General (Page 1,326)

ന്യൂഡൽഹി: വിവാദ കാർഷിക നിയമങ്ങൾ പിൻവലിക്കാൻ തീരുമാനിച്ച് കേന്ദ്ര സർക്കാർ. പ്രധാനമന്ത്രി നരേന്ദ്ര മോദിയാണ് ഇക്കാര്യം അറിയിച്ചത്. ഗുരുനാനാക് ജയന്തി ദിനത്തിൽ ജനങ്ങളെ അഭിസംബോധന ചെയ്യുകയായിരുന്നു അദ്ദേഹം. വിവാദമായ മൂന്ന് കാർഷിക നിയമങ്ങളും പിൻവലിക്കാനാണ് സർക്കാരിന്റെ തീരുമാനം.

കർഷർ സമരം തുടരുന്ന പശ്ചാത്തലത്തിലാണ് സർക്കാർ ഇത്തരമൊരു തീരുമാനം സ്വീകരിച്ചത്. നിയമങ്ങൾ പിൻവലിക്കാനുള്ള ബിൽ അടുത്ത പാർലമെന്റ് ശൈത്യകാല സമ്മേളനത്തിൽ കൊണ്ടുവരുമെന്നും പ്രധാനമന്ത്രി പറഞ്ഞു. കർഷകർ രാജ്യത്തിന്റെ നട്ടെല്ലാണ്. കർഷകരെ സഹായിക്കാൻ ആത്മാർഥതയോടെയാണ് നിയമങ്ങൾ കൊണ്ടുവന്നത്. ചെയ്ത കാര്യങ്ങളെല്ലാം കർഷകരുടെ നൻമയ്ക്ക് വേണ്ടിയായിരുന്നു. എന്നാൽ ചില കർഷകർക്ക് അത് മനസിലാക്കാൻ സാധിച്ചില്ലെന്നും അദ്ദേഹം വ്യക്തമാക്കി. രാജ്യത്തോട് പ്രധാനമന്ത്രി ക്ഷമ ചോദിക്കുകയും ചെയ്തു. രാജ്യതലസ്ഥാനത്ത് സമരം ചെയ്യുന്ന കർഷകർ മടങ്ങി പോകണമെന്നും അദ്ദേഹം ആവശ്യപ്പെട്ടു.

നിയമങ്ങളെ എതിർത്ത കർഷകരെ കാര്യങ്ങൾ ബോധ്യപ്പെടുത്തുന്നതിൽ കേന്ദ്രസർക്കാർ പരാജയപ്പെട്ടു. കർഷക ക്ഷേമത്തിന് സർക്കാർ പ്രതിജ്ഞാബദ്ധമാണ്. രാജ്യത്തെ കർഷകരുടെ വേദന മനസിലാക്കുന്നു. കർഷകരുടെ പ്രയത്നം നേരിൽകണ്ടയാളാണ് താൻ. രണ്ട് ഹെക്ടറിൽ താഴെ മാത്രം ഭൂമിയുള്ളവരാണ് ഭൂരിഭാഗം കർഷകരും. അവരുടെ ഉന്നമനത്തിന് മുൻഗണന നൽകുമെന്നും അദ്ദേഹം കൂട്ടിച്ചേർത്തു. പഞ്ചാബ്, ഉത്തർപ്രദേശ് തുടങ്ങിയ സംസ്ഥാനങ്ങളിൽ നിയമസഭാ തിരഞ്ഞെടുപ്പ് അടുത്തിരിക്കുന്ന സാഹചര്യം കൂടി കണക്കിലെടുത്താണ് കേന്ദ്രം ഇത്തരത്തിലൊരു നിർണായക പ്രഖ്യാപനം നടത്തിയതെന്നാണ് വിലയിരുത്തൽ.

ന്യൂഡൽഹി: ബോളിവുഡ് താരം കങ്കണ റണൗട്ടിനെതിരെ രൂക്ഷ വിമർശനവുമായി കോൺഗ്രസ് എം പി ശശി തരൂർ. സ്വാതന്ത്ര്യ സമരവുമായി ബന്ധപ്പെട്ട് നടത്തിയ പരാമർശങ്ങളുമായി ബന്ധപ്പെട്ടാണ് ശശി തരൂർ കങ്കണയ്‌ക്കെതിരെ രൂക്ഷ വിമർശനം ഉന്നയിച്ചത്. കങ്കണയുടെ പരാമർശങ്ങൾ വിഡ്ഢിത്തമാണെന്നും കങ്കണ കുറച്ചു കൂടി ചരിത്രം വായിക്കേണ്ടതായുണ്ടെന്നും അദ്ദേഹം പറഞ്ഞു. ഒരു ദേശീയ വാർത്താ ചാനലിന് നൽകിയ അഭിമുഖത്തിലായിരുന്നു അദ്ദേഹത്തിന്റെ പരാമർശം.

കങ്കണ പറയുന്നത് മഹാത്മാഗാന്ധി ബ്രിട്ടീഷുകാരോട് സ്വാതന്ത്ര്യം യാചിച്ചു വാങ്ങി എന്നാണ്. നിങ്ങളുടെ നിയമം അനീതിയാണെന്നും അതിനാൽ താൻ അത് ലംഘിക്കുകയാണെന്നും ബ്രിട്ടിഷുകാരോട് പറഞ്ഞ മഹാത്മാഗാന്ധി സ്വാതന്ത്ര്യം യാചിക്കുകയായിരുന്നുവെന്നാണ് കങ്കണ കരുതുന്നതെങ്കിൽ, അവർ ചരിത്രം കുറച്ചു കൂടി പഠിക്കാൻ തയ്യാറാകണമെന്ന് തരൂർ വ്യക്തമാക്കി. കങ്കണയ്ക്ക് ഇക്കാര്യങ്ങളെ കുറിച്ച് വലിയ ധാരണയൊന്നുമില്ലെന്നാണ് തനിക്ക് തോന്നുന്നതെന്നും അദ്ദേഹം അഭിപ്രായപ്പെട്ടു. എന്നെ ശിക്ഷിക്കണമെങ്കിൽ ശിക്ഷിച്ചോളൂ എന്ന് പറയുന്നത് ഒരു യാചകന്റെ ശബ്ദമാണോയെന്നാണ് തരൂർ ചോദിക്കുന്നത്.

ഒരു ലാത്തിചാർജിനിടയിലാണ് ലാലാ ലജ്പത് റായ് കൊല്ലപ്പെടുന്നത്. ഒരു അഹിംസാ സമരത്തിനിടയിൽ അദ്ദേഹത്തിന്റെ തല തല്ലിപൊളിക്കുകയായിരുന്നു.െ തോക്കുമായി ഒരാളെ കൊല്ലാൻ പോയിട്ട് മരിച്ചുവീഴുന്നതിലും ധീരമായ മരണമായിരുന്നു ലാലാ ലജ്പത് റായിയുടേതെന്നും അപാരമായ മനക്കരുത്തിന്റെയും ആർജവത്തിന്റെയും ധൈര്യത്തിന്റെയും മുന്നേറ്റമായിരുന്നു ഇന്ത്യയുടെ സ്വാതന്ത്ര്യസമരമെന്നും അദ്ദേഹം വിശദീകരിച്ചു. 1947 ൽ ഇന്ത്യക്ക് ലഭിച്ചത് സ്വാതന്ത്ര്യമായിരുന്നില്ലെന്നായിരുന്നു കങ്കണ പറഞ്ഞത്. ബ്രിട്ടീഷുകാരുടെ ഭിക്ഷയായിരുന്നു അതെന്നും രാജ്യത്തിന് യഥാർത്ഥത്തിൽ സ്വാതന്ത്ര്യം ലഭിച്ചത് 2014 ലാണെന്നുമായിരുന്നു കങ്കണയുടെ പരാമർശം.

ന്യൂഡൽഹി: ക്രിപ്‌റ്റോ കറൻസിയുമായി ബന്ധപ്പെട്ട് നടപടികൾ ശക്തമാക്കാനൊരുങ്ങി കേന്ദ്ര സർക്കാർ. ക്രിപ്റ്റോ കറൻസി ഉപയോഗത്തിലെ കളളനാണയങ്ങളെ കണ്ടെത്താൻ ലോകമെമ്പാടുമുളള ജനാധിപത്യരാജ്യങ്ങൾ കൈ കോർക്കണമെന്ന് പ്രധാനമന്ത്രി നരേന്ദ്ര മോദി ആവശ്യപ്പെട്ടു. ക്രിപ്റ്റോ കറൻസിയുടെ ഉപയോഗത്തെക്കുറിച്ചും അവയെ എങ്ങനെ നിയന്ത്രിക്കാമെന്നും രാജ്യങ്ങൾ ആലോചിക്കേണ്ടതാണ്. സാങ്കേതികവിദ്യയും ഡാറ്റയും പുതിയ ആയുധങ്ങളായി മാറുകയാണെന്നും ഡാറ്റാ ഭരണത്തിനുള്ള നിയമങ്ങളിൽ ജനാധിപത്യ രാജ്യങ്ങൾ സഹകരിക്കണമെന്നും അദ്ദേഹം അഭ്യർത്ഥിച്ചു. ആസ്ട്രേലിയൻ സ്ട്രാറ്റജിക് പോളിസി ഇൻസ്റ്റിറ്റ്യൂട്ട് സംഘടിപ്പിച്ച സമ്മേളനത്തിൽ സംസാരിക്കവെയാണ് അദ്ദേഹം ഇക്കാര്യം വെളിപ്പെടുത്തിയത്.

രാജ്യങ്ങൾ ഭാവി ടെക്നോളജിക്കായി നിലകൊളളണം. അതിനായി നിക്ഷേപങ്ങൾ നടത്തണം. സൈബർ ലോകത്ത് നടക്കുന്ന കുറ്റകൃത്യങ്ങളും തിരിമറികളും കണ്ടെത്തുന്നതിനായി വിശ്വസനീയമായ നിർമ്മാണമേഖലയും വിതരണക്കാരും ബുദ്ധിപരവും പ്രവർത്തനക്ഷമവുമായ സൈബർ സുരക്ഷയാണ് നമുക്ക് ആവശ്യം. ആഗോള വിവരശേഖരണത്തിലും നിയന്ത്രണം അവശ്യമാണെന്ന് അദ്ദേഹം വിശദമാക്കി.

ഡിജിറ്റൽ യുഗം എല്ലാത്തിലും മാറ്റങ്ങൾ വരുത്തിക്കൊണ്ടിരിക്കുന്നു. രാഷ്ട്രീയ, സാമ്പത്തിക, സാമൂഹിക മേഖലകൾ തന്നെ പുനർനിർവചിക്കപ്പെട്ടു. രാജ്യസ്നേഹം, ഭരണനിർവഹണം, അവകാശങ്ങൾ, സുരക്ഷ എന്നിവയെക്കുറിച്ചു പുതിയ ചോദ്യങ്ങളാണ് ഉയരുന്നത്. ആഗോളമത്സരം, അധികാരം, നേതൃത്വം എന്നിവയിലും മാറ്റം സംഭവിക്കുന്നു. എല്ലാ മേഖലകളിലും ഉയരുന്ന ഭീഷണികൾ നേരിടാൻ നാം തയ്യാറാകണം. കാലഘട്ടത്തിൽ ഒരിക്കൽ മാത്രം സംഭവിക്കുന്ന മാറ്റത്തിന്റെ സമയത്താണ് നമ്മളിപ്പോഴുള്ളത്. ഡേറ്റയും സാങ്കേതിക വിദ്യയും ആയുധങ്ങളാകുകയാണെന്നും അദ്ദേഹം പറഞ്ഞു.

ന്യൂഡൽഹി: സിബിഐ ഇഡി ഡയറക്ടർമാരുടെ കാലാവധി നീട്ടാനുള്ള കേന്ദ്രസർക്കാർ ഉത്തരവിനെതിരെ സുപ്രീം കോടതിയെ സമീപിച്ച് കോൺഗ്രസ്. സർക്കാർ ഓർഡിനൻസ് റദ്ദാക്കണമെന്ന് ആവശ്യപ്പെട്ടാണ് കോൺഗ്രസ് ഹർജി നൽകിയത്. നടപടി സുപ്രീം കോടതിയുടെ ഉത്തരവിന് വിരുദ്ധമാണെന്നും കോൺഗ്രസ് വക്താവ് രൺദീപ് സുർജേവാല ഹർജിയിൽ ആരോപിച്ചു. രണ്ട് വർഷമായിരുന്ന ഇഡി, സിബിഐ ഡയറക്ടർമാരുടെ കാലാവധിയാണ് അഞ്ച് വർഷമാക്കി സർക്കാർ ഓർഡിനൻസ് പുറത്തിറക്കിയത്. തൃണമൂൽ കോൺഗ്രസ്, സിപിഎം, തുടങ്ങിയ പ്രതിപക്ഷ പാർട്ടികളും നീക്കങ്ങളും കേന്ദ്ര നീക്കത്തിനെതിരെ വിമർശനവുമായി രംഗത്തെത്തിയിരുന്നു.

ഇഡി ഡയറക്ടർ എസ് കെ മിശ്രയുടെ കാലാവധി ഒരു വർഷം കൂടി നീട്ടി കഴിഞ്ഞ ദിവസമാണ് കേന്ദ്ര സർക്കാർ ഉത്തരവിറക്കിയത്. മിശ്രയുടെ സർവീസ് നീട്ടരുതെന്ന സുപ്രീം കോടതി നിർദ്ദേശം മറിക്കടക്കാനാണ് കഴിഞ്ഞ ദിവസം സിബിഐ, ഇഡി ഡയറക്ടർമാരുടെ കാലാവധി അഞ്ചുവർഷം വരെ നീട്ടി കേന്ദ്ര സർക്കാർ ഭേദഗതി ഇറക്കിയത്. ഇതിനായി രണ്ട് ഓർഡിനൻസുകളാണ് കേന്ദ്രസർക്കാർ അവതരിപ്പിച്ചിരിക്കുന്നത്. നിലവിൽ രണ്ടു വർഷമാണ് സിബിഐ, എൻഫോഴ്സ്മെന്റ് ഡയറക്ടർമാരുടെ കാലാവധി.

ഡൽഹി സ്‌പെഷ്യൽ പോലീസ് (എസ്റ്റാബ്ലിഷ്‌മെന്റ്) ഓർഡിനൻസ്, 2021, സെൻട്രൽ വിജിലൻസ് കമ്മീഷൻ (ഭേദഗതി) ഓർഡിനൻസ്, 2021 എന്നീ രണ്ട് ഓർഡിനൻസുകളും ഉടനടി പ്രാബല്യത്തിൽ വരുമെന്നാണ് നിയമ-നീതി മന്ത്രാലയം അറിയിക്കുന്നത്. കാലാവധി അവസാനിക്കുന്നത് മുൻപ് ഡയറക്ടർമാരെ സ്ഥാനത്ത് നിന്നും നീക്കാൻ കഴിയില്ലെങ്കിലും ഓർഡിനൻസ് പ്രകാരം രണ്ടു വർഷ കാലാവധിയ്ക്ക് ശേഷം ഓരോ വർഷങ്ങളിലായി മൂന്ന് തവണ വരെ ഡയറക്ടർമാരുടെ കാലാവധി നീട്ടി നൽകാൻ കഴിയും.

അഞ്ച് വർഷം വരെ സിബിഐ, ഇഡി മേധാവികളായി തുടരാൻ ഓർഡിനൻസിലൂടെ കഴിയും. പൊതു താത്പര്യം മുൻനിർത്തിയാണ് കേന്ദ്ര സർക്കാർ ഇക്കാര്യത്തിൽ തീരുമാനമെടുക്കുക. അല്ലെങ്കിൽ ബന്ധപ്പെട്ട സമിതിയുടെ ശുപാർശ ലഭിക്കണം. അഞ്ച് വർഷം പൂർത്തിയാക്കിയാൽ പിന്നീട് കാലാവധി നീട്ടി നൽകില്ലെന്നും കേന്ദ്ര സർക്കാർ വ്യക്തമാക്കിയിരുന്നു.

ന്യൂഡൽഹി: ബോംബെ ഹൈക്കോടതിയുടെ വിവാദ ഉത്തരവ് റദ്ദാക്കി സുപ്രീം കോടതി. പോക്സോ കേസിലെ കുറ്റാരോപിതൻ ഇരയുടെ ശരീരത്തിൽ സ്പർശിക്കാതെ മാറിടത്തിൽ തൊടുന്നത് കുറ്റകരമല്ലെന്ന ബോംബെ ഹൈക്കോടതിയുടെ വിധിയാണ് സുപ്രീം കോടതി റദ്ദാക്കിയത്. ലൈംഗിക ഉദ്ദേശത്തോടെ വസ്ത്രത്തിന് മുകളിലൂടെ മാറിടത്തിൽ സ്പർശിക്കുന്നത് പോക്സോ കേസിന്റെ പരിധിയിൽ വരുമെന്ന് സുപ്രീം കോടതി അറിയിച്ചു. ജസ്റ്റിസ് യു യു ലളിത് അദ്ധ്യക്ഷനായ ബെഞ്ചാണ് ഇക്കാര്യം അറിയിച്ചിരിക്കുന്നത്.

പോക്സോ നിയമത്തെ തന്നെ പരാജയപ്പെടുത്തുന്ന ബോംബെ ഹൈക്കോടതിയുടെ സങ്കുചിതമായ വ്യാഖ്യാനം അംഗീകരിക്കാൻ പറ്റില്ലെന്ന് സുപ്രീം കോടതി ചൂണ്ടിക്കാട്ടി. പ്രതിയ്ക്ക് ലൈംഗിക ഉദ്ദേശം ഉണ്ടായിരുന്നോ എന്നതാണ് പോക്സോ കേസിൽ ഏറ്റവും പ്രധാനമെന്നും ഇരയുടെയും കുറ്റാരോപിതന്റെയും ചർമ്മങ്ങൾ പരസ്പരം സ്പർശിച്ചാൽ മാത്രമേ പോക്സോയുടെ പരിധിയിൽ വരികയുള്ളൂവെന്ന ഹൈക്കോടതിയുടെ നിലപാട് അംഗീകരിക്കാൻ കഴിയില്ലെന്നും കോടതി വിശദീകരിച്ചു.

ചർമത്തിൽ സ്പർശിക്കാതെ പെൺകുട്ടിയുടെ മാറിടത്തിൽ തൊട്ടത് കുറ്റകരമല്ലെന്നായിരുന്നു ബോംബെ ഹൈക്കോടതി ഉത്തരവിട്ടത്. വസ്ത്രങ്ങൾക്ക് മുകളിലൂടെ ശരീരത്തിൽ പിടിക്കുന്നത് ഇന്ത്യൻ ശിക്ഷാ നിയമത്തിലെ 354-ാം വകുപ്പ് പ്രകാരമുള്ള കുറ്റം മാത്രമേ ആകുകയുള്ളൂവെന്നും കോടതി വ്യക്തമാക്കിയിരുന്നു. പേരയ്ക്ക നൽകാമെന്ന് പറഞ്ഞ് പന്ത്രണ്ടുകാരിയെ വിളിച്ചുവരുത്തി മാറിടത്തിൽ സ്പർശിച്ചെന്ന കേസിലായിരുന്നു ബോംബെ ഹൈക്കോടതിയുടെ വിവാദ ഉത്തരവ്. അറ്റോർണി ജനറൽ കെ കെ വേണുഗോപാൽ, മഹാരാഷ്ട്ര സർക്കാർ, ദേശീയ വനിതാ കമ്മിഷൻ എന്നിവരാണ് ബോംബെ ഹൈക്കോടതി വിധിക്കെതിരെ സുപ്രീം കോടതിയെ സമീപിച്ചത്.