പനാജിയില്‍ 54-ാമത് ഗോവ രാജ്യാന്തര ചലച്ചിത്രമേള ആരംഭിച്ചു. മലയാള സിനിമ ആട്ടം ആണ് പനോരമയില്‍ ഉദ്ഘാടന ചിത്രം. ഇന്ത്യൻ പനോരമയില്‍ ഇടംപിടിച്ചത് ഏഴ് മലയാള ചിത്രങ്ങളാണ്. 408 സിനിമകളില്‍ നിന്ന് സംവിധായകൻ ടി.എസ് നാഗാഭരണ അദ്ധ്യക്ഷനായ ജൂറിയാണ് സിനിമകള്‍ തെരഞ്ഞെടുത്തത്. വിനയ് ഫോര്‍ട്ട് ആണ് നവാഗതനായ ആനന്ദ് ആകര്‍ഷി സംവിധാനം ചെയ്ത ആട്ടത്തില്‍ കേന്ദ്രകഥാപാത്രത്തെ അവതരിപ്പിക്കുന്നത്.
നോണ്‍ ഫീച്ചര്‍ വിഭാഗത്തില്‍ മലയാളത്തില്‍നിന്ന് ശ്രീ രുദ്രവും പനോരമയിലുണ്ട്.മാളികപ്പുറം, കാതല്‍,2018, ന്നാ താൻ കേസ് കൊട്, ഇരട്ട, പൂക്കാലം എന്നീ സിനിമകള്‍ പനോരമയിലുണ്ട്. വാക്സിൻ വാര്‍, കാന്താര, വിടുതൈല ഒന്നാംഭാഗം എന്നിവയും പനോരമയില്‍ ഉള്‍പ്പെട്ടിട്ടുണ്ട്.ദ കേരള സ്റ്റോറിക്ക് പുറമേ പൊന്നിയിൻ സെല്‍വൻ രണ്ടാം ഭാഗം അടക്കം അഞ്ച് സിനിമകൾ മുഖ്യധാര വിഭാഗത്തിലുണ്ട്. ആനന്ദ ജ്യോതി സംവിധാനം ചെയ്ത മലയാള ചിത്രം ശ്രീ രുദ്രം ഉള്‍പ്പെടെ 20 ചിത്രങ്ങളാണ് നോണ്‍ ഫീച്ചര്‍ വിഭാഗത്തില്‍ പനോരമയിലുള്ളത്. 28 വരെയാണ് മേള നടക്കുന്നത്