ന്യൂഡല്‍ഹി: അസംഘടിത തൊഴിലാളികള്‍ക്കായി ഇ-ശ്രാം പോര്‍ട്ടല്‍ വികസിപ്പിച്ചെടുത്ത് കേന്ദ്ര സര്‍ക്കാര്‍. ഇന്ത്യന്‍ സര്‍ക്കാര്‍ തൊഴിലാളികള്‍ക്കായി ആരംഭിച്ച ഈ ദേശീയ ഡാറ്റാബേസ് അവരുടെ ആധാര്‍ കാര്‍ഡുകള്‍ ഉപയോഗിച്ച് സീഡ് ചെയ്യും. രാജ്യത്തെ 38 കോടിയിലധികം അസംഘടിത തൊഴിലാളികളെ (യുഡബ്ല്യു) ഒരു പോര്‍ട്ടലില്‍ രജിസ്റ്റര്‍ ചെയ്യും.
നിര്‍മ്മാണ തൊഴിലാളികള്‍, കുടിയേറ്റ തൊഴിലാളികള്‍, തെരുവ് കച്ചവടക്കാര്‍, വീട്ടുജോലിക്കാര്‍ തുടങ്ങി 38 കോടി അസംഘടിത തൊഴിലാളികളെ രജിസ്റ്റര്‍ ചെയ്യാനാണ് കേന്ദ്രം ലക്ഷ്യമിടുന്നത്. ഇ-ശ്രാം പോര്‍ട്ടലിന്റെ eshram.gov.in കീഴിലുള്ള രജിസ്ട്രേഷന് തികച്ചും സൗജന്യമാണ്, കൂടാതെ കോമണ്‍ സര്‍വീസ് സെന്ററുകളിലോ (CSC) അല്ലെങ്കില്‍ എവിടെയെങ്കിലും തൊഴിലാളികള്‍ അവരുടെ രജിസ്‌ട്രേഷനായി ഒന്നും നല്‍കേണ്ടതില്ല.
തൊഴിലാളികള്‍ക്ക് അവരുടെ ആധാര്‍ കാര്‍ഡ് നമ്പറിലൂടെയും ബാങ്ക് അക്കൗണ്ട് വിശദാംശങ്ങളിലൂടെയും ഇ-ശ്രാം പോര്‍ട്ടലില്‍ രജിസ്റ്റര്‍ ചെയ്യാന്‍ സാധിക്കും. സ്വയം രജിസ്റ്റര്‍ ചെയ്യാന്‍ ആഗ്രഹിക്കുന്ന തൊഴിലാളികളുടെ സംശയങ്ങള്‍ പരിഹരിക്കുന്നതിന് 14434 എന്ന ദേശീയ ടോള്‍ ഫ്രീ നമ്പര്‍ ആരംഭിക്കുമെന്ന് തൊഴില്‍ മന്ത്രി യാദവ് പറഞ്ഞു.
രജിസ്ട്രേഷന് ശേഷം, തൊഴിലാളികള്‍ക്ക് പ്രത്യേക യൂണിവേഴ്‌സല്‍ അക്കൗണ്ട് നമ്പര്‍ (യുഎഎന്‍) ഇ-ഷ്രാം കാര്‍ഡ് നല്‍കും, കൂടാതെ ഈ കാര്‍ഡ് വഴി എപ്പോള്‍ വേണമെങ്കിലും അവര്‍ക്ക് വിവിധ സാമൂഹിക സുരക്ഷാ പദ്ധതികളുടെ പ്രയോജനങ്ങള്‍ ലഭ്യമാകുകയും ചെയ്യും. പേര്, തൊഴില്‍, വിലാസം, വിദ്യാഭ്യാസ യോഗ്യത, നൈപുണ്യ തരങ്ങള്‍, കുടുംബ വിശദാംശങ്ങള്‍ തുടങ്ങിയവയുടെ വിശദാംശങ്ങള്‍ അവരുടെ തൊഴില്‍ സാധ്യതകള്‍ പരമാവധി സാക്ഷാത്കരിക്കുന്നതിനും സാമൂഹിക സുരക്ഷാ പദ്ധതികളുടെ പ്രയോജനങ്ങള്‍ അവര്‍ക്ക് ലഭ്യമാക്കുന്നതിനും ഇതില്‍ ഉണ്ടാകും.
കുടിയേറ്റ തൊഴിലാളികള്‍, നിര്‍മാണ തൊഴിലാളികള്‍, ഗിഗ്, പ്ലാറ്റ്‌ഫോം തൊഴിലാളികള്‍ എന്നിവരുള്‍പ്പെടെയുള്ള അസംഘടിത തൊഴിലാളികളുടെ ആദ്യ ദേശീയ ഡാറ്റാബേസാണ് രാജ്യത്ത് ആരംഭിച്ചിരിക്കുന്നത്.