കലോത്സവം: കലാപ്രതിഭകൾക്ക് മാനസിക പിന്തുണയുമായി ജില്ലാ ലീഗൽ സർവ്വീസസ് അതോറിറ്റി

On: January 4, 2023

കോഴിക്കോട്: മാനസിക സംഘർഷങ്ങൾ ഇല്ലാതെ കലോത്സവത്തെ ആഘോഷമാക്കാൻ വിദ്യാർത്ഥികൾക്ക് പിന്തുണയുമായി ജില്ലാ ലീഗൽ സർവ്വീസസ് അതോറിറ്റി. കലോത്സവ വേദിയിൽ മത്സരത്തിനെത്തിയ വിദ്യാർത്ഥികൾക്ക് മാനസിക പിന്തുണയും കരുതലും നിയമ സഹായങ്ങളും നൽകുന്നതിനായി വിദഗ്ധരുടെ കൗൺസിലിംഗാണ് ഇവിടെ നൽകുന്നത്.

വിദ്യാർത്ഥികൾക്ക് പുറമെ അധ്യാപകർ, രക്ഷിതാക്കൾ എന്നിവർക്കും കൗൺസിലിംഗ് നൽകുന്നുണ്ട്. 4 ഡോക്ടർമാർ, 4 കൗൺസിലർമാർ എന്നിവരാണ് കൗൺസിലിംഗ് സേവനം ലഭ്യമാക്കുന്നത്. പൊതുജനങ്ങൾക്ക് നിയമങ്ങൾ സംബന്ധിച്ച ബോധവത്കരണവും നിയമ സഹായവും നൽകും. നിയമ ബോധവത്കരണം നടത്തുക, നിയമ അറിവുകൾ പങ്കുവെക്കുക, സഹായങ്ങൾ നൽകുക, നിയമ സംബന്ധിയായ പുസ്തകങ്ങൾ വിതരണം ചെയ്യുക തുടങ്ങിയ കാര്യങ്ങളും ഇവിടെ ചെയ്യുന്നുണ്ട്. കൂടാതെ ലീഗൽ സർവീസസ് അതോറിറ്റി പരിഗണിക്കുന്ന വിഭാഗത്തിലുള്ള പരാതികൾ നേരിട്ട് സ്വീകരിക്കുകയും ചെയ്യും.

ജില്ലാ കോടതി ജഡ്ജ് കൃഷ്ണകുമാർ, സബ് ജഡ്ജ് എം.പി ഷൈജൽ എന്നിവരുടെ നേതൃത്വത്തിൽ പ്രധാന വേദിയായ വിക്രം മൈതാനിയിലാണ് ലീഗൽ സർവീസസ് അതോറിറ്റിയുടെ സ്റ്റാൾ ഒരുക്കിയിട്ടുള്ളത്.

Previous Post: ചാൾസ് മൂന്നാമൻ രാജാവുമായി ടെലിഫോണിൽ സംസാരിച്ച് ഇന്ത്യൻ പ്രധാനമന്ത്രി; വിജയകരമായി ഭരണം നടത്താൻ കഴിയട്ടെയെന്ന് ആശംസ

Next Post: പ്രതിദിന വേതനം വര്‍ധിപ്പിക്കണം; നഴ്‌സുമാര്‍ വീണ്ടും സമരത്തിലേക്ക്‌

നാല് ഐ എസ് ഭീകരർ അറസ്റ്റിൽ; പിടിയിലായത് വിമാനത്താവളത്തിൽ നിന്നും

അഹമ്മദാബാദ്: നാല് ഐ എസ് ഭീകരർ അറസ്റ്റിൽ. അഹമ്മദാബാദ് വിമാനത്താവളത്തിൽ നിന്നാണ് ഭീകരർ അറസ്റ്റിലായത്. ഗുജറാത്ത് ഭീകരവിരുദ്ധ സ്‌ക്വാഡാണ് ഇവരുടെ അറസ്റ്റ് രേഖപ്പെടുത്തിയത്. അറസ്റ്റിലായവരെല്ലാം ശ്രീലങ്കൻ സ്വദേശികളാണ്. ഇവരുടെ ചിത്രങ്ങൾ എടിഎസ് പുറത്തുവിട്ടു. സംഭവത്തിന് പിന്നാലെ വിമാനത്താവളത്തിൽ സുരക്ഷ വർധിപ്പിച്ചു. സംഭവവുമായി ബന്ധപ്പെട്ട് കൂടുതൽ വിശദാംശങ്ങൾ ലഭ്യമായിട്ടില്ല. തിങ്കളാഴ്ച്ചയാണ് ഈ ഭീകരർ അഹമ്മദാബാദ് സർദാർ വല്ലാഭായ് പട്ടേൽ അന്താരാഷ്ട്ര വിമാനത്താവളത്തിലെത്തിയത്. നാലുപേരെയും എ.ടി.എസ്. അറസ്റ്റ് ചെയ്തതായും പിന്നാലെ ചോദ്യം ചെയ്യലിനായി രഹസ്യകേന്ദ്രത്തിലേക്ക് കൊണ്ടുപോയതായും മാദ്ധ്യമങ്ങൾ റിപ്പോർട്ട് ചെയ്യുന്നു. അതേസമയം, ഐപിഎൽ മത്സരത്തിനായി മൂന്ന് ടീമുകൾ അഹമ്മദാബാദിൽ എത്താനിരിക്കുകയാണ്. ഇതിനിടെയാണ് ഐഎസ് ഭീകരരായ നാലുപേർ വിമാനത്താവളത്തിൽ നിന്ന് പിടിയിലാകുന്നത്.
ഇന്ത്യൻ 2 ന്റെ റിലീസ് തീയതി പ്രഖ്യാപിച്ചു

കമൽഹാസൻ നായകനായെത്തുന്ന ഇന്ത്യൻ 2 ന്റെ റിലീസ് തീയതി ഔദ്യോഗികമായി പ്രഖ്യാപിച്ചു. 2024 ജൂലൈ 12 ന് ചിത്രം റിലീസ് ചെയ്യുമെന്ന് അണിയറ പ്രവർത്തകർ അറിയിച്ചു. ശങ്കറാണ് ചിത്രം സംവിധാനം ചെയ്തിരിക്കുന്നത്. 1996-ലെ ബോക്സ് ഓഫീസ് റെക്കോർഡുകൾ തകർത്ത ‘ഇന്ത്യൻ’ ചിത്രത്തിന്റെ രണ്ടാം ഭാഗമാണ് ഇന്ത്യൻ 2 . ഇന്ത്യൻ 2 ൽ അനിരുദ്ധ് രവിചന്ദർ ആണ് സംഗീത സംവിധാനം നിർവ്വഹിച്ചിരിക്കുന്നത്. സിദ്ധാർത്ഥ്, എസ് ജെ സൂര്യ, രാകുൽ പ്രീത് സിങ്, പ്രിയ ഭവാനി ശങ്കർ, കാളിദാസ് ജയറാം, നെടുമുടി വേണു, വിവേക്, ബോബി സിംഹ, ഗുരു സോമസുന്ദരം, മനോബാല, വെണ്ണെല കിഷോർ, ദീപ ശങ്കർ തുടങ്ങിയവർഇന്ത്യൻ 2 ൽ പ്രധാന വേഷത്തിൽ എത്തുന്നു. ലൈക്ക പ്രൊഡക്ഷൻസും റെഡ് ജെയ്ന്റ് മൂവീസും ചേർന്നാണ് ചിത്രം നിർമ്മിച്ചിരിക്കുന്നത്.
ബിജെപി ഒരിക്കലും ന്യൂനപക്ഷങ്ങൾക്കെതിരല്ല; പ്രതിപക്ഷത്തിന്റേത് പ്രീണന രാഷ്ട്രീയമാണെന്ന് പ്രധാനമന്ത്രി

ന്യൂഡൽഹി: ബിജെപി ഒരിക്കലും ന്യൂനപക്ഷങ്ങൾക്കെതിരല്ലെന്ന് പ്രധാനമന്ത്രി നരേന്ദ്ര മോദി. ന്യൂനപക്ഷങ്ങൾക്കെതിരെ താൻ ഒരു അക്ഷരം പോലും പറഞ്ഞിട്ടില്ലെന്നും അദ്ദേഹം വ്യക്തമാക്കി. പ്രതിപക്ഷത്തിനെതിരെ അദ്ദേഹം രൂക്ഷ വിമർശനം ഉന്നയിക്കുകയും ചെയ്തു. പ്രതിപക്ഷത്തിന്റേത് പ്രീണന രാഷ്ട്രീയമാണ്, കോൺഗ്രസിന്റെ വോട്ട് ബാങ്ക് രാഷ്ട്രീയത്തെയാണ് താൻ വിമർശിച്ചതെന്നും അദ്ദേഹം ചൂണ്ടിക്കാട്ടി. കോൺഗ്രസ് ഭരണഘടനക്കെതിരെ പ്രവർത്തിക്കുന്നു. മതാടിസ്ഥാത്തിൽ സംവരണം ഉണ്ടാകുന്നതിന് അംബേദ്കറും നെഹ്‌റുവും എതിരായിരുന്നുവെന്നും അദ്ദേഹം അറിയിച്ചു. ലോക്‌സഭാ തെരഞ്ഞെടുപ്പ് പ്രചാരണത്തിനിടെ രാജസ്ഥാനിലും ഉത്തർപ്രദേശിലും പ്രധാനമന്ത്രി നടത്തിയ പ്രസംഗങ്ങൾ വിവാദങ്ങൾ സൃഷ്ടിച്ചിരുന്നു. ഇന്ത്യാ സഖ്യം അധികാരത്തിൽ വന്നാൽ രാജ്യത്തെ ജനങ്ങളുടെ സ്വത്ത് അവർ കൂടുതൽ മക്കളുള്ളവർക്കും നുഴഞ്ഞുകയറ്റക്കാർക്കും നൽകും അത് വേണോ എന്നായിരുന്നു രാജസ്ഥാനിലെ പ്രസംഗത്തിൽ പ്രധാനമനത്രി നടത്തിയ പരാമർശം. കോൺഗ്രസ്- എസ്പി സഖ്യം ജയിച്ചാൽ അവർ ജനങ്ങളുടെ സമ്പത്ത് വോട്ട് ജിഹാദിന്റെ ആളുകൾക്ക് നൽകുമെന്നായിരുന്നു ഉത്തർപ്രദേശിൽ മോദി വ്യക്തമാക്കിയത്.
തിരുവനന്തപുരത്തെ റോഡുകളുടെ ദുരവസ്ഥ; ഇടപെട്ട് മനുഷ്യാവകാശ കമ്മീഷൻ

തിരുവനന്തപുരം: തിരുവനന്തപുരം നഗരത്തിലെ സ്മാർട്ട് റോഡുകളുടെ നിർമ്മാണം അനന്തമായി നീളുന്നതിൽ ഇടപെട്ട് മനുഷ്യാവകാശ കമ്മീഷൻ. ഇക്കാരണത്താൽ ജനങ്ങളുടെ സഞ്ചാര സ്വാതന്ത്ര്യം തടസപ്പെട്ടതിനെ കുറിച്ച് നഗരസഭാ സെക്രട്ടറി രണ്ടാഴ്ചക്കകം റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ ആവശ്യപ്പെട്ടു. കമ്മീഷൻ ആക്ടിംഗ് ചെയർപേഴ്‌സണും ജുഡീഷ്യൽ അംഗവുമായ കെ ബൈജൂനാഥാണ് നഗരസഭാ സെക്രട്ടറിക്ക് ഇതുസംബന്ധിച്ച നിർദ്ദേശം നൽകിയത്. മഴ പെയ്തതോടെ പലയിടങ്ങളിലും യാത്ര ദുസഹമായി മാറിയിരിക്കുകയാണ്. ജൂണിൽ കേസ് പരിഗണിക്കും. ഇവിടെയുള്ള വീട്ടുകാർക്ക് വലിയ കുഴികൾ ചാടികടന്നു വേണം പുറത്തുപോകേണ്ടത്. മഴ തുടങ്ങിയതോടെ നിർമ്മാണം നിലച്ചു. 273 കോടി മുടക്കിയാണ് റോഡുകൾ നവീകരിക്കുന്നത്. സ്‌കൂളുകളും കോളേജുകളും പ്രവർത്തിക്കുന്ന പ്രദേശങ്ങളിലെ റോഡുകളാണ് കുത്തിപൊളിച്ചത്. 28 റോഡുകളുടെ നവീകരണം ഇനി പൂർത്തിയാക്കാനുണ്ട്. ക്യത്യമായ ആസൂത്രണമില്ലായ്മയാണ് ഇപ്പോഴുണ്ടായ പ്രതിസന്ധിക്ക് കാരണമെന്നാണ് ആരോപണം.
ചെളിയിലും കെട്ടിക്കിടക്കുന്ന വെള്ളത്തിലും ഇറങ്ങുന്നവർ ഡോക്സിസൈക്ലിൻ കഴിക്കണം: നിർദ്ദേശവുമായി ആരോഗ്യ വകുപ്പ്

തിരുവനന്തപുരം: സംസ്ഥാനത്ത് ശക്തമായ മഴ തുടരുന്ന സാഹചര്യത്തിൽ ആരോഗ്യ വകുപ്പ് ജില്ലകൾക്ക് ജാഗ്രതാ നിർദേശം നൽകിയതായി ആരോഗ്യ വകുപ്പ് മന്ത്രി വീണാ ജോർജ്. കാലാവസ്ഥാ വ്യതിയാനം കാരണം നിരവധി പകർച്ചവ്യാധികൾ ഉണ്ടാകാൻ സാധ്യതയുണ്ട്. ആശുപത്രികൾക്കും ജാഗ്രതാ നിർദേശം നൽകിയിട്ടുണ്ട്. മരുന്നുകളുടെ ലഭ്യത ഉറപ്പാക്കാൻ നേരത്തെ തന്നെ നിർദേശം നൽകിയിട്ടുണ്ട്. കഴിഞ്ഞ യോഗത്തിൽ തീരുമാനമെടുത്ത പ്രകാരം എല്ലാ പ്രധാന ആശുപത്രികളിലും ഫീവർ ക്ലിനിക്കുകൾ പ്രവർത്തിക്കുന്നുണ്ടെന്ന് ഉറപ്പ് വരുത്തണം. ദുരിതാശ്വാസ ക്യാമ്പുകൾ ആരോഗ്യ വകുപ്പ് നൽകുന്ന നിർദേശങ്ങൾ കൃത്യമായി പാലിക്കണമെന്നും മന്ത്രി നിർദേശം നൽകി. മഴ തുടരുന്നതിനാൽ ഡെങ്കിപ്പനിയ്ക്കും എലിപ്പനിയ്ക്കും സാധ്യതയുണ്ട്. കൊതുകുകടി ഏൽക്കാതിരിക്കാൻ ശ്രദ്ധിക്കണം. കൊതുകിന്റെ ഉറവിടങ്ങൾ നശിപ്പിക്കാനുള്ള നടപടി സ്വീകരിക്കണം. എലിപ്പനി പ്രതിരോധം പ്രധാനമാണ്. ചെളിയിലോ മലിന ജലത്തിലോ കെട്ടിക്കിടക്കുന്ന മഴവെള്ളത്തിലോ ഇറങ്ങരുത്. അഥവാ ഇറങ്ങിയാൽ കൈകാലുകൾ സോപ്പ് ഉപയോഗിച്ച് വൃത്തിയായി കഴുകണം. വെള്ളത്തിലിറങ്ങുന്നവർ നിർബന്ധമായും എലിപ്പനി പ്രതിരോധ ഗുളികയായ ഡോക്‌സിസൈക്ലിൻ കഴിക്കണമെന്നാണ് നിർദ്ദേശം.