General (Page 1,504)

തിരുവനന്തപുരം: കെ.എസ്.ആർ.ടി.സിയിൽ പെൻഷൻ വിതരണം മുടങ്ങി. മാസം പകുതിയിലധികം കഴിഞ്ഞിട്ടും കെ.എസ്.ആർ.ടി.സിയിൽ ഇതുവരെ പെൻഷൻ വിതരണം ആരംഭിച്ചിട്ടില്ല. സഹകരണ സംഘങ്ങൾ വഴിയാണ് കെ.എസ്.ആർ.ടി.സിയിൽ പെൻഷൻ വിതരണം നടത്തുന്നത്. പുതിയ സർക്കാർ മേൽ നടപടികൾ സ്വീകരിക്കാത്തതിനാലാണ് പെൻഷൻ മുടങ്ങിയിരിക്കുന്നത്.

സർക്കാരും സഹകരണ സംഘങ്ങളും തമ്മിലുള്ള എം.ഒ.യു ഇതുവരെ പുതുക്കിയിട്ടില്ല. മാർച്ചിൽ എം.ഒ.യു കാലാവധി കഴിഞ്ഞെങ്കിലും തെരഞ്ഞെടുപ്പ് കമ്മിഷന്റെ അനുവാദത്തോടെ കഴിഞ്ഞ രണ്ടു മാസത്തേയും പെൻഷൻ തുക സഹകരണ സംഘങ്ങളിൽ എത്തിച്ചിരുന്നു. എന്നാൽ ഇനിയുള്ള പെൻഷൻ വിതരണത്തിനായുള്ള നടപടികൾ സർക്കാരിന്റെ ഭാഗത്ത് നിന്നും ഉണ്ടായിട്ടില്ല.

എല്ലാം ആദ്യം മുതൽ ആരംഭിച്ചാൽ മാത്രമെ പെൻഷൻ വിതരണം നടത്താൻ കഴിയൂ. പെൻഷൻ ഫയൽ ഗതാഗത വകുപ്പ് ധന വകുപ്പിന് അയച്ചിരിക്കുകയാണ്. അവിടെ നിന്ന് സഹകരണ വകുപ്പിലും പിന്നീട് കേരള ബാങ്കിലും പോകണം. അവിടെ പുതിയ കരാറുണ്ടാക്കാനുള്ള വ്യവസ്ഥകൾ ചർച്ച ചെയ്തു തീരുമാനിക്കണം. പിന്നീട് മൂന്നു വകുപ്പുകളും കൂടിയാലോചിച്ച് വേണം അന്തിമ തീരുമാനമെടുക്കാൻ. ഇതെല്ലാം അവസാനിച്ച് പെൻഷൻ വിതരണം ആരംഭിക്കാൻ ഒരാഴ്ച്ചയിലധികം എടുത്തേക്കുമെന്നാണ് വിവരം. കോവിഡ് കാലത്ത് മരുന്നു വാങ്ങാൻ പോലും ബുദ്ധിമുട്ടിലാണെന്നാണ് പെൻഷൻകാരുടെ പരാതി. വളരെയേറെ സാമ്പത്തിക പ്രതിസന്ധിയിലാണെന്നും ഇവർ പരാതി പറയുന്നു.

തിരുവനന്തപുരം: സംസ്ഥാനത്ത് കോവിഡ് വൈറസ് ബാധിച്ചതിനെ തുടർന്ന് മാതാപിതാക്കളെ നഷ്ടപ്പെട്ട കുട്ടികൾക്ക് ധനസഹായം അനുവദിച്ചു. വനിത ശിശുവികസന വകുപ്പ് ഇത് സംബന്ധിച്ച ഉത്തരവ് പുറപ്പെടുവിച്ചതായി ആരോഗ്യമന്ത്രി വീണാ ജോർജ് അറിയിച്ചു.

സംസ്ഥാനത്ത് കോവിഡ് ബാധിച്ച് മാതാപിതാക്കൾ രണ്ട് പേരും മരണപ്പെട്ട കുട്ടികൾക്കും അതോടൊപ്പം നേരത്തെ മാതാപിതാക്കളിൽ ഒരാൾ മരണപ്പെടുകയും ശേഷിച്ച ആൾ ഇപ്പോൾ കോവിഡ് മൂലം മരണപ്പെട്ട് രക്ഷിതാക്കൾ പൂർണമായും നഷ്ടപ്പെട്ടതുമായ എല്ലാ കുട്ടികൾക്കുമാണ് സർക്കാർ സഹായം അനുവദിക്കുന്നതെന്ന് വീണാ ജോർജ് വ്യക്തമാക്കി.

വനിതാശിശു വികസന വകുപ്പിന്റെ ഫണ്ടിൽ നിന്നും 2000 രൂപ വീതം, കുട്ടിക്ക് 18 വയസ് ആകുന്നത് വരെ കുട്ടിയുടെയും കുട്ടിയുടെ ഇപ്പോഴത്തെ രക്ഷിതാവിന്റെയും പേരിലുള്ള ജോയിന്റ് അക്കൗണ്ടിലേയ്ക്ക് മാസം തോറും നിക്ഷേപിക്കുന്നതാണ്. ഈ കുട്ടികളുടെ പേരിൽ 3 ലക്ഷം രൂപയുടെ സ്ഥിര നിക്ഷേപവും തുടങ്ങും. കൂടാതെ കുട്ടികളുടെ ബിരുദതലം വരെയുള്ള പഠനച്ചെലവുകൾ മുഖ്യമന്ത്രിയുടെ ദുരിതാശ്വാസനിധിയിൽ നിന്നും വഹിക്കുന്നതാണ്. ഈ ധനസഹായങ്ങൾക്ക് ആവശ്യമായി വരുന്ന അധികതുക ധനവകുപ്പാണ് അനുവദിക്കേണ്ടതെന്നും മന്ത്രി അറിയിച്ചു.

സംസ്ഥാനത്ത് കോവിഡ് മഹാമാരി മൂലം മാതാപിതാക്കളെ/ രക്ഷിതാക്കളെ നഷ്ടപ്പെടുകയും കുട്ടികൾ അനാഥരാകുകയും ചെയ്യുന്ന സാഹചര്യം സംജാതമാകുന്നതിനാൽ മുഖ്യമന്ത്രിയുടെ നിർദേശ പ്രകാരമാണ് ഉത്തരവ് പുറപ്പെടുവിച്ചത്. കോവിഡിനെ തുടർന്ന് മാതാപിതാക്കളെ നഷ്ടപ്പെട്ട 74 കുട്ടികളാണ് സംസ്ഥാനത്തുള്ളത്. ഈ കുട്ടികളെ ബാലനീതി നിയമത്തിന്റെ ശ്രദ്ധയും പരിചരണവും ആവശ്യമായ ഗണത്തിൽ ഉൾപ്പെടുത്തി പരിഗണന നൽകേണ്ടതും ഈ കുട്ടികളുടെ സംരക്ഷണം, വിദ്യാഭ്യാസം, മറ്റ് അടിയന്തര ആവശ്യങ്ങൾ എന്നിവ മുൻനിർത്തി അടിയന്തര സഹായം നൽകേണ്ടതും ആവശ്യമാണ്. സർക്കാർ ഇക്കാര്യം പരിശോധിച്ചാണ് തീരുമാനമെടുത്തതെന്നും മന്ത്രി കൂട്ടിച്ചേർത്തു.

കോഴിക്കോട്: മരംമുറി വിവാദവുമായി ബന്ധപ്പെട്ട് വനം വകുപ്പിൽ ജീവനക്കാരുടെ സംഘടനകൾ തമ്മിൽ തർക്കം മുറുകുന്നു. റവന്യൂ വകുപ്പിന്റെ പിഴവുകളിൽ വനം വകുപ്പ് ജീവനക്കാർക്കെതിരെ അന്വേഷണം വേണ്ടെന്ന കേരള ഫോറസ്റ്റ് പ്രൊട്ടക്ടീവ് സ്റ്റാഫ് അസോസിയേഷന്റെ നിലപാടിനെതിരെ എതിർപ്പുമായി ഫോറസ്റ്റ് പ്രൊട്ടക്ടീവ് സ്റ്റാഫ് ഓർഗനൈസേഷൻ രംഗത്തെത്തി.

കുറ്റക്കാരായവർക്ക് രക്ഷപ്പെടുന്നതിനുള്ള അവസരമൊരുക്കാൻ വേണ്ടിയാണ് കേരള ഫോറസ്റ്റ് പ്രൊട്ടക്ടീവ് സ്റ്റാഫ് അസോസിയേഷൻ അന്വേഷണം വേണ്ടെന്ന നിലപാട് സ്വീകരിക്കുന്നതെന്നാണ് സിപിഐയുടെ നേതൃത്വത്തിലുള്ള ഫോറസ്റ്റ് പ്രൊട്ടക്ടീവ് സ്റ്റാഫ് ഓർഗനൈസേഷൻ ആരോപിക്കുന്നത്. അസോസിയേഷന്റെ പ്രധാന ഭാരവാഹിക്കും ബന്ധുവിനും മരംകൊള്ളയിൽ പങ്കുണ്ടെന്ന ആരോപണവും ഫോറസ്റ്റ് പ്രൊട്ടക്ടീവ് സ്റ്റാഫ് ഓർഗനൈസേഷന്റെ ഭാഗത്ത് നിന്നും ഉണ്ടാകുന്നുണ്ട്. ജീവനക്കാർക്ക് നൽകിയ വാട്‌സാപ് സന്ദേശത്തിലാണ് സ്റ്റാഫ് ഓർഗനൈസേഷൻ ഇക്കാര്യങ്ങൾ വ്യക്തമാക്കിയിരിക്കുന്നത്.

വനം വകുപ്പിലുള്ളവർക്ക് മരംമുറിയിൽ പങ്കുണ്ടെന്നും അന്വേഷണത്തിലൂടെ മാത്രമെ കുറ്റക്കാരെ പുറത്തു കൊണ്ടുവരാൻ കഴിയൂവെന്നും ഫോറസ്റ്റ് പ്രൊട്ടക്ടീവ് സ്റ്റാഫ് ഓർഗനൈസേഷൻ വിശദീകരിക്കുന്നു. അന്വേഷണം അട്ടിമറിക്കാനാണ് അസോസിയേഷൻ ശ്രമിക്കുന്നതെന്നാണ് സ്റ്റാഫ് ഓർഗനൈസേഷന്റെ ആരോപണം. ക്രമക്കേടുകൾക്ക് കുടപിടിച്ചവർ തന്നെയാണ് ഇപ്പോൾ അന്വേഷണത്തിനെതിരെ രംഗത്തുവന്നരിക്കുന്നതെന്നും ഓർഗനൈസേഷൻ ഭാരവാഹികൾ കൂട്ടിച്ചേർത്തു.

തിരുവനന്തപുരം: സ്വർണ്ണക്കടത്ത് കേസിൽ സംസ്ഥാന സർക്കാരിനെ വെട്ടിലാക്കി കസ്റ്റംസ്. സരിത്തിനേയും സ്വപ്നയേയും കരുക്കളാക്കി യു.എ.ഇ. കോൺസൽ ജനറൽ സംസ്ഥാനത്തെ മന്ത്രിമാരുമായും ഉന്നത ഉദ്യോഗസ്ഥരുമായി വഴിവിട്ട ബന്ധം സ്ഥാപിച്ചുവെന്നാണ് കസ്റ്റംസ് വ്യക്തമാക്കുന്നത്. കോൺസൽ ജനറൽ ജമാൽ ഹുസൈൻ അൽ സാബി, അറ്റാഷെ റാഷിദ് ഖാമിസ്, ചീഫ് അക്കൗണ്ടന്റ് ഖാലിദ് എന്നീ പ്രതികൾക്ക് കസ്റ്റംസ് നൽകിയ ഷോക്കോസ് നോട്ടീസിലാണ് ഇക്കാര്യങ്ങൾ ആരോപിച്ചിരിക്കുന്നത്.

വിദേശകാര്യ മന്ത്രാലയത്തിന്റെ പ്രോട്ടോക്കോൾ നിയമങ്ങളും സംസ്ഥാന സർക്കാരിന്റെ പ്രോട്ടോക്കോൾ നിയമങ്ങളുമെല്ലാം തെറ്റിച്ചാണ് യുഎഇ കോൺസൽ ജനറൽ കേരളത്തിൽ പ്രവർത്തിച്ചിരുന്നത്. മുഖ്യമന്ത്രിയുടെ ഓഫീസിൽ പോലും യോഗങ്ങൾ നടന്നു. ചില മന്ത്രിമാരും ഇവരുടെ വലയിൽ വീണതായുള്ള സൂചനയും കസ്റ്റംസ് നൽകുന്നുണ്ട്. വൈ കാറ്റഗറി സുരക്ഷയാണ് സർക്കാർ കോൺസൽ ജനറലിന് നൽകിയിരുന്നത്. സുരക്ഷാ ഭീഷണി ഇല്ലാതിരുന്നിട്ടും പ്രോട്ടോക്കോൾ ഓഫീസിനെ മറികടന്നായിരുന്നു സർക്കാർ തീരുമാനം.

വിയറ്റ്നാമിൽ കോൺസൽ ജനറലായി ജോലി ചെയ്യുമ്പോൾ അവിടെയും ഇവർ കള്ളക്കടത്ത് നടത്തിയിരുന്നുവെന്നും യു.എ.ഇയിൽ നിന്നും നിരോധിത മരുന്ന്, സിഗരറ്റ് അടക്കമുള്ളവ വിയറ്റ്നാമിലേക്ക് കടത്തി ഇൻസ്റ്റാഗ്രമിലൂടെ കോൺസൽ ജനറലും കൂട്ടരും വിൽപന നടത്തിയെന്നും കസ്റ്റംസ് നോട്ടീസിൽ ചൂണ്ടിക്കാട്ടുന്നു. ഇതിനുള്ള ശിക്ഷാനടപടിയുടെ ഭാഗമായി സ്ഥലംമാറ്റം ലഭിച്ചാണ് കോൺസൽ ജനറൽ അടക്കമുള്ള ഉദ്യോഗസ്ഥർ സംസ്ഥാനത്തെത്തിയത്. കേരളത്തിൽ നിന്ന് കള്ളക്കടത്തിലൂടെ ലഭിക്കുന്ന പ്രതിഫലത്തിൽ കള്ളനോട്ടുണ്ടോ എന്ന് തിരിച്ചറിയാനായി കോൺസൽ ജനറലിന്റെ നിർദേശപ്രകാരം സരിത്ത് നോട്ടെണ്ണൽ യന്ത്രം വാങ്ങി നൽകിയെന്നും നോട്ടീസിൽ വിശദീകരിക്കുന്നു.

തിരുവനന്തപുരം: സംസ്ഥാനത്തെ ഹരിത ഇന്ധനം ഉപയോഗിച്ചുള്ള ആദ്യ എല്‍.എന്‍.ജി. ബസ് സര്‍വ്വീസ് തിങ്കളാഴ്ച ഉദ്ഘാടനം ചെയ്യും.തിരുവനന്തപുരം സെന്‍ട്രല്‍ ബസ് സ്റ്റേഷനില്‍ നിന്നും ഉച്ചയ്ക്ക് 12 മണിയ്ക്കുള്ള ആദ്യ സര്‍വ്വീസ് ഗതാഗത വകുപ്പ് മന്ത്രി ആന്റണി രാജു ഫ്‌ലാഗ് ഓഫ് ചെയ്യും. നഗരസഭാ കൗണ്‍സിലര്‍ സി.ഹരികുമാര്‍ ചടങ്ങിന് അധ്യക്ഷത വഹിക്കും.

കെ എസ് ആര്‍ ടി സി സിഎംഡി ബിജു പ്രഭാകര്‍, പെട്രോനെറ്റ് എല്‍എന്‍ജി ലിമിറ്റഡ് ചീഫ് ജനറല്‍ മാനേജര്‍ യോഗാനന്ദ റെഡ്ഡി, യൂണിയന്‍ നേതാക്കളായ വി. ശാന്തകുമാര്‍ , ആര്‍. ശശിധരന്‍, കെ.എല്‍ രാജേഷ്, സൗത്ത് സോണ്‍ എക്‌സിക്യൂട്ടീവ് ഡയറക്ടര്‍ ജി. അനില്‍ കുമാര്‍ തുടങ്ങിയവര്‍ ചടങ്ങില്‍ പങ്കെടുക്കും.തുടക്കത്തില്‍ രണ്ടു എസി ബസുകളാണ് സര്‍വീസ് ആരംഭിക്കുന്നത്.ലോകമെമ്പാടും ഹരിത ഇന്ധനങ്ങളിലേക്കുള്ള ചുവടു മാറ്റം വ്യാപകമാവുന്ന സാഹചര്യത്തിലാണ് കെ.എസ്.ആര്‍.ടി.സിയുടെ പുനരുദ്ധാരണ പ്രവര്‍ത്തനങ്ങളുടെ ഭാഗമായി ഹരിത ഇന്ധനത്തിലേക്കുള്ള ചുവടു മാറ്റം.

നിലവിലുള്ള 400 പഴയ ഡീസല്‍ ബസ്സുകളെ എല്‍.എന്‍.ജിയിലേക്ക് മാറ്റുന്നതിനുള്ള ഉത്തരവ് നല്‍കിയിട്ടുണ്ട്. അടുത്തിടെയായി ഒട്ടനവധി പരിഷ്‌ക്കാരങ്ങളാണ് കെഎസ്ആര്‍ടിയിസിയില്‍ വരുത്തുന്നത്. തിരുവനന്തപുരം സിറ്റി സര്‍വ്വീസുകളില്‍ പരീക്ഷണാടിസ്ഥാനത്തില്‍ റൂട്ട് നമ്പറിംഗ് സിസ്റ്റം നടപ്പിലാക്കുന്നു.എത്തിച്ചേരുന്ന സ്ഥലത്തിനും സഞ്ചരിക്കുന്ന റൂട്ടിനും പ്രാധാന്യം നല്‍കിയാണ് ഈ സംവിധാനം നടപ്പിലാക്കിയിരിക്കുന്നത്. ജില്ലകളെ സൂചിപിക്കുന്നതിന് ഇംഗ്ലീഷ് അക്ഷരങ്ങളും സ്ഥലങ്ങള്‍ക്കും അക്കങ്ങളും ചേരുന്ന ഒരു സംവിധാനമാണ് നടപ്പില്‍ വരുത്തുന്നത്.