തിരുവനന്തപുരം: കൂണിന്റെ വ്യാവസായികാടിസ്ഥാനത്തിലുള്ള ഉത്പാദനത്തിന് പദ്ധതിയുമായി കൃഷി വകുപ്പ്. സംസ്ഥാനത്ത് 100 കൂൺ ഗ്രാമങ്ങൾ ഒരുക്കാനാണ് പദ്ധതി. ഹോർട്ടികൾച്ചർ മിഷന്റെ നേതൃത്വത്തിൽ ഓരോ ജില്ലയിലും 5- 8 വരെ കൂൺഗ്രാമങ്ങളാണ് ആരംഭിക്കുന്നത്.
68.1 കോടി രൂപ പദ്ധതി ചെലവ് കണക്കാക്കിയുള്ള 100 കൂൺ വില്ലേജുകളാണ് ലക്ഷ്യമിടുന്നത്. രാഷ്ട്രീയ കൃഷി വികാസ് യോജനയുടെ സാമ്പത്തിക സഹായമാണ് ഇതിൽ 30.25 കോടി രൂപ. ചെറിയ യൂണിറ്റുകൾ ഉത്പാദിപ്പിക്കുന്ന കൂണിന് വേണ്ടത്ര മാർക്കറ്റ് ലഭിക്കാത്ത സാഹചര്യത്തിൽ, കൂൺ കൃഷിയുടെ സമഗ്ര വികസനത്തിനുവേണ്ടി ഉത്പാദനം മുതൽ വിപണനം വരെയുള്ള കാര്യങ്ങൾ കോർത്തിണക്കി സമഗ്രമായ പ്രോജക്ടാണ് തയ്യാറാക്കിയിട്ടുള്ളത്.
ഒരു ബ്ലോക്ക് പഞ്ചായത്തിന് കീഴിൽ രണ്ടോ മൂന്നോ പഞ്ചായത്തുകളെ ചേർത്തുള്ള കൂൺ ഗ്രാമത്തിൽ ചെറുതും വലുതുമായ ഉത്പാദക യൂണിറ്റുകളും പ്രോസസിംഗ്, മൂല്യവർദ്ധന മാർക്കറ്റിംഗ് വരെയുള്ള കാര്യങ്ങളും ഉൾപ്പെടുന്നതാണ്.