ഫിഫ ലോകകപ്പ് ഫുട്ബാൾ ടൂർണമെന്റ്; യോഗ്യതാ മത്സരത്തിന്റെ രണ്ടാം റൗണ്ട് വ്യാഴാഴ്ച്ച

On: March 19, 2024

റിയാദ്: 2026ൽ നടക്കാനിരിക്കുന്ന ഫിഫ ലോകകപ്പ് ഫുട്ബാൾ ടൂർണമെന്റിലേക്കും 2027ൽ സൗദിയിൽ നടക്കാനിരിക്കുന്ന ഏഷ്യൻ കപ്പ് ടൂർണമെന്റിലേക്കുമുള്ള സംയുക്ത യോഗ്യതാ മത്സരത്തിന്റെ രണ്ടാം റൗണ്ടിൽ ഇന്ത്യ അഫ്ഗാനിസ്ഥാനെ നേരിടും. വ്യാഴാഴ്ച രാത്രി 10ന് സൗദി അറേബ്യയിലെ അബഹയിലെ ‘ദമാക് മൗണ്ടൈൻ’ എന്നറിയപ്പെടുന്ന അമീർ സുൽത്താൻ ബിൻ അബ്ദുൽ അസീസ് സ്റ്റേഡിയത്തിലാണ് മത്സരം നടക്കുന്നത്.

ഇന്ത്യ, കുവൈത്ത്, ഖത്തർ, അഫ്ഗാനിസ്ഥാൻ എന്നിവരടങ്ങിയ ‘എ ഗ്രൂപ്പി’ൽ നിലവിൽ മൂന്ന് പോയന്റുമായി മൂന്നാം സ്ഥാനത്താണ് ഇന്ത്യ. ആറ് പോയിന്റുമായി ഖത്തർ ആണ് ഗ്രൂപ്പിൽ ഒന്നാം സ്ഥാനത്ത്. രണ്ടു മത്സരങ്ങളിലും പരാജയമേറ്റുവാങ്ങിയ അഫ്ഗാനിസ്ഥാന് നിലവിൽ പോയിന്റൊന്നുമില്ല.

യോഗ്യത റൗണ്ടിന്റെ ഇന്ത്യയിൽ നടന്ന ആദ്യ പാദത്തിൽ എതിരില്ലാത്ത മൂന്ന് ഗോളുകൾക്ക് ഖത്തറിനോട് ഇന്ത്യ പരാജയപ്പെട്ടിരുന്നു. എന്നാൽ കുവൈത്തിൽ നടന്ന മത്സരത്തിൽ കുവൈത്തിനെ എതിരില്ലാത്ത ഒരു ഗോളിന് ഇന്ത്യ പരാജയപ്പെടുത്തി.

Previous Post: പൗരത്വ ഭേദഗതി നിയമത്തിന് തത്ക്കാലം സ്റ്റേയില്ല; കേന്ദ്രത്തിന് മറുപടി നൽകാൻ മൂന്നാഴ്ച്ച സമയം

Next Post: വേനൽച്ചൂട്; തീപിടിത്തങ്ങൾ ഒഴിവാക്കാൻ ഇക്കാര്യങ്ങൾ ശ്രദ്ധിക്കുക

പാർട്ടിക്കുള്ളിൽ അവഗണന നേരിടുന്നു; പ്രചാരണ സമിതിയിൽ നിന്നും രാജിവച്ച് മഹാരാഷ്ട്രയിലെ മുതിർന്ന നേതാവ്

മുംബൈ: മഹാരാഷ്ട്രയിലെ മുതിർന്ന കോൺഗ്രസ് നേതാവും മുൻ മന്ത്രിയുമായ മുഹമ്മദ് ആരിഫ് നസീം ഖാൻ പ്രചാരണ സമിതിയിൽ നിന്നും രാജിവച്ചു. പാർട്ടിക്കുള്ളിൽ അവഗണന നേരിടുന്നുവെന്ന ആരോപണം ഉന്നയിച്ചാണ് അദ്ദേഹത്തിന്റെ രാജി. ദീർഘകാലമായി പിന്തുടരുന്ന പ്രത്യയ ശാസ്ത്രത്തിൽ നിന്ന് കോൺഗ്രസ് വ്യതിചലിച്ചെന്ന് ആരോപിച്ചാണ് അദ്ദേഹം രാജിവെച്ചത്. ലോക്സഭാ തിരഞ്ഞെടുപ്പിൽ സംസ്ഥാനത്തെ ഒരു മുസ്ലിം നേതാവിനെ പോലും മഹാ വികാസ് അഘാഡി സഖ്യം (എംവിഎ) സ്ഥാനാർത്ഥിയായി പരിഗണിച്ചില്ലെന്നും അതിനാൽ പ്രചാരണ സമിതിയിൽ നിന്ന് രാജിവെക്കുന്നതെന്നും അദ്ദേഹം അറിയിച്ചു. ഇക്കാര്യം വ്യക്തമാക്കി അദ്ദേഹം കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയ്ക്ക് കത്തയക്കുകയും ചെയ്തു. മൊത്തം 48 സീറ്റിൽ ഒരു മുസ്ലിം സ്ഥാനാർത്ഥിയെ പോലും എംവിഎ നിർത്തിയില്ല. ന്യൂനപക്ഷ സമുദായത്തിൽനിന്ന് ഒരു മുസ്ലിം സ്ഥാനാർത്ഥിയേയെങ്കിലും കോൺഗ്രസ് നോമിനേറ്റ് ചെയ്യുമെന്ന് സംസ്ഥാനത്തെ മുസ്ലിം സംഘടനകളും പാർട്ടി പ്രവർത്തകരും കരുതിയിരുന്നു. പക്ഷെ നിർഭാഗ്യവശാൽ അത് സംഭവിച്ചില്ലെന്ന് അദ്ദേഹം വ്യക്തമാക്കി. എന്തുകൊണ്ട് തങ്ങളെ അവഗണിച്ചു എന്നാണ് ന്യൂനപക്ഷ സംഘടനകളും പാർട്ടി പ്രവർത്തകരും തന്നോട് ചോദിക്കുന്നത്. ന്യൂനപക്ഷവിഭാഗത്തോട് എന്തുകൊണ്ട് ഇത്തരത്തിലുള്ള അനീതി കാട്ടുന്നുവെന്ന ചോദ്യത്തെ അഭിമുഖീകരിക്കാൻ തനിക്ക് കഴിയുന്നില്ല. എല്ലാ സമുദായങ്ങൾക്കും പ്രാതിനിധ്യം നൽകുന്ന പ്രത്യയശാസ്ത്രത്തിൽ നിന്നും കോൺഗ്രസ് വ്യതിചലിച്ചെന്നും ആരിഫ് നസീം ഖാൻ കൂട്ടിച്ചേർത്തു.
മാതൃകാപരം; അപൂര്‍വരോഗം ബാധിച്ച 12 വയസ് വരെയുള്ള കുട്ടികള്‍ക്ക് സൗജന്യ മരുന്ന് വിതരണം ആരംഭിച്ച് കേരളം

തിരുവനന്തപുരം: അപൂർവ രോഗമായ സ്‌പൈനൽ മസ്‌കുലർ അട്രോഫി (എസ്.എം.എ) അസുഖം ബാധിച്ച 12 വയസ് വരെയുള്ള കുട്ടികൾക്കുള്ള സൗജന്യ മരുന്ന് വിതരണം ആരംഭിച്ചു. ആരോഗ്യമന്ത്രി വീണാ ജോർജാണ് ഇക്കാര്യം അറിയിച്ചത്. 6 വയസ് വരെയുള്ള കുട്ടികൾക്ക് നൽകിയിരുന്ന മരുന്നാണ് 12 വയസ് വരെയാക്കിയത്. ആദ്യ ഘട്ടത്തിൽ 10 കുട്ടികൾക്കാണ് വിലകൂടിയ മരുന്ന് നൽകിയത്. ഇതുവരെ 57 കുട്ടികൾക്കാണ് മരുന്ന് നൽകിയത്. 12 വയസ് വരെ ചികിത്സ ഉയർത്തുമ്പോൾ 23 കുട്ടികൾക്കും കൂടി മരുന്ന് നൽകുന്നതാണ്. നവകേരള സദസ്സിനിടെ എസ്.എം.എ. ബാധിതയും കോഴിക്കോട് സ്വദേശിയുമായ സിയ മെഹ്റിൻ തന്റെ അനുഭവം പങ്കുവയ്ക്കുന്നതിനിടേയാണ് അപൂർവ രോഗത്തിനുള്ള മരുന്ന് വിതരണം 6 വയസിന് മുകളിലുള്ള കുട്ടികൾക്കും ലഭ്യമാക്കിയാൽ സഹായകരമാണെന്ന ആവശ്യം ഉന്നയിച്ചത്. സംസ്ഥാനത്തിന്റെ പല ഭാഗത്ത് നിന്നും ഇതേ ആവശ്യം ഉന്നയിച്ചിരുന്നു. നട്ടെല്ലിന്റെ വളവ് പരിഹരിക്കുന്നതിനുള്ള സൗജന്യ ശസ്ത്രക്രിയ ആദ്യമായി നടത്തിയത് സിയാ മെഹ്റിനിലാണ്. ഇക്കാര്യം പരിശോധിച്ച് നടപടിയെടുക്കുമെന്ന് ബഹു. മുഖ്യമന്ത്രി പ്രഭാത യോഗത്തിൽ തന്നെ പറഞ്ഞിരുന്നു. തുടർന്നാണ് സർക്കാർ തലത്തിൽ ചർച്ച ചെയ്ത് 6 വയസിന് മുകളിലുള്ള കുട്ടികൾക്കും സൗജന്യ മരുന്ന് നൽകാൻ കഴിഞ്ഞ മാസം തീരുമാനമെടുത്തതെന്ന് വീണാ ജോർജ് കൂട്ടിച്ചേർത്തു.
വസ്ത്രം മാറുമ്പോൾ വാതിൽ തള്ളിത്തുറക്കാൻ ശ്രമിച്ചു; സീരിയൽ നിർമാതാവിനെതിരെ ഗുരുതര ആരോപണങ്ങളുമായി നടി

സീരിയൽ നിർമാതാവിനെതിരെ ഗുരുതര ആരോപണങ്ങളുമായി നടി രംഗത്ത്. നടി കൃഷ്ണ മുഖർജിയാണ് സീരിയൽ നിർമ്മാതാവിനെതിരെ രംഗത്തെത്തിയത്. താൻ അഭിനയിച്ചുകൊണ്ടിരുന്ന ശുഭ് ശകുൻ എന്ന പരമ്പരയുടെ സെറ്റിൽ വെച്ച് ധാരാളം ദുരനുഭവങ്ങൾ നേരിടേണ്ടി വന്നെന്നാണ് നടിയുടെ വെളിപ്പെടുത്തൽ. ശുഭ് ശകുൻ എന്ന പരമ്പരയെ കുറിച്ചും നിർമ്മാതാവ് കുന്ദൻ സിംഗിനെ കുറിച്ചുമാണ് നടി തുറന്നു പറച്ചിലുകൾ നടത്തിയിരിക്കുന്നത്. എല്ലാം തുറന്നുപറയാനുള്ള ധൈര്യം ഇതുവരെ ഇല്ലായിരുന്നെങ്കിലും ഇനിയത് പിടിച്ചുവെയ്‌ക്കേണ്ടതില്ലെന്ന് തീരുമാനിച്ചു. ഏറെ വിഷമതകൾ നിറഞ്ഞ സമയത്തിലൂടെയാണ് താൻ കടന്നുപോകുന്നത്. കഴിഞ്ഞ ഒന്നര വർഷം എന്റെ അവസ്ഥ അത്ര നല്ലതായിരുന്നില്ല. വിഷാദവും ഉത്കണ്ഠയും ബാധിച്ചു. ഒറ്റയ്ക്കായിരിക്കുമ്പോൾ ഉറക്കെ കരഞ്ഞു. അവസാനം പ്രദർശനത്തിനെത്തിയ ശ്ുഭ് ശകുൻ എന്ന പരമ്പര ചെയ്തു തുടങ്ങിയതാണ് എല്ലാത്തിന്റെയും ആരംഭം. ജീവിതത്തിലെടുത്ത ഏറ്റവും മോശം തീരുമാനമായിരുന്നു അത്. പ്രൊഡക്ഷൻ ഹൗസും നിർമാതാവും തന്നെ പലതവണ ഉപദ്രവിച്ചുവെന്ന് നടി വ്യക്തമാക്കി. കടുത്ത വിഷാദവും ഉത്കണ്ഠയും നിറഞ്ഞ നാളുകളിലൂടെയാണ് താൻ കടന്നുപോകുന്നത്. സുഖമില്ലാതിരുന്ന അവസരത്തിൽ തന്നെ മേക്കപ്പ് റൂമിൽ പൂട്ടിയിടുകപോലും ചെയ്തു. ചെയ്ത ജോലിക്ക് കൂലി നൽകിയിരുന്നില്ല. വസ്ത്രം മാറുന്ന സമയത്ത് മേക്കപ്പ് റൂമിന്റെ വാതിലിൽ അത് തകർക്കാനെന്നപോലെ അടിച്ചു. അഞ്ചുമാസത്തെ പ്രതിഫലമായി കിട്ടേണ്ടിയിരുന്നത് വലിയൊരു സംഖ്യയായിരുന്നു. ഇക്കാര്യം ഉന്നയിച്ച് ചാനൽ ഓഫീസിനെ സമീപിച്ചെങ്കിലും അനുകൂല നിലപാടുണ്ടായിരുന്നില്ലെന്നും കൃഷ്ണ മുഖർജി ആരോപിക്കുന്നു. തനിക്ക് ഭയവും അരക്ഷിതാവസ്ഥയും അനുഭവപ്പെട്ടു. സഹായത്തിനായി പലരേയും സമീപിച്ചെങ്കിലും ഒന്നും ഫലംചെയ്തില്ല. താനെന്താണ് ഷോ ചെയ്യാത്തതെന്ന് പലരും ചോദിക്കുന്നുണ്ട്. ഇതാണ് കാരണം. ഇതുപോലെ വീണ്ടും നടന്നാലോ എന്ന ഭയമാണ് തനിക്കെന്നും തനിക്ക് നീതി ലഭിക്കണമെന്നും നടി കൂട്ടിച്ചേർത്തു.
കോവളം – ബേക്കൽ ജലപാതയിൽ ടൂറിസം, വാണിജ്യ പദ്ധതികൾ നടപ്പിലാക്കൽ; സാദ്ധ്യതാപഠനം പുരോഗമിക്കുന്നു

കൊച്ചി: കോവളം – ബേക്കൽ ( കാസർകോട് ) ജലപാതയിൽ ടൂറിസം, വാണിജ്യ പദ്ധതികൾ നടപ്പിലാക്കാനുള്ള സാദ്ധ്യതാപഠനം പുരോഗമിക്കുന്നു. മലബാർ മേഖലയ്ക്ക് പ്രത്യേക പരിഗണന നൽകി വിശദമായ പദ്ധതി റിപ്പോർട്ട് തയ്യാറാക്കാനാണ് അധികൃതരുടെ തീരുമാനം. പൊതു സ്വകാര്യ പങ്കാളിത്തത്തിൽ (പി.പി.പി) നടപ്പാക്കുമെന്നാണ് അധികൃതർ അറിയിച്ചിരിക്കുന്നത്. കൊല്ലം – കോട്ടപ്പുറം ദേശീയ ജലപാത ഉൾപ്പെടെ വെസ്റ്റ്‌കോസ്റ്റ് കനാലുമായി ബന്ധിപ്പിച്ചാണ് പദ്ധതികൾ. ജലപാത 13 ഭാഗങ്ങളായി തിരിച്ചാണ് സാദ്ധ്യതാ പഠനം. രണ്ടിടത്തെ പഠനം പൂർത്തിയായി. നാലിടത്ത് പഠനം അവസാനഘട്ടത്തിലാണ്. കോവളം- ബേക്കൽ ജലപാത വികസിപ്പിക്കുന്നത് കോസ്റ്റൽ ഷിപ്പിംഗ് ആൻഡ് ഇൻലാൻഡ് നാവിഗേഷൻ വകുപ്പും കൊച്ചി അന്താരാഷ്ട്ര വിമാനത്താവള കമ്പനിയും (സിയാൽ) ചേർന്ന് രൂപീകരിച്ച കേരള വാട്ടർവേയ്സ് ആൻഡ് ഇൻഫ്രാസ്ട്രക്ചേഴ്സ് ലിമിറ്റഡ് (ക്വിൽ) കമ്പനിയാണ്. ഡി.പി.ആർ തയ്യാറാക്കുന്നത് ക്വിൽ നിയോഗിച്ച ഏജൻസികളാണ്. ജലകേളികൾ ഉൾപ്പെടെ ടൂറിസം പദ്ധതികൾ, മത്സ്യസംസ്‌കരണ കേന്ദ്രങ്ങൾ, ഭക്ഷ്യസംരംഭങ്ങൾ തുടങ്ങിയവ ആവിഷ്‌കരിക്കുമെന്ന റിപ്പോർട്ടുകളും പുറത്തു വരുന്നുണ്ട്.
നടൻ സഹിൽ ഖാൻ അറസ്റ്റിൽ

ബോളിവുഡ് നടൻ സഹിൽ ഖാൻ അറസ്റ്റിൽ. മഹാദേവ് വാതുവെപ്പ് കേസുമായി ബന്ധപ്പെട്ടാണ് അറസ്റ്റ്. മുൻകൂർ ജാമ്യം തേടി സഹിൽ ഖാൻ സമർപ്പിച്ച ഹർജി മുംബൈ ഹൈക്കോടതി തള്ളിയിരുന്നു. അതിന് പിന്നാലെയാണ് സഹിൽ ഖാനെ അറസ്റ്റ് ചെയ്തത്. ചത്തീസ്ഗഢിൽ നിന്നാണ് താരം അറസ്റ്റിലായത്. ജാമ്യാപേക്ഷ തള്ളിയതിന് പിന്നാലെ സഹിൽ ഒളിവിൽ പോയിരുന്നു. 40 മണിക്കൂർ നീണ്ട തിരച്ചിലിനു ശേഷമാണ് താരത്തെ മുംബൈ പൊലീസ് സൈബർ സെല്ലിന്റെ പ്രത്യേക അന്വേഷണ സംഘം അറസ്റ്റ് ചെയ്തത്. താരത്തെ മുംബൈയിൽ എത്തിച്ച് കോടതിയിൽ ഹാജരാക്കുമെന്ന് പോലീസ് വ്യക്തമാക്കി. ഛത്തീസ്ഗഡിലെ സാമ്പത്തിക, റിയൽ എസ്റ്റേറ്റ് സ്ഥാപനങ്ങളും വിവാദമായ മഹാദേവ് വാതുവെപ്പ് ആപ്പിന്റെ പ്രമോട്ടർമാരും തമ്മിലുള്ള അനധികൃത ഇടപാടുകൾ സംബന്ധിച്ചാണ് പ്രത്യേക അന്വേഷണ സംഘം അന്വേഷണം നടത്തുന്നത്. ഛത്തീസ്ഗഢ് ഭിലായ് സ്വദേശികളായ സൗരഭ് ചന്ദ്രകർ, രവി ഉപ്പൽ എന്നിവർ ചേർന്ന് ദുബായിൽ നിന്ന് പ്രവർത്തിപ്പിക്കുന്ന ആപ്പാണ് മഹാദേവ്.