Politics (Page 105)

എഐ കാമറ അഴിമതി ആരോപണം നിയമസഭയില്‍ ഉന്നയിച്ച് പ്രതിപക്ഷം. മോഷ്ടിക്കാന്‍ കാമറ വയ്ക്കുന്ന സംസ്ഥാനത്തെ ആദ്യ പദ്ധതിയാണെന്ന് പി.സി വിഷ്ണുനാഥ് ആരോപിച്ചു. ടെണ്ടര്‍ വ്യവസ്ഥകള്‍ എല്ലാം മറികടന്നാണ് കാമറ സ്ഥാപിക്കാനുള്ള കരാറും ഉപകരാറും നല്‍കിയത്. 60 ശതമാനം നോക്കുകൂലി വാങ്ങിയാണ് പദ്ധതി നടപ്പാക്കിയത്. മുഖ്യമന്ത്രിയുടെ മകനുമായി അടുത്ത ബന്ധമുള്ളവര്‍ക്ക് പങ്കാളിത്തമുണ്ടെന്നും പി.സി വിഷ്ണുനാഥ് ആരോപിച്ചു.
എന്നാല്‍ മുഖ്യമന്ത്രിയുടെ കുടുംബത്തിനെതിരായ ആരോപണം സഭാ രേഖകളില്‍ നിന്ന് നീക്കണമെന്ന് ഭരണപക്ഷം ആവശ്യപ്പെട്ടു. അത് പരിഗണിക്കാമെന്ന് സ്പീക്കറുടെ ചെയറിലുണ്ടായിരുന്ന ചിറ്റയം ഗോപകുമാര്‍ അറിയിച്ചു

കരുവന്നൂര്‍ തട്ടിപ്പുകേസുമായി ബന്ധപ്പെട്ട് എ.സി. മൊയ്തീന്‍ എം.എല്‍.എ. ഇ.ഡിയ്ക്ക് മുന്നില്‍ ഹാജരായി. ഇന്ന് പുലര്‍ച്ചെ തൃശൂരില്‍ നിന്നും അദ്ദേഹം കൊച്ചിയില്‍ എത്തുകയായിരുന്നു. രണ്ടു തവണ നോട്ടീസ് നല്‍കിയപ്പോഴും പല തടസ്സങ്ങള്‍ പറഞ്ഞ് ഒഴിഞ്ഞുമാറിയ മൊയ്തീന് ഇന്ന് കൂടി ഹാജരായില്ലെങ്കില്‍ അറസ്റ്റ് നേരിടേണ്ടി വരുമായിരുന്നു. മുമ്പു രണ്ടു തവണ ചോദ്യം ചെയ്യലിനു ഹാജരാകണമെന്നു നോട്ടീസ് നല്‍കിയെങ്കിലും അസൗകര്യമുണ്ടെന്നു കാട്ടി ഒഴിവാകുകയായിരുന്നു. ഹാജരായില്ലെങ്കില്‍ ഒളിച്ചോടിയെന്നാകും പറയുകയെന്നു എ.സി. മൊയ്തീന്‍ വ്യക്തമാക്കിയിരുന്നു.ഇന്നത്തെ നിയമസഭാ സമ്മേളനത്തില്‍ അദ്ദേഹം പങ്കെടുക്കില്ല. സാക്ഷികള്‍ക്കു നല്‍കുന്ന നോട്ടീസാണു ചോദ്യംചെയ്യലിനു ഹാജരാവാന്‍ മൊയ്തീനു നല്‍കിയിട്ടുള്ളത്. പത്തു വര്‍ഷത്തെ ബാങ്ക് സ്‌റ്റേറ്റ്‌മെന്റുമായി എത്താനാണു മൊയ്തീന് ഇ.ഡി. നിര്‍ദേശം.കരുവന്നൂര്‍ ബാങ്ക് തട്ടിപ്പുകേസില്‍ താന്‍ ഉത്തരവാദിയാണെന്നതിനു തെളിവില്ലെന്നാണു മൊയ്തീന്റെ വാദം. അതേസമയം, റിമാന്‍ഡിലായ രണ്ടുപ്രതികള്‍ ഇ.ഡിക്കു നല്‍കിയ മൊഴി പുറത്തുവന്നിട്ടില്ല.വടക്കാഞ്ചേരി സ്റ്റാന്‍ഡിങ് കമ്മിറ്റി ചെയര്‍മാന്‍ അരവിന്ദാക്ഷന്‍, സി.പി.എം. കൗണ്‍സിലര്‍ അനൂപ് ഡേവിസ് എന്നിവരും ഇന്നു കൊച്ചി ഇ.ഡി. ഓഫീസില്‍ ചോദ്യംചെയ്യലിനു ഹാജരാകും. സി.പി.എം. എറണാകുളം ജില്ലാ സെക്രട്ടേറിയറ്റ് മുന്‍ അംഗം സി.കെ. ചന്ദ്രന്‍, ബാങ്ക് മുന്‍ മാനേജര്‍ ബിജു കരീം, ബാങ്ക് സെക്രട്ടറി സുനില്‍കുമാര്‍,സ്വര്‍ണ വ്യാപാരി അനില്‍ സേട്ട് എന്നിവരെ കഴിഞ്ഞ ദിവസം ഇ.ഡി. ചോദ്യംചെയ്തിരുന്നു. . മൊയ്തീന്റെ ബിനാമികളെന്നു കരുതുന്ന സതീഷ് കുമാര്‍, പി.പി. കിരണ്‍ എന്നിവര്‍ റിമാന്‍ഡിലാണ്.

റേഷന്‍ വ്യാപാരികളുടെ സമരത്തിനെതിരെ ഭക്ഷ്യമന്ത്രി ജി ആര്‍ അനില്‍. സമരം ഒരിക്കലും അര്‍ഹരായ
കുടുംബങ്ങള്‍ക്ക് റേഷന്‍ അവകാശം നിഷേധിക്കുന്ന തരത്തിലാകരുതെന്ന് അദ്ദേഹം പറഞ്ഞു.
സര്‍ക്കാര്‍ നിശ്ചയിച്ച സമയത്തിനുള്ളില്‍ റേഷന്‍ വിതരണം ചെയ്തില്ലെങ്കില്‍ സര്‍ക്കാര്‍ ഗൗരവമായി കാണുമെന്നും കര്‍ശന നടപടി സ്വീകരിക്കുമെന്നും മന്ത്രി മുന്നറിയിപ്പ് നല്‍കി.റേഷന്‍ കാര്‍ഡുടമകള്‍ക്ക് റേഷന്‍ നിഷേധിച്ചുകൊണ്ടുള്ള ഒരു സമരപരിപാടിയെയും ഒരു കാരണവശാലും അംഗീകരിക്കില്ലെന്ന് ഭക്ഷ്യമന്ത്രി പറഞ്ഞു. കൂടാതെ റേഷ്യന്‍ വ്യാപാരികള്‍ ഇത്തരത്തിലുള്ള സമരപരിപാടികളില്‍ നിന്ന്് പിന്മാറണമെന്നും അദ്ദേഹം ആവശ്യപ്പെട്ടു.സര്‍ക്കാരിന്റെ ഓണ കിറ്റ് വിതരണത്തില്‍ വ്യാപാരികള്‍ക്ക് നല്‍കാനുള്ള 11 മാസത്തെ കുടിശിക നല്‍കുക, വേതന പാക്കേജ് പരിഷ്‌ക്കരിക്കുക,ഇ പോസ് യന്ത്രത്തിന് നിരന്തരമുണ്ടാകുന്ന തകരാറുകള്‍ പൂര്‍ണമായി പരിഹരിക്കുക തുടങ്ങിയ ആവശ്യങ്ങളുന്നയിച്ചാണ് സമരം. അതേസമയം റേഷന്‍ വ്യാപാരി സംയുക്ത സമിതി സമരത്തില്‍ പങ്കെടുക്കില്ലെന്ന് അറിയിച്ചിരുന്നു

പ്രവർത്തക സമിതി തിരഞ്ഞെടുപ്പില്‍ മനോവിഷമം ഉണ്ടാക്കിയെന്നും എന്നാല്‍ ഒരു പദവിയില്ലെങ്കിലും താന്‍ ജനങ്ങള്‍ക്കും പാര്‍ട്ടിക്കും വേണ്ടി പ്രവര്‍ത്തിക്കുമെന്നും കോണ്‍ഗ്രസ് നേതാവ് രമേശ് ചെന്നിത്തല. വിഷമം ഉണ്ടായത് സത്യമാണെന്നും കോണ്‍ഗ്രസ് വര്‍ക്കിംഗ് കമ്മറ്റി തിരഞ്ഞെടുപ്പില്‍ ചില അസ്വാഭാവികത തോന്നിയെന്നും രമേശ് ചെന്നിത്തല വാര്‍ത്താസമ്മേളനത്തില്‍ പറഞ്ഞു.കേരളത്തിന്റെ പ്രതിപക്ഷ നേതൃസ്ഥാനം വിട്ട ശേഷം രണ്ടുവര്‍ഷമായി പാര്‍ട്ടിയില്‍ ഒരു പദവിയും ഇല്ല. കോണ്‍ഗ്രസിന്റെ ദേശീയ നേതൃത്വത്തില്‍ സ്ഥിരം ക്ഷണിതാവാക്കിയതില്‍ നന്ദിയുണ്ടെന്നും 19 വര്‍ഷം മുമ്പ് പ്രവര്‍ത്തിച്ച അതേ പദവിയാണ് ഇതെന്നും പറഞ്ഞു. പാര്‍ട്ടിയില്‍ വ്യക്തിപരമായ സ്ഥാനങ്ങള്‍ക്കല്ല പ്രാധാന്യമെന്നും പാര്‍ട്ടിയെ താന്‍ ഒരിക്കലും തള്ളിപ്പറഞ്ഞിട്ടില്ലെന്നും പാര്‍ട്ടി ജീവശ്വാസമാണെന്നും എല്ലാവരും ഒറ്റക്കെട്ടായി പ്രവര്‍ത്തിക്കുമെന്നും കേരളത്തില്‍ നിന്നും ദേശീയ നേതൃത്വത്തിലേക്ക് തെരഞ്ഞെടുക്കപ്പെട്ടവര്‍ യോഗ്യതയുള്ളവരാണെന്നും അദ്ദേഹം പറഞ്ഞു. പുതുപ്പള്ളിയിലെ വിജയത്തില്‍ അഭിമാനിക്കുന്നു എന്നും അതില്‍ ചെറിയ പങ്ക് വഹിക്കാന്‍ കഴിഞ്ഞതില്‍ അഭിമാനിക്കുന്നതായും, 20 ദിവസം തുടര്‍ച്ചയായി പുതുപ്പള്ളി മണ്ഡലത്തില്‍ ചെലവഴിച്ച് ചാണ്ടി ഉമ്മന്റെ വിജയത്തിന് വേണ്ടി പ്രവര്‍ത്തിച്ചു. തന്റെ സുഹൃത്തായ ഉമ്മന്‍ചാണ്ടിയുടെ മകന്റെ വിജയത്തിനായി പാര്‍ട്ടി തന്നെ ഏല്‍പ്പിച്ച ചുമതല ഭംഗിയായി നിറവേറ്റാനുമായി കോട്ടയത്തെ മൂന്‍ എംപി എന്ന നിലയില്‍ പുതുപ്പള്ളിയിലെ ജനങ്ങളുമായുള്ള ബന്ധം ഉപയോഗിക്കാനും കഴിഞ്ഞതായും രമേശ് ചെന്നിത്തല പറഞ്ഞു.
വിജയത്തില്‍ അഹങ്കരിക്കാനില്ലെന്നും തൃക്കാക്കരയിലെയും പുതുപ്പള്ളിയിലെയും കൂറ്റന്‍ വിജയങ്ങള്‍ കോണ്‍ഗ്രസിന് കൂടുതല്‍ ഉത്തരവാദിത്വം നല്‍കിയിരിക്കുകയാണ് എന്നും ലോക്‌സഭാ തെരഞ്ഞെടുപ്പില്‍ 20 മണ്ഡലങ്ങളിലേക്കും വ്യാപിപ്പിക്കാനാണ് ശ്രമിക്കുന്നതെന്നും ചെന്നിത്തല കൂട്ടിച്ചേർത്തു. . പാര്‍ലമെന്റ് തെരഞ്ഞെടുപ്പില്‍ കോണ്‍ഗ്രസ് ഒറ്റക്കെട്ടായുള്ള പ്രവര്‍ത്തനമാണ് നടത്തേണ്ടതെന്നും അദ്ദേഹം വ്യക്തമാക്കി.

ചാണ്ടി ഉമ്മന്‍ ഇന്ന് എംഎല്‍ എയായി സത്യപ്രതിജ്ഞ ചെയ്തു. . രാവിലെ ചോദ്യോത്തര വേളക്ക് ശേഷം പത്തുമണിക്കായിരുന്നു നിയമസഭയിലെ സത്യപ്രതിജ്ഞ. . ചാണ്ടി ഉമ്മന്‍ നിയമ സഭയിലേക്കെത്തുന്നത് പുതുപ്പള്ളി നിയോജക മണ്ഡലത്തില്‍ നിന്നും 37.719 വോട്ടുകളുടെ ചരിത്ര ഭൂരിപക്ഷത്തോടെയാണ്.
മണ്ഡല ചരിത്രത്തിലെ ഏറ്റവും ഉയര്‍ന്ന ഭൂരിപക്ഷമാണ് യുഡിഎഫ് സ്ഥാനാര്‍ത്ഥിയുടേത്. പോള്‍ ചെയ്ത വോട്ടിന്റെ 61 ശതമാനവും ചാണ്ടി ഉമ്മന്‍ വാരി കൂട്ടി. 14.726 വോ്ട്ടുകള്‍ കഴിഞ്ഞ തവണത്തേക്കാള്‍ യു ഡി എഫിന് കൂടിയപ്പോള്‍ 12,684 വോട്ടുകള്‍ എല്‍ ഡി എഫിന് കുറഞ്ഞു. ബിജെപിക്കാവട്ടെ വെറും 6447 വോട്ടുകല്‍ മാത്രമാണ് നേടാന്‍ കഴിഞ്ഞത്.പുതുപ്പള്ളിയില്‍ എല്ലാ വിഭാഗം ജനങ്ങളും ഉമ്മന്‍ചാണ്ടിയുടെ മകന്‍ ചാണ്ടി ഉമ്മന് വോട്ട് ചെയ്തുവെന്നായിരുന്നു കോണ്‍ഗ്രസ് നേതാവ് എ.കെ. ആന്റണിയുടെ പ്രതികരണം. തന്റെ കൂടെ നിയമസഭയില്‍ വന്ന ഉമ്മന്‍ചാണ്ടി ഇന്നില്ല. ഉമ്മന്‍ചാണ്ടിയുടെ പിന്‍ഗാമി ചാണ്ടി ഉമ്മനാണെന്നും എകെ ആന്റണി പറഞ്ഞു. എംഎല്‍എ ആയതിന് ശേഷം തിരുവനന്തപുരത്തെ എകെ ആന്റണിയുടെ വീട്ടില്‍ സന്ദര്‍ശിക്കുകയായിരുന്നു ചാണ്ടി ഉമ്മന്‍. തന്റെ പിതാവിന് നല്‍കിയ പിന്തുണ എ.കെ. ആന്റണി തനിക്കും തന്നുവെന്ന് ചാണ്ടി ഉമ്മന്‍ പ്രതികരിച്ചു.
53 വര്‍ഷം പുതുപ്പള്ളിയെ നിയമസഭയില്‍ പ്രതിനിധീകരിച്ച ഉമ്മന്‍ ചാണ്ടിയുടെ റെക്കോര്‍ഡ് ഭൂരിപക്ഷത്തിനെയും മറികടന്നായിരുന്നു ചാണ്ടി ഉമ്മന്റെ ജയം. ജെയ്ക്ക് സി തോമസിനെ ചാണ്ടി ഉമ്മന്‍ ബഹുദൂരം പിന്നിലാക്കി. ഒരു ഘട്ടത്തില്‍ പോലും ചാണ്ടിയെ മുന്നേറാന്‍ ജെയ്ക് സി തോമസിനായില്ലെന്നത് ശ്രദ്ധേയമാണ്.