Politics (Page 93)

കരുവന്നൂർ സഹകരണ ബാങ്ക് തട്ടിപ്പിനെതിരെ ബിജെപി നടത്തിയ പദയാത്ര വിജയകരമെന്ന് മുൻ എംപി സുരേഷ് ഗോപി. സഹകരണ മേഖലയിലെ ഭരണാധികാരികൾക്ക് സത്ബുദ്ധി ഉദിക്കുമ്പോൾ യാത്ര പൂർണ അർത്ഥത്തിൽ എത്തും. ബിജെപി നേതാക്കൾ പദയാത്ര നല്ല രീതിയിൽ ഏകോപിപ്പിച്ചു. മാധ്യമങ്ങൾ ഒരു ദുഷ്പ്രചരണവും നടത്തിയില്ല. പൊലീസിന്റെ സാന്നിധ്യവും നീതിനിർവഹണവും പ്രശംസനീയമെന്നും സുരേഷ് ഗോപി പറഞ്ഞു.

എല്ലാ പാർട്ടിക്കാരും യാത്രയിൽ അണിനിരന്നു. സംഘശക്തിയല്ല, ഉദ്ദേശശുദ്ധിയാണ് പ്രധാനം. സഹകരണ ബാങ്കുകളിലെ തട്ടിപ്പിൽ അധികാരികൾ പ്രതിവിധി കാണണം. പദയാത്ര ലോക്സഭാ പ്രാചാരണമെന്ന ആരോപണം അവരുടെ പ്രത്യയശാസ്ത്രമാണ്. പദയാത്ര നടത്തിയത് മനുഷ്യർക്ക് വേണ്ടിയാണ്, യാത്രയ്ക്ക് രാഷ്ട്രീയമില്ല. ലോകത്തിന് ആവശ്യം സോഷ്യലിസമാണ്, അല്ലാതെ കമ്യൂണിസമല്ലഎന്നും അദ്ദേഹം വ്യക്തമാക്കി.

തട്ടമിടല്‍ പരാമര്‍ശത്തില്‍ സിപിഐഎം നേതാവ് അനില്‍കുമാറിനെതിരെ സമസ്ത. തട്ടം മാറ്റലാണ് പുരോഗതിയെന്ന് വിശ്വസിക്കുന്നില്ലെന്ന് സമസ്ത നേതാവ് അബ്ദു സമദ് പൂക്കോട്ടൂര്‍ പറഞ്ഞു. ശിരോവസ്ത്രവും ഹിജാബും ധരിച്ച് ലോകത്ത് ഉന്നത സ്ഥാനങ്ങളില്‍ എത്തുന്നവരുണ്ടെന്ന് സമസ്ത നേതാവ് പറഞ്ഞു. . ഇന്ത്യയില്‍ മതം ഉള്‍ക്കൊള്ളാനും നിഷേധിക്കാനും അവകാശമുണ്ടെന്ന് അദ്ദേഹം പ്രതികരിച്ചു.

ഇസ്ലാമിക ചിട്ടകള്‍ക്കെതിരെയുള്ള ഒളിയമ്പാണ് സിപിഐഎം നേതാവിന്റെ പ്രസ്താവനയെന്ന് അബ്ദു സമദ് പൂക്കോട്ടൂര്‍ വിമര്‍ശിച്ചു. വോട്ടുബാങ്ക് രാഷ്ട്രീയം ലക്ഷ്യം വെച്ചുളള സിപിഎം നീക്കത്തിന്റെ ഇരട്ടത്താപ്പ് പുറത്തായി എന്നും അദ്ദേഹം പറഞ്ഞു. തട്ടം വേണ്ടെന്ന് പറയുന്ന പെണ്‍കുട്ടികള്‍ മലപ്പുറത്തുണ്ടായത് കമ്മ്യൂണിസ്റ്റ് കേരളത്തില്‍ വന്നതിന്റെ ഭാഗമായിട്ടാണെന്നായിരുന്നു അനില്‍കുമാറിന്റെ പ്രസ്താവന.
യുക്തിവാദ സംഘടനയായ എസ്സന്‍സ് ഗ്ലോബല്‍ സംഘടിപ്പിച്ച ലിറ്റ്മസ് നാസ്തിക സമ്മേളനത്തിലായിരുന്നു അനില്‍കുമാറിന്റെ പരാമര്‍ശം ഉണ്ടായത്.

ആര് കുറ്റം ചെയ്താലും നിയമപരമായ നടപടി എടുക്കുന്നതിന് എതിരല്ലെന്ന് കേരള ബാങ്ക് വൈസ് പ്രസിഡന്‍റ് എം കെ കണ്ണന്‍. കുറ്റകൃത്യം ശ്രദ്ധയില്‍പ്പെട്ട സന്ദര്‍ഭത്തില്‍ ഉടനടി ഉചിതമായ നടപടിയെടുത്തിട്ടുണ്ട്. കുറച്ചുകൂടി കാര്യക്ഷമമായ രീതിയില്‍ 2022-23ല്‍ ഓഡിറ്റിങ് നടന്നുകഴിഞ്ഞു. നല്ലൊരു ടീമാണ് ഓഡിറ്റിനായിട്ടുള്ളത്. നിയമത്തിന് എന്തെങ്കിലും പഴുതുണ്ടെങ്കില്‍ അത് അടച്ച് കുറച്ചുകൂടി കാര്യക്ഷമമാക്കുന്നത് തെറ്റാണോ. ഇതിനെ സ്വാഗതം ചെയ്യുകയല്ലെ വേണ്ടതെന്നും അദ്ദേഹം ചോദിച്ചു. വിശ്വാസം വീണ്ടെടുക്കാനും പ്രവർത്തനങ്ങള്‍ കുറെകൂടി കാര്യക്ഷമമാക്കാനുമുള്ള നടപടി ഈ നിയമത്തോട് കൂടി വന്നുകഴിഞ്ഞുവെന്നും അദ്ദേഹം പറഞ്ഞു.

പിണറായി വിജയനെ പാര്‍ട്ടി നേതാവ് എന്ന നിലയില്‍ കണ്ടതാണ്. അദ്ദേഹവുമായി ഞാന്‍ ഷെയര്‍ ചെയ്ത എല്ലാ കാര്യങ്ങളും പറയണ്ട കാര്യമില്ലെന്നും അദ്ദേഹം പറഞ്ഞു. നാളെ നടക്കുന്ന മീറ്റിങ്ങില്‍ കരുവന്നൂരിന്റെ പാക്കേജുമായി ബന്ധപ്പെട്ട് തീരുമാനമെടുക്കുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.

മുഖ്യമന്ത്രി പിണറായി വിജയനെ കടുത്ത ഭാഷയിൽ വിമർശിച്ച് ഗവർണർ ആരിഫ് മുഹമ്മദ് ഖാൻ. മുഖ്യമന്ത്രി സർക്കാർ കാര്യങ്ങൾ രാജ്ഭവനെ അറിയിക്കുന്നില്ല. രാജ്ഭവനിലേക്ക് മന്ത്രിമാരും ഉദ്യോഗസ്ഥരും വന്നിട്ട് കാര്യമില്ലെന്നും മുഖ്യമന്ത്രി നേരിട്ട് എത്തണമെന്നും ഗവർണർ പറഞ്ഞു. കരുവന്നൂർ ബാങ്ക് തട്ടിപ്പ് കേസ് എൻഫോഴ്‌സ്‌മെന്റ് ഡയറക്ടറേറ്റ് ഉൾപ്പടെയുള്ള അന്വേഷണ ഏജൻസികൾ അന്വേഷിക്കുന്നുണ്ട്.

നിയമപരമല്ലാതെ എന്തെങ്കിലും നടന്നാൽ പുറത്ത് വരണം. സർക്കാർ പ്രവർത്തിക്കുന്നത് പാർട്ടി പറയും പോലെയാണ്. ഒരാൾക്കും പ്രത്യേക അനുകമ്പ ഉണ്ടാകരുതെന്നാണ് പ്രതിജ്ഞ ചെയ്യുന്നത്, അത് ലംഘിക്കുകയാണെന്നും ഗവർണർ തുറന്നടിച്ചു. ‘വി സിമാരെ നിയമിക്കുന്നതിനുള്ള ബിൽ നിയമപരമല്ല. എന്താണ് അതിൽ ന്യായമുള്ളത്. നിയമോപദേശത്തിനായി സർക്കാർ 40 ലക്ഷം ചെലവാക്കുന്നു. എന്തിനാണ് ഇത്രയധികം പണം ചെലവഴിക്കുന്നതെന്നും ഗവർണർ ചോദിച്ചു.

സർക്കാർ പദ്ധതികളുടെ കുടിശ്ശിക ലഭിക്കാത്തതിൽ പ്രതിഷേധിച്ച് സംസ്ഥാനത്തെ കരാറുകാർ സമരത്തിലേക്ക്. വാട്ടർ അതോറിറ്റിയിൽ അറ്റകുറ്റപ്പണി നടത്തിയ വകയിൽ 16 മാസത്തെ കുടിശ്ശികയാണ് കരാറുകാർക്ക് കിട്ടാനുള്ളത്. പണി പൂർത്തിയായാലും ഉദ്യോഗസ്ഥർ ഫയലുകളിൽ തീരുമാനമെടുക്കുന്നില്ല എന്നാണ് ഇവരുടെ പരാതി. നാളെ കോഴിക്കോട് മാനാഞ്ചിറ സബ് ട്രഷറി ഓഫീസിനു മുന്നിൽ ഗവൺമെൻറ് കോൺട്രാക്ടേഴ്സ് ഫെഡറേഷന്റെ നേതൃത്വത്തിൽ ഉപവാസ സമരം നടത്തും.

കിഫ്ബി പ്രവർത്തികൾ ഏറ്റെടുത്തവർക്കും രണ്ടുവർഷം മുൻപുള്ള കുടിശ്ശിക കൊടുത്തുതീർത്തിട്ടില്ലെന്ന് കരാറുകൾ പറയുന്നു. ഇതോടെ പ്രത്യക്ഷ സമരത്തിലേക്ക് കടക്കാനാണ് ഗവൺമെൻറ് കരാറുകാരുടെ തീരുമാനം.സംസ്ഥാനത്ത് സർക്കാരിന്റെ വിവിധ വകുപ്പുകളിലായി പി.ഡബ്ല്യു.ഡി, എൽ.എസ്.ജി.ഡി, കെ.ഡബ്ല്യു.എ ഗവൺമെൻറ് കരാറുകാർക്ക് കോടികളുടെ കുടിശ്ശികയാണുള്ളത്. കഴിഞ്ഞ മാർച്ചിൽ എൽ.എസ്.ജി.ഡിയിൽ പൂർത്തീകരിച്ച കരാറുകാരുടെ ബില്ലുകൾ ഇപ്പോഴും ട്രഷറിയിൽ നിന്ന് ലഭിച്ചിട്ടില്ല എന്നാണ് പരാതി.