ഗവർണറുടെ പെരുമാറ്റം മാതൃകാപരം; ആരിഫ് മുഹമ്മദ് ഖാനെ പുകഴ്ത്തി സിപിഎം എംഎൽഎ
ആലപ്പുഴ: ഗവർണർ ആരിഫ് മുഹമ്മദ് ഖാനെ പുകഴ്ത്തി സിപിഎം എംഎൽഎ യു പ്രതിഭ. രാഷ്ട്രീയ അഭിപ്രായങ്ങൾ വ്യത്യസ്തമാണെങ്കിലും ഗവർണറുടെ പെരുമാറ്റം മാതൃകാപരമാണെന്ന് പ്രതിഭ പറഞ്ഞു. സംസ്ഥാന സർക്കാരും ഗവർണറും തമ്മിലുള്ള പോര് കനക്കുന്നതിനിടെയാണ് പ്രതിഭ ഗവർണറെ പ്രശംസിച്ച് രംഗത്തെത്തിയത്. ചെട്ടിക്കുളങ്ങര ഹയർ സെക്കൻഡറി സ്‌കൂൾ നവതി ആഘോഷച്ചടങ്ങിൽ സംസാരിക്കവെയായിരുന്നു എംഎൽഎയുടെ പരാമർശം. ഗവർണർ വേദിയിലിരിക്കെയായിരുന്നു എംഎൽഎയുടെ വാക്കുകൾ.
എല്ലാവരോടും സ്‌നേഹത്തോടെയാണ് ഗവർണർ പെരുമാറുന്നത്. എല്ലാവരോടും അദ്ദേഹത്തിന് കരുതലുണ്ട്. മലയാളം പഠിക്കാൻ ഗവർണർ കാണിക്കുന്ന ഉത്സാഹവും കേരളീയ വേഷത്തോടുളള അദ്ദേഹത്തിന്റെ ഇഷ്ടവും പ്രശംസനീയമാണെന്നും പ്രതിഭ അറിയിച്ചു.
അതേസമയം, ചെട്ടികുളങ്ങര പഞ്ചായത്ത് പ്രസിഡന്റിന്റെ ആരോഗ്യനില മോശമാണെന്ന് ചടങ്ങിൽ പറഞ്ഞപ്പോൾ വേദിയിൽ നിന്ന് അദ്ദേഹത്തിന്റെ അടുത്തെത്തി ഗവർണർ വിശേഷങ്ങൾ ചോദിച്ചറിഞ്ഞു. വിദ്യാഭ്യാസ മന്ത്രി വി ശിവൻകുട്ടിക്കും ഈ ചടങ്ങിലേക്ക് ക്ഷണിച്ചിരുന്നു. എന്നാൽ മറ്റ് തിരക്കുകൾ മൂലം അദ്ദേഹത്തിന് ചടങ്ങിൽ പങ്കെടുക്കാൻ കഴിഞ്ഞില്ല.
