കൊച്ചി: നടൻ മോഹൻലാലിന്റെ മൊഴിയെടുത്ത് ആദായ നികുതി വകുപ്പ്. മോഹൻലാലിന്റെ സാമ്പത്തിക ഇടപാടുകളുടെ വിശദാംശങ്ങൾ അധികൃതർ തേടിയതായാണ് റിപ്പോർട്ട്. രണ്ട് മാസം മുമ്പ് നടത്തിയ റെയ്ഡിന്റെ ഭാഗമായാണ് ആദായ നികുതി വകുപ്പ് മോഹൻലാലിന്റെ മൊഴി രേഖപ്പെടുത്തിയതെന്ന് ആദായ നികുതി വകുപ്പ് വ്യക്തമാക്കി. മലയാള സിനിമാ മേഖലയിലെ ചില പ്രമുഖ താരങ്ങളുടെ വിദേശ ബാങ്ക് അക്കൗണ്ടുകളും ഇടപാടുകളും സംബന്ധിച്ച രേഖകൾ ആദായ നികുതി വകുപ്പ് പരിശോധിക്കുന്നുണ്ടെന്ന വിവരങ്ങളും പുറത്തു വരുന്നുണ്ട്.
മോഹൻലാലിൽ നിന്ന് ചില സാമ്പത്തിക കാര്യങ്ങളിൽ ആദായ നികുതി വകുപ്പ് വ്യക്തത തേടുകയും ചെയ്തു. നേരത്തെ ആദായ നികുതി വകുപ്പ് നിർമാതാവ് ആന്റണി പെരുമ്പാവൂരിന്റെ മൊഴിയും രേഖപ്പെടുത്തിയിരുന്നു. ഇതിൽ മോഹൻലാലുമായി ബന്ധപ്പെട്ട സാമ്പത്തിക ഇടപാടുകൾ കൂടി ഉണ്ടായിരുന്നു. ഇക്കാര്യത്തിലും മോഹൻലാലിൽ നിന്ന് വിശദീകരണം തേടിയതായാണ് റിപ്പോർട്ട്.