വല്ലാത്ത ക്ഷീണം അനുഭവപ്പെടുന്നുവെന്ന് ഒരിക്കലെങ്കിലും തോന്നാത്തവർ ഉണ്ടാകില്ല. വിവിധ രോഗങ്ങൾ കാരണമോ ജോലി, യാത്ര, ജീവിതരീതി, പ്രായം തുടങ്ങിയ കാരണങ്ങൾ മൂലമോ നമുക്ക് ക്ഷീണം അനുഭവപ്പെടാറുണ്ട്. ക്ഷീണം നമ്മുടെ ജീവിതത്തെ പല രീതിയിലും ബാധിക്കും. ജോലിയെ വരെ ചിലപ്പോൾ ഈ ക്ഷീണം പ്രതികൂലമായി ബാധിച്ചേക്കാനിടയുണ്ട്.
നന്നായി ഉറങ്ങിയിട്ടും സമയത്തിന് ആഹാരം കഴിച്ചിട്ടും ക്ഷീണം വിട്ടു മാറാതെ തുടരുന്നുണ്ടെങ്കിൽ അത് നിങ്ങളുടെ ഭക്ഷണക്രമത്തിൽ ആവശ്യമുള്ള പോഷകങ്ങൾ ഇല്ലാത്തതിനാലാകും. ഇത് തടയാൻ ശരീരത്തെ ഊർജ്ജസ്വലമാക്കാൻ സഹായിക്കുന്ന ഭക്ഷണം കഴിക്കേണ്ടതുണ്ട്. ഇത്തരത്തിലുള്ള അഞ്ച് സൂപ്പർ ഫുഡുകളെ പരിചയപ്പെടാം.
- ബീറ്റ്റൂട്ട്
ഇരുമ്പ് സത്ത് ധാരാളം അടങ്ങിയിട്ടുള്ള ഭക്ഷ്യവസ്തുവാണ് ബീറ്റ്റൂട്ട്. ശരീരത്തിന് ഊർജ്ജം പ്രദാനം ചെയ്യുന്ന കോശങ്ങളുടെ ഉത്പാദനക്ഷമത മെച്ചപ്പെടുത്തുന്ന നൈട്രേറ്റുകളും ബീറ്റ്റൂട്ടിൽ അടങ്ങിയിട്ടുണ്ട്. പോഷകങ്ങളുടെ കോശങ്ങളിലേക്കുള്ള വിതരണം മെച്ചപ്പെടുത്താനും ബീറ്റ്റൂട്ട് സഹായിക്കും.
- ചീര
പോഷക ഗുണങ്ങളുടെ കലവറയാണ് ചീര. ഇരുമ്പ് സത്തയും ചീരയിലുണ്ട്. ധാതുക്കളും വൈറ്റമിനുകളും ധാരാളം അടങ്ങിയിട്ടുള്ള ചീര കഴിക്കുന്നതിലൂടെ ശരീരത്തിന് ഊർജവും ഉണർവും ലഭിക്കും.
- മുട്ട
ഇരുമ്പ്, കൊളീൻ, വൈറ്റമിൻ ഡി, വൈറ്റമിൻ ബി-12 എന്നിവയാൽ സമ്പന്നമാണ് മുട്ട. ക്ഷീണമകറ്റാനും ദിവസം മുഴുവൻ ശരീരത്തിന് ഊർജ്ജം പകരാനും മുട്ട കഴിക്കുന്നത് സഹായിക്കും. ഉയർന്ന നിലവാരത്തിലുള്ള പ്രോട്ടീനും ആരോഗ്യകരമായ കൊഴുപ്പും മുട്ടയിൽ അടങ്ങിയിട്ടുണ്ട്.
- പഴം
സൂക്രോസ്, ഫ്രക്ടോസ്, ഗ്ലൂക്കോസ് എന്നീ ഘടകങ്ങൾ അടങ്ങിയിട്ടുള്ള ഭക്ഷ്യവസ്തുവാണ് പഴം. പൊട്ടാസ്യം, പ്രോട്ടീൻ, ഫൈബർ എന്നിവ പഴത്തിലുണ്ട്. ഊർജ്ജത്തിന്റെ തോത് ഉയർത്താൻ സഹായിക്കുന്ന കാർബോഹൈഡ്രേറ്റ്സും പഴത്തിൽ ധാരാളമുണ്ട്. രക്തസമ്മർദം നിയന്ത്രിക്കാനും പഴം കഴിക്കുന്നത് നല്ലതാണ്.
- ഈന്തപ്പഴം
ഊർജ്ജത്തിന്റെ കലവറയാണ് ഈന്തപ്പഴം. സെലെനീയം, കാത്സ്യം, ഫോസ്ഫറസ്, സൾഫർ, കോപ്പർ, മഗ്നീഷ്യം എന്നിവ ഈന്തപ്പഴത്തിൽ ധാരാളം അടങ്ങിയിരിക്കുന്നു. ദിവസവും രണ്ടോ മൂന്നോ ഈന്തപ്പഴം കഴിക്കുന്നത് ക്ഷീണം അകറ്റാൻ സഹായിക്കും.