രാഹുൽ മാങ്കൂട്ടത്തിലിനെ ഡ്യൂട്ടി ഗ്രൂപ്പിൽ അപമാനിക്കുന്ന പോസ്റ്റുമായി പൊലീസുകാരൻ. ഇടത് പൊലീസ് സംഘടനയുടെ സംസ്ഥാന കമ്മറ്റി അംഗം കിരൺദേവ് ഔദ്യോഗിക വാട്സ്ആപ്പ് ഗ്രൂപ്പിലാണ് പോസ്റ്റിട്ടത്. കിരൺദേവ്, തിരുവന്തപുരം സിറ്റി പൊലീസ് കൺട്രോൾ റൂമിലെ സിവിൽ പൊലീസ് ഓഫീസറാണ്. ഇയാൾ രാഷ്ട്രീയ പോസ്റ്റിട്ടത് തിരുവനന്തപുരം കൺട്രോൾ റൂമിലെ പൊലീസുകാരുടെ ഡ്യൂട്ടിയിടുന്ന ഔദ്യോഗിക വാട്സ്ആപ്പ് ഗ്രൂപ്പിലാണ്. ഒരു തരത്തിലുമുള്ള രാഷ്ട്രീയ അനുഭാവവും പൊലീസ് ഉദ്യോഗസ്ഥർ കാണിക്കാൻ പാടില്ലെന്ന സർവീസ് ചട്ടങ്ങളുടെ ലംഘനമാണ് ഇത്.
ഇയാൾ മന്ത്രി ഗണേഷ് കുമാർ യൂത്ത് കോൺഗ്രസ് സംസ്ഥാന പ്രസിഡന്റ് രാഹുൽ മാങ്കൂട്ടത്തിലിനെ പരിഹസിച്ച് നടത്തുന്ന പ്രസംഗമാണ് പോസ്റ്റ് ചെയ്തത്. ഗ്രൂപ്പിലെ മറ്റ് അംഗങ്ങൾ പോസ്റ്റ് ഇട്ടതിനുതൊട്ടു പിന്നാലെ ഇത് റിമൂവ് ചെയ്യണമെന്ന് പറഞ്ഞ് കമന്റ് ഇട്ടിരുന്നു. എന്നാൽ ഇയാള് അത് കേട്ടില്ല. വാമൊഴിയായി പരാതിയും പല പൊലീസുകാരും നൽകിയിരുന്നു. എന്നാൽ പോസ്റ്റ് റിമൂവ് ചെയ്യാൻ ഇയാൾ തയ്യാറായില്ല. നിലവിൽ പൊലീസ് അസോസിയേഷന്റെ സംസ്ഥാന കമ്മറ്റി അംഗമാണ് ഇടത് അനുഭാവം പുലർത്തുന്ന കിരൺദേവ്.