മുബൈയില്‍ നിന്ന് മംഗലാപുരം വരെ യാത്ര ചെയ്‌തെങ്കിലും റോഡില്‍ ഒറ്റ കുഴി പോലുമില്ല; പ്രതികരണവുമായി കുഞ്ചാക്കോ ബോബന്‍
തിരുവോണ ദിനം തിയേറ്ററിലെത്തുന്ന ഒറ്റ് എന്ന ചിത്രത്തിന്റെ പ്രചാരണത്തിനിടെ റോഡുകളിലെ കുഴിയുമായി ബന്ധപെട്ട് പരോക്ഷ വിമര്‍ശനവുമായി നടന്‍ കുഞ്ചാക്കോ ബോബന്‍. ഒറ്റ് എന്ന പുതിയ ചിത്രത്തില്‍ മുബൈയില്‍ നിന്ന് മംഗലാപുരം വരെ യാത്ര ചെയ്‌തെങ്കിലും റോഡില്‍ ഒറ്റ കുഴി പോലുമില്ലെന്ന് കുഞ്ചാക്കോ ബോബന്‍ പറഞ്ഞു. തിരുവോണ ദിനം തിയേറ്ററിലെത്തുന്ന ചിത്രത്തിന്റെ പ്രചാരണ പരിപാടിക്കിടെയായിരുന്നു താരത്തിന്റെ പ്രതികരണം.
റോഡില്‍ കുഴികളില്ലാത്തതിനാല്‍ പ്രേക്ഷകര്‍ക്ക് ധൈര്യപൂര്‍വം തിയേറ്ററുകളിലേക്ക് വരാം. മംഗലാപുരം മുതല്‍ കൊച്ചി വരെ റോഡ് പണി നടന്നുകൊണ്ടിരിക്കുകയാണ്. ചില ചിത്രങ്ങള്‍ മൂലം നല്ല കാര്യങ്ങള്‍ സംഭവിക്കുമെന്നും താരം കൂട്ടിച്ചേര്‍ത്തു. ന്നാ താന്‍ കേസ് കൊട് എന്ന ചിത്രത്തിന്റെ വിജയം പരസ്യ വാചകത്തിന്റെ പേരില്‍ വിമര്‍ശിച്ചവര്‍ക്കുള്ള മറുപടി കൂടിയാണെന്ന് കുഞ്ചാക്കോ ബോബന്‍ പറഞ്ഞു. എന്താണ് നമ്മള്‍ ഉദ്ദേശിക്കുന്നതെന്ന് മനസിലാക്കാതെ ആളുകള്‍ മറ്റ് രീതിയില്‍ അതിനെ വ്യാഖ്യാനിക്കുന്ന സാഹചര്യമുണ്ടാകാറുണ്ട്. ഉദ്ദേശ ശുദ്ധി മനസിലാക്കാതെ ചിലര്‍ക്ക് തങ്ങള്‍ പറയുന്നതാണ് കാര്യമെന്ന് വരുത്തി തീര്‍ക്കാനുള്ള വ്യഗ്രത എന്തിനാണെന്ന് മനസിലാകുന്നില്ല. ആക്ഷേപഹാസ്യം ആസ്വദിക്കാന്‍ കഴിവുള്ളവരാണ് മലയാളികളെന്നും വേറൊരു രീതിയില്‍ ആക്ഷേപഹാസ്യത്തെ കാണരുതെന്നും ചാക്കോച്ചന്‍ അഭിപ്രായപ്പെട്ടു. ന്നാ താന്‍ കേസ് കൊട് എന്ന ചിത്രത്തിന്റെ റിലീസിനോടനുബന്ധിച്ച് കഴിഞ്ഞ മാസം ഏഴിന് പത്രങ്ങളില്‍ പ്രസിദ്ധീകരിച്ച ‘തിയേറ്ററുകളിലേക്കുള്ള വഴിയില്‍ കുഴിയുണ്ട്, എന്നാലും വന്നേക്കണേ’ എന്ന ചിത്രത്തിന്റെ പോസ്റ്ററിലെ പരസ്യവാക്യത്തിനെതിരെ ശക്തമായ പ്രതിഷേധമുയര്‍ന്നിരുന്നു. പരസ്യത്തിനെ അനുകൂലിച്ചും പ്രതികൂലിച്ചും സമൂഹ മാധ്യമങ്ങളിലൂടെ നിരവധി പേരാണ് രംഗത്ത് എത്തിയത്.
