കൊച്ചി: കേരളത്തിലേക്ക് മയക്കു മരുന്ന് എത്തിക്കുന്ന സംഘത്തിലെ പ്രധാന കണ്ണി അറസ്റ്റിൽ. ആഫ്രിക്കൻ യുവതിയാണ് പോലീസിന്റെ പിടിയിലായത്. സംസ്ഥാനത്തേക്ക് അതിതീവ്ര ലഹരിമരുന്നായ എംഡിഎംഎ എത്തിക്കുന്ന സംഘത്തിലെ പ്രധാനിയായ യുവതിയെയാണ് പിടികൂടിയതെന്ന് പാലാരിവട്ടം പോലീസ് അറിയിച്ചു.
ആഫ്രിക്കയിലെ ഘാന സ്വദേശിനിയായ ഏഞ്ചല്ല തക്വിവായെയാണ് അറസ്റ്റ് ചെയ്തത്. ബംഗളൂരുവിൽ വച്ചാണ് പാലാരിവട്ടം പോലീസ് ഇവരെ പിടികൂടിയത്. ജൂലൈ 20 ന് കൊച്ചി കലൂർ സ്റ്റേഡിയത്തിനരികെ പാർക്ക് ചെയ്ത വാഹനത്തിൽ നിന്നും 102 ഗ്രാം എംഡിഎംഎ പൊലീസ് പിടികൂടിയിരുന്നു. ഈ കേസുമായി ബന്ധപ്പെട്ട അന്വേഷണത്തിലാണ് യുവതി വലയിലായത്.
ലഹരിക്കടത്തുമായി ബന്ധപ്പെട്ട് നൈജീരിയൻ സ്വദേശി ഒക്കാഫോർ എസേ ഇമ്മാനുവൽ ഉൾപ്പെടെ ആറ് പേർ നേരത്തെ പിടിയിലായിരുന്നു. ഇവരെ ചോദ്യം ചെയ്‌തോടെയാണ് ഏഞ്ചലയെ കുറിച്ച് വിവരം ലഭിച്ചത്. സംസ്ഥാനത്തേക്ക് എംഡിഎംഎ കൂടുതലായി എത്തുന്നത് ഡൽഹി, ബംഗളൂരു എന്നിവിടങ്ങളിൽ നിന്നാണ്. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്നും അധികൃതർ വ്യക്തമാക്കി.