഞ്ഞശേഷം നെയ്ത്ത് സംഘങ്ങളും സൊസൈറ്റികളും വിൽപനശാലകളും സജീവമായതോടെയാണ് കഴിഞ്ഞദിവസംഈ ഉത്തരവ് സർക്കാർ വീണ്ടും ഇറക്കിയത്. കൈത്തറിയെ രക്ഷിക്കാനായി നടപ്പ് അദ്ധ്യയനവർഷം സംസ്ഥാനത്തെ 163 ഉപജില്ലകളിലായി 38.02 ലക്ഷം മീറ്റർ സ്‌കൂൾ യൂണിഫോം തുണി വിതരണം ചെയ്തിട്ടുണ്ട്. ഒന്ന് മുതൽ ഏഴ് വരെ ക്ലാസുകളിലെ കുട്ടികൾക്കുള്ള ഷർട്ട്, നിക്കർ, സ്‌കേർട്ട് തുണിയാണ് നൽകുന്നത്.

നാലാം ക്ലാസ് വരെ എയ്ഡഡ് സ്‌കൂൾ കുട്ടികൾക്കും യൂണിഫോം ലഭിക്കും. 2022-23 അദ്ധ്യയന വർഷത്തേക്ക് 46.5 ലക്ഷം മീറ്റർ കൈത്തറി തുണിയുടെ ഓർഡർ പൊതുവിദ്യാഭ്യാസ വകുപ്പ് നൽകിയിട്ടുണ്ട്. ഇതിനായി 120 കോടി രൂപയാണ് അനുവദിച്ചത്. കുപ്പടം കരമുണ്ട്, ശ്രീകൃഷ്ണപുരം പട്ട്ജീവനക്കാരെ ആകർഷിക്കാൻ പരമ്പരാഗതഖാദിക്കരയായ കുപ്പടം കരപതിച്ച മുണ്ടുമുതൽ ആകർഷകമായ ഡിസൈനുകളിലുള്ള സിൽക്ക് സാരി വരെ ഖാദി, കൈത്തറി സ്റ്റാളുകളിലുണ്ട്. കുപ്പടം സിംഗിൾ, ഡബിൾ എന്നിവയ്ക്ക് യഥാക്രമം 500, 1000 രൂപയാണ് വില. സ്ത്രീകൾക്കുള്ള അനന്തപുരി സിൽക്ക്, പാലക്കാട്ടെ ചിതലിപ്പട്ട്, ശ്രീകൃഷ്ണപുരം പട്ട്, കണ്ണൂരിന്റെ പയ്യന്നൂർ പട്ട് എന്നിവയുമുണ്ട്. 2,000 രൂപയാണ് ഇതിന്റെ വില.

തിരുവനന്തപുരം: ശ്രീപദ്മനാഭസ്വാമി ക്ഷേത്രത്തിലെ അൽപ്പശി ഉത്സവത്തോടനുബന്ധിച്ചുള്ള ആറാട്ട് വ്യാഴാഴ്ച്ച നടക്കും. ആറാട്ടിന് മുന്നോടിയായുള്ള പള്ളിവേട്ട പത്മനാഭ ക്ഷേത്രത്തിൽ ആരംഭിച്ചു. സുന്ദരവിലാസം കൊട്ടാരത്തിനു മുന്നിൽ പ്രത്യേകം തയ്യാറാക്കിയ വേട്ടക്കാവിൽ ഇലഞ്ഞിക്കു ചുവട്ടിലെ കരിക്കിൽ പ്രതീകാത്മകമായി അമ്പെയ്താണ് പള്ളിവേട്ട ആരംഭിച്ചത്. ക്ഷേത്രംസ്ഥാനി മൂലം തിരുനാൾ രാമവർമ്മ രാത്രി എട്ടരയോടെയാണ് പള്ളിവേട്ട നടത്തിയത്.

ഉത്സവ ശീവേലിക്ക് ശേഷം രാജകുടുംബസ്ഥാനി ക്ഷേത്രത്തിൽ നിന്നും ഉടവാളുമായി പടിഞ്ഞാറെ നടവഴി പുറത്തിറങ്ങി. തുടർന്ന് ശ്രീ പദ്മനാഭസ്വാമിയുടെ വില്ലേന്തിയ വിഗ്രഹം സ്വർണഗരുഡവാഹനത്തിലും തിരുവാമ്പാടി ശ്രീകൃഷ്ണസ്വാമിയെയും നരസിംഹമൂർത്തിയെയും വെള്ളി ഗരുഡവാഹനത്തിലും എഴുന്നള്ളിച്ചു. വാദ്യമേളങ്ങളില്ലാതെ നിശബ്ദ ഘോഷയാത്ര സുന്ദരവിലാസം കൊട്ടാരത്തിന് മുന്നിലെ വേട്ടക്കളത്തിലെത്തി. തന്ത്രി തരണനല്ലൂർ സതീശൻ നമ്പൂതിരി അമ്പും വില്ലും ആവാഹനം കഴിച്ച് രാമവർമ്മക്ക് കൈമാറി. തുടർന്നായിരുന്നു പള്ളിവേട്ട നടന്നത്. വ്യാഴാഴ്ച്ച പുലർച്ചെ കറവപ്പശുവിനെയും കുട്ടിയെയും മണ്ഡപത്തിലെത്തിച്ച് പള്ളിക്കുറുപ്പ് ദർശനം നടത്തും.

ദീപാരാധന കഴിഞ്ഞ് ഗരുഡവാഹനത്തിൽ ശ്രീ പദ്മനാഭസ്വാമിയേയും നരസിംഹമൂർത്തിയെയും ശ്രീകൃഷ്ണസ്വാമിയെയും പുറത്തെഴുന്നള്ളിക്കും. ഇവയ്‌ക്കൊപ്പം ചേരാനായി തിരുവല്ലം പരശുരാമക്ഷേത്രം, വടുവൊത്ത് മഹാവിഷ്ണുക്ഷേത്രം, അരകത്ത് ദേവിക്ഷേത്രം, പാൽക്കുളങ്ങര ചെറിയ ഉദേശ്വരം മഹാവിഷ്ണുക്ഷേത്രം എന്നിവിടങ്ങളിൽ നിന്നുള്ള ആറാട്ട് വിഗ്രഹങ്ങൾ പടിഞ്ഞാറേ നടയിലെത്തും. തുടർന്ന് ഘോഷയാത്ര ശംഖുമുഖത്തേക്ക് പുറപ്പെടും. വള്ളക്കടവിൽ നിന്ന് തിരുവനന്തപുരം അന്താരാഷ്ട്ര വിമാനത്താവളത്തിനകത്ത് കൂടി ശംഖുമുഖത്തെത്തി കൽമണ്ഡപത്തിലിറക്കി വച്ച വാഹനങ്ങളിൽ നിന്ന് വിഗ്രഹങ്ങൾ പൂജകൾക്ക് ശേഷം സമുദ്രത്തിലാറാടിക്കും. ആറാട്ടു കഴിഞ്ഞ് എഴുന്നള്ളത്ത് രാത്രി ക്ഷേത്രത്തിൽ എത്തുന്നതോടെയാണ് ഉത്സവത്തിന് കൊടിയിറങ്ങുക.

ആറാട്ട് ഘോഷയാത്ര കടന്നു പോകുന്നതിനാൽ തിരുവനന്തപുരം വിമാനത്താവളം അഞ്ചു മണിക്കൂർ അടച്ചിടും. കേരള പൊലീസിന്റെയും ഇന്ത്യൻ പട്ടാളത്തിന്റെയും നായർ പടയാളികളുടെയും വാളേന്തിയ തിരുവിതാംകൂർ രാജകുടുംബ അംഗങ്ങളുടെയും അകമ്പടി ഘോഷയാത്രയ്ക്ക് ഉണ്ടാകും. അതേസമയം ഘോഷയാത്രയ്ക്ക് അദാനി ഗ്രൂപ്പ് സ്വീകരണം നൽകും. കോവിഡ് പ്രോട്ടോകോൾ പൂർണ്ണമായും പാലിച്ചായിരിക്കണം ആറാട്ട് നടത്തേണ്ടതെന്ന് ജില്ലാ കളക്ടർ ഉത്തരവ് പുറപ്പെടുവിച്ചിട്ടുണ്ട്.

തിരുവനന്തപുരം: സംസ്ഥാനത്ത് സിനിമാ ടൂറിസം ആരംഭിക്കുമെന്ന് മന്ത്രി പി എ മുഹമ്മദ് റിയാസ്. കാലം എത്ര കഴിഞ്ഞാലും മനസിൽ നിന്നും മാഞ്ഞ് പോവാത്ത ചില സിനിമാ ഫ്രെയിമുകളുണ്ട്. നമ്മളെ ഏറെ സ്വാധീനിച്ച ചില സിനിമാ രംഗങ്ങൾ. നമ്മുടെ ഇത്തരം സിനിമാ ഗൃഹാതുര ഓർമ്മകൾക്ക് നിറം പകരുന്ന പുതിയ പദ്ധതി ആരംഭിക്കാൻ ടൂറിസം വകുപ്പ് ഒരുങ്ങുകയാണെന്ന് മന്ത്രി പറഞ്ഞു.

കിരീടം സിനിമയിൽ മോഹൻലാലിന്റെ വികാര നിർഭരമായ രംഗങ്ങൾ ചിത്രീകരിച്ച പാലം, ബോംബെ സിനിമയിൽ ഉയിരെ എന്ന ഗാനം ചിത്രീകരിച്ച ബേക്കൽ തുടങ്ങി ഒട്ടേറെ സ്ഥലങ്ങളിൽ ഒരുവട്ടമെങ്കിലും എത്താൻ സഞ്ചാരികളെ ആകർഷിക്കുന്നതാണ് പദ്ധതി. സാംസ്‌കാരിക വകുപ്പും ടൂറിസം വകുപ്പും സംയുക്തമായാണ് പദ്ധതി ഒരുക്കുന്നതെന്ന് അദ്ദേഹം വ്യക്തമാക്കി.

സിനിമാ താരങ്ങളെ കൂടി ഉൾപ്പെടുത്തി സിനിമാടൂറിസം പദ്ധതി മികവുറ്റതാക്കാം എന്നാണ് പ്രതീക്ഷിക്കുന്നത്. ഇതുമായി ബന്ധപ്പെട്ട് സിനിമാമേഖലയിലെ പ്രമുഖരുമായി ചർച്ച നടത്തുന്നതാണ്. സാംസ്‌കാരിക വകുപ്പ് മന്ത്രി ശ്രീ. സജി ചെറിയാനുമായി നടത്തിയ ചർച്ചയിൽ ഇരു വകുപ്പുകളും ചേർന്ന് ഉടൻ തന്നെ സിനിമാടൂറിസം പദ്ധതി യാഥാർത്ഥ്യമാക്കാൻ തീരുമാനിച്ചുവെന്നും അദ്ദേഹം കൂട്ടിച്ചേർത്തു.

കൊച്ചി: സിറോ മലബാർ സഭ എറണാകുളം- അങ്കമാലി അതിരൂപതയിലെ ഭൂമി വിൽപനയുമായി ബന്ധപ്പെട്ട് രണ്ട് വൈദികരെ ചോദ്യം ചെയ്ത് എൻഫോഴ്‌സ്‌മെന്റ് ഡയറക്ടറേറ്റ്. ഭൂമി ഇടപാടിൽ വൻതോതിൽ കള്ളപ്പണ ഇടപാട് നടന്നുവെന്ന കേസിലാണ് രണ്ട് വൈദികരെ എൻഫോഴ്‌മെന്റ് ചോദ്യം ചെയ്തത്. എറണാകുളം- അങ്കമാലി അതിരൂപത മുൻ മോൺസിഞ്ഞോർ ഫാ. സെബാസ്റ്റ്യൻ വടക്കുമ്പാടൻ, മുൻ പ്രോക്യൂറേറ്റർ ഫാദർ ജോഷി പുതുവ എന്നിവരെയാണ് ചോദ്യം ചെയ്ത്. ഇരുവരും എറണാകുളത്ത് ഇ.ഡി ഓഫിസിൽ ചോദ്യം ചെയ്യലിനായി എത്തി.

കർദിനാൾ മാർ ജോർജ് ആലഞ്ചേരി അടക്കം 24 പേരാണ് കേസിലെ പ്രതികൾ. കേസിൽ നേരത്തെ ഇ.ഡി പരാതിക്കാരനായ ആലുവ ചൊവ്വര സ്വദേശി പാപ്പച്ചന്റെ മൊഴി രേഖപ്പെടുത്തിയിരുന്നു. പലരും വാങ്ങിയ ഭൂമിക്ക് പണമെത്തിയത് ഒരേ കേന്ദ്രത്തിൽ നിന്നാണെന്നാണ് മൊഴി നൽകിയ ശേഷം പാപ്പച്ചൻ മാദ്ധ്യമങ്ങളോട് പ്രതികരിച്ചിരുന്നു. വിവാദമായ ഭൂമി വിൽപ്പനയിൽ ആധാരം വിലകുറച്ചു കാണിച്ച് കോടികളുടെ കള്ളപ്പണ ഇടപാട് നടന്നെന്നായിരുന്നു എൻഫോഴ്‌സ്‌മെന്റിന്റെ കേസ്. ആദായ നികുതി വകുപ്പ് നികുതി വെട്ടിപ്പ് കേസിൽ സഭക്ക് 6.5 കോടി പിഴ ഇട്ടിരുന്നു.

തിരുവനന്തപുരം: പൊതുമരാമത്ത് പദ്ധതിയുടെ പുരോഗതി അറിയാനാകുന്ന പ്രൊജക്ട് മാനേജ്‌മെന്റ് സിസ്റ്റം നടപ്പാക്കും. മന്ത്രി പി എ മുഹമ്മദ് റിയാസാണ് ഇക്കാര്യം അറിയിച്ചത്. പ്രവൃത്തികളിൽ സുതാര്യത, വേഗത, എന്നിവ ഉറപ്പാക്കുക എന്ന ലക്ഷ്യത്തോടെയാണ് പ്രൊജക്ട് മാനേജ്‌മെന്റ് സിസ്റ്റം ആരംഭിക്കുന്നതെന്ന് മന്ത്രി പറഞ്ഞു.

ഒരു പദ്ധതിയുമായി ബന്ധപ്പെട്ട എല്ലാ വിവരങ്ങളും ഇതുവഴി ലഭ്യമാകും. എപ്പോൾ പ്രവൃത്തി തുടങ്ങും, അവസാനിക്കും, എത്ര ശതമാനം പുരോഗമിച്ചു എന്നതെല്ലാം ഈ ഡാഷ് ബോർഡിൽ ലഭ്യമാക്കുമെന്നും ഓരോ ഘട്ടത്തിനും കൃത്യമായ ടൈം ലൈൻ ഉണ്ടാകുമെന്നും അദ്ദേഹം അറിയിച്ചു. കരാറുകാർക്ക് അവരുടേതായ ആയ പ്രശ്‌നങ്ങൾ റിപ്പോർട്ട് ചെയ്യാനുള്ള അവസരവുമുണ്ട്.

വകുപ്പു മേധാവി, ജില്ലാകളക്ടർ, സ്റ്റേറ്റ് നോഡൽ ഓഫീസർ, ഉദ്യോഗസ്ഥർ തുടങ്ങിയവർക്ക് ബന്ധപ്പെട്ട വിവരങ്ങൾ ഇതിൽ അപ്‌ഡേറ്റ് ചെയ്യാൻ ചെയ്യും. അങ്ങനെ സമഗ്രമായ ഒരു സംവിധാനമാണ് ഉദ്ദേശിക്കുന്നത്. എം എൽ എ മാർക്കും ജനങ്ങൾക്കു എല്ലാം ഇത് പരിശോധിക്കാൻ സംവിധാനം ഒരുക്കുമെന്നും ജനങ്ങൾക്ക് എന്തെങ്കിലും പരാതി ഉണ്ടെങ്കിൽ അത് രേഖപ്പെടുത്താനും സാധിക്കുമെന്നും മന്ത്രി വിശദമാക്കി.