ഹിന്ദു സമൂഹത്തെ അക്രമാസക്തരെന്ന് വിളിക്കുന്നത് ഗുരുതരമായ കുറ്റം; രാഹുൽ ഗാന്ധിക്കെതിരെ പ്രധാനമന്ത്രി
ന്യൂഡൽഹി: രാഹുൽ ഗാന്ധിയ്ക്ക് മറുപടിയുമായി പ്രധാനമന്ത്രി നരേന്ദ്ര മോദി. ഹിന്ദു സമൂഹത്തെ അക്രമാസക്തരെന്ന് വിളിക്കുന്നത് ഗുരുതരമായ കുറ്റമാണെന്ന് പ്രധാനമന്ത്രി പറഞ്ഞു. രാഹുലിന്റെ വാക്കുകൾ ഹിന്ദു വികാരത്തെ വ്രണപ്പെടുത്തുന്നതാണെന്നും അദ്ദേഹം ചൂണ്ടിക്കാട്ടി. നമ്മുടെ എല്ലാ മഹത് വ്യക്തിത്വങ്ങളും അഹിംസയെക്കുറിച്ചും ഭയം അവസാനിപ്പിക്കുന്നതിനെക്കുറിച്ചുമാണ് പറഞ്ഞിട്ടുള്ളതെന്നും എന്നാൽ ഹിന്ദു എന്ന് സ്വയം വിളിക്കുന്നവർ അക്രമത്തെയും വിദ്വേഷത്തെയും കുറിച്ചാണ് സംസാരിക്കുന്നതെന്നുമുള്ള രാഹുലിന്റെ പരാമർശത്തിനാണ് പ്രധാനമന്ത്രി മറുപടി നൽകിയത്.
രാഹുൽ ഗാന്ധി മാപ്പ് പറയണമെന്നാവശ്യപ്പെട്ട് കേന്ദ്ര ആഭ്യന്തര മന്ത്രി അമിത് ഷായും രംഗത്തെത്തി. ഹിന്ദുവായതിൽ അഭിമാനം കൊള്ളുന്ന കോടിക്കണക്കിന് ഇന്ത്യാക്കാർ ഈ രാജ്യത്തുണ്ടെന്ന കാര്യം അദ്ദേഹത്തിനറിയില്ലെന്ന് അമിത് ഷാ വ്യക്തമാക്കി. അവരെല്ലാവരും അക്രമത്തെക്കുറിച്ചാണ് സംസാരിക്കുന്നതെന്ന് പറയാനാണോ അദ്ദേഹം ശ്രമിക്കുന്നത്. അക്രമത്തെ ഒരു മതവുമായും ബന്ധപ്പെടുത്താനാകില്ല. അദ്ദേഹം മാപ്പ് പറയണമെന്ന് അമിത് ഷാ ആവശ്യപ്പെട്ടു.
ഹിന്ദുക്കൾ അക്രമകാരികളാണെന്ന രാഹുൽ ഗാന്ധിയുടെ പരാമർശത്തിലൂടെ ഹിന്ദുക്കളോടുള്ള കോൺഗ്രസിന്റെ വിദ്വേഷ മനോഭാവം വ്യക്തമായി എന്ന് കേന്ദ്ര ധനകാര്യ മന്ത്രി നിർമ്മല സീതാരാമൻ അറിയിച്ചു.
