Entertainment (Page 165)

സിനിമയില്‍ നിന്ന് മാറി നിന്ന കാലത്തെ കുറിച്ച് മനസ്സ് തുറന്ന് നടന്‍ സുരേഷ് ഗോപി. രണ്ടാംഭാവത്തിന്റെ പരാജയം എന്നെ തളര്‍ത്തി, അതിന് ശേഷമാണ് ഇനി സിനിമ ചെയ്യുന്നില്ലെന്ന് തീരുമാനിക്കുന്നത്. എന്നാല്‍, കുറച്ചു കാലം കഴിഞ്ഞ് രണ്‍ജിപണിക്കരെ വിളിച്ചിട്ട് നമുക്കൊരു സിനിമ ചെയ്യണം. വീണ്ടും എന്റെ ഫ്ളക്സ് വരണമെന്നൊക്കെ പറഞ്ഞു. രണ്‍ജി ഒരാഴ്ച കഴിഞ്ഞ് വിളിച്ചിട്ട് പറഞ്ഞു, സിനിമയൊക്കെ ചെയ്യാം പക്ഷെ നീ പഴയതുപോലെ തെറി പറയണം, സിഗരറ്റും വലിക്കണം. അങ്ങനെയുണ്ടെങ്കില്‍ ചെയ്യാം. അങ്ങനെയായിരുന്നു ഭരത്ചന്ദ്രന്‍ ഐപിഎസ് സംഭവിച്ചത്.

വരനെ ആവശ്യമുണ്ട് എന്ന കഥ കേട്ടപ്പോള്‍ തന്നെ ഇഷ്ടമായിരുന്നു, പക്ഷെ ആ ചിത്രം താമസിക്കാന്‍ കാരണം ശോഭന ഡേറ്റ് നല്‍കാന്‍ ഒരു വര്‍ഷമെടുത്തു. സെറ്റിലേക്ക് പോകാന്‍ തീരുമാനിച്ച ദിവസം രാവിലെ വീട്ടില്‍ വന്ന ഒരു സന്ദര്‍ശകന്‍ പറഞ്ഞ കാര്യം കേട്ട് അതിയായ വിഷമം തോന്നിയിട്ട് ഈ സിനിമയില്‍ അഭിനയിക്കേണ്ട എന്ന് വരെ തീരുമാനിച്ചിരുന്നു. ബുക്ക് ചെയ്ത വിമാന ടിക്കറ്റും അന്ന് കാന്‍സല്‍ ചെയ്യുകയായിരുന്നു.

സര്‍ വന്നില്ലെങ്കില്‍ ഈ സിനിമ ഞാന്‍ ചെയ്യില്ലെന്ന് പിന്നീട് അനൂപ് പറയുകയായിരുന്നു. ഇത് മുടങ്ങിയാല്‍ അതിന്റെ പാപം ഞാന്‍ സാറിന്റെ മുകളിലില്‍ ഇടും. സാര്‍ ഇല്ലെങ്കില്‍ ശോഭന മാഡത്തിന്റെ ഡേറ്റും വേണ്ടെന്ന് പറഞ്ഞു. അതു കേട്ടപ്പോള്‍ സന്ദര്‍ശകനോട് നിങ്ങള്‍ നിങ്ങളുടെ കാര്യം ചെയ്യൂ എന്ന് പറഞ്ഞ് ഞാന്‍ ചെന്നൈയ്ക്ക് പോവുകയായിരുന്നു. അങ്ങനെയാണ് വരനെ ആവശ്യമുണ്ട് എന്ന ചിത്രം പൂര്‍ത്തിയാക്കുന്നത്. സുരേഷ് ഗോപി വ്യക്തമാക്കി.

മകന്‍ ഗോകുല്‍ സുരേഷിന്റെ അഭിനയ കാര്യങ്ങളില്‍ താന്‍ ഇടപെടാതിരുന്നതില്‍ ദുഖമുണ്ടെന്ന് നടന്‍ സുരേഷ് ഗോപി. മക്കള്‍ അവരുടെ വഴിക്ക് മുന്നോട്ട് പോകട്ടെ എന്ന ചിന്തയായിരുന്നു ഉണ്ടായിരുന്നതെന്നും, എന്നാല്‍, മകന്റെ പ്രകടനം തിയേറ്ററില്‍ കണ്ടപ്പോള്‍ ഡബ്ബിംഗ് തിയേറ്ററില്‍ താന്‍ ഉണ്ടായിരുന്നെങ്കില്‍ എന്ന് തോന്നിപ്പോയെന്നും സുരേഷ് ഗോപി പറഞ്ഞു. ഒരു അച്ഛന്‍ എന്ന നിലയില്‍ വലിയൊരു മഹാപാപിയാണെന്ന് ആ സമയത്ത് തോന്നിയെന്നും താരം വെളിപ്പെടുത്തുന്നു.

സുരേഷ് ഗോപിയുടെ വാക്കുകള്‍–

‘എന്റെ മകന്‍ വന്നതും, ഇന്ന് നടന്നു നീങ്ങുന്നതും, നാളെ ഒരു ഓട്ടക്കാരനാകാനുള്ള തയ്യാറെടുപ്പ് നടത്തുന്നതുമൊന്നും ഞാന്‍ കാണുന്നില്ല. ഒരു മില്ലി മീറ്ററിന്റെ ഫ്രാക്ഷന്‍ പോലും അവനെ ഞാന്‍ സപ്പോര്‍ട്ട് ചെയ്യുന്നില്ല. അവനൊരു നിര്‍ദേശം പോലും കൊടുക്കുന്നില്ല. ഇരയാണ് അവന്റെ ഒരു സിനിമ എന്ന നിലയില്‍ ആദ്യമായി തിയേറ്ററില്‍ പോയി കാണുന്നത്. അതും എന്റെ ഭാര്യ നിര്‍ബന്ധിച്ചതുകൊണ്ട്. അവന്റെ മനസിനെ വല്ലാതെ അത് ബാധിക്കുന്നുണ്ടാകണം എന്നു പറഞ്ഞതു കൊണ്ട് തിയേറ്ററില്‍ പോയി കണ്ടു.

പടം കണ്ടുകൊണ്ടിരുന്നപ്പോള്‍ ഒരിടത്താണ് ഒരു അച്ഛന്‍ എന്ന നിലയില്‍ വലിയൊരു മഹാപാപിയാണെന്ന് തോന്നല്‍ എനിക്കുണ്ടായത്. കുഞ്ഞിന്റെ കാര്യത്തില്‍ ഞാന്‍ ശ്രദ്ധിക്കണമായിരുന്നു. ചാന്‍സ് വാങ്ങികൊടുക്കുന്നതിനോ പ്രൊമോട്ട് ചെയ്യുന്നതിനോ അല്ല, ഇന്നുവരെ ഞാനത് ആര്‍ക്കും ചെയ്തിട്ടുമില്ല. അവന്റെ ക്രിയേറ്റീവ് എബിലിറ്റി വളര്‍ത്തുന്നതിന് വേണ്ടി എനിക്ക് പ്രാപ്യമായ ഒരു എക്സ്പീരിയന്‍സുണ്ട്. അതിന്റെ ഒരംശം ഞാന്‍ നല്‍കണ്ടേ? ഞാനല്ലേ അവന് എല്ലാം നല്‍കിയത്. സിനിമയിലെ ഒരു സീനില്‍ അവന്‍ ഡബ്ബ് ചെയ്ത സമയത്ത്, ഡബ്ബിംഗ് തിയേറ്ററില്‍ ഞാനുണ്ടായിരുന്നെങ്കില്‍ എന്ന് എനിക്ക് തോന്നിപ്പോയി. ഒന്നുകൂടി എന്റെ കുഞ്ഞിനെ എനിക്ക് നന്നാക്കാമായിരുന്നു.’