General (Page 1,275)

കോഴിക്കോട്: സംസ്ഥാനത്തെ വിവിധ ജില്ലകളിൽ നടന്ന വനംകൊള്ള സംബന്ധിച്ച് സമഗ്രാന്വേഷണത്തിനുള്ള സംഘത്തെ ക്രൈംബ്രാഞ്ച് മേധാവി എഡിജിപി എസ് ശ്രീജിത്ത് നയിക്കും.വനംകൊള്ളയ്ക്ക് പിന്നിൽ ഗൂഢാലോചന നടന്നെന്നും സമഗ്രാന്വേഷണം വേണമെന്നും ചീഫ് സെക്രട്ടറി വി പി ജോയി ഇറക്കിയ ഉത്തരവിൽ വ്യക്തമാക്കുന്നുവയനാട് മുട്ടിൽ മരം കൊള്ളയെക്കുറിച്ച് അന്വേഷിക്കുന്ന സംഘത്തിലേക്ക് കോഴിക്കോട് ഡിഎഫ്ഒ പി ധനേഷ് കുമാറിനെ തിരിച്ചെടുത്തു. അന്വേഷണ സംഘങ്ങളുടെ പ്രവർത്തനം കൂടുതൽ ശക്തവും കാര്യക്ഷമവുമാക്കുന്നതിനാണ് നടപടി. വനംമന്ത്രിയാണ് ധനേഷ് കുമാറിനെ തിരിച്ചെടുക്കാൻ നിർദേശം നൽകി.

മരംമുറി വിവാദം അന്വേഷിക്കുന്നതിനായി ഫ്‌ളൈയിംഗ് സ്‌ക്വാഡ് ഡി.എഫ്.ഒമാരുടെ നേതൃത്വത്തിൽ അഞ്ച് പ്രത്യേക അന്വേഷണ സംഘത്തെ വനം വിജിലൻസ് നിയമിച്ചിരുന്നു. ഇതിൽ കാസർകോട്, കണ്ണൂർ, വയനാട്, കോഴിക്കോട്, മലപ്പുറം, പാലക്കാട്, തൃശ്ശൂർ, എറണാകുളം മേഖലകളിൽ നടത്തുന്ന അന്വേഷണത്തെ നിരീക്ഷിക്കുന്ന കോട്ടയം ഫോറസ്റ്റ് കൺസർവേറ്ററുടെ സംഘത്തിലാണ് പി.ധനേഷ് കുമാറിനെ നിയമിച്ചത്.

മുട്ടിൽ മരം മുറിയിൽ ഉദ്യോഗസ്ഥരുടെ പങ്ക് കണ്ടെത്തിയ ഉദ്യോഗസ്ഥനായിരുന്നു ധനേഷ് കുമാർ. മരംമുറി കേസിലെ പ്രതിയായ റോജി അഗസ്റ്റിൻ ധനേഷിനെതിരെ കോഴ ആരോപണം ഉന്നയിച്ചതോടെയാണ് അദ്ദേഹത്തെ അന്വേഷണ സംഘത്തിൽ നിന്നും മാറ്റിയത്. ധനേഷ് കുമാറിനെ അന്വേഷണ സംഘത്തിൽ നിന്നും മാറ്റിയത് വിവാദങ്ങൾക്കിടയാക്കിയിരുന്നു. മരം മുറിച്ച് കടത്തിയതിൽ വനം വകുപ്പ് ഉദ്യോഗസ്ഥർക്ക് പങ്കുണ്ടെന്നായിരുന്നു പ്രാഥമിക അന്വേഷണത്തിൽ ധനേഷ് കുമാർ കണ്ടെത്തിയത്.

പാലക്കാട്: നെന്മാറ അയിലൂരിൽ 11 വർഷത്തോളം പെൺകുട്ടിയെ കാമുകൻ ഒളിവിൽ പാർപ്പിച്ച സംഭവത്തിൽ കേസെടുത്ത് സംസ്ഥാന വനിതാ കമ്മീഷൻ. മാദ്ധ്യമവാർത്തകളുടെ അടിസ്ഥാനത്തിൽ കമ്മീഷൻ സ്വമേധയാ കേസെടുക്കുകയായിരുന്നു. സംഭവത്തിൽ അന്വേഷണം നടത്തി റിപ്പോർട്ട് നൽകാൻ കമ്മീഷൻ നെന്മാറ സിഐയോട് ആവശ്യപ്പെട്ടു. യുവതിയ്ക്ക് കൗൺസിലിംഗ് നൽകാനും കമ്മീഷൻ നിർദ്ദേശിച്ചു.

ഇത്രയും കാലം ഒളിവിൽ കഴിഞ്ഞതിൽ എന്തെങ്കിലും തരത്തിൽ ഭീഷണിയോ സമ്മർദ്ദമോ ഉണ്ടായിരുന്നോ എന്നതുൾപ്പടെയുള്ള കാര്യങ്ങൾ വനിതാ കമ്മീഷൻ പരിശോധിയ്ക്കും. നടന്നത് കടുത്ത മനുഷ്യാവകാശ ലംഘനമാണെന്ന് വനിതാ കമ്മീഷൻ അംഗം ഷിജി ശിവജി വ്യക്തമാക്കി.

പ്രണയത്തിന്റെ പേരിലാണെങ്കിൽ പോലും 10 വർഷം മുറിക്കുള്ളിൽ അടച്ചിടപ്പെട്ട സജിതയുടെ മാനസികവും ശാരീരികവും ആയ ആരോഗ്യാവസ്ഥയെക്കുറിച്ച് ആശങ്കയുണ്ട്. ഈ നാളുകളിൽ ഇവർക്ക് മതിയായ ഭക്ഷണം പോലും ലഭിച്ചിരുന്നില്ല എന്നുവേണം കരുതാൻ. സജിതയുടെ ഫോട്ടോയും വിഡിയോയും കാണുമ്പോൾ അങ്ങനെയാണ് മനസ്സിലാകുന്നതെന്നും ഷിജി ശിവജി കൂട്ടിച്ചേർത്തു.

സജിത സ്വന്തം ഇഷ്ടപ്രകാരമാണ് അങ്ങനെ കഴിഞ്ഞിരുന്നത് എന്നിരുന്നാൽ പോലും കമ്മീഷന് ഇക്കാര്യത്തിൽ ആശങ്ക രേഖപ്പെടുത്താതിരിക്കാനാവില്ല. പൊലീസിനോട് വിവരങ്ങൾ തിരക്കിയിരുന്നു. ഒരു തവണ കൗൺസിലിങ് നൽകിക്കഴിഞ്ഞതായാണ് പൊലീസ് അറിയിച്ചത്. ആവശ്യമെങ്കിൽ ഇനിയും അത്തരം സഹായങ്ങൾ നൽകും. കർശനമായ ലോക്ക്ഡൗണായതിനാലാണ് കമ്മീഷൻ സജിതയെ സന്ദർശിക്കാത്തത്. ഉടൻതന്നെ അവരെ കാണും. അവർ താമസിച്ചിരുന്ന വീട്ടിലെത്തി സാഹചര്യം മനസ്സിലാക്കുമെന്നും കമ്മീഷൻ പറയുന്നു.

അയിലൂർ സ്വദേശി റഹ്മാന്റെ വീട്ടിൽ കാമുകിയും അയൽവാസിയുമായ സജിത 11 വർഷം ഒളിവിൽ കഴിഞ്ഞ സംഭവം ജൂൺ ഏഴിനാണ് പുറം ലോകം അറിയുന്നത്.

ന്യൂഡൽഹി: കേരളത്തിന്റെ വായ്പാ പരിധി ഉയർത്തി കേന്ദ്രം. സംസ്ഥാന ജി ഡി പിയുടെ അഞ്ച് ശതമാനം വരെ കടമെടുക്കാൻ കേന്ദ്രം സംസ്ഥാന സർക്കാരിന് അനുമതി നൽകി. കോവിഡ് വൈറസ് വ്യാപനത്തെ തുടർന്ന് സാമ്പത്തിക പ്രതിസന്ധിയിലായ സർക്കാരിന് കേന്ദ്രത്തിന്റെ തീരുമാനം വലിയ ആശ്വാസമാണ്.

വായ്പാ പരിധി ഉയർത്തണമെന്ന് കേരളം കേന്ദ്രത്തോട് ആവശ്യപ്പെട്ടിരുന്നു. ഈ സാഹചര്യത്തിലാണ് കേന്ദ്രം ആഭ്യന്തര ഉത്പാദനത്തിന്റെ മൂന്നു ശതമാനം മാത്രമേ കടമെടുക്കാൻ പാടുളളൂ എന്ന നിബന്ധന മാറ്റി അഞ്ച് ശതമാനമാക്കി ഉയർത്തിയത്. വായ്പാ പരിധി ഉയർത്താൻ സംസ്ഥാനങ്ങളെ സഹായിക്കുമെന്ന് കേന്ദ്രസർക്കാർ നേരത്തെ പ്രഖ്യാപിച്ചിരുന്നു.

വായ്പാ പരിധി ഉയർത്തുന്നതിന് സർക്കാർ ചില നിബന്ധനകൾ മുന്നോട്ട് വെച്ചിരുന്നു. ഈ നിബന്ധനകളെല്ലാം കേരളം പാലിച്ചതിനെ തുടർന്നാണ് വായ്പാ പരിധി ഉയർത്തുന്നതിന് കേന്ദ്രം അംഗീകാരം നൽകിയത്. ഒറ്റ രാജ്യം ഒറ്റ റേഷൻ കാർഡ് എന്നതിലേക്ക് കൂടുതൽ നടപടികൾ സ്വീകരിക്കുക, വൈദ്യുതി സബ്സിഡി കർഷകർക്ക് നേരിട്ട് ബാങ്ക് അക്കൗണ്ട് വഴി നൽകുക, വ്യവസായ സൗഹൃദ നടപടികൾ എന്ന നിലയിൽ കേന്ദ്രം മുന്നോട്ട് വെച്ച് നിർദ്ദേശങ്ങൾ നടപ്പിലാക്കുക തുടങ്ങിയവയാണ് കേന്ദ്രം സംസ്ഥാനങ്ങൾക്ക് നൽകിയിരുന്ന നിർദ്ദേശം. ഉത്തരാഖണ്ഡും ഗോവയും കേരളവുമാണ് കേന്ദ്രം മുന്നോട്ട് വെച്ച ഈ നിർദ്ദേശങ്ങൾ പാലിച്ചത്. അതിനാലാണ് കേരളത്തിന്റെ വായ്പാ പരിധി ഉയർത്താൻ കേന്ദ്രം അനുമതി നൽകിയത്.

തിരുവനന്തപുരം: വനംകൊള്ളയുമായി ബന്ധപ്പെട്ട് ഇടക്കാല റിപ്പോർട്ട് തേടുമെന്ന് വനംമന്ത്രി എ കെ ശശീന്ദ്രൻ. അന്വേഷണ റിപ്പോർട്ട് ലഭിച്ച ശേഷം ആവശ്യമെങ്കിൽ വിഷയത്തിൽ മറ്റ് വകുപ്പുകളുടെ അന്വേഷണം ഉണ്ടാകുമെന്ന് അദ്ദേഹം പറഞ്ഞു. വനംവകുപ്പ് ഉദ്യോഗസ്ഥർക്ക് ജാഗ്രതക്കുറവ് പാടില്ലെന്നും കർശന നിരീക്ഷണം ഉണ്ടാകുമെന്നും അദ്ദേഹം വ്യക്തമാക്കി.

കൈക്കൂലി ആരോപണവുമായി ബന്ധപ്പെട്ട് ഉയർന്ന വിവാദങ്ങളോട് പ്രതികരിക്കാനില്ലെന്നും അത് അന്വേഷണത്തെ ബാധിക്കുമെന്നും മന്ത്രി പറഞ്ഞു. റോജി അഗസ്റ്റിൻ കഴിഞ്ഞ ജൂണിൽ തന്നെ കണ്ടിരുന്നു. ഒരു ഉദ്ഘാടനച്ചടങ്ങിന് ക്ഷണിക്കാൻ വേണ്ടിയാണ് റോജി തന്നെ കാണാൻ എത്തിയത്. എന്നാൽ അസൗകര്യം കാരണം ചടങ്ങിൽ പങ്കെടുക്കാൻ കഴിഞ്ഞില്ല. റോജിയെ യാതൊരു വിധത്തിലും താൻ സഹായിച്ചിട്ടില്ലെന്നും അദ്ദേഹം വിശദമാക്കി.

റോജിയ്ക്ക് പരാതി ഉണ്ടെങ്കിൽ അന്വേഷണം സംഘത്തെ സമീപിക്കാം. അല്ലാതെ മാദ്ധ്യമങ്ങളോട് പരാതി പറയുകയല്ല വേണ്ടത്. തന്റെ മടിയിൽ കനമില്ലെന്നും എ കെ ശശീന്ദ്രൻ പ്രതികരിച്ചു.