തിരുവനന്തപുരം: ഇന്ത്യയുടെ രാജ്യാന്തര ചലച്ചിത്രോത്സവമായ ഐഎഫ്എഫ്ഐയുടെ പുതിയ എഡിഷൻ ഇത്തവണ വീട്ടിലിരുന്നും കാണാൻ അവസരം. ഡിജിറ്റൽ ഉപകരണങ്ങളിലൂടെ സഹായത്തോടെ വെർച്വൽ മാതൃകകയിൽ വീട്ടിലിരുന്ന് ഐഎഫ്എഫ്ഐ കാണാനുള്ള സൗകര്യമാണ് ഇത്തവണ ഒരുങ്ങിയിരിക്കുന്നത്. നവംബർ 20 മുതൽ 28 വരെയാണ് ഗോവയിൽ വെച്ചാണ് 52-ാമത് ഐഎഫ്എഫ്ഐ നടക്കുക. https://virtual.iffigoa.org/ എന്ന വെബ്സൈറ്റിലൂടെയാണ് രജിസ്ട്രേഷൻ നടത്തേണ്ടത്.
സാധാരണ ഡെലിഗേറ്റുകൾക്ക് 200 രൂപയാണ് (18 % ജിഎസ്ടി കൂടാതെ) രജിസ്ട്രേഷനുള്ള ഫീസ്. ഓൺലൈൻ പ്ലാറ്റ്ഫോമിൽ പ്രദർശിപ്പിക്കുന്ന സിനിമകൾക്കൊപ്പം ഉദ്ഘാടന, സമാപന ചടങ്ങുകളും മാസ്റ്റർ ക്ലാസ്, ഇൻ കോൺവർസേഷൻ എന്നീ പരിപാടികളും കാണാനുള്ള അവസരം വെർച്വൽ മാതൃകയിൽ രജിസ്റ്റർ ചെയ്യുന്നവർക്ക് ലഭിക്കും. ഡെലിഗേറ്റ്, വിദ്യാർഥികൾ, മാദ്ധ്യമപ്രവർത്തകർ എന്നിങ്ങനെ മൂന്ന് വിഭാഗങ്ങളിലായാണ് വെർച്വൽ രജിസ്ട്രേഷൻ നടക്കുന്നത്. വിദ്യാർഥികൾക്കും മാദ്ധ്യമപ്രവർത്തകർക്കും വെർച്വൽ ഫെസ്റ്റിവലിൽ സൗജന്യമായി പങ്കെടുക്കാനുള്ള അവസരമാണുള്ളത്.
ജെയിംസ് ബോണ്ടിനെ തിരശ്ശീലയിൽ അനശ്വരനാക്കിയ നടൻ സീൻ കോണറിക്ക് ആദരം നേർന്നുകൊണ്ടുള്ള പാക്കേജാണ് ഇത്തവണ മേളയുടെ പ്രധാന ആകർഷണം. റഷ്യൻ ചലച്ചിത്രകാരൻ ആന്ദ്രേ കൊഞ്ചലോവ്സ്കി, ഹംഗേറിയൻ ചലച്ചിത്രകാരൻ ബേല താർ എന്നിവരുടെ റെട്രോസ്പെക്റ്റീവുകളും മേളയിലുണ്ടാകും. ഇത്തവണത്തെ ഐഎഫ്എഫ്ഐയുടെ ഉദ്ഘാടന ചിത്രം കാർലോസ് സോറ സംവിധാനം ചെയ്ത സ്പാനിഷ് മ്യൂസിക്കൽ ഡ്രാമ ചിത്രം ‘ദ് കിംഗ് ഓഫ് ഓൾ ദ് വേൾഡ്’ ആണ്. നേരത്തേ പ്രഖ്യാപിച്ചിരുന്ന ഇന്ത്യൻ പനോരമ വിഭാഗത്തിൽ രഞ്ജിത്ത് ശങ്കറിന്റെ ജയസൂര്യ ചിത്രം സണ്ണി, ജയരാജ് സംവിധാനം ചെയ്ത നിറയെ തത്തകളുള്ള മരം എന്നിവ ഇടം നേടിയിരുന്നു.