ന്യൂഡൽഹി : പ്രധാനമന്ത്രി നരേന്ദ്ര മോദിയുടെ ചിത്രവും സന്ദേശവും വളം ചാക്കുകളിൽ നൽകാൻ നിർദ്ദേശം നൽകി കേന്ദ്ര സർക്കാർ. വളം ചാക്കുകളിൽ ഉപയോഗിക്കാൻ പുതിയ ഡിസൈൻ നിർമിച്ചതായും ഇതിനോടൊപ്പം രാസവളങ്ങളുടെ ഉപയോഗം കുറയ്ക്കണമെന്ന പ്രധാമന്ത്രിയുടെ സന്ദേശം ഉൾപ്പെടുത്തണമെന്നും ആവശ്യപ്പെട്ടുകൊണ്ടാണ് കേന്ദ്രരാസവള മന്ത്രാലയം വിവിധ വളം നിർമാണ കമ്പനികളുടെ എം ഡിക്ക് കത്തയച്ചത്.
‘വൺ നേഷൻ, വൺ ഫെർട്ടിലൈസേഴ്സ് ‘ എന്ന വളങ്ങൾക്ക് ‘ഭാരത്’ എന്ന ഒറ്റ ബ്രാൻഡ് നെയിം നൽകുന്ന പദ്ധതി നടപ്പാക്കാൻ നേരത്തെ കേന്ദ്ര സർക്കാർ തീരുമാനിച്ചിരുന്നു. സബ്‌സിഡി പദ്ധതിയായ പ്രധാനമന്ത്രി ഭാരതീയ ജൻഉർവരക് പരിയോജനയുടെ ലോഗോയ്ക്ക് കീഴിലായിരിക്കും ഇനി മുതൽ എല്ലാ വളങ്ങളും പുറത്തിറങ്ങുന്നത്.
കത്തിനൊപ്പം കമ്പനികൾക്ക് വളങ്ങളുടെ ചാക്കിൽ ഉപയോഗിക്കാനുള്ള മന്ത്രാലയം അംഗീകരിച്ച അന്തിമ ഡിസൈനും നൽകിയിട്ടുണ്ട്. രാസവളങ്ങളുടെ ഉപയോഗം കുറച്ച് ഭൂമിയെ സംരക്ഷിക്കണമെന്നാണ് ഹിന്ദിയിലുള്ള സന്ദേശത്തിൽ ആവശ്യപ്പെടുന്നത്. പുതിയ ഡിസൈൻ നൽകിയിട്ടുള്ള ചാക്കുകൾ വേഗം തന്നെ പുറത്തിറക്കണമെന്നാണ് കേന്ദ്രം ആവശ്യപ്പെടുന്നത്.