Uncategorized

കേപ്ടൗണ്‍ ടെസ്റ്റില്‍ ദക്ഷിണാഫ്രിക്കയോടുള്ള തോല്‍വിയ്ക്ക് പുറകെ ഇന്ത്യന്‍ ടെസ്റ്റ് ടീമിന്റെ നായക സ്ഥാനം ഒഴിഞ്ഞ് വിരാട് കോഹ്ലി. ട്വിറ്റര്‍ അക്കൗണ്ടിലൂടെയാണ് കോഹ്ലി തന്റെ തീരുമാനം പങ്കുവെച്ചത്. 2014ലെ ഓസ്‌ട്രേലിയന്‍ പര്യടനത്തിലാണ് വിരാട് കോഹ്ലി ഇന്ത്യന്‍ ടെസ്റ്റ് ക്യാപ്റ്റന്‍ സ്ഥാനം ഏറ്റെടുത്തത്. കോഹ്ലി ക്യാപ്റ്റനാവുമ്പോള്‍ ടെസ്റ്റ് റാങ്കിങില്‍ ഏഴാം സ്ഥാനത്തായിരുന്നു ഇന്ത്യ. തുടര്‍ന്ന് ഇന്ത്യന്‍ ടീമിനെ വിജയങ്ങളുടെ കൊടുമുടി കയറാന്‍ വിരാട് കോഹ്ലിയുടെ ക്യാപ്റ്റന്‍സിക്ക് കഴിഞ്ഞു.

കഴിഞ്ഞ അഞ്ച് വര്‍ഷമായി കോഹ്ലിയുടെ കീഴില്‍ ഒന്നാം സ്ഥാനത്താണ് ഇന്ത്യ. പ്രഥമ ഐസിസി ടെസ്റ്റ് ചാമ്പ്യന്‍ഷിപ്പ് ഫൈനലില്‍ ഇന്ത്യയെ എത്തിക്കാനും കോഹ്ലിയ്ക്ക് സാധിച്ചു. ടെസ്റ്റ് ക്രിക്കറ്റില്‍ 68 മത്സരങ്ങളില്‍ ഇന്ത്യയെ നയിച്ചിട്ടുള്ള കോഹ്ലി 40 മത്സരങ്ങളില്‍ ടീമിനെ വിജയത്തിലെത്തിച്ചു. ടെസ്റ്റില്‍ ഏറ്റവും കൂടുതല്‍ വിജയം നേടിയ നാലാമത്തെ ക്യാപ്റ്റനായിട്ടാണ് അദ്ദേഹം ഇന്ത്യന്‍ ക്യാപ്റ്റന്‍ സ്ഥാനത്തുനിന്നും വിട പറയുന്നത്.

തിരുവനന്തപുരം: സംസ്ഥാനത്ത് കൊവിഡ്, ഓമിക്രോണ്‍ വ്യാപനത്തിന്റെ പശ്ചാത്തലത്തില്‍ ഒന്ന് മുതല്‍ ഒന്‍പത് വരെയുള്ള കുട്ടികള്‍ക്ക് ക്ലാസുകള്‍ ഓണ്‍ലൈനാക്കാന്‍ തീരുമാനം. ഈ മാസം 21 മുതലാണ് സ്‌കൂളുകള്‍ അടക്കുക. എന്നാല്‍, പത്താം ക്ലാസ് മുതല്‍ പ്ലസ് ടു വരെയുള്ള ക്ലാസ്സുകള്‍ക്ക് മാറ്റം ഉണ്ടായിരിക്കില്ല. മുഖ്യമന്ത്രിയുടെ അധ്യക്ഷതയില്‍ ചേര്‍ന്ന കൊവിഡ് അവലോകന യോഗത്തിലാണ് തീരുമാനം.

അതേസമയം, സംസ്ഥാനത്ത് 15 മുതല്‍ 18 വയസുവരെയുള്ള കുട്ടികള്‍ക്ക് വാക്സിനേഷന്‍ ഒരാഴ്ചക്കുള്ളില്‍ പൂര്‍ത്തിയാക്കാനാണ് സര്‍ക്കാരിന്റെ തീരുമാനം. രാത്രി കര്‍ഫ്യൂവോ വാരാന്ത്യ നിയന്ത്രണങ്ങളോ നിലവില്‍ ഉണ്ടാകില്ല. സംസ്ഥാന സര്‍ക്കാറിന്റെ പരിപാടികള്‍ ഓണ്‍ലൈനായി നടത്തും. സര്‍ക്കാര്‍/സ്വകാര്യ സ്ഥാപനങ്ങളില്‍ കൊവിഡ് വ്യാപനം രൂക്ഷമായാല്‍ മേലധികാരികള്‍ക്ക് തീരുമാനമെടുക്കാമെന്നും അവലോകന യോഗത്തില്‍ ധാരണയായി.

സംസ്ഥാനത്തെ വ്യാപാര സ്ഥാപനങ്ങളെല്ലാം ഓണ്‍ലൈന്‍ ബുക്കിങ്ങും വില്‍പ്പനയും പ്രോത്സാഹിപ്പിക്കേണ്ടതാണ്. മാളുകളില്‍ ജനത്തിരക്ക് ഉണ്ടാകാത്ത രീതിയില്‍ 25 സ്‌ക്വയര്‍ ഫീറ്റിന് ഒരാളെന്ന നിലയില്‍ നിശ്ചയിക്കേണ്ടതും അതനുസരിച്ചു മാത്രം ആളുകളെ പ്രവേശിപ്പിക്കേണ്ടതുമാണ്. കൊവിഡ് വര്‍ധിച്ച സാഹചര്യത്തില്‍ ശബരിമലയില്‍ ജനുവരി 16 മുതല്‍ നേരത്തെ ഓണ്‍ലൈന്‍ ബുക്കിങ് ചെയ്തവര്‍ക്ക് സന്ദര്‍ശനം മാറ്റി വെക്കാന്‍ അഭ്യര്‍ത്ഥിച്ച് സന്ദേശം അയക്കാന്‍ മുഖ്യമന്ത്രി നിര്‍ദ്ദേശിച്ചു. സര്‍ക്കാര്‍ ഓഫീസുകളില്‍ ജോലി ചെയ്യുന്ന ഗര്‍ഭിണികള്‍ക്ക് വര്‍ക്ക് ഫ്രം ഹോം സംവിധാനമൊരുക്കും. സര്‍ക്കാര്‍, അര്‍ദ്ധ സര്‍ക്കാര്‍, പൊതുമേഖലാ സ്ഥാപനങ്ങള്‍, സഹകരണ സ്ഥാപനങ്ങള്‍ എന്നിവിടങ്ങളിലേതുള്‍പ്പെടെ എല്ലാ ഔദ്യോഗിക പരിപാടികളും ചടങ്ങുകളും ഓണ്‍ലൈന്‍ ആയി നടത്തേണ്ടതാണ്. ടെസ്റ്റ് പോസിറ്റിവിറ്റി നിരക്ക് 20 ല്‍ കൂടുതലുള്ള ജില്ലകളില്‍ സാമൂഹ്യ, സാംസ്‌കാരിക, സാമുദായിക പരിപാടികള്‍ക്കും 50 പേരായി പരിമിതപ്പെടുത്തും.

തിരുവനന്തപുരം: സെര്‍വര്‍ തകരാറ് മൂലം പതിസന്ധിയിലായ സംസ്ഥാനത്തെ റേഷന്‍ വിതരണം പുനരാരംഭിക്കുന്നതിന് റേഷന്‍ കടകളുടെ പ്രവര്‍ത്തന സമയം പുനഃക്രമീകരിച്ചതായി ഭക്ഷ്യമന്ത്രി ജി.ആര്‍ അനില്‍ അറിയിച്ചു.

മലപ്പുറം, തൃശൂര്‍, പാലക്കാട്, കൊല്ലം, ആലപ്പുഴ, പത്തനംതിട്ട, വയനാട് ജില്ലകളില്‍ രാവിലെ 8.30 മുതല്‍ 12 വരെയും, എറണാകുളം, കോഴിക്കോട്, തിരുവനന്തപുരം, കണ്ണൂര്‍, കോട്ടയം, കാസര്‍കോട്, ഇടുക്കി ജില്ലകളില്‍ വൈകീട്ട് 3.30 മുതല്‍ 6.30 വരെയുമാണ് കടകള്‍ തുറന്ന് പ്രവര്‍ത്തിക്കുക.

ഹൈദരാബാദിലെ എന്‍ഐസി സെര്‍വറിലൂടെയാണ് ഇ-പോസ് മെഷീന്റെ വിവര വിശകലനം നടക്കുന്നത്. സെര്‍വര്‍ ശേഷിയുടേതാണ് പ്രശ്‌നങ്ങള്‍. ഇത് ഭാഗികമായി പരിഹരിച്ചിട്ടുണ്ട്.

തിരുവനന്തപുരം: രാഷ്ട്രപതിക്ക് ഡി-ലിറ്റ് നല്‍കാനുള്ള ഗവര്‍ണ്ണറുടെ നിര്‍ദ്ദേശം കേരള സര്‍വകലാശാല വി സി നിഷേധിച്ചതിനെതിരെ പ്രതിപക്ഷം രംഗത്ത്. ഔദ്യോഗിക ലെറ്റര്‍ പാഡിലല്ലാതെയുള്ള കത്ത് പൂര്‍ണ്ണമായും നടപടി ക്രമങ്ങള്‍ പാലിക്കാതെയാണെന്ന് എഴുതിയതെന്ന് രമേശ് ചെന്നിത്തല ആരോപിച്ചു. രാഷ്ട്രപതിക്ക് ഡീലിറ്റ് നിഷേധിച്ചതില്‍ സര്‍ക്കാര്‍ ഇടപെടല്‍ ഉണ്ടോ എന്ന് വ്യക്തമാക്കണമെന്നും ചെന്നിത്തല ആവശ്യപ്പെട്ടു.

അതേസമയം, സിന്‍ഡിക്കേറ്റ് അംഗങ്ങളുമായി ചര്‍ച്ച ചെയ്‌തെന്ന് മാത്രമാണ് വി സിയുടെ കത്തിലുള്ളത്. അങ്ങനെയല്ല നടപടിക്രമം. സിന്‍ഡിക്കേറ്റ് യോഗത്തില്‍ ചര്‍ച്ച ചെയ്യണം എന്ന നടപടി ക്രമം പാലിച്ചില്ലെന്ന് താന്‍ നേരത്തെ പറഞ്ഞത് ഇപ്പോള്‍ വ്യക്തമായെന്ന് വി ഡി സതീശനും കുറ്റപ്പെടുത്തി.

കഴിഞ്ഞ മാസം ഏഴിനാണ് ഡീലിറ്റ് നല്‍കാനുള്ള ഗവര്‍ണ്ണറുടെ ശുപാര്‍ശക്കെതിരെ വിസി കത്തെഴുതിയത്. വെള്ളക്കടലാസില്‍ സ്വന്തം കൈപ്പടയിലാണോ ഗവര്‍ണര്‍ക്ക് കത്ത് നല്‍കേണ്ടെന്ന് ചെന്നിത്തല ചോദിച്ചു. മാത്രവുമല്ല വി സി ഇടത് സിന്‍ഡിക്കേറ്റ് അംഗങ്ങളോട് മാത്രം ചര്‍ച്ച ചെയ്താണ് ഗവര്‍ണ്ണറുടെ ആവശ്യം തള്ളിയതെന്നും ചെന്നിത്തല പറഞ്ഞു.

ആലപ്പുഴ: കൊവിഡ് ബാധിച്ച് മരണപ്പെട്ടവരുടെ കുടംബത്തിന് പ്രതിമാസം ധനസഹായം നല്‍കുന്ന പദ്ധതിയുടെ മാനദണ്ഡങ്ങള്‍ പുതുക്കി സംസ്ഥാന സര്‍ക്കാര്‍.

ബി.പി.എല്‍. കുടുംബത്തിലെ വരുമാന ദായകരായ വ്യക്തി, കൊവിഡ് മൂലം മരണപ്പെട്ടാല്‍ ഭാര്യക്കോ ഭര്‍ത്താവിനോ മക്കള്‍ക്കോ ധനസഹായത്തിന് അര്‍ഹതയുണ്ടെന്നായിരുന്നു ആദ്യം വ്യക്തമാക്കിയിരുന്നത്. എന്നാല്‍, പുതുക്കിയ മാനദണ്ഡ പ്രകാരം അംഗപരിമിതരും മാനസിക വെല്ലുവിളി നേരിടുന്നവരുമായ മക്കള്‍ക്ക് മാത്രമാണ് സഹായധനം എന്നാണ് വ്യക്തമാക്കുന്നത്. മരിച്ചവരുടെ പ്രായം 70-നു മുകളിലും താഴെയും എന്നിങ്ങനെ രണ്ട് ഭാഗമാക്കിയാണ് സഹായത്തിന് അര്‍ഹരെ കണ്ടെത്തുക.

പുതുക്കിയ പ്രധാന വ്യവസ്ഥകള്‍

തദ്ദേശസ്ഥാപനങ്ങളുടെ ബി.പി.എല്‍. പട്ടികയില്‍ ഉള്‍പ്പെട്ട കുടുംബങ്ങള്‍ക്ക് സഹായം നല്‍കാം. കൂടാതെ മരിച്ചവ്യക്തിയുടെ വരുമാനം ഒഴിവാക്കിയാല്‍, ബി.പി.എല്‍. പരിധിയില്‍ വരുന്നവരെയും പരിഗണിക്കും. ഇതു വില്ലേജ് ഓഫീസര്‍ അന്വേഷിച്ച് അപേക്ഷയില്‍തന്നെ റിപ്പോര്‍ട്ടുചെയ്യണം.

മരിച്ചയാള്‍ 70 വയസ്സിനു മുകളിലുള്ളവരാണെങ്കില്‍ ഭാര്യ/ഭര്‍ത്താവ് എന്നിവര്‍ക്കുമാത്രമേ സഹായധനത്തിന് അര്‍ഹതയുണ്ടാകൂ. ഇവര്‍ ജീവിച്ചിരിപ്പില്ലെങ്കില്‍ അംഗപരിമിതര്‍, മാനസിക വെല്ലുവിളി നേരിടുന്നവര്‍ എന്നീ വിഭാഗങ്ങളില്‍പ്പെടുന്ന മക്കളെമാത്രം പരിഗണിക്കും.

70-ല്‍ താഴെ പ്രായമുള്ളവരാണ് മരിച്ചവരെങ്കില്‍ ഭാര്യ/ഭര്‍ത്താവ് ജീവിച്ചിരിപ്പുണ്ടെങ്കില്‍ സഹായംനല്‍കാം. ജീവിച്ചിരിപ്പില്ലെങ്കില്‍മാത്രം 21 വയസ്സില്‍ താഴെ പ്രായമുള്ളവരും മരിച്ച വ്യക്തിയെ ആശ്രയിച്ചു കഴിയുന്നവരുമായ ഒരു മകനോ, മകള്‍ക്കോ(മൂത്തയാള്‍ക്ക്) സഹായം നല്‍കും. ഇതിനു റേഷന്‍ കാര്‍ഡിലെ വിവരങ്ങള്‍ പരിഗണിക്കാം.

തിരുവനന്തപുരം: മുഖ്യമന്ത്രി പിണറായി വിജയന്‍ തുടര്‍ ചികിത്സക്കായി ഈ മാസം 15ന് വീണ്ടും അമേരിക്കയിലേക്ക് പോകും. മയോ ക്ലിനിക്കിലാണ് അദ്ദേഹത്തിന്റെ ചികിത്സ നടക്കുന്നത്. ജനുവരി 29 വരെ അദ്ദേഹം അമേരിക്കയില്‍ തുടരും.

2021 ഒക്ടോബറില്‍ മുഖ്യമന്ത്രി അമേരിക്കയിലേക്ക് ചികിത്സക്ക് പോകുമെന്നാണ് ആദ്യം അറിയിച്ചിരുന്നത്. എന്നാല്‍, കൊവിഡ് പ്രതിസന്ധിമൂലം യാത്ര മാറ്റിവെക്കുകയായിരുന്നു. നിലവില്‍ അദ്ദേഹത്തിന് കാര്യമായ ആരോഗ്യപ്രശ്നങ്ങള്‍ ഒന്നുമില്ലെന്നാണ് റിപ്പോര്‍ട്ടുകള്‍.

അതേസമയം, മുഖ്യമന്ത്രിയുടെ അഭാവത്തില്‍ സംസ്ഥാനത്തെ അധികാര ചുമതല ആരെ ഏല്‍പ്പിക്കുമെന്നതില്‍ ഇതുവരെ തീരുമാനമായിട്ടില്ല

പല രാജ്യങ്ങളിലും ഒമിക്രോണ്‍ കേസുകളുടെ എണ്ണം അതിവേഗമാണ് കുതിച്ചുയരുന്നത്. ഇതിന്റെ ലക്ഷണങ്ങളെ കുറിച്ച് വിശദീകരിക്കുകയാണ് ഇപ്പോള്‍ ആരോഗ്യവിദഗ്ദര്‍. യുകെയുടെ ZOE കൊവിഡ് സ്റ്റഡി ആപ്പ് അനുസരിച്ച് ഒമിക്രോണിന്റെ സാധാരണയായി റിപ്പോര്‍ട്ട് ചെയ്യപ്പെട്ട ചില ലക്ഷണങ്ങള്‍ എതൊക്കെയാണെന്ന് വ്യക്തമാക്കുന്നു.

നേരിയ പനി, തൊണ്ടയില്‍ പൊട്ടല്‍, തുമ്മല്‍, ശരീര വേദന, ക്ഷീണം, രാത്രി വിയര്‍ക്കുക എന്നിവയാണ് ഒമിക്രോണ്‍ പിടിപെട്ടാല്‍ കൂടുതലായും കാണുന്ന ലക്ഷണങ്ങള്‍. ചിലരില്‍ ഛര്‍ദ്ദി, വിശപ്പില്ലായ്മ എന്നിവയും കണ്ട് വരുന്നു. ഒമിക്രോണ്‍ ബാധിച്ചാല്‍ ചര്‍മ്മത്തിലും ചില മാറ്റങ്ങള്‍ ഉണ്ടാകാമെന്നാണ് സ്റ്റഡി ആപ്പില്‍ പുതിയതായി പറയുന്നത്. ചൊറിഞ്ഞു പൊട്ടുകയോ അല്ലെങ്കില്‍ തിണര്‍പ്പ് ഉണ്ടാവുകയോ ചെയ്യുന്നതാണ് ഒമിക്രോണ്‍ പിടിപെട്ടാല്‍ ചര്‍മ്മത്തില്‍ പ്രകടമാകുന്ന മറ്റൊരു ലക്ഷണം. ചര്‍മ്മത്തിലെ തിണര്‍പ്പ് പലപ്പോഴും കൊവിഡുമായി ബന്ധപ്പെട്ടിരിക്കുന്നു. SARs-COV-2 വൈറസ് മൂലമുണ്ടാകുന്ന കോശജ്വലനത്തിന്റെ ലക്ഷണമാകാം ഇത് എന്ന് നേരത്തെയുള്ള പഠനങ്ങള്‍ സൂചിപ്പിച്ചിരുന്നു.

കൊവിഡ് 19 ന്റെ നാലാമത്തെ പ്രധാന ലക്ഷണമായി ടര്‍മ്മത്തിലെ തിണര്‍പ്പ് കണക്കാക്കണമെന്ന് ZOE COVID പഠന ആപ്പ് റിപ്പോര്‍ട്ട് ചെയ്യുന്നുണ്ട്. കൊറോണ വൈറസ് ബാധിച്ചാല്‍ കാല്‍വിരലുകളില്‍ ചുവപ്പും പര്‍പ്പിള്‍ നിറത്തിലുള്ള മുഴകളിലേക്കും നയിച്ചേക്കാം. ഇത് കാരണം വേദനയും ചൊറിച്ചിലും അനുഭവപ്പെട്ടേക്കാം.

കൊച്ചി: സംസ്ഥാനത്തെ നോക്കുകൂലി വിവാദത്തില്‍ നിയമഭേദഗതി വേണമെന്ന നിര്‍ദ്ദേശവുമായി ഹൈക്കോടതി. നോക്കുകൂലി വാങ്ങുന്ന തൊഴിലാളികള്‍ക്കും യൂണിയനുകള്‍ക്കുമെതിരെ കേസെടുക്കണമെന്നും, അത് സംബന്ധിച്ച് ഡി ജി പി സര്‍ക്കുലര്‍ പുറപ്പെടുവിക്കണമെന്നും കോടതി ആവശ്യപ്പെട്ടു. കൊല്ലം സ്വദേശി നല്‍കിയ ഹര്‍ജി പരിഗണിക്കുന്നതിനിടയിലാണ് കോടതി നിര്‍ദ്ദേശം നല്‍കിയത്.

അടുത്തമാസം എട്ടാം തീയതി ഇതു സംബന്ധിച്ച ഉത്തരവ് പുറപ്പെടുവിക്കാന്‍ കോടതി തീരുമാനിച്ചിട്ടുണ്ട്. സര്‍ക്കാര്‍ വിശദീകരണത്തിന്റെ കൂടി അടിസ്ഥാനത്തിലായിരിക്കും കോടതി ഉത്തരവ് പുറപ്പെടുവിക്കുക. നിയമഭേദഗതി സംബന്ധിച്ച പുരോഗതി അറിയിക്കാനും കോടതി നിര്‍ദേശിച്ചിട്ടുണ്ട്. അതേസമയം, നോക്കുകൂലി അവസാനിപ്പിക്കാന്‍ പോലീസ് ഇടപെടല്‍ കൂടുതല്‍ കര്‍ശനമാക്കണമെന്ന് ജസ്റ്റിസ് ദേവന്‍ രാമചന്ദ്രന്‍ അഭിപ്രായപ്പെട്ടു.

ലോകത്തിലെ ആദ്യത്തെ ഇലക്ട്രിക്ക് കപ്പലായ ‘യാര ബിര്‍ക്ക്ലാന്‍ഡ്’ നോര്‍വേയില്‍ നിന്ന് യാത്ര പുറപ്പെട്ടു. പ്രതിവര്‍ഷം വേണ്ടി വരുന്ന 40,000 ഡീസല്‍ ട്രക്കുകളുടെ യാത്രക്ക് പകരമാവും ഈ കപ്പല്‍ യാത്ര. ഫോസില്‍ ഇന്ധനം ആവശ്യമില്ലാത്തതും കാര്‍ബണ്‍ ബഹിര്‍ഗമനം തീരെ ഇല്ലാത്തതുമായ ഈ ഇലക്ട്രിക് കപ്പല്‍ പരിസ്ഥിതി സൗഹാര്‍ദ്ദമായ കടല്‍മാര്‍ഗ സഞ്ചാരത്തിലെ വലിയ മുതല്‍ക്കൂട്ടാകുമെന്നാണ് വിലയിരുത്തല്‍.

കപ്പലുകളിലെ മെഷീന്‍ റൂമിനു പകരം ഇതില്‍ ബാറ്ററി കംപാര്‍ട്‌മെന്റുകളാണുണ്ടാവുക. പ്രവര്‍ത്തനതിന് ജലവൈദ്യുതിയെ ആശ്രയിക്കുന്ന കപ്പലിന്റെ ബാറ്ററിക്ക് 6.8 മെഗാവാട്ട് ശേഷിയുണ്ട്. നൂറ് ടെസ്ലകള്‍ക്ക് തുല്യമായാണ് ഇത് കണക്കാക്കപ്പെടുന്നത്. 80 മീറ്റര്‍ ഉയരവും 3200 ടണ്‍ ഭാരവുമുള്ള കപ്പല്‍ രണ്ടു വര്‍ഷം പ്രവര്‍ത്തന പരീക്ഷണത്തിലായിരിക്കും. നാലോ അഞ്ചോ വര്‍ഷത്തിനുള്ളില്‍ കപ്പലില്‍ വീല്‍ഹൗസിന്റെ ആവശ്യമേയുണ്ടാകുകയില്ലെന്ന് ഹോള്‍സെതര്‍ പറഞ്ഞു. വീല്‍ഹൗസിനുള്ളില്‍ നിന്നുമാണ് ക്യാപ്റ്റന്‍ കപ്പല്‍ നിയന്ത്രിക്കുന്നത്.

തെക്കുകിഴക്കന്‍ പട്ടണമായ പോര്‍സ്ഗ്രണിലെ ഒരു പ്ലാന്റില്‍ നിന്ന് 120 കണ്ടെയ്നര്‍ വളവുമായി എട്ട് മൈല്‍ അകലെയുള്ള ബ്രെവിക് തുറമുഖത്തേക്ക് കപ്പല്‍ ആദ്യ യാത്ര പുറപ്പെട്ടു. പ്രതിവര്‍ഷം 40,000 ഡീസല്‍ ട്രക്കുകളാണ് സാധാരണ ഈ പ്ലാന്റില്‍ നിന്ന് യാത്രതിരിക്കുന്നത്. ട്രക്കുകള്‍ക്ക് പകരം കപ്പല്‍ ഗതാഗതം ആരംഭിക്കുന്നതോടെ ഒരു വര്‍ഷം പുറന്തള്ളുന്ന കാര്‍ബണ്‍ ഡയോക്സൈഡില്‍ 678 ടണ്ണിന്റെ കുറവ് സംഭവിക്കും.

sudaan

ഖാര്‍ത്തൂം: വടക്കന്‍ ആഫ്രിക്കന്‍ രാജ്യമായ സുഡാനില്‍ സൈന്യം ഭരണം പിടിച്ചെടുത്തു. ഇടക്കാല സര്‍ക്കാരില്‍ നിന്നും സൈനിക അട്ടിമറിയിലൂടെ ജനറല്‍ അബ്ദെല്‍ ഫത്താഹ് അല്‍ ബുര്‍ഹാന്റെ നേതൃത്വത്തിലുള്ള സംഘമാണ് ഭരണം പിടിച്ചെടുത്തത്. രാജ്യത്ത് സൈന്യം അടിയന്തരാവസ്ഥ പ്രഖ്യാപിച്ചു. അതേസമയം, സൈന്യവുമായി നടന്ന ഏറ്റുമുട്ടലില്‍ ഏഴ് പേര്‍ കൊല്ലപ്പെടുകയും 140 പേര്‍ക്ക് പരിക്കേല്‍ക്കുകയും ചെയ്‌തെന്നാണ് ലഭിക്കുന്ന വിവരം.

ഏകാധിപതിയായ ഒമര്‍ അല്‍ ബഷീറിന്റെ 30 വര്‍ഷത്തെ ഭരണമാണ് സുഡാനില്‍ അവസാനിച്ചത്. എന്നാല്‍ സൈന്യം ഭരണം പിടിച്ചെടുത്തതോടെ ജനാധിപത്യം സ്വപ്നം കണ്ട സുഡാന്‍ ജനതയ്ക്ക് തിരിച്ചടിയായിരിക്കുകയാണിത്.

ഖാര്‍ത്തൂം വിമാനത്താവളം അടക്കുകയും അന്താരാഷ്ട്ര വിമാനസര്‍വീസുകള്‍ റദ്ദാക്കുകയും ചെയ്തു. തങ്ങള്‍ അന്താരാഷ്ട്ര നിയമങ്ങള്‍ പാലിക്കാന്‍ തയ്യാറാണെന്നും 2023 ജൂലൈയില്‍ തെരഞ്ഞെടുപ്പ് നടത്തി അധികാരം കൈമാറുമെന്നും സൈനികമേധാവി അറിയിച്ചു.

രാജ്യത്തെ മിലിറ്ററി സിവിലിയന്‍ സോവേറിയന്‍ കൗണ്‍സില്‍ അടിയന്തിരാവസ്ഥ പ്രഖ്യാപിച്ചതോടെ പിരിച്ചു വിട്ടു. മിലിറ്ററി സിവിലിയന്‍ സോവേറിയന്‍ കൗണ്‍സില്‍ രൂപീകരിച്ചത് ജനങ്ങളുടെ ജനാധിപത്യ അവകാശങ്ങള്‍ സംരക്ഷിക്കുന്നതിനായിട്ടാണ്. രണ്ട് വര്‍ഷം മുമ്പാണ് ഇത് രൂപീകരിച്ചത്. കൗണ്‍സിലിന് രൂപം നല്‍കിയത് മുന്‍ ഭരണാധികാരി ഒമര്‍ അല്‍ ബഷീര്‍ ആണ്. അതേസമയം രാജ്യത്ത് അടിയന്തിരാവസ്ഥ പ്രഖ്യാപിക്കാന്‍ നിലവിലെ പ്രധാനമന്ത്രി അബ്ദല്ല ഹംദോകിന് മാത്രമേ അധികാരമുള്ളൂവെന്ന് സുഡാന്‍ വാര്‍ത്താവിതരണ മന്ത്രാലയം ഫേസ്ബുക്കിലൂടെ അറിയിച്ചു.