Highlights (Page 84)

On:

കാസർകോട്: സംസ്ഥാനത്ത് വികസന പ്രവർത്തനങ്ങൾക്ക് വേഗം പകർന്ന് സർക്കാർ. മഞ്ചേശ്വരത്ത് വാഹനയാത്രക്കാർക്ക് അത്യാധുനിക സൗകര്യങ്ങളോടെയുള്ള വിശ്രമ കേന്ദ്രം നിർമ്മിക്കാനാണ് സർക്കാരിന്റെ തീരുമാനം. അന്താരാഷ്ട്ര നിലവാരത്തിലുള്ള വഴിയോര വിശ്രമ കേന്ദ്രമാണ് കാസർകോട് നിർമ്മിക്കുന്നത്. സംസ്ഥാനത്തെ ആദ്യത്തെ റസ്റ്റ് സ്റ്റോപ്പ് പദ്ധതിയാണ് മഞ്ചേശ്വരത്ത് നിർമ്മാണം ആരംഭിക്കാനൊരുങ്ങുന്നത്.

ദേശീയപാതയിൽ മഞ്ചേശ്വരം ഹൊസങ്കടിക്ക് സമീപമാണ് റെസ്റ്റ് സ്‌റ്റോപ്പ് പദ്ധതി നിർമ്മിക്കുന്നത്. പത്ത് ഏക്കർ സർക്കാർ സ്ഥലത്താണ് നിർമ്മാണം. യാത്രക്കാർക്ക് വിശ്രമിക്കാനും വാഹനങ്ങൾ അറ്റകുറ്റപ്പണി നടത്താനുമുള്ള സൗകര്യങ്ങൾ ഇവിടെയുണ്ടാകും. ആധുനിക ശുചിമുറികൾ, ക്ലിനിക്ക്, ഫുഡ്‌കോർട്ടുകൾ, റീട്ടെയ്ൽ സ്റ്റോർ, കുട്ടികൾക്കുള്ള പ്ലേ സ്റ്റേഷൻ, പെട്രോൾ പമ്പ് തുടങ്ങിയവയെല്ലാം ഇവിടെയുണ്ടാകും.

ഒരേ സമയം 200 കാറുകൾ പാർക്ക് ചെയ്യാമെന്നതാണ് റെസ്റ്റ് സ്റ്റോപ്പിന്റെ മറ്റൊരു പ്രത്യേകത. റെസ്റ്റ് സ്റ്റോപ്പിന്റെ നിർമ്മാണ ചുമതല ഓവർസീസ് കേരളൈറ്റ്‌സ് ഇൻവസ്റ്റ്‌മെന്റ് ആന്റ് ഹോൾഡിങ്ങ് കമ്പനിക്കാണ്. അതേസമയം, കേരളത്തിൽ മറ്റ് 29 ഇടങ്ങളിൽ കൂടി റെസ്റ്റ് സ്റ്റോപ്പുകൾ ആരംഭിക്കും.

On:

തിരുവനന്തപുരം: എലിപ്പനി രോഗനിർണയം വേഗത്തിൽ നടത്താൻ സംസ്ഥാനത്ത് 9 സർക്കാർ ലാബുകളിൽ ലെപ്‌റ്റോസ്‌പൈറോസിസ് ആർടിപിസിആർ പരിശോധന നടത്താനുള്ള സംവിധാനമൊരുക്കിയതായി ആരോഗ്യ മന്ത്രി വീണാ ജോർജ്. എലിപ്പനി ബാധിച്ചവർക്ക് വളരെ വേഗം രോഗനിർണയം നടത്തി ചികിത്സ ഉറപ്പാക്കാനാണ് ലെപ്‌റ്റോസ്‌പൈറോസിസ് ആർടിപിസിആർ പരിശോധന നടത്തുന്നതെന്ന് വീണാ ജോർജ് പറഞ്ഞു.

രോഗം ബാധിച്ച് മൂന്നുനാല് ദിവസത്തിനകം തന്നെ പരിശോധിച്ചാലും എലിപ്പനിയാണെങ്കിൽ കണ്ടെത്താനാകുമെന്നതാണ് ഈ പരിശോധനയുടെ പ്രത്യേകത. എല്ലാ ജില്ലകൾക്കും ഈ സേവനം ലഭ്യമാകും വിധം എസ്.ഒ.പി. (സ്റ്റാൻഡേർഡ് ഓപ്പറേറ്റിംഗ് പ്രൊസീജിയർ) പുറത്തിറക്കി. സാമ്പിൾ കളക്ഷൻ മുതൽ പരിശോധനാ ഫലം ലഭ്യമാക്കും വരെ പുലർത്തേണ്ട മാനദണ്ഡങ്ങൾ എസ്.ഒ.പി.യിൽ ഉൾക്കൊള്ളിച്ചിട്ടുണ്ടെന്നും മന്ത്രി വ്യക്തമാക്കി.

തിരുവനന്തപുരം ജില്ലയിൽ നിന്നും തിരുവനന്തപുരം മെഡിക്കൽ കോളേജ്, തിരുവനന്തപുരം സ്റ്റേറ്റ് പബ്ലിക് ഹെൽത്ത് ലാബ്, കൊല്ലം ജില്ലയിൽ നിന്നും തിരുവനന്തപുരം സ്റ്റേറ്റ് പബ്ലിക് ഹെൽത്ത് ലാബ്, ഇടുക്കി, കോട്ടയം, പത്തനംതിട്ട ജില്ലകളിൽ നിന്നും പത്തനംതിട്ട റീജിയണൽ പബ്ലിക് ഹെൽത്ത് ലാബ്, ആലപ്പുഴ ജില്ലയിൽ നിന്നും ഐസിഎംആർ-എൻഐവി ആലപ്പുഴ, എറണാകുളം ജില്ലയിൽ നിന്നും എറണാകുളം റീജിയണൽ പബ്ലിക് ഹെൽത്ത് ലാബ്, തൃശൂർ ജില്ലയിൽ നിന്നും തൃശൂർ മെഡിക്കൽ കോളേജ്, പാലക്കാട്, മലപ്പുറം ജില്ലകളിൽ നിന്നും കോഴിക്കോട് റീജിയണൽ പബ്ലിക് ഹെൽത്ത് ലാബ്, കോഴിക്കോട് ജില്ലയിൽ നിന്നും കോഴിക്കോട് മെഡിക്കൽ കോളേജ്, കോഴിക്കോട് റീജിയണൽ പബ്ലിക് ഹെൽത്ത് ലാബ്, വയനാട് ജില്ലയിൽ നിന്നും വയനാട് ജില്ലാ പബ്ലിക് ഹെൽത്ത് ലാബ്, കണ്ണൂർ, കാസർഗോഡ് ജില്ലകളിൽ നിന്നും കണ്ണൂർ റീജിയണൽ പബ്ലിക് ഹെൽത്ത് ലാബ് എന്നിവിടങ്ങളിലേക്ക് സാമ്പിളുകൾ പരിശോധനയ്ക്കായി അയ്ക്കാവുന്നതാണെന്നും വീണാ ജോർജ് വിശദീകരിച്ചു.

നിലവിൽ എല്ലാ മെഡിക്കൽ കോളേജുകളിലും പ്രധാന സർക്കാർ ആശുപത്രികളിലും പബ്ലിക് ഹെൽത്ത് ലാബുകളിലും എലിപ്പനി രോഗനിർണയത്തിനുള്ള ഐജിഎം എലൈസ പരിശോധന നടത്തുന്നുണ്ട്. ഒരാളുടെ ശരീരത്തിൽ ബാക്ടീരിയ കടന്ന ശേഷം ഏഴ് ദിവസം കഴിഞ്ഞാൽ മാത്രമേ ഈ പരിശോധനയിലൂടെ എലിപ്പനിയാണെന്ന് കണ്ടെത്താൻ സാധിക്കൂ. അതേസമയം ലെപ്‌റ്റോസ്‌പൈറോസിസ് ആർടിപിസിആർ പരിശോധനയിലൂടെ അസുഖം ബാധിച്ച് മൂന്നുനാല് ദിവസത്തിനകം തന്നെ പരിശോധിച്ചാലും എലിപ്പനിയാണെങ്കിൽ കണ്ടെത്താനാകും. ഇതിലൂടെ വളരെ വേഗത്തിൽ എലിപ്പനിയ്ക്കുള്ള ചികിത്സ ആരംഭിക്കാൻ കഴിയുന്നതാണെന്നും ആരോഗ്യമന്ത്രി കൂട്ടിച്ചേർത്തു.

On:

സംസ്ഥാനത്ത് കര്‍ശന നടപടികളുമായി മോട്ടോര്‍ വാഹനവകുപ്പ്. വേഗപ്പൂട്ടിന് പൂട്ടിടുന്ന വാഹന ഡീലര്‍മാര്‍ക്കെതിരെ കേസെടുക്കുമെന്ന് മോട്ടോര്‍ വാഹന വകുപ്പ് അറിയിച്ചു. വടക്കഞ്ചേരി അപകടത്തില്‍ ടൂറിസ്റ്റ് ബസ് മണിക്കൂറില്‍ 97.2 കിലോമീറ്റര്‍ വേഗതയിലായിരുന്നു സഞ്ചരിച്ചിരുന്നത്. കോണ്‍ട്രാക്ട് ക്യാരേജ് വാഹനങ്ങള്‍ക്ക് പരാമാവധി വേഗപരിധി 700 കിലോമീറ്ററാണ് വേഗപരിധി. ഈ സാഹചര്യത്തില്‍ വാഹന ഡീലര്‍മാരും മറ്റും ഉള്‍പ്പെടുന്ന ലോബിയാണ് സ്പീഡ് ഗവര്‍ണര്‍ പൊളിക്കുന്നത് എന്നത് നേരത്തെ വാര്‍ത്തയായിരുന്നു.

അതേസമയം, ഓരോ ബസുകളും ഓരോ എംവിഡി ഉദ്യോഗസ്ഥരെ ഏല്‍പ്പിക്കും. ഓരോ പ്രദേശത്തും രജിസ്റ്റര്‍ ചെയ്തിരിക്കുന്ന ടൂറിസ്റ്റ് ബസുകളുടെ ഉത്തരവാദിത്തം ആ പ്രദേശത്തുള്ള ഓരോ ഉദ്യോഗസ്ഥര്‍ക്കായി വിഭജിച്ച് നല്‍കും. പിന്നീട് ഈ ബസുകള്‍ നിയമം ലംഘിച്ചാല്‍ ഉത്തരവാദിത്തപ്പെട്ട് ഉദ്യോഗസ്ഥര്‍ക്കെതിരെ നടപടി ഉണ്ടാവും. നിലവില്‍ നിയമലംഘനം നടത്തിയാല്‍ പിഴ ഈടാക്കാറാണ് പതിവ്. എന്നാല്‍, പിഴ അടച്ച ശേഷം വീണ്ടും പഴയ രീതിയില്‍ നിരത്തിലിറക്കി നിയമം ലംഘിക്കുന്ന ടൂറിസ്റ്റ് ബസുകളുടെ പെര്‍മിറ്റ് അടക്കം റദ്ദാക്കാനും തീരുമാനമുണ്ട്.

പലനിറത്തില്‍ പെയിന്റ് ചെയ്യുന്നതിന് വിലക്കേര്‍പ്പെടുത്തും. പുതിയ നിയമം അനുസരിച്ച് ഇനി മുതല്‍ ടൂറിസ്റ്റു ബസുകളുടെ പുറം ബോഡിയില്‍ വെള്ളയും മധ്യഭാഗത്ത് പകരം പത്ത് സെന്റീമീറ്റര്‍ വീതിയില്‍ വയലറ്റും അതിനുമുകളില്‍ മൂന്ന് സെന്റിമീറ്റര്‍ വീതിയില്‍ സ്വര്‍ണനിറത്തിലെ വരയും മാത്രമേ പാടുള്ളൂ. മറ്റുനിറങ്ങളോ എഴുത്തോ, ചിത്രപ്പണികളോ, അലങ്കാരങ്ങളോ പാടില്ല. മുന്‍വശത്ത് ഓപ്പറേറ്ററുടെ പേരെഴുതാം. പക്ഷേ 12 ഇഞ്ച് വീതിയില്‍ സാധാരണ അക്ഷരങ്ങളില്‍ വെള്ള നിറത്തില്‍ മാത്രമേ പേരെഴുതാന്‍ പാടുള്ളൂ. പിന്‍വശത്ത് 40 സെന്റീമീറ്റര്‍ വീതിയില്‍ പേരും ഉടമയുടെയോ ഓപ്പറേറ്റുടെയോ മേല്‍വിലാസവും എഴുതുകയും ചെയ്യാം. വിദ്യാലയങ്ങളില്‍ നിന്ന് വിനോദയാത്ര പോകുമ്പോള്‍ മൂന്നു ദിവസം മുന്‍പ് അധികൃതരെ വിവരം അറിയിക്കണം. നിര്‍ദേശം സംസ്ഥാനത്തെ സിബിഎസ്ഇ ഉള്‍പ്പെടെ എല്ലാ സ്ഥാപനങ്ങള്‍ക്കും ബാധമാക്കി പുതിയ സര്‍ക്കുലര്‍ ഇറക്കും. യാത്ര പോകുന്ന ബസിന്റെയും ഡ്രൈവര്‍മാരുടെയും വിവരങ്ങള്‍ പരിശോധിച്ച ശേഷമാവും ആര്‍ടിഒ അനുമതി നല്‍കുക.

On:

വയനാട്ടിലൂടെ രാത്രിയാത്ര ചെയ്യാന്‍ ആഗ്രഹിക്കാത്ത ആരാണുള്ളത്? ഇത്തരം വിനോദസഞ്ചാരികള്‍ക്ക് രാത്രി ജംഗിള്‍ സഫാരി നല്‍കാനുള്ള പദ്ധതിയൊരുക്കുകയാണ് കെഎസ്ആര്‍ടിസിയുടെ ബജറ്റ് സെല്‍. 300 രൂപ നിരക്കില്‍ 60 കിലോമീറ്റര്‍ രാത്രി സഫാരി നല്‍കാനാണ് പദ്ധതി ലക്ഷ്യമിടുന്നത്. രാത്രികാല വിനോദസഞ്ചാരത്തിന്റെ സാധ്യതകള്‍ കൂടി ഉപയോഗപ്പെടുത്താനാണ് പദ്ധതിയുടെ ലക്ഷ്യം.

കോഴിക്കോട്-കൊല്ലേഗല്‍ ദേശീയ പാത 766 വഴി കേരള-കര്‍ണാടക അതിര്‍ത്തിയിലെ പൊന്‍കുഴിയിലേക്ക് രാത്രി 9 മണിയോടെ സുല്‍ത്താന്‍ ബത്തേരിയിലെ കെഎസ്ആര്‍ടിസി ബസ് ഡിപ്പോയില്‍ നിന്ന് യാത്ര ആരംഭിക്കും. വന്യജീവി സങ്കേതത്തിന്റെ അതിര്‍ത്തിയിലുള്ള മൂലങ്കാവ്, കരിപ്പൂര്‍, വള്ളുവാടി, വടക്കനാട് എന്നീ കുഗ്രാമങ്ങളിലൂടെ വാഹനം സുല്‍ത്താന്‍ ബത്തേരിയിലേക്ക് കടക്കും. ഇടവേളയ്ക്ക് ശേഷം വന്യജീവി സങ്കേതത്തിലെ കുറിച്യാട്, കുറിചയാട് ഫോറസ്റ്റ് റേഞ്ചുകളിലൂടെ ഇരുളം വരെ യാത്ര തുടരും. 60 കിലോമീറ്റര്‍ സഫാരി രാത്രി 11.30 ഓടെ സുല്‍ത്താന്‍ ബത്തേരിയില്‍ അവസാനിക്കും. നൈറ്റ് സഫാരി അടുത്ത ആഴ്ച പകുതിയോടെ ആരംഭിക്കും, സഫാരിക്കായി ഒരാള്‍ക്ക് 300 രൂപ ചിലവാകും.

അതേസമയം, യാത്രക്കായി രണ്ട് കസ്റ്റമൈസ്ഡ് ബസുകള്‍ സജ്ജീകരിച്ചിട്ടുണ്ട്. കെഎസ്ആര്‍ടിസി ഡിപ്പോയില്‍ വിനോദസഞ്ചാരികള്‍ക്ക് നാമമാത്രമായ ചെലവില്‍ താമസിക്കാന്‍ നാല് എയര്‍കണ്ടീഷന്‍ ചെയ്ത സ്ലീപ്പര്‍ ബസുകളും ഒരുക്കിയിട്ടുണ്ട്. സ്ത്രീകള്‍ക്കായി മാത്രം റിസര്‍വ് ചെയ്തിട്ടുള്ള ഒരു ബസ് ഉള്‍പ്പെടെയാണിത്. ബസുകളില്‍ മുന്‍കൂര്‍ ബുക്കിംഗ് നടത്തുന്നവര്‍ക്ക് ഡീലക്സ് റൂമുകളും ഡോര്‍മിറ്ററി സൗകര്യങ്ങളും ലഭ്യമാക്കും. ഡോര്‍മിറ്ററിയിലെ ഓരോ കിടക്കയ്ക്കും ഡീലക്സ് റൂമിനും യഥാക്രമം 160 രൂപയും 890 രൂപയുമാണ് കെഎസ്ആര്‍ടിസി പ്രതിദിനം ഈടാക്കുന്നത്.

On:

തിരുവനന്തപുരം സർക്കാർ മെഡിക്കൽ കോളേജിൽ കരൾ മാറ്റിവയ്ക്കൽ ശസ്ത്രക്രിയ യാഥാർത്ഥ്യമായി. മലപ്പുറം സ്വദേശിയ്ക്കാണ് (53) കരൾ മാറ്റിവയ്ക്കൽ ശസ്ത്രക്രിയ നടത്തിയത്. അദ്ദേഹത്തിന്റെ ഭാര്യയുടെ സഹോദരി ഭർത്താവാണ് (43) കരൾ പകുത്ത് നൽകിയത്. ഇക്കഴിഞ്ഞ വ്യാഴാഴ്ചയാണ് ശസ്ത്രക്രിയ നടന്നത്. രാവിലെ 7 മണിക്ക് തുടങ്ങിയ ശസ്ത്രക്രിയ രാത്രി 11.30 ഓടു കൂടിയാണ് പൂർത്തിയായത്. നാഷ് എന്ന അസുഖം മുഖാന്തിരം കരളിൽ സിറോസിസും കാൻസറും ബാധിച്ചിരുന്നു. ശസ്ത്രക്രിയയ്ക്ക് ശേഷം രോഗി ട്രാൻസ്പ്ലാന്റ് ഐസിയുവിൽ നിരീക്ഷണത്തിലാണ്. മാറ്റിവയ്ക്കുന്ന കരളിന്റെ പ്രവർത്തനം സാധാരണ നിലയിലേക്ക് എത്തുവാൻ രണ്ടാഴ്ചയോളം സമയമെടുക്കാറുണ്ട്. ഈ സമയം രോഗി തീവ്ര പരിചരണത്തിലും സൂക്ഷ്മ നിരീക്ഷണത്തിലുമായിരിക്കും.

കരൾ മാറ്റിവയ്ക്കൽ ശസ്ത്രക്രിയ നടത്തിയ ടീം അംഗങ്ങളെ ആരോഗ്യ വകുപ്പ് മന്ത്രി വീണാ ജോർജ് അഭിനന്ദിച്ചു. സർജിക്കൽ ഗ്യാസ്‌ട്രോ, അനസ്തീഷ്യ ആൻഡ് ക്രിട്ടിക്കൽ കെയർ, മെഡിക്കൽ ഗ്യാസ്‌ട്രോ, റേഡിയോളജി, ഓപ്പറേഷൻ തീയറ്റർ ടീം, ട്രാൻസ്ഫ്യൂഷൻ മെഡിസിൻ, മൈക്രോബയോളജി, ഇൻഫെക്ഷ്യസ് ഡിസീസസ്, നഴ്‌സിംഗ് വിഭാഗം, പത്തോളജി, കെ സോട്ടോ തുടങ്ങിയ വിഭാഗങ്ങളിലെ ഡോക്ടർമാർ, നഴ്‌സുമാർ, ഒ.ടി. ടെക്‌നീഷ്യൻമാർ, ബയോമെഡിക്കൽ എൻജിനിയർമാർ, ട്രാൻസ്പ്ലാന്റ് കോ ഓഡിനേറ്റർമാർ, നഴ്‌സിംഗ് അസിസ്റ്റന്റുമാർ, അറ്റന്റർമാർ, മറ്റ് ജീവനക്കാർ തുടങ്ങിയ അൻപതോളം പേരുടെ കൂട്ടായ പരിശ്രമത്തിന്റെ ഫലമായാണ് കരൾ മാറ്റിവയ്ക്കൽ പ്രക്രിയ നടത്താനായത്. മെഡിക്കൽ വിദ്യാഭ്യാസ വകുപ്പ് ഡയറക്ടർ, പ്രിൻസിപ്പൽ, ആശുപത്രി സൂപ്രണ്ട് എന്നിവർ പ്രവർത്തനങ്ങൾ ഏകോപിപ്പിച്ചു. തിരുവനന്തപുരം കിംസ്, എറണാകുളം അമൃത ആശുപത്രികളുടെയും സഹകരണമുണ്ടായിരുന്നു.

ഏറെ പണച്ചെലവുള്ള കരൾ മാറ്റിവയ്ക്കൽ ശസ്ത്രക്രിയ സാധാരണക്കാർക്ക് സർക്കാർ ആശുപത്രികളിലൂടെ ലഭ്യമാക്കാനാണ് സർക്കാർ ശ്രമിക്കുന്നതെന്ന് മന്ത്രി വീണാ ജോർജ് പറഞ്ഞു. ഈ സർക്കാർ അധികാരത്തിൽ വന്ന ശേഷം സംസ്ഥാനത്ത് കരൾമാറ്റിവയ്ക്കൽ ശസ്ത്രക്രിയ യാഥാർത്ഥ്യമാക്കാൻ വലിയ പരിശ്രമമാണ് നടത്തിയത്. നിരന്തരം യോഗങ്ങൾ വിളിച്ചു ചേർത്ത് ആക്ഷൻ പ്ലാൻ രൂപീകരിച്ചാണ് കരൾ മാറ്റിവയ്ക്കൽ ശസ്ത്രക്രിയ യാഥാർത്ഥ്യമാക്കിയത്. കോട്ടയം മെഡിക്കൽ കോളേജിൽ 3 കരൾ മാറ്റിവയ്ക്കൽ ശസ്ത്രക്രിയകൾ നടത്തി. കോഴിക്കോട് മെഡിക്കൽ കോളേജ് കരൾമാറ്റിവയ്ക്കൽ ശസ്ത്രക്രിയയ്ക്ക് സജ്ജമായി വരുന്നു.

സർക്കാർ സംവിധാനത്തിന്റേയും ഡോക്ടർമാരുടേയും ജീവനക്കാരുടേയും നിശ്ചയദാർഢ്യത്തിന്റേയും കൂട്ടായ പരിശ്രമത്തിന്റേയും വിജയം കൂടിയാണിത്. സേവന നിലവാരം മെച്ചപ്പെടുത്തുന്നതിന് തിരുവനന്തപുരം മെഡിക്കൽ കോളേജിൽ ക്വാളിറ്റി ഇംപ്രൂവ്‌മെന്റ് ഇനിഷ്യേറ്റീവ് ആരംഭിച്ചു. കരൾ മാറ്റിവയ്ക്കൽ ശസ്ത്രക്രിയയ്ക്കായി പ്രത്യേക ട്രാൻസ്പ്ലാന്റ് ടീമിനെ നിയോഗിക്കുകയും അവർക്ക് വിദഗ്ധ പരിശീലനം നൽകുകയും ചെയ്തു. ഇടയ്ക്കിടയ്ക്ക് ട്രാൻസ്പ്ലാന്റ് പ്രവർത്തന പുരോഗതി വിലയിരുത്തി. ആക്ഷൻ പ്ലാൻ പ്രകാരം കരൾ മാറ്റിവയ്ക്കൽ ശസ്ത്രക്രിയ ആരംഭിക്കുന്നതിന് സമയബന്ധിതമായി സജ്ജീകരണങ്ങൾ ഒരുക്കി.

കരൾ മാറ്റിവയ്ക്കൽ ശസ്ത്രക്രിയയ്ക്കാവശ്യമായ റസിപ്യന്റ് ഐസിയു, ഡോണർ ഐസിയു കൂടാതെ ഓപ്പറേഷൻ തീയറ്റർ എന്നിവ മാനദണ്ഡങ്ങൾ പ്രകാരം സജ്ജമാക്കി. കരൾ മാറ്റിവയ്ക്കൽ ശസ്ത്രക്രിയയ്ക്കുള്ള ലൈസൻസ് ലഭ്യമാക്കി. തുടർന്ന് രോഗികളെ വിദഗ്ധ പരിശോധനകൾക്കായി ആശുപത്രിയിൽ പ്രവേശിപ്പിച്ചു. മൂവായിരത്തോളം കിടക്കകളും മുന്നൂറോളം ഐസിയു രോഗികളും നൂറ്റി അറുപതോളം വെന്റിലേറ്റർ രോഗികളും നാലായിരത്തോളം ഒപി രോഗികളും ആയിരത്തോളം അത്യാഹിത വിഭാഗം രോഗികളും ചികിത്സ തേടുന്ന ഇന്ത്യയിലെ ഏറ്റവും വലിയ ആശുപത്രികളിൽ ഒന്നായ തിരുവനന്തപുരം മെഡിക്കൽ കോളേജിൽ മറ്റ് രോഗികളുടെ ചികിത്സയ്ക്ക് ഒപ്പം കരൾമാറ്റിവയ്ക്കൽ ശസ്ത്രക്രിയ നടത്താനായത് വലിയ നേട്ടമാണ്.

On:

ന്യൂഡൽഹി: കോൺഗ്രസ് അദ്ധ്യക്ഷ സ്ഥാനത്തേക്ക് തിരഞ്ഞെടുപ്പിനുള്ള നാമനിർദ്ദേശ പത്രിക പിൻവലിക്കാനുള്ള സമയപരിധി അവസാനിച്ചു. മുതിർന്ന നേതാവ് മല്ലികാർജുന ഖാർഗെയും ശശി തരൂരും എം.പിയുമാണ് നിലവിൽ മത്സര രംഗത്തുള്ളത്. ഇരുവരെയും സ്ഥാനാർത്ഥികളായി പ്രഖ്യാപിക്കുകയും ചെയ്തു. തിരഞ്ഞെടുപ്പ് അതോറിട്ടി ചെയർമാൻ മധുസൂദനനൻ മിസ്ത്രിയാണ് ഇവരെ സ്ഥാനാർത്ഥികളായി പ്രഖ്യാപിച്ചത്.

ഇരു സ്ഥാനാർത്ഥികൾക്കും ഇനി മുതൽ ഔദ്യോഗികമായി പ്രചാരണം നടത്താം. ഒക്ടോബർ 17 നാണ് തെരഞ്ഞെടുപ്പ്. 17ന് രഹസ്യ ബാലറ്റ് വഴിയായിരിക്കും വോട്ടെടുപ്പ് നടക്കുന്നത്. 19 നാണ് വോട്ടെണ്ണലും ഫലപ്രഖ്യാപനവും. അതേസമയം, രാഹുൽ ഗാന്ധി നയിക്കുന്ന ഭാരത് ജോഡോ യാത്രയിൽ പങ്കെടുക്കുന്നവർക്ക് പ്രത്യേക ബാലറ്റ് വഴി വോട്ട് ചെയ്യാൻ സൗകര്യം ഉണ്ടാകും. എ.ഐ.സി.സി ആസ്ഥാനവും ഭാരത് ജോഡോ ബൂത്തും ഉൾപ്പെടെ 69 ബൂത്തുകൾ സജ്ജമാക്കുമെന്നും കോൺഗ്രസ് വ്യക്തമാക്കിയിട്ടുണ്ട്.

എന്നാൽ, പരസ്യ പിന്തുണ ചട്ടലംഘനങ്ങളുമായി ബന്ധപ്പെട്ട് കേരളത്തിലെ നേതാക്കൾക്കെതിരെ ശശി തരൂർ പരാതി നൽകിയിട്ടില്ലെന്ന് മധുസൂദൻ മിസ്ത്രി പറഞ്ഞു. മറ്റൊരു സംസ്ഥാനത്തെ കുറിച്ച് തരൂർ പരാതി നൽകിയിട്ടുണ്ടെന്നും അത് പരിശോധിക്കുമെന്നും അദ്ദേഹം വ്യക്തമാക്കി.

മാദ്ധ്യമ വാർത്തകളുടെ അടിസ്ഥാനത്തിൽ നടപടി സ്വീകരിക്കാൻ കഴിയില്ലെന്നും അദ്ദേഹം വിശദീകരിച്ചു. കോൺഗ്രസ് അദ്ധ്യക്ഷ തിരഞ്ഞെടുപ്പിൽ മാനദണ്ഡങ്ങൾ ലംഘിക്കപ്പെടുന്നുവെന്ന് ചൂണ്ടിക്കാട്ടിയാണ് ശശി തരൂർ പരാതി നൽകിയത്.

On:

ന്യൂഡല്‍ഹി: കൃത്രിമോപഗ്രഹങ്ങളുമായുള്ള റോക്കറ്റ് വിക്ഷേപണത്തിനായി ശ്രീഹരിക്കോട്ടയ്ക്ക് പുറമേ മറ്റൊരു ‘സ്പേസ് പോര്‍ട്ട്’ കൂടി തമിഴ്‌നാട്ടിലെ കുലശേഖരത്ത് ഒരുക്കാനുള്ള തയ്യാറെടുപ്പുകളുമായി കേന്ദ്രം. വിക്ഷേപണ കേന്ദ്രം സജ്ജീകരിക്കുന്നതിനായി ആവശ്യമുള്ള 2,350 ഏക്കറില്‍ 1,950 ഏക്കര്‍ ഭൂമി ഇതിനകം ഏറ്റെടുത്തു. ഇത് സംബന്ധിച്ച വിവരം കേന്ദ്ര ശാസ്ത്ര സാങ്കേതിക സഹമന്ത്രി ഡോ. ജിതേന്ദ്ര സിംഗ് രാജ്യസഭയില്‍ വെളിപ്പെടുത്തി. 2024-25 ഓടെ രാജ്യത്തെ രണ്ടാമത്തെ സ്പേസ് പോര്‍ട്ട് റോക്കറ്റ് വിക്ഷേപണത്തിന് സജ്ജമാകും.

അതേസമയം, ശീഹരിക്കോട്ടയില്‍ നിന്ന് വിക്ഷേപിച്ച റോക്കറ്റുകള്‍ കിഴക്കോട്ട് കടലിന് മുകളിലൂടെയാണ് പറക്കുന്നത്. അതിനാല്‍ എന്തെങ്കിലും അപകടങ്ങള്‍ സംഭവിച്ചാല്‍ റോക്കറ്റും അതിന്റെ അവശിഷ്ടങ്ങളും കടലിലാണ് വീഴുക. എന്നിരുന്നാലും ഐ എസ് ആര്‍ ഒയുടെ ഭാവി പദ്ധതികള്‍ക്ക് ശ്രീഹരിക്കോട്ടയെ കൂടാതെ മറ്റൊരു സ്ഥലം കൂടി ആവശ്യമാണ്. ചെറു റോക്കറ്റുകളും, ഒപ്പം ശ്രീലങ്കയുമാണ് രണ്ടാമത്തെ സ്പേസ് പോര്‍ട്ടിനായി ഇന്ത്യയെ പ്രേരിപ്പിക്കുന്നത്. ശ്രീഹരിക്കോട്ടയില്‍ നിന്നും റോക്കറ്റ് ദക്ഷിണധ്രുവത്തിലേക്ക് നീങ്ങുമ്‌ബോള്‍ ശ്രീലങ്കക്ക് മുകളിലൂടെ പറക്കുന്നത് വലിയ അപകട സാദ്ധ്യത വിളിച്ചു വരുത്തുന്നതാണ്. അതിനാല്‍ ലങ്കന്‍ ഭൂപ്രദേശം ഒഴിവാക്കാനായുള്ള പ്രോഗ്രാം ചെയ്താണ് ഇന്ത്യ റോക്കറ്റ് വിക്ഷേപിക്കുന്നത്.

എന്നാല്‍, ചെറിയ റോക്കറ്റുകള്‍ക്ക് ഇത് വിജയകരമായി നടപ്പാക്കാന്‍ കൂടുതല്‍ ബുദ്ധിമുട്ടാണ്. ഇത്തരം ചെറിയ റോക്കറ്റുകള്‍ നേര്‍രേഖയില്‍ വിക്ഷേപിക്കാന്‍ കഴിയുന്ന ഒരു സ്ഥലം ഇന്ത്യ അന്വേഷിച്ചപ്പോഴാണ് കുലശേഖരത്തെത്തുന്നത്. തൂത്തുക്കുടി ജില്ലയിലാണ് ഈ പട്ടണം സ്ഥിതി ചെയ്യുന്നത്.

On:

തിരുവനന്തപുരം: ആറു വർഷത്തിനിടെ സംസ്ഥാനത്തെ റോഡ് അപകടങ്ങളിൽ മരണപ്പെട്ടത് 26,407 പേർ. ക്രൈം റെക്കോർഡ്‌സ് ബ്യൂറോയുടെ കണക്കുകളിലാണ് ഇക്കാര്യം വ്യക്തമാക്കിയിട്ടുള്ളത്. ഇക്കാലയളവിൽ 2,49,231 റോഡ് അപകടങ്ങളാണ് സംഭവിച്ചതെന്നും കണക്കുകൾ വ്യക്തമാക്കുന്നു. 2,81,320 പേർക്ക് അപകടങ്ങളിൽ പരിക്കേറ്റു. ഈ വർഷം ഓഗസ്റ്റ് മാസം വരെ മാത്രം 28,876 അപകടങ്ങളുണ്ടാകുകയും 2838 പേർ മരണപ്പെടുകയും 32,314 പേർക്ക് പരിക്കേൽക്കുകയും ചെയ്തു.

വിശദമായ കണക്കുകൾ:

2016: അപകടങ്ങളുടെ എണ്ണം (39420), മരണം (4287), പരുക്കേറ്റവർ (44108)

2017: അപകടങ്ങളുടെ എണ്ണം (38470), മരണം (4131), പരുക്കേറ്റവർ (42671)

2018: അപകടങ്ങളുടെ എണ്ണം (40181), മരണം (4303), പരുക്കേറ്റവർ (45458)

2019: അപകടങ്ങളുടെ എണ്ണം (41111), മരണം (4440), പരുക്കേറ്റവർ (46055)

2020: അപകടങ്ങളുടെ എണ്ണം (27877), മരണം (2979), പരുക്കേറ്റവർ (30510)

2021: അപകടങ്ങളുടെ എണ്ണം (33296), മരണം (3429), പരുക്കേറ്റവർ (40204)

2022 (ഓഗസ്റ്റ് വരെ): അപകടങ്ങളുടെ എണ്ണം (28876), മരണം (2838), പരുക്കേറ്റവർ (32314)

On:

ന്യൂഡൽഹി: വിവിധ സ്ഥലങ്ങളിൽ പരിശോധനയുമായി എൻഫോഴ്‌സ്‌മെന്റ് ഡയറക്ടറേറ്റ്. മദ്യനയവുമായി ബന്ധപ്പെട്ട കേസിലാണ് ഡൽഹി ഉൾപ്പെടെ 35 ഇടങ്ങളിൽ എൻഫോഴ്‌സ്‌മെന്റ് റെയ്ഡ് നടത്തുന്നത്. ഡൽഹി, പഞ്ചാബ്, ഹൈദരാബാദ് തുടങ്ങിയ സ്ഥലങ്ങളിലാണ് പരിശോധന.

അതേസമയം, ഇഡിയുടെ നടപടിക്കെതിരെ വിമർശനവുമായി ഡൽഹി മുഖ്യമന്ത്രി കെജ്രിവാൾ രംഗത്തെത്തിയിട്ടുണ്ട്. വൃത്തികെട്ട രാഷ്ടീയത്തിനായി ഉദ്യോഗസ്ഥരുടെ സമയം കളയുകയാണെന്നാണ് കെജ്രിവാളിന്റെ വിമർശനം. എൻഫോഴ്‌സ്‌മെന്റ് 3 മാസത്തിനിടെ നൂറുകണക്കിന് സ്ഥലങ്ങളിൽ 500 പരിശോധനകൾ നടത്തി. എന്നാൽ, മനീഷ് സിസോദിയക്ക് എതിരെ ഒന്നും കണ്ടെത്തിയില്ല. ഇങ്ങനെയുള്ള ഒരു രാജ്യം എങ്ങനെ പുരോഗമിക്കുമെന്ന് അദ്ദേഹം ചോദിക്കുന്നു.

മദ്യനയ കേസിൽ അറസ്റ്റിലായ മലയാളി വിജയ് നായരെ സിബിഐ കസ്റ്റഡിയിൽ വിട്ടു. അഞ്ച് ദിവസത്തേക്കാണ് കസ്റ്റഡി കാലാവധി. ഡൽഹി റോസ് അവന്യൂ കോടതിയിലാണ് പ്രതിയെ സിബിഐ ഹാജരാക്കിയത്. വിജയ് നായരുടെ മൊബൈൽ ഫോണിലെ വിവരങ്ങളെല്ലാം ഡിലീറ്റ് ചെയ്ത നിലയിലാണെന്നും, പ്രതി ചോദ്യം ചെയ്യലിനോട് സഹകരിക്കുന്നില്ലെന്നും സിബിഐ കോടതിയിൽ വ്യക്തമാക്കി.

On:

ന്യൂഡൽഹി: ഇന്ത്യയുടെ പ്രതീക്ഷിത ജിഡിപി വളർച്ച നിരക്ക് പുതുക്കി നിശ്ചയിച്ച് ലോകബാങ്ക്. നടപ്പു സാമ്പത്തിക വർഷത്തിൽ ഇന്ത്യ ആറര ശതമാനം വളർച്ച കൈവരിക്കുമെന്നാണ് റിപ്പോർട്ടിൽ വ്യക്തമാക്കിയിട്ടുള്ളത്. ലോകത്തെ മറ്റു രാജ്യങ്ങളെ അപേക്ഷിച്ച് ഏറ്റവും ശക്തമായി കോവിഡ് കാലത്തെ അതിജീവിക്കുന്ന രാജ്യമാണ് ഇന്ത്യയെന്ന് റിപ്പോർട്ടിൽ ചൂണ്ടിക്കാട്ടുന്നു. 8.7 ശതമാനം വളർച്ചയാണ് കഴിഞ്ഞ സാമ്പത്തിക വർഷത്തിൽ ഇന്ത്യ കൈവരിച്ചത്.

ഇന്ത്യ ഏറ്റവും മികച്ച രീതിയിൽ സാമ്പത്തികമായി മുന്നേറ്റം കാഴ്ചവയ്ക്കുന്നത് സേവന മേഖലയിലും, സേവന കയറ്റുമതിയിലുമാണ്. നടപ്പ് സാമ്പത്തിക വർഷത്തെ രണ്ടാമത്തെയും മൂന്നാമത്തെയും പാദവാർഷികങ്ങൾ ലോകത്തെ മറ്റു പല രാജ്യങ്ങൾക്കും വെല്ലുവിളി നിറഞ്ഞതാണ്. സമാനമായ നിലയിൽ ഇന്ത്യയ്ക്കും സാമ്പത്തിക സാഹചര്യങ്ങൾ തിരച്ചടി ആകുമെങ്കിലും അതിനെ ഫലപ്രദമായി ചെറുക്കുന്നതിൽ ഇന്ത്യ മുന്നേറുന്നുണ്ടെന്നും റിപ്പോർട്ടിൽ വിശദീകരിക്കുന്നു. അതേസമയം, റിസർവ് ബാങ്കിലെ വിദേശനാണ്യശേഖരം ഇന്ത്യയ്ക്ക് മുതൽക്കൂട്ടാകും എന്ന് ലോക ബാങ്കിന്റെ ദക്ഷിണേഷ്യ വിഭാഗം ചീഫ് സാമ്പത്തിക വിദഗ്ധൻ ഹാൻസ് ടിമ്മർ അറിയിച്ചു.

കാലത്തെ അതിജീവിക്കാൻ കേന്ദ്രസർക്കാർ നടത്തുന്ന ശ്രമങ്ങളെ അദ്ദേഹം അഭിനന്ദിക്കുകയും ചെയ്തു. ഡിജിറ്റൽ ആശയങ്ങൾ ഉപയോഗിച്ച് സാമൂഹിക സുരക്ഷാ നെറ്റ്‌വർക്കുകൾ വിപുലീകരിക്കുന്നത് പോലുള്ള ചില മാതൃകകൾ ഇന്ത്യൻ ഗവൺമെന്റ് ലോകത്തിന് മുന്നിൽ വയ്ക്കുന്നുവെന്നും അദ്ദേഹം കൂട്ടിച്ചേർത്തു.