Highlights (Page 163)

തിരുവനന്തപുരം: ഇരുപത്തിമൂന്നാം പാർട്ടി കോൺഗ്രസിന് മുന്നോടിയായുള്ള ഏരിയാ സമ്മേളനങ്ങൾ ആരംഭിച്ച് സിപിഎം. പുതിയ ഏരിയാ കമ്മിറ്റികളിൽ രണ്ട് വനിതകളെങ്കിലും വേണമെന്നാണ് സിപിഎമ്മിന്റെ നിർദ്ദേശം. മതന്യൂനപക്ഷ പ്രാതിനിധ്യം നിർബന്ധമായും വേണമെന്നും നിർദ്ദേശമുണ്ട്. ഏരിയാ സെക്രട്ടറിമാർ സഹകരണബാങ്ക് പ്രസിഡന്റ് സ്ഥാനം ഏറ്റെടുക്കരുത്. പൂർണസമയം പാർട്ടിക്കായി പ്രവർത്തിക്കുന്നവരാകണം സെക്രട്ടറിമാർ. സർക്കാരുമായി ബന്ധപ്പെട്ട് മുഴുവൻ സമയം പ്രവർത്തിക്കുന്നവരെ സെക്രട്ടറിമാരാക്കേണ്ടെന്നും സിപിഎം നിർദ്ദേശിച്ചു.

കണ്ണൂരിലാണ് ഇരുപത്തി മൂന്നാം പാർട്ടി കോൺഗ്രസ് നടക്കുന്നത്. കഴിഞ്ഞ ആഴ്ച്ച തന്നെ ഇവിടെ ഏരിയാ സമ്മേളനങ്ങൾ ആരംഭിച്ചു. എറണാകുളത്താണ് സംസ്ഥാന സമ്മേളനം. ഇവിടെയും ഏരിയാ കമ്മിറ്റികൾ ആരംഭിച്ചിട്ടുണ്ട്. ഏരിയാ കമ്മിറ്റി അംഗങ്ങൾ കമ്മിറ്റി തീരുമാനങ്ങൾ നടപ്പാക്കാൻ സമയമുള്ളവരാകണമെന്ന് മാർഗരേഖയിൽ സി.പി.എം വിശദമാക്കുന്നുണ്ട്. രാവിലെ 10 മുതൽ വൈകിട്ട് 5 മണി വരെ ജോലിയെടുക്കേണ്ടി വരുന്നയാൾ ഏരിയാ കമ്മിറ്റി അംഗമായാൽ പാർട്ടി പ്രവർത്തനത്തിന് സമയം മാറ്റിവയ്ക്കാൻ കഴിയാതെ വരുന്നു, വൈകിട്ട് ആറ് മണി മുതൽ മാത്രം പാർട്ടി പ്രവർത്തനത്തിന് സമയം ചെലവഴിക്കാനാവുന്നവർ ഏരിയാ കമ്മിറ്റിയിൽ കൂടുതലാവുന്നത് കമ്മിറ്റിയുടെ സുഗമമായ പ്രവർത്തനത്തിന് തടസ്സമാകുമെന്നാണ് പാർട്ടിയുടെ വിലയിരുത്തൽ.

യോഗങ്ങളിൽ പങ്കെടുക്കാൻ കഴിയാതിരിക്കുകയും, ഒരു പ്രവർത്തനത്തിലും ഭാഗമാകാതിരിക്കുകയും ചെയ്യുന്നവരെ ഒഴിവാക്കി പ്രവർത്തന സന്നദ്ധതയുള്ളവരെ ഉൾപ്പെടുത്തണമെന്നും സിപിഎം നിർദ്ദേശിച്ചു. ഏരിയാ, ലോക്കൽ കമ്മിറ്റികളിലുള്ളവർ രാത്രിയേറെ വൈകിയും കീഴ്ഘടകങ്ങളുടെ യോഗങ്ങളിൽ പങ്കെടുക്കാൻ ബാദ്ധ്യതപ്പെട്ടവരാണ്. പ്രായാധിക്യം, ആരോഗ്യ പ്രശ്‌നങ്ങൾ എന്നിവയാൽ യോഗങ്ങളിൽ പങ്കെടുക്കാനാവാത്തവർ കമ്മിറ്റികളിൽ തുടരുന്നുണ്ട്. ദീർഘകാലം അവർ പാർട്ടിക്കായി സേവനം നടത്തിയതിനെ ആദരിച്ചു കൊണ്ടു തന്നെ അവരെ കമ്മിറ്റിയിൽ നിന്നൊഴിവാക്കണമെന്ന നിർദ്ദേശവും മുന്നോട്ട് വെച്ചിട്ടുണ്ട്. കമ്മിറ്റികളിൽ കൂടുതൽ ചെറുപ്പക്കാരെ ഉൾപ്പെടുത്താൻ ശ്രദ്ധിക്കണം. അനുഭവസമ്പത്തുള്ളവരും പുതുതലമുറയിലുള്ളവരും ഉൾക്കൊള്ളുന്ന കമ്മിറ്റിയെ തിരഞ്ഞെടുക്കുന്നതിൽ മേൽകമ്മിറ്റി വ്യക്തമായ മാർഗനിർദ്ദേശം നൽകണമെന്നും മാർഗ രേഖയിൽ പറയുന്നു.

അടുത്ത മാസം പകുതിയോടെയാണ് ജില്ലാ സമ്മേളനങ്ങൾ ആരംഭിക്കുന്നത്. ഓരോ ജില്ലയിലും വിവിധ ഏരിയകൾക്ക് കീഴിൽ നിന്ന് ശരാശരി പത്ത് ശതമാനം പേരെ വീതം ജില്ലാ സമ്മേളനങ്ങളിൽ പ്രതിനിധികളാക്കാനാണ് നിർദ്ദേശം. കൂടുതൽ അംഗബലമുള്ള കമ്മിറ്റികളിൽ നിന്ന് 13 ശതമാനം വരെ പ്രാതിനിദ്ധ്യമുണ്ടാകണമെന്നും നിർദ്ദേശമുണ്ട്.

ഓസ്ട്രിയ: കോവിഡ് പ്രതിരോധ വാക്‌സിൻ സ്വീകരിക്കാത്തവർക്ക് ലോക്ക് ഡൗൺ പ്രഖ്യാപിച്ച് ഓസ്ട്രിയ. കോവിഡ് വാക്‌സിനേഷൻ നിർബന്ധമാക്കുന്നതിന്റെ ഭാഗമായാണ് നടപടി. വാക്സിൻ എടുത്തില്ലെങ്കിൽ ഇനി വീട്ടിൽനിന്നും പുറത്തിറങ്ങാൻ കഴിയില്ലെന്നാണ് ഈ ലോക്ക് ഡൗണിലൂടെ അർത്ഥമാക്കുന്നത്.

കോവിഡ് വ്യാപനം തുടരുകയും വാക്‌സിൻ വിരുദ്ധർ വർധിക്കുകയും ചെയ്ത സാഹചര്യത്തിലാണ് ഓസ്ട്രിയയിൽ ലോക്ക് ഡൗൺ പ്രഖ്യാപിച്ചത്. 12 വയസ്സിനു മുകളിലുള്ള വാക്സിൻ എടുക്കാത്ത ആരും വീട്ടിൽനിന്നിറങ്ങരുത് എന്നാണ് ഓസ്ട്രിയൻ സർക്കാരിന്റെ ഉത്തരവ്. എന്നാൽ അത്യാവശ്യകാര്യങ്ങൾക്ക് ഇവർക്ക് പുറത്തിറങ്ങാം. ഓസ്ട്രിയയിലെ ജനസംഖ്യ 89 ലക്ഷമാണ്. പത്തു ദിവസത്തേക്കാണ് ലോക്ക്ഡൗൺ പ്രഖ്യാപിച്ചതെന്ന് ചാൻസലർ അലക്സാണ്ടർ ഷാലൻബർഗ് പറഞ്ഞു. പുറത്തിറങ്ങുന്നവർ വാക്സിൻ എടുത്തിട്ടുണ്ടോ എന്ന് പരിശോധിക്കാൻ പൊലീസിനെ ചുമതലപ്പെടുത്തിയിട്ടുണ്ടെന്നും അദ്ദേഹം മുന്നറിയിപ്പ് നൽകി. വാക്സിൻ എടുക്കാതെ പുറത്തിറങ്ങുന്നവർ 1450 യൂറോ (1.23 ലക്ഷം രൂപ) പിഴ അടക്കേണ്ടിവരുമെന്നും അദ്ദേഹം അറിയിച്ചു.

യൂറോപ്പിൽ വാക്‌സിനേഷനിൽ പിന്നിലുള്ള രാജ്യമാണ് ഓസ്ട്രിയ. ഞായറാഴ്ച്ച 11,522 പുതിയ കേസുകളാണ് ഓസ്ട്രിയയിൽ റിപ്പോർട്ട് ചെയ്തത്.

തിരുവനന്തപുരം: മുഖ്യമന്ത്രി പിണറായി വിജയനെതിരെ ഗുരുതര ആരോപണവുമായി കെപിസിസി പ്രസിഡന്റ് കെ സുധാകരൻ. ജനാധിപത്യ ചേരിയെ ശാക്തീകരിക്കാനുള്ള സിപിഎം ദേശീയ നേതൃത്വത്തിന്റെ ശ്രമങ്ങളെ പതിവുപോലെ ഇത്തവണയും മുഖ്യമന്ത്രി പിണറായി വിജയൻ ഉൾപ്പെടുന്ന കേരള സംഘം അട്ടിമറിച്ചെന്ന് അദ്ദേഹം ആരോപിച്ചു. ദേശീയതലത്തിൽ വരാനിരിക്കുന്ന തിരഞ്ഞെടുപ്പുകളിൽ ബിജെപിക്കെതിരെ കോൺഗ്രസുമായി കൂട്ടുകെട്ട് വേണ്ടെന്ന തീരുമാനം പോളിറ്റ് ബ്യൂറോ എടുത്തത് കേരള ഘടകത്തിന്റെ സമ്മർദ്ദം മൂലമാണോയെന്ന് വ്യക്തമാക്കണമെന്ന് അദ്ദേഹം ആവശ്യപ്പെട്ടു. സിപിഎം നിലപാട് അങ്ങേയറ്റം ബുദ്ധിശൂന്യതയും വിവേകമില്ലായ്മയുമാണെന്നും അദ്ദേഹം പറഞ്ഞു.

കേരളം മാത്രമാണ് സിപിഎമ്മിന് തുരുത്തായുള്ളത്. കേരള സിപിഎം നേതാക്കളുടെ നിലപാട് ബിജെപിക്ക് അനുകൂലമാണ്. കാലങ്ങളായി കേരളത്തിൽ സിപിഎമ്മും ബിജെപിയും തുടരുന്ന രഹസ്യ സഖ്യമാണ് ഇത്തരം ഒരു നിലപാട് പിബിയിൽ സ്വീകരിക്കാൻ കേരള നേതാക്കൾക്ക് ഇന്ധനം പകർന്നത്. അന്ധമായ കോൺഗ്രസ് വിരോധം വച്ചുപുലർത്തുന്ന കേരളത്തിലെ സിപിഎം നേതാക്കളുടെ മൃദുഹിന്ദുത്വ സമീപനത്തിന് തെളിവാണ് പിബിയിലെ നിലപാടെന്നും അദ്ദേഹം അഭിപ്രായപ്പെട്ടു.

വർഗീയ ഫാസിസത്തിനെതിരായ പോരാട്ടത്തിൽ ജനാധിപത്യ മതേതര ശക്തികളെ സിപിഎം ഒറ്റിക്കൊടുക്കുകയാണ്. നരേന്ദ്ര മോദിയുടെ നയങ്ങളോടും നിലപാടുകളോടും യോജിക്കുന്ന നടപടികളാണ് അധികാരത്തിൽ എത്തിയത് മുതൽ കേരള മുഖ്യമന്ത്രി പിന്തുടരുന്നത്. ബിജെപിയുടെ വർഗീയ ഫാസിസ്റ്റ് ഭീഷണിയെ ചെറുത്ത് തോൽപ്പിക്കാൻ കോൺഗ്രസിന്റെ നേതൃത്വത്തിലുള്ള മതേതര ജനാധിപത്യകക്ഷികളുടെ ദേശീയ ബദൽ രൂപപ്പെട്ടുവരുന്ന ഘട്ടത്തിലാണ് സിപിഎം കേരള ഘടകം പിന്നിൽ നിന്നും കുത്തിയതെന്നും അദ്ദേഹം പറഞ്ഞു. ലാവ്‌ലിൻ കേസും സ്വർണ്ണക്കടത്ത് കേസും ബിജെപി നേതാക്കൾ പ്രതികളായ കുഴൽപ്പണക്കേസും എങ്ങനെ തെളിവുകളില്ലാതെ ആവിയായിപ്പോയി എന്ന് തിരിച്ചറിയാൻ സിപിഎം പിബിയിലെ കേരള നേതാക്കളുടെ നിലപാട് മാത്രം പരിശോധിച്ചാൽ മതിയെന്നും സുധാകരൻ അദ്ദേഹം കൂട്ടിച്ചേർത്തു.

കൊച്ചി: ഭൂമിയിടപാടുമായി ബന്ധപ്പെട്ട് ശാസ്ത്രജ്ഞൻ നമ്പി നാരായണനെതിരെ അന്വേഷണം ആവശ്യപ്പെട്ട് നൽകിയ ഹർജി തള്ളി ഹൈക്കോടതി. മുൻ സിബിഐ ഉദ്യോഗസ്ഥരുമായുള്ള ഭൂമി ഇടപാട് അന്വേഷിക്കണമെന്ന് ആവശ്യപ്പെട്ട് ഐഎസ്ആർഒ ചാരക്കേസ് ഗൂഢാലോചന കേസ് പ്രതികൾ നൽകിയ ഹർജിയാണ് ഹൈക്കോടതി തള്ളിയത്. കേസിൽ തെളിവില്ലെന്ന് കണ്ടാണ് കോടതിയുടെ നടപടി. ഇക്കാര്യം ആവശ്യപ്പെട്ടു കൊണ്ടുള്ള ഹർജി നേരത്തെ തിരുവനന്തപുരം സിബിഐ കോടതിയും തള്ളിയിരുന്നു.

ചാരക്കേസ് അന്വേഷിച്ചിരുന്ന കാലത്ത് കേസിൽ നിന്ന് രക്ഷപ്പെടുന്നതിനു വേണ്ടി ഇവർ തമ്മിൽ ഭൂമി ഇടപാട് ഉണ്ടായിരുന്നു എന്നായിരുന്നു ഹർജിയിൽ ഉന്നയിച്ചിരുന്ന ആരോപണം. കൂടുതൽ രേഖകളുണ്ടെങ്കിൽ അവയുമായി വിചാരണ കോടതിയെ സമീപിക്കാമെന്ന് ഹൈക്കോടതി വ്യക്തമാക്കി. ഐഎസ്ആർഒ ചാരക്കേസ് ഗൂഢാലോചന കേസിലെ പ്രതികളായ എസ്. വിജയൻ ഉൾപ്പെടെയുള്ളവരാണ് ഹൈക്കോടതിയിൽ ഹർജി നൽകിയത്.

ആരോപണവുമായി ബന്ധപ്പെട്ട രേഖകൾ ഹാജരാക്കാരന് ഹർജിക്കാരന് കഴിഞ്ഞിട്ടില്ലെന്നും കോടതി ചൂണ്ടിക്കാട്ടി.

ന്യൂഡൽഹി: നവംബർ 14 മുതൽ അടുത്ത ഏഴ് ദിവസത്തേക്ക് ആറ് മണിക്കൂർ നേരത്തേക്ക് റെയിൽവേ ടിക്കറ്റ് റിസർവേഷൻ സൗകര്യങ്ങൾ ലഭിക്കില്ല. ഇന്ത്യൻ റെയിൽവേയാണ് ഇക്കാര്യം അറിയിച്ചത്. സിസ്റ്റം നവീകരിണത്തിന്റെയും ട്രെയിനുകളുടെ വിവരങ്ങൾ പുതുതായി ചേർക്കുന്നതിന്റെ ഭാഗമായാണ് നടപടി. രാത്രി 11.30 മുതൽ വെളുപ്പിന് 5.30 വരെയാണ് റിസർവേഷൻ സൗകര്യങ്ങൾ നിർത്തി വയ്ക്കുന്നത്. ഇന്ന് രാത്രി മുതൽ നവംബർ 21 വരെ ഈ നിലയിലായിരിക്കും പ്രവർത്തനമെന്ന് റെയിൽവേ വൃത്തങ്ങൾ വ്യക്തമാക്കി.

കോവിഡ് വൈറസ് വ്യാപനത്തിന് മുമ്പുണ്ടായിരുന്ന തരത്തിലുള്ള പ്രവർത്തനങ്ങളിലേക്കുള്ള മടങ്ങിപ്പോക്കിനാണ് ശ്രമിക്കുന്നതെന്നും നിരവധി പഴയ ട്രെയിനുകളുടെ വിവരങ്ങളും യാത്രക്കാരുടെ രേഖകളും അപ്‌ഡേറ്റ് ചെയ്യേണ്ടതുള്ളതിനാൽ വളരെയേറെ ശ്രദ്ധാപൂർവ്വമാണ് റെയിൽവേ ഈ പ്രവർത്തനങ്ങൾ നടത്തുന്നതെന്നും റെയിൽവേ അറിയിച്ചു. ടിക്കറ്റ് റിസർവേഷൻ, ബുക്കിംഗ്, റദ്ദാക്കൽ, വിവരങ്ങൾ അറിയുന്നതിനുള്ള സൗകര്യം തുടങ്ങിയ സേവനങ്ങളൊന്നും ഈ സമയം ലഭ്യമായിരിക്കില്ലെന്നും ഇവ ഒഴിച്ചുള്ള മറ്റ് 139 സേവനങ്ങളും യാത്രക്കാർക്ക് പ്രയോജനപ്പെടുത്താമെന്നും റെയിൽവേ അധികൃതർ കൂട്ടിച്ചേർത്തു.

തിരുവനന്തപുരം: പുതിയ മാറ്റങ്ങളുമായി ക്ലബ് ഹൗസ്. ചർച്ചകൾ റെക്കോഡ് ചെയ്യാനുള്ള ഫീച്ചർ ക്ലബ് ഹൗസിൽ അവതരിപ്പിച്ചു. ഒരു തത്സമയ സെഷൻ റെക്കോഡ് ചെയ്യാനും സ്വന്തം പ്രൊഫൈലിലോ ക്ലബ്ബിലോ സേവ് ചെയ്യാനും സാധിക്കുന്ന റീപ്ലേ എന്ന ഫീച്ചറാണ് ക്ലബ്ഹൗസ് അവതരിപ്പിച്ചത്. ആൻഡ്രോയിഡ്, ഐ.ഒ.എസ് പ്ലാറ്റ്ഫോമുകളിൽ പുതിയ സംവിധാനം ലഭ്യമാണ്. റെക്കോഡ് ചെയ്ത ഫയലുകൾ ഡൗൺലോഡ് ചെയ്ത് ആപ്പിന് പുറത്ത് ഷെയർ ചെയ്യാനും ഇനിമുതൽ കഴിയുന്നതാണ്.

ക്ലബ്ഹൗസിലെ റൂമിൽ റീപ്ലേ സംവിധാനം വേണമോയെന്ന് തീരുമാനിക്കാനുള്ള അവകാശം അഡ്മിനുകൾക്കാണ്. റീപ്ലേ സംവിധാനം അനുവദിക്കുകയാണെങ്കിൽ ആ റൂമിലെ ഏല്ലാവർക്കും ചർച്ച മൊത്തത്തിൽ റെക്കോഡ് ചെയ്യാനും പിന്നീട് ആവശ്യമുള്ളപോലെ കേൾക്കാനും സാധിക്കും.

റെക്കോഡഡ് സെഷനുകൾ തത്സമയ ചർച്ചകളുടെ തന്നെ അനുഭവം നൽകും. റീപ്ലേ ഉപയോഗിക്കുന്ന ഒരാൾക്ക് റെക്കോഡിങ് പോസ് ചെയ്യാനും അടുത്ത സ്പീക്കറുടെ സംസാരം തെരഞ്ഞെടുക്കാനും കൂടുതൽ വേഗത്തിൽ സംസാരം കേൾക്കാനുമുള്ള അവസരമുണ്ട്. ആരൊക്കെ റീപ്ലേ ഉപയോഗിക്കുന്നുണ്ടെന്ന് അറിയാൻ അഡ്മിനുകൾക്ക് കഴിയുമെന്നതാണ് മറ്റൊരു പ്രത്യേകത.