തിരുവനന്തപുരം: ഓണത്തിന് ഉച്ചഭക്ഷണ പദ്ധതിയിലുൾപ്പെട്ട സ്കൂൾ കുട്ടികൾക്ക് അഞ്ചു കിലോഗ്രാം വീതം സൗജന്യ അരി വിതരണം ചെയ്യാൻ പൊതുവിദ്യാഭ്യാസ വകുപ്പ്. അരി വിതരണം ചെയ്യാനുള്ള അനുമതി പൊതുവിദ്യാഭ്യാസ ഡയറക്ടർക്ക് നൽകി. കേരള സ്റ്റേറ്റ് സിവിൽ സപ്ലൈസ് കോർപറേഷന്റെ കൈവശം സ്റ്റോക്കുള്ള അരിയിൽ നിന്നാണ് അരിവിതരണം നടത്തുക.
29.5 ലക്ഷം കുട്ടികളാണ് ഗുണഭോക്താക്കൾ.. സപ്ലൈകോ തന്നെ അരി സ്കൂളുകളിൽ നേരിട്ട് എത്തിച്ചുനൽകും. അരി വിതരണം ഓഗസ്റ്റ് 24-നകം പൂർത്തിയാക്കാനുള്ള നിർദേശമാണ് സപ്ലൈക്കോയ്ക്ക് നൽകിയിരിക്കുന്നതെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി അറിയിച്ചു.